الشعبية نجمة تزين سماء مدينة الخرطوم بحري

Quote: ليتك لم تسكت يامنير ( سيزر ) وياليتني قابلتك في معسكر كورة ولا داخلية جامعة ولا ليالي سمر الشعبية وانت كل ما تكتب تذّكرني الاديب الروسي (بوشكين ) الذي يعد من اعظم شعراء الروس وللاسف لم يعش طويلا ولكنه رغم ذلك ترك اثار أدبية عظيمة لدرجة أن قراءه تخيلوا انه عاش كثيرا وكان متأثر في كتاباته (ببيرون وشكسبير ) ومن حاجاته الممتعة (اسير القوقاز) وفي الاصل ترجع جذورة الى افريقيا ويا جماعة انتوا معاي ممكن نقول منير والشيخ سيد احمد ودكتور قناوي امتداد لهذا العملاق الروسي الافريقي الاصل . وشوفوا البساطة هنا . كتب منير وجري الزمن وتباعدت مسافاتنا من جذورنا ـ والواحد بقي يخلي أخوانه الصغار أو أولاد جيرانه شفع صغار ـ يقوم يجي بعد سنتين يلقاهم في سن المراهقة ـ يجيهم بعد سنتين يلقي شنباتهم تكتف الزول وبقوا للعرس ـ تجي بعد شوية تلقي الشفع يضايروا في شيبهم جلحاتهم وصلعاتهم و..و آناس قولوا للزمن ده وقف شوية ، خلينا نشيل نفسنا شوية .. و.. أمسكوني ما تفكوني .. أقوم انبهل ليكم هنا ده .. أمابالنسبة للطمبور فالحمد لله نحن رغم أننا نشأنا في الشعبية شمال وقبلها في الشعبية جنوب ـ في شارع ناس النجم المحبوب عزالدين الصبابي ـ إلا إننا كنا في طفولتنا نسافر كل إجازة صيف للبلد ـ وطبعآ تشبعنا بغبار قطر كريمة وركوب اللواري للبلد وحضرنا مواسم حش التمر المزدحمة بالأعراس والصفقة والدليب والطمبور ، ومن ديك الواحد أحب الطمبور زي حبه للقراصة والدمعة وريحة التراب والجالوص والزبالة والبراسيم وهبهبة جريد النخيل وقوقاي القماري وموية الجداول و..و.. تسلسلت المناظر ولو استرسلت أكثر لما توقفت ولقلتم ليته سكت ..) ليتك لم تسكت ولم توقف الكتابة وليتك تواصل ، كما ندعوا اخونا الشيخ سيد احمد ودكتور قناوي وانتم اهل الكتابة ومواعيدنا معاكم قربت وخلونا نشبع هوايتنا وهي القراءة فقط .