كارثة إنتخابية .. كارثة حقيقية

Quote: بدر الدين اللذيذ ما بكتب للهولنديين , بكتب هنا عشان نعرف اولا و عشان نوعي كلنا بما يحدث في الغرب و نتبادل المعارف و تجارب بعضنا البعض و برضو عشان انبه الغافلين لي خطورة ما يحدث في هولندا .. اقترح عليك مبتدأ ان تمشي باقي ليلك ده تقوقل (تقوقي) في هولندا سياسيا منذ عام 2000 , عشان تفهم البوست ده , ده طبعا في حالة إنك إتخلصت من موجة اللذاذه الدّخلتها فيك الانتخابات. يا سفيان سلامات و ابصم معاك علي منفستو عجاج الكِرعين اعلاه , بدرالدين و من لف لفه من منسوبي المؤتمر الوطني في المنبر جونا بي بدعة ( المكاواة) في السياسة و دي طبعا مدرسة الذي يرسف في قيد مجلس الصحافة و المطبوعات منتظرا (عطّية البشير) و ما بّدل تبديلا . ناس بدر الدين بفتلوا في نفس الحّبل و ما عارفين آخرتها عرضحالات للباب العالي تهز و ترز بعد أن يقضي الباب طبعا, منهم وطرا و يقذف بهم لا اسفا ولا ندامة. حركة المكاواة الانتخابية دي يا سفيان للاسف إنجر بعضنا خلفها و إنطلت علي البعض الاخر الحِيلة فضاقت بهم صفحات المنبر و اعتزلوا مُرددين .. منبر بقي سخيف و مليان اولاد صغار و مراهقين و بتاعين امن. بدرالدين اللذيذ خالس عن نفسي ما عندي هجرة عكسية .. زي ما حاربناكم في الخرطوم و لسه بنحارب في فسادكم و دعواتكم العنصرية و نحن في الخارج حا نتمسك بأراضينا الجديدة و نحارب فيها الفساد و العنصرية و ما حا نهرب للخلف .. الموضوع ما شخصي يا بدرالدين , الموضوع صراع افكار و سلطة. شّفت قوة عيننا !! شيوعيين في الغرب بحاربوا و بنظموا صفوفهم ضد اليمين المسيحي المتّطرف و بنادوا بحق المهاجرين في إقتسام الخبر و المأوئ طالما كانو من كِرام المواطنين دافعي الضرائب و الحافظين لفروجهم و للقانون. خيرت فيلدرز يا بدرالدين في الاسبوع الماضي و ضمن حملتو الانتخابية وصّف حزب الـ PvdA شريك الحكم , وصفهم بأنهم الناطقين بالعربية في معرض إنتقاد إحترامهم للاجانب و الدين الاسلامي و أعرب عن سعادتة لسقوط تحالف الحكومة الاخير لانها سمحت بالمساجد علي كل ناصية حي بدلا عن مكاتب الخدمة الاجتماعية, و إنت جاي تتظارف هنا و تشمّت في مهاجرين هولندا !! ده بدل ما تّعد لهم ما استطعت من قوة و من رباط الخيل !؟