ياجماعة ( الحاجة) دي يعني شنو ؟ وحلال ولا حرام ؟! يوجد ( خزائن وزئبق أحمر ) !!

Quote: احكى ليك قصة حصلت قبل سنين والضحية كانو زوج وزوجة مقيمين فى الامارات والزوج شغال مدير مالى فى شركة كبيرة تابعة لواحد من الشيوخ هناك ..وانت طبعا عارفة مجتمع النسوان بيصدقوا الخرفات دى .. أها الزولة دى سمعت بى شيخ ايدو لاحقة وبينزل القروش ، يعنى المليون درهم بيعملو 2 مليون والمليون دولار كذلك .. وانت عارفة ناس الخليج الحاجات دى بيكوسوها كواسة ، المهم زولتنا كلمت صاحب المؤسسة الاماراتى وجابو المحتال من السودان وقعد فى غرفة فى بيت الشيخ وجابو ليهو مليون درهم ودخل الغرفة وقعد فيها فيها ثلاثة ايام وبعدها نادى الشيخ وقال ليهو ادخل الغرفة فعلا الشيخ شاف بعينو المليون درهم ذادت وبقت اثنين مليون . بس الدجال قال ليهو القروش دى مابنقدر نشيلها هسع من الجان الا بعد 4 ايام والشيخ طبعا طمع وسلم الدجال 10 مليون دولار عشان يزيدها وتبقى 20 مليون .. وطبعا دى الحاجة الدايرها الدجال .! وفعلا استلم الـ 20 مليون ودخل بيها الغرفة وبعد ثلاثة ايام قال للشيخ تعال شوف بعينك .. وفعلا القروش بقت 20 مليون دولار .! وطلعوا وقفلوا الغرفة وقال للشيخ ماتفتح الغرفة الا بعد مرور 4 ايام والشيخ وافق وصاحبنا الدجال شال اتعابو ورجع السودان .. بعد 4 ايام الشيخ مشى الغرفة وفتحها ومالقى فيها الكتح ..!! فى النهاية الشيخ قال لزوج المرة الجابت الدجال انا بعرفك انت وانت الجيبتو ودخلو السجن والولية المسكينة جات السودان وفتحت بلاغ وزوجها محبوس هناك وقبضو الدجال من غرب السودان وكانت قصة .. عشان كدة اوعك تخشى فى حاجة زى دى .. القصة دى حقيقة والبلاغ كان مفتوح فى القسم الشرقى الخرطوم ومتذكر مولاناالمستشار الهادى مكاوى وكان وكيل اول نيابة الخرطوم شرق سافر الامارات عشان يأخد اقوال صاحب الشركة .