الوافد وود البلد : في ذهنيّة محمد إبراهيم نقد ، ومحمد عبد الله محمدين

Quote: شمالية نقد قد تتجلى و تبدو ظاهرة للعيان حينما يتحدث عن الفن السوداني مثلا كما هنا في الجزء الثاني من لقاء صحيفة الاخبار: * Quote: الفن قديما وحديثاً؟. - الأغاني الحديثة قامت في الخرطوم، ودا دور ناس حسن عطية وسليمان الحاوي وعثمان حسين، التهامي، وزي الناس ديل بدوا يتنسوا، جات أجيال جديدة وحقوا الجانب دا يبرز، حياتهم فيها جانب كبير مفروض يبرز، كيف كانوا بيلحنوا، بيتعاملوا مع منو من الشعراء، أحمد المصطفى إرتباطوا مع ناس أبو العلا خلاه يغني غنا ود أبو العلا، حسن عطية والحاوي هنا، مع ناس عتيق مثلