|
عاوز لى موبايل قنبلة !!
|
قنبله يعنى قنبله يعنى بنفجر عديل كده ! ياخ معقول ؟ يجيك زول فى المكتب .. تسلم عليهو وتجرى ليهو اللازم وتكرمو وتقريهو الجرايد كلها رياضية وسياسية ! بعد ده كلو .. تلفونك يضرب يخلى كل شئ ويفتح خشمو ويعاين ليك زى الداير يعطس ! إتكلمت مع البوليس فى موضوع يخص الأولاد ورسوم المدارس .. طوالى إستلم الموضوع والله الرسوم دى مفروض الرئيس يكون عندو فيها رأى قاطع ... الرئيس طوالى يا عمك ؟؟ ما نشوف النائب فى الأول !! ضرب لى واحد يعزينى فى خالتى .. وبعد إنتهيت من المكالمة طوالى صاحبك بى طول حسو الفاااتحة لمن خلعنى ! أها بعد داك شلت الفاتحه مع طلطاشر نفر كده ! ضربت لى أمى قالت عاوزة تمشى الحاج يوسف لأختها عشه ! إقترحت عليها نمشى يوم الخميس ! صدقوا الزول ده نط لى فى حلقى وقال لى الجمعة أحسن !!! الشوارع بتكون فااااضية ، عليك الله فى زول فاضى زيك ؟ وبين هذا وذاك كل مرة يسألنى من خبر منشور فى الجريدة ! صحى البتين ديل مرقوا من يوم العيد لغاية هسى ما لقوهن ؟؟ أطنش من سؤالو يشبكنى ليك : آ آ آ آ صحى ما لقوهم آ آ آ ؟؟ وتعليقات مختارة من الجرايد .. ياخ والله وزير الماليه ده ببالغ عديل كده ! برضو أطنش ! معقول يا جماعة..؟ بالله صلاح إدريس ده جنّ ولّ شنو ! أستمر أنا فى الطناش ، ويفاجئنى بالسؤال : عليك الله ما عندك شاحن إبره ؟؟ الإبره التقدد عيونك .. الزول ده البحلنى منو شنو يا جماعة !! تلفونى يضرب تانى .. وتانى يعاين لى ويعاين للتلفون وانا المرة دى قررت ما أرد.. حتى لو ضارب لى وارغو زاتو !! أها صاحبك بقى يعاين لى ويعاين للموبايل والشمار كاتلو.. فى النهاية قال لى ما ترد على الزول ده إمكن فى حاجة مهمة ! قلت ليهو هاك رد إنت ... و بووووووووم !!!
|
|
|
|
|
|
|
العنوان |
الكاتب |
Date |
عاوز لى موبايل قنبلة !! | صلاح أبودية | 09-22-10, 11:13 AM |
Re: عاوز لى موبايل قنبلة !! | omer osman | 09-22-10, 11:18 AM |
Re: عاوز لى موبايل قنبلة !! | صلاح أبودية | 09-22-10, 11:55 AM |
Re: عاوز لى موبايل قنبلة !! | omer osman | 09-22-10, 12:20 PM |
Re: عاوز لى موبايل قنبلة !! | الفاضل يسن عثمان | 09-22-10, 11:26 AM |
Re: عاوز لى موبايل قنبلة !! | صلاح أبودية | 09-22-10, 12:58 PM |
Re: عاوز لى موبايل قنبلة !! | جمال محمود | 09-22-10, 07:36 PM |
Re: عاوز لى موبايل قنبلة !! | SHIBKA | 09-22-10, 09:05 PM |
Re: عاوز لى موبايل قنبلة !! | صلاح أبودية | 09-26-10, 08:46 AM |
Re: عاوز لى موبايل قنبلة !! | SHIBKA | 09-26-10, 09:26 AM |
Re: عاوز لى موبايل قنبلة !! | صلاح أبودية | 09-23-10, 09:14 PM |
Re: عاوز لى موبايل قنبلة !! | cantona_1 | 09-23-10, 11:01 PM |
|
|
|