|
|
 Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
شوفي يا إيمان أسمعي كلام واحد في عمر أبوكي ومغترب من ثلاثة عقود .. والله كل الإتكلمت عنهم ديل نصابين درجة أولى ما يعجبك الكلام الحلو المعسول.. ديل عاوزين كل شيء على الجاهز .. وبعين تروح السكرة وتجي الفكرة وتقولي يا ريت البقى ما حصل .. كنتي في الأول تكتبي ليهم وتقولي بت فقيرة متعلمة ذات أصل طيب مقبولة الجمال .. تعمل براتب متواضع .. تقيم في الوطن وتبحث عن شاب ليتقدم لها للزواج .. وكنتي شفتي ردة الفعل شنو؟ .. والله اليومين دي بنشوف نماذج من الشباب عاوز يصل بأي شكل ولا يهم كرامته ولا رجولته.. ولما تتكلم معاه يقول عليك إنت دقة قديمة!!!.. شوفي يا بتي العاوزك لذاتك وعلمك وثقافتك وتوافقتي معاه عاطفياً ومتكافيء معك مادياً وغجتماعياً وذو أخلاق ودين فمبروك.. لكن يا بتي أولاد ...م وخلو لأولاد الحلال فرصة؟!! الواحد بقى يتشكك في كل حاجة!!
والله يا بتي لو وقعت في واحد من سيل النصابين والكذابين ديل يبيعك الوراك والقدامك وهو في دواخله بعاين ليك من ( تحت لتحت بقعر عينو ويكتم ضحكتو ولسان حالو يقول كما قال شرحبيل : يا بكرة تندم وأنا حالك بشوفو!! أو قول عادل إمام( بكرة تندم يا جميل)!!
الله يستر بناتنا من شباب هذه الأيام!!
| |
 
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: فيصل نوبي)
|
يا إيمان ،، خليك من شفع المدارس ديل ركزي على رجال النسوان ،، خبرة طويلة في كل شيئ من غسيل العدة لي غاية غسيل الكرعين ،، ما سمعتي الاغنية البتقول
بابا بيغسل العدة
أمي قالت ليك جيب معاك دكوة واغشا الغسال اتناول المكوة
بس لعلمك أسعارهم غالية لكن سعرهم فيهم يعني ممكن تلقي فيهو خلو رجل من صاحباتك لمن يجو ويشاهدو بأم أعينهم مدى الاخلاص والجودة في الاداء. فأوصيك برجال النساء خيرا ولو رغبتي عندي ليك قائمة طويلة عريضة حسب المواصفات المطلوبة فقط اتصلي على www.rajilmara.bom
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
Quote: اها قمت مشيت سوق باب شريف وماخليت شئ، خمج شديد، اشتريت شيلة العريس من جلاليب وعراريق وطواقي للعريس وون مان شو الهلال رشو ولي الافترشيف وأمواس ومعجون الحلاقة جبتهم.
ضربت لي ابوي وقلت ليه اها انا جاهزة انت لقيت العريس؟ |
عاد يا ايمان اتلومتى مشيتى لباب شريف واشتريتى الحاجات دى كلها ومالاقاكى عريس هناك ..
ماراقدين بالكوم الببيعو الطواقى والعمم زى الببيعو عندنا الجرايد هنا بالله عليك الله ما كتر الا هم
من هناك كان احسن ليك جاهز ومابيكلفك حق التظكرة
حق التظكرة دة ممكن تفتحى ليهو كشك بيهو بدل الشحططة فى شوارع باب شريف
بعدين تعالى هنا انتى عاوزة تطمعيهم فينا ولا شنو
هم كدى ما مريحننا الواحد يقول ليك عاوزة شغاله عشان تساعدنى
وتلقيهو منشن عليها تصرف عليهو مش تساعدو
اولاد اخر زمن..
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
Quote: بعدين تعالى هنا انتى عاوزة تطمعيهم فينا ولا شنو
هم كدى ما مريحننا الواحد يقول ليك عاوزة شغاله عشان تساعدنى
وتلقيهو منشن عليها تصرف عليهو مش تساعدو
اولاد اخر زمن.. |
قشور نجود غير فلاحتك دى شى مبورك مافى.. خلى البت تكثف من الاعلان عشان الباقيات
الصالحات يتلحلحوا...باقى انا قدمت ليها طلبى فوق كان الله يهديها على،،،[/B]
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: المسافر)
|
غايتو جنس محن !!!
ياأيمان
انا جايايكى اقول ليكى لو بتنتظرى ود اخوى كم سنه كده بكلمو ليكى, هو عمرو 11 سنه وامه انجليزيه وابوهو سودانى, الواد ده مامقتنع ابدا بحكايه يجيب للمرا الشيله والحاجات ده ويصرف عليها بعد الزواج, قال لى هى ما تجيب
لى الحاجات ده أشمعنى انا بس الاجيبها, وأشمعنى انا الاصرف عليها بعد الزواج?
قلت ليهو ما ينفع الدين قال الرجل هو المسئول عن المراه, قال لى طيب هى دورها شنو? قلت ليهو هى دورها تـطيعك ودورها البيت وتربيه الاطفال, قال لى بس? قال لى انا ماعندى مانع اعمل الحاجات ده وهى التصرف وتجيب لى الحاجات, طبعا أتصدمت وقلت ده عشان ماسودانى مائه فى المائه يمكن بقول كده وقلت لانو مامشى السودان الا مرات قليله, المهم فى النهايه وافق على مضض, بس اوفر زى ده حيعجبو جدا ويخليهو يمسك فيكى تمام, بس حقيقى اندهشت فى سودانيين 100% واتولدو وعاشو فى السودان ماعندهم برضو مانع انو المره تصرف عليهم ويقوموا بدور المرأه وده كلو عشان الحاجات الجاهزه
شفتى المحن ده يا القلب النابض? كان كده اخير لينا أنجليز عديلللللل من البشتنه ده يا بتى
وفى امان الله
لا اله الا الله
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
الاخت ايمان
السلام عليكم ورحمة الله تعالى وبركاته
ايه رايك انا عاوزة اخطبك لزوجى وتبقى انت التانية والله راجل هدى ورضى
يعجبك بالوا طويل بس انت دقى ليه تلفون عشان تقنعيه وما تنسى تعدلى الشيلة
بتاعتك تختى شوية حاجات لمراة الراجل (انا) وعشان اكون معاك واضحة الراجل
رجل اعمال وانا تعبت من السفر والسك وراه والشفع والمدارس وحاجات كتيرة
عاوزه لى زول يهتم بيه عشان انا بريده وكمان بريدالبريدوا يا ست البنات
قلتى شنو؟؟؟؟؟؟؟؟؟؟؟؟؟؟؟؟؟؟؟
انتصار
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
الأخت الكريمة إيمان
تحياتي
مرحب بك إضافة واضح أنها ستكون نوعية للمنبر
معالجة رائعة لواقع محير نتخيره ونأتي بعد زمان نتأفف منه ونشكوه لطوب الأرض .
يراودني إحساس أن البوست ذهب لغير الوجهة التي رغبت . ربما ساهم في ذلك توقفك .
خارج النص
شلت ليك هم ليس من عدد العرسان الذين قدموا أوراق ترشيحهم ، لكن من عدد الردود التي
تنتظرك . ( وكمان داخلين على وييك إند )
| |
|
|
|
|
|
|
|
|
 Re: اها ياجماعة انا مغتربة ولميت القروش وجاهزة للعرس (Re: عاطف عمر)
|
عاطف
سلام
وتسلم على الجية والكلمة الحلوة
البوست ماذهب لغير وجهته التي رغبتها
بس الناس كتار
والزحمة اصلها بتعمل لخبطة زي دي
بس الدايرة اقوله بقوله
ومافي شئ بيمنعني
ومعليش تقول شنو؟
الوقفة سببها الظروف
وصحي الردود شيلتني هم
حالتي قلت اقرا باقي البوستات
لي هسه مالقيت فرصة في بوست تاني
الله يهون
ايمان
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
ايمان....
تمي عليك النبي ... عشان اذا القصة دي نجحت اكلم علوية...
حكم علوية ..لي روب الحمام جهزتو ليهو...
و حالفه يمين الشيلة تمشي لي اهل العريس بلهينو...
ومع العلم الهينو ذاتو انكلودد...
يا طويلة العمر... قصة العرس بلصور دي كانت زمان ...
زمن كان حسن الظن يغلب علي عامة الناس...
زمن.. وت يو قت اذ وت يو سي...
حسي كن ما قعد معاها و فلفلها تفلفل و عرف اصل سبيبة شعرها تركي ولا من جنوب الصحراء ... باب بيتم ما بشوفو...
تمي... تمي.. الله يهديكي بس..
يوسسف... يوسسف... اجري نادي علوية... قوم تقوم قيامتك ...
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: ShiningStar)
|
| Quote: شفتى المحن ده يا القلب النابض? كان كده اخير لينا أنجليز عديلللللل من البشتنه ده يا بتى |
بري بري بري بررررررررررررري
وبرية يا بت الاحفاد
الخواجات ديل آ بدورن عارفة ليه
اولا: كان اتشاكلت معاه ما بقدر اقول ليه الخيل تجقلب والشكر لي حماد.
ثاناً: يجي يقول لي الفواتير بالنص , انت فاتورة الموية وانا فاتورة الكهربا , وانت فاتورة التلفون وانا فاتورة النت, وانت فاتورة التلفزيون(التلفزيون بقروش هنا ما ساي)
وانا المابعفوا داك .
انا الايجار وانت ضرائب الايجار والعتب.
يحكها معاي كدة لمن اعصابك يبوظ , دي ما تربته عاد ما بتقدري تقولي ليه لا ولا كاني ولا ماني. دا مفتح شديد.
اخير سوداني ود بلد, كان قلت ليه ما دايرة اشيغل دايرة اتفرغ للعيال يفرح... ويشيل همي واشيل همو...
فاهمني وفاهماه
ناكل قراصتنا وعصيدتناونحمد سيدنا
ولا ماكدي يابت الاحفاد
ولا شنو يا جماعة
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: saadeldin abdelrahman)
|
Quote: قرعتي والله ملقيها
القلب شيلتها القناعة و القيم النبيله والأصاله
بتقدرن علي كدي انتي ونسمة وبت الأحفاد?
البتقدر فيكن تديني رقم ابوها فى المسنجر
وكان ما عندكن قدره عاد خلو قلبي ده يدق |
يا سعدالدين ياخوى
الكلام ده القالو منو?
Quote: بت الأحفاد خيتي
ويييينا البشتنه هسه?
وبعدين الخواجيات كملن عشان نتبشتن ليكن احنا ?
كان نتبشتن ما عارف |
ولا كلام الليل بياخدو النهار 
عموما هو ما كيس خضار, يابت الاحفاد يا أيمان يانسمه
على وزن يابطاطس ياملوخيه يا باميه
البدورنا ده لاذم يكون محدد هدفه من البدايه عايز مين بالضبط
وفى ى شروط معينه لاذم يوافق عليها
ويرسل صوره من الCV مع كفرينج ليتر
وخت فى بالك انو ماحأشارك مع الراجل ولو بملايه
يعنى اوفر ايمان ده ماتحلم بيهو ابدا
مش لانى بخيله
لكن لانى مقتنعه ان الرجل والمرأه كل واحد عندو دور محدد الربنا فطرنا عليهو
لو حاولنا نغيروا الحال بينقلب
اها نواصل فى الشروط ولا يفتح الله?
وفى امان الله
لا اله الا الله
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: bint_alahfad)
|
Quote: عموما هو ما كيس خضار, يابت الاحفاد يا أيمان يانسمه
على وزن يابطاطس ياملوخيه يا باميه
البدورنا ده لاذم يكون محدد هدفه من البدايه عايز مين بالضبط
وفى ى شروط معينه لاذم يوافق عليها
ويرسل صوره من الCV مع كفرينج ليتر
|
بنت الأحفاد الجاده
احترامي
ما بطاطس ولا بطيخ
لكن القلب فااااااااهمه بس
ولمن لميتكن كدي ما حقاره مني لكن على وزن الجاهزة تقول خير
واحنا ناس عرس بالحيل.
اها هسه كان حددنا وقصدتك انتي
ومهرك يكون حجه بتقبلي وللا كلامك كلو فصاحه ساااي
CV!
?ليييييه مقدم اوراقي لقنقليسةرايس?
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: Kostawi)
|
Quote: بري بري بري بررررررررررررري
وبرية يا بت الاحفاد
الخواجات ديل آ بدورن عارفة ليه
اولا: كان اتشاكلت معاه ما بقدر اقول ليه الخيل تجقلب والشكر لي حماد |
انا زاتى مابعرف تجقلب معناها شنو ولا حماد ده منو عشان كده ماعندى مشكله فى
كده
Quote: ثاناً: يجي يقول لي الفواتير بالنص , انت فاتورة الموية وانا فاتورة الكهربا , وانت فاتورة التلفون وانا فاتورة النت, وانت فاتورة التلفزيون(التلفزيون بقروش هنا ما ساي)
وانا المابعفوا داك .
انا الايجار وانت ضرائب الايجار والعتب.
يحكها معاي كدة لمن اعصابك يبوظ , دي ما تربته عاد ما بتقدري تقولي ليه لا ولا كاني ولا ماني. دا مفتح شديد.
اخير سوداني ود بلد, كان قلت ليه ما دايرة اشيغل دايرة اتفرغ للعيال يفرح... ويشيل همي واشيل همو... |
أخير نص نص ولا اخير انتى تقومى بكل شئ من شيله وجهاذ وصرف الخ....
على الاقل بدل ما أسمع ' ياوليه وينو الملاح'
حيقول لى ' What do u wanna eat my baby?'
وبدل ما يكون ماشى قدام وانا فى نهايه الشارع جاريه عشان الحقو
حيكون ماسك يدى وماشين مع بعض
| Quote: ولا ماكدي يابت الاحفاد |
بعد القريتو فى البوست ده
ماكده
ماكده
ماكده 
وفى امان الله
لا اله الا الله
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
Quote: بنت الاحفاد
شايفاك خاتة عينك على خواجة
كان كدي عرسي ود خالتك النص نص داك |
سلامه نظرك يا أيمان
الجاب سيره ود خالتى منو? أنا قلت ولد أخوى الامو خواجيه, ولد أخوىىىىىىى
ما ود خالتى فهمتى يا عسوله? آها بس ود أخوى أتزوجو كيفن?
بعدين بينى وبينك انا كنت ماببدل السودانى بأنجليذى ولا غيرو وكنت بقول السودانى ذيو مافى, لكن بعد البوست ده بقيت أشوفهم عشره عشره
فتك بعافيه
وفى امان الله
لا اله الا الله
| |
|
|
|
|
|
|
|
|
 Re: اها ياجماعة انا مغتربة ولميت القروش وجاهزة للعرس (Re: bint_alahfad)
|
اها دي القصة كااااااااملة
أول شئ عملته بعدما كملت الجامعة فكرت في الإغتراب لأني عارفة وراي حاتكون هموم الحياة والعرس وتكوين اسرة وتربية عيال، اها جيت السعودية واشتغلت شغل السواد وجريت جري الوحوش ولميت الريالات وحسع مستعدة للعرس.
رسلت لي ابوي يجهز العريس وقال لي اصلو دي مامشلكة يابتي عشان الاولاد راقدين ومالاقيين عروس تمرقهم من هموم الدنيا بس انتي جهزي شيلة العريس، اها قمت مشيت سوق باب شريف وماخليت شئ، خمج شديد، اشتريت شيلة العريس من جلاليب وعراريق وطواقي للعريس وون مان شو الهلال رشو ولي الافترشيف وأمواس ومعجون الحلاقة جبتهم.
ضربت لي ابوي وقلت ليه اها انا جاهزة انت لقيت العريس؟ قال لي انتي كان جيتي ومشيتي ليك عرس وااااحد بس بتلقي ليك عريس ود ناس ومؤدب ومستور، قلت ليه يابوي انا مابقدر اجي انتو شوفوا الولد وكان لقيتوه رسلوا لي الصور وانا كان عجبني بديكم رايي وانتو تعقدوا من هناك وترسلوه لي وانا في المطار بعرفه بالصور.
اها رسلوا لي صور لي كم ولد من اولاد الحلة ورشحوهم لي قالوا اولاد ناس ومن الجامعة للبيت ومن البيت للجامعة وهديين ورضيين ويومهم كله في المطبخ بيساعدوا في ابواتهم ومابيمرقوا من البيت الا مع اهلهم، المهم لقيت الأولاد صورهم حلوة ولابسين لبس حشمة فاخترت منهم اتنين وقلت لي اهلي اسالوا من اهلهم ولو عاوزين يكملوا قرايتهم قبل العرس وكده.
قالوا واحد من الاولاد قال ماعندو مشكلة موافق على العرس وممكن يواصل الدراسة وهو عريس، وانا قلت ليهم انا مابتوقف في الموضوع دا وبديه كامل حريته عشان يواصل دراسته ولو جبنا اطفال بساعده في تربيتهم وفي شغل البيت من طبيخ وغسيل عدة لحدي مايكمل دراسته رغم ظروف الشغل هنا دوامين وجري وبجي البيت هلكانة.
المهم ادوني تلفون اهل الولد قالوا عشان اتعرف بيه وفعلاً اتصلت بوالدته ووالده وسلمت عليهم وقلت ليهم عاوزة اتكلم معاه لو ممكن، قالوا لي والله يابتي نحن مابنحبذ المسألة دي خالص لكن انتي بت ناس واهلك ناس سيرتهم سيرة محترمة فبنديك تتعرفي بيه .
انا طبعاً لقيت الولد ده سمح شديد في الصورة وقلت اركز عليه هو عشان ده اهم شئ طبعاً، عشان مااجيب لي راجل يضحك فوقي الناس ويقولوا بعد فصاحتها دي كلها وفلسفتها دي مشت عرست ليها راجل وشو ينعل قفاه، فقلت اشوف طريقة كلامه واسلوبه عشان مايكون كمان تور الله الانطح ويضحك فوقي الناس.
اتكلمت معاه وانا شايلة صورته واعاين لي سماحته واقول ليه في الكلام السمح واغازل فيه، صوتك حلو، عيونك جميلة، انا من زمان بحلم براجل سمح زيك كده، وهو همه كله في القراية ويسأل فيني، انتي متأكدة موضوع اني اكمل دراستي دا مامشكلة بالنسبة ليك؟ وانا طبعاً بيني وبينكم ناوية ليه على نية، قراية شنو كمان البيكملها؟ انا بس قلت اتم الموضوع باي شكل ولما يصلني هنا بعرف امشيه على مزاجي زي ماكل النسوان بيعملن.
قلت ليه بالعكس، انا من انصار انه الولد يكمل دراسته قبل الزواج وحتى لو اتزوج يكمل دراسته وعشان كده انا ذاتي حااساعدك واقيف جنبك بس انت اهم شئ هسه تقول لي رايك عشان انا مستعجلة شوية في موضوع العرس ده، واحتمال ينقلوني لمدينة تانية ووظيفة جديدة فعاوزاك تكون معاي عشان نختار عفش بيتنا وحاجاتنا كلها مع بعض، ولا انت رايك شنو؟
قال لي والله انا من حيث المبدا ماعندي مانع خصوصاً اني عرفت انك من عائلة كويسة ووظيفتك في السعودية محترمة وانك مع فكرة اكمال تعليم الرجل دي، وكمان عرفت انك جاهزة من كل النواحي واظن ده بيوفر علينا وقت طويل، فماعندي مانع.
قلت ليه خلاص انا بتكلم مع امك وابوك وبتصل باهلي برضو عشان يكملوا المسائل دي بسرعة عشان اقوم اعمل ليك اجراءات الاستقدام عشان بتاخد ليها زي شهرين تلاتة كدي وبتصل بيك عشان نتفق على التفاصيل، يلا اديني الوالدة اتكلم معاها، قال لي كويس واداني امه وسمعت صوته بيتكلم مع ابوه وبعد شوية سمعت صوت زغرودة من ابوه وفهمت انه فرح عشان ولده وافق.
المهم قلت لي امه تتصل بي امي عشان التفاصيل عشان انا مستعجلة، وقفلت منهم واتصلت بي ناس بيتنا وقلت ليهم شوفوا انا ماعاوزة جوطة وصرف في الفاضي انا برسل ليكم الشيلة دي وتشوفوا ليكم اي ولد من اولاد الحلة يغني في حفلة دكاكينية كده وتتموا الموضوع باي طريقة سريع سريع ولو حسيتوا انه اهل العريس عاوزين يبالغوا وروهم اني عندي كم زول اترشحوا لي واني مستعجلة.
وفعلاً اهل الولد طبعاً حسوا اني عروس لقطة وخافوا الولد يبور وسدوا دي بي طينة ودي بي عجينة ورضوا بالمقسوم وعقدوا في صمت وبدون صرف، رغم اني كنت سامعة من اخوي انه الولد كان بيحلم بجلابية زفاف وسيرة وزفة ورقيص عريس زي حق عمر البشير البيعملوا داك، لكن في النهاية رضى بالمقسوم واتوكل على الله وقال اخير اعرس ولا اقعد احلم واطير العروس خالص من يدي واقعد اندم زي اولاد كتيرين.
اها بعد مااتفقنا على التفاصيل والاهل رضوا بالمقسوم حددنا التواريخ للعقد وقلنا حفلة الدخلة ممكن نعملها في وقت تاني لمن الظروف تسمح. ورسلت ليهم توكيل من قنصليتنا في جدة بعدما سلوا روحي وحققوا معاي التقول مجرمة مازولة بدفع ضرائب وبطلب عمل شئ من ابسط حقوقي كمواطنة.
الجماعة في السودان عملوا العقد وبقيت عروس رسمي بس ماشعبي وسكيت موضوع الاستقدام عشان اجيبه السعودية، وطبعاً مع الجري الشديد والصرف والمشغوليات بقيت مابقدر اتصل كتير، اها هو بقى يتصل ويقول لي مالك انتي بقيتي مابتتصلي ومابتقولي لي كلام حلو زي الكنتي بتقوليه لي ايام التعارف؟ ومالك بقيتي مابتشتاقي لي؟ وقدر ماحاولت اشرح ليه الظروف كان بيقول لي برضو مهما كانت الظروف يعني اكيد بتلقي ليك خمسة دقايق تتصلي بي فيها.
اها انا بيجاي قمت فتشت لي شقة براي عشان كنت ساكنة مع مجموعة طبعاً ولقيت لي شقة من غرفة وصالة وحمدت الله عشان الايجارات هنا مرتفعة شوية لو البيوت كبيرة، ومشيت الحراج محل بيع اغلب الاشياء المستعملة اشتريت لي عفش معقول وفرشت البيت بما تيسر، وقلت اخلي عدة المطبخ لمن هو يجي عشان يختار براه الشئ البناسبه.
المهم مرت فترة الاستقدام وادوه الفيزا وقطعت ليه التذكرة بالخطوط السودانية ناقلنا الوطني لانها ارخص من الخطوط السعودية طبعاً وحجزت ليه واخيراً جات لحظة اللقاء المنتظر وشلت الصورة وحفظت تقاطيع وشه سممممممح ومشيت المطار، بقيت اعاين لوشوش القادمين زي الرايح لي شئ واقول بري ده ماهو ده ابيض وده اسود، ده طويل وده قصير، لغاية ماشفت الجلابية واللبسة بتاعة باب شريف المابتغباني وعرفته ده زولي.
رفعت ليه يدي من وسط الناس وشفته مسكين مع الخجل وشيل الشنطة كل شوية الشال يقع من كتفه ويخت الشنطة يقيف يرفعه في كتفه ويصلحه ويدنقر يجر الشنطة تاني، لمن وصلني وسالمني وسالمته وباركت ليه قلت ليه مبروك علي انت، ضحك بي خجل وقال لي الله يبارك فيك، ومرقنا من المطار وركبنا لينا ليموزين على قولة ناس السعودية واتجهنا على الشقة.
جينا البيت وبدينا اخيراً الحياة الزوجية الكاسرين الناس رقبتهم عشان يعيشوها، زارونا زميلاتنا في البيت وبعض السودانيين المعارف والجيران وباركوا لينا، ومشينا السوق اشتريت العدة للمطبخ والملايات واكياس المخدات والذي منه، وبدينا النقنقة من اول ايام في السوق يقول لي الحاجات دي ماسمحة وحاجات رخيصة وهايفة ساي ولو في مراده يشريني الحاجات الغالية السماها اصلية.
بعد اسبوع قعدة في البيت ولاحظوا انا ماعندي اجازة اها قمت نزلت الشغل وبقيت كل مااجي البيت من الشغل القاه بس قاعد يتبكى اها انا انخلع واقول الحصل شنو ياربي ولما اساله يقول لي مافي شئ ولما اقول ليه مافي شئ كيفن مالك بتبكي؟ يقعد يقول لي انا بس كنت متخيل نقعد مع بعض اكتر شوية قبل ماتنزلي الشغل، ومرات يقول هو بس عشان مافارق اهله خالص من صغير ومشتاق ليهم ومرات يقول حاسس اني بعيدة منه.
اها انا بقيت ازهج من جنس الدلع ده ومااستحمل كل يوم بكاء ودموع ودلع وقلة ادب وبقيت اقعد احاول افهمه اني ماعندي اجازة عشان اقعد معاه في البيت اكتر وانه الشغل هنا مابيرحم وانه مفروض يتبسط عشان انا قعدت معاه اسبوع كامل في البيت، وافهمه انه الحياة كده وانه مفروض يستحمل بعده من اهله ويتفرغ لحياته الزوجية، وافهمه برضو انه انا مابعيدة منه.
البيت بقى يزهج من النكد والموبايل كرهته من كترة اتصالاته بي والسؤال، اها جاية متين؟ ماممكن نطلع لما تجي راجعة البيت؟ ممكن تجيبي معاك الشئ الفلاني؟ المكيف ده فوقه مشكلة، الخ... كرهت حياتي من اول شهر وكرهت العرس القايلاه بيريح بالي، وبقيت اجي القاه بس ماسك التلفون، يابيتكلم مع واحد من ازواج السودانيات الهنا الدخلوا علينا وبقوا اصحاب متين مابعرف، ياالقاه ضرب لي اهله يتونس معاهم.
النصيحة انا زهجت من الدلع ده وفصلت تلفون البيت عشان الفواتير كمان ماتعمل لينا هم جديد، وطوالي سالني التلفون ده ماله كضم؟ وقلت اتكلم معاه عشان يفهم الظروف كان يخلي الدلع وعدم المسئولية ده شوية. اها قعدت معاه وقلت ليه التلفون مابنقدر على فواتيره عشان كدي انا قطعته وانه البلد دي مابلد ابوي واني جيت واغتربت عشان نصلح ظروفنا ونرجع بلدنا، وانه لازم يخلي الكلام الكتير في التلفون ده.
قعد يرمي في دميعاته ويقول لي دي ماحياة اصلها وانه بيصحى معاي الساعة خمسة الصباح وانه بعد ماامشي الشغل بيقوم ينضف البيت كله وده بياخد منه وقت طويل وبيغسل العدة والهدوم وبيبدا في عمل الغدا عشان عارفني برجع البيت زي الساعة اتنين وبمرق تاني لدوام المساء زي الساعة خمسة، وانه لما يخلص من الحاجات دي بيكون زهج من الوقفة طول اليوم ومافي زول ينضم معاه كلمة واحدة وقعدة البيت ليه براه بين اربعة حيطان قال حارة شديد عشان كده بيتكلم مرات في التلفون.
وقال ماهو البيضرب كل المرات وانه مرات راجل فلانة هو البيضرب ليه وبيتونسوا، وانه ماقاعد يضرب لي اهله الا مرة واااااحدة كل اسبوعين وبقينا في غلاط انا اقول ليه هسه انت يوم الجمعة الفات ماضربت ليهم وهو يقول لي ااااي لكن ده ماعشان ابوي كان راقد عيان وغلاط ونقة وكل مانتناقش يقول لي حسع انتي مالك بتكوركي فيني؟ والله بيني وبينكم كرهته وكرهت وشه وبقيت كان في طريقة البيت ذاته مااجيه بين الدوامين من عيشة النكد دي وعدم الفهم وعدم الاحساس ده.
اها بعد داك دورنا اسطوانة جديدة وانا قلت اكيد دي من راس راجل فلانة ، بقى يقول لي انتي قلتي انا ممكن اواصل دراستي وانا اقول ليه انا قدمت اوراقك وراجية الرد والناس ديل مابيردوا بالساهل اخير تصبر، اها بقى يقول لي خلاص طيب انا عاوز ذاتي اشوف لي شغل عشان قعدة البيت صعبة وعشان اساعدك انتي ذاتك. واريته ماقال الكلمة دي خلاني انفجر واطلع الحابساه جواي كله من زهجي منه.
قلت ليه والله ياها دي الفضلت انا اتعب اليوم كله في الشغل واجي البيت عشان اخت راسي وارتاح ساعتين واكل لي شئ قبل ماامرق تاني اها اجي كمان القاك انت شغال ولا بتقرا وسايب البيت لا نضافة لا اكل اصله هي القصة كان كدا انا معرساك ليه؟ اسمع ياراجل من الليلة تشيل من راسك فكرة الدراسة دي خالص وماعاوزاك تاني تقول لي عاوز تشتغل واهلك واصحابك ديل كان هم البيملوا ليك راسك بالافكار دي ذاتك تاني ماتتصل بيهم الا مرة في الشهر وقدامي.
اها من اللحظة الوريته فيها العين الحمراء كترت الدموع لكن بقى مابيقول لي اصله بيبكي ماله، بقى الكلام بيناتنا ذاتو بالقطارة وريحني بيني وبينكم من النقنقة ووجع الراس لكن كمان انا المسخرة وقلة الادب مابتنفع معاي كيفن يعني يقعد ساكت وكل ماسالته سؤال يرد علي من طرف نخرتو زي الانا خدامة عنده؟؟
اها اقروا الكلام ده واحكموا براكم على البقت علي انا القلت ارتاح بالعرس وانتظروا اكتب ليك الجزء الجاي وشوفوا جنس الظلم الاتظلمته.
اها بعد الكلام ده كله بقت اسطوانة داير اقرا اسطوانة يومية وانا زولةً عنيدة وعشان كدي اي زول راسه قوي وداير يمشي كلامه ورايه علي مابينفع معاي اصله فقفلت ليه كل الابواب دي وقلت ليه تاني لو قلت دراسة ماتلومني في اي تصرف. اها ضربت لي امه وقالت لي الولد ده قال في بيناتكم شوية عدم تفاهم يااولادي، والحياة دي محتاجة صبر وخصوصاً انتو في الغربة. قلت ليها شوفي ياحاجة لو ماعاوزاني اتلوم معاك ارجوك تاني ماتتدخلي في امور حياتنا الشخصية وزهجت منها وقفلت ليها الخط في وشها من الزهج.
اها اليوم داك ماخليته ينوم من الدروس الاديتها ليه عشان بيحكي بامور حياتنا للناس، وقال لي انا ماحكيت لي زول غير امي والسبب انك اصلك مابتسمعيني وانك زولة متسلطة وانا لو عارف حياتنا كده ماكنت اتزوجتك، وهسه نحن ناس متزوجين لينا شهور اصلك وقت مادايراني اكمل دراستي ولا رضيانة اشوف لي شغل ليه ماحصل قلتي لي دايرة اولاد ولا مادايرة. قلت ليه اصله موضوع الاولاد ده ماتتكلم فيه تاني، انا جيت هنا اكون نفسي ومامتفرغة هسه لصرف على اولاد ولا لتربية اولاد، بس والبكاء بدا.
طبعاً بعد ده بقى ده موضوعنا الجديد الاولاد والولادة وطوالي في لحظة زهج من النقة قلت ليه لو عاوز اولاد امشي الديهم انت براك، ومن اليوم داك بقينا لا انا لا هو طايقين وشوش بعض، وبقيت اقضي يومي كله بره ولما اجي البيت بس اقرا الجرايد، لامن يوم جيت البيت لقيته قال عاوز يرجع السودان وعاوز الطلاق وطوالي بدون ماافكر مشيت قطعت ليه تذكرة السفر للسودان الدايره ده وحجزت ليه وسفرته في ظرف ايام.
اها ولي حسع اهله يضربوا لي في التلفونات عشان نتم الاتفاق على موضوع الطلاق وبقيت مابرد عليهم ذاتي ومخلياه معلق ماعارف روحه لسع معرسني ولا طليقي ولا يسمي روحه شنو، وانا مافارقة معاي وقت اصله الموضوع بتاع العرس ده موضوع شراء وبيع اها لميت القروش تاني وحسع خلاص دايرة اشتري لي عريس جديد غيره.
يلا ياجماعة الحشاش يملا شبكته.
ايمان
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: ناذر محمد الخليفة)
|
نجود
الفي باب شريف ديك اسكتي خليهم ساي بقوا ياختي لابيفرزوا المرا من الراجل ولا الزول من الحيوان، مابيعرفوا شئ غير الريال، الواحد فيهم كان قلتي ليه الساعة كم؟ يقول ليك خمسة ريال ونص
والله يا إيمان شكيت فى قدراتك على الرغم من إنسجامها إلا عندك مساعد وناس الحراج البدلاء ديل أوعك توريهم وشك ...عليك الله يا إيمان إنتى فصل من كلية الأحفاد الجامعيه بدرس فى حاله والله شنو...عليك الله المره الجايه قولى إلا وزير....
منصور
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
Quote: بس ياهو ده الانا عارفاه
الزوغان بيحصل لما نجيب سيرة دارفور
وسيرة اللسان الماعربي
المهم والله زوغتك سرت بالي
اصلي انا جني وجن العنصرية
وبقال شفته في الصور خاااااطب
وخطيبته سماحة الدنيا عليها
امشي انت دق صدرك واخطب
وغني في عرسك لخطيبتك
ايمان |
ايمان انا لساني كويس جداً وبتكم عربي احسن من ناس ناذر
وبالجد جد انا خلاص بقيت عريس ليكي بس جيبي لي شنطة العرس
وجهزي الحجات بتاع العريس وتعالي لي انا جاهز ,,
انا خاطب بت سمحة بتقرأ معاي في الجامعة فضلوا لي ثلاثة
انتي الثانية كدة بيكون فضلوا لي اتنين بس
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: ابراهيم بقال سراج)
|
ابراهيم بقال اهلاً بيك
والله ياخوي عروبةً بيتشرفوا بيها دي ماظنيتها لي بيها غرض
وكان اللسان سوداني اسود احسن لي من مليون لسان ملون
وكدي النشوف راي خطيبتك شنو وقت انت ماعندك عوجة
عشان كان موافقة اشوف ليك انا الاتنين التانيات بالمرة واقفل البوست ده على كده ونعمل بدله بوست التهاني بعرسنا
اها قلت شنو؟
ايمان
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
Quote: ابراهيم بقال اهلاً بيك
والله ياخوي عروبةً بيتشرفوا بيها دي ماظنيتها لي بيها غرض
وكان اللسان سوداني اسود احسن لي من مليون لسان ملون
وكدي النشوف راي خطيبتك شنو وقت انت ماعندك عوجة
عشان كان موافقة اشوف ليك انا الاتنين التانيات بالمرة واقفل البوست ده على كده ونعمل بدله بوست التهاني بعرسنا
اها قلت شنو؟
ايمان |
خلاص اتفقنا يا ايمان ,, خطيبتي الاولي وانتي التانية ونشوف لي
اتنين تانيات ,, مبروك عليكي ومبروك علي ومبروك علي كل الزملاء
يالا يا شباب تعالوا اعملوا لينا تهاني الزواج
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: إيمان صالح)
|
Quote: صديق الموج
هسه انت مشيت اتعلمت نضافة الكمونية ولا لسع؟ وانتي كان دي طريقتك في مخاطبة النسوان بقشور دي كان كدي راجيك شغل كبير مع ال CV بتاعك
ايمان |
ايمونية(دى على وزن كمونية)سلام
ما تفهمينى غلط ..قشور دى بنقولها لى قطاعين الارزاق ناس نجود ديك لكن انت حا اقول ليك
يا ايمونتى..وبعدين ولايهمك حا انضفها حا انضفها وهسع انا بكتب ليك من السلخانة
دخلت ادفانس كورس بتخصص دقيق ام فتفت..فى اى اوامر اخرى؟؟
احلامك اوامر يا ايمونتى،،،
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: صديق الموج)
|
ايمان السمحة أزيك،
تعرفي عنوانك ده زكرني المغترب الجنو صطلي، أها في يوم كان بيسمع في برنامج ما يطلبه المستمعون ، وحسب السطلة قوم شيل التلفون وأضرب للبرنامج. أها المزيعة سألتو: هل عندك أي اهداء خاص للأغنية الجاية؟ قال ليها آآآي، بهديها للخطيبة بمناسبة المولود الجديد.
دنقس
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: Abdulgadir Dongos)
|
Quote: الليلة عاد يانزار ماسويتها شينة تب
تنشر كلام وماعارف اسياده يرضوا ولا لا
الله يستر جماعتك ديل مايكونوا في امريكا
هناك المحامين ناقصين شغلة |
والله يا ايمان انا اشفقت عليك من كثرة الردود وفي كل مرة نتداخل معاك
نعرقلك من باقي الفكرة الرئيسية المدهشة يا قول كتيرين معاي...
لكن بس حبيت اطمئنك انو الناس الكتبت عنهم سعيدين جدا بهذا المشروع
وان كان لديهم قضية فهي قطعا ضد المجتمع...لا انا لا انت...
وامشي في لمليم عراريقك وطواقيك...شال واحد ما يعترلك
| |
|
|
|
|
|
|
|
|
|
Re: اها ياجماعة انا مغتربة ولميت القروش وجاهزة للعرس (Re: صديق الموج)
|
Quote: أبو شيبة
جيت تاني؟
غايتو خفيف جنس خفة
ياراجل اتقل
جلاليب وعراريق تسوي فيك جنس الفعلة دي؟
موضوع رجال النسوان ده جاياه
اصبر لي انت بس
واتقل حبة
|
يا إيمان أتقل كيييييييف مع العروض المغرية دي ربنا يجعلنا من المختارين وليس من المحتارين ،، قولي آمييييييييييييييييييييييييييين
| |
|
|
|
|
|
|
| |
إيمان صالح
abuguta
فيصل نوبي
عبدالرحمن عبدالله أبوشيبة
صديق الموج
عاطف عبدالله
المسافر
bint_alahfad
saadeldin abdelrahman
اشرف السر
لؤى
انتصار محمد صالخ بشير
مريم بنت الحسين
عاطف عمر
الملك
القلب النابض
EMU إيمو
Kostawi
Emad Abdulla
osly2
ناذر محمد الخليفة
munswor almophtah
ابراهيم بقال سراج
mekki
فيس بوك
تويتر
انستقرام
يوتيوب
بنتيريست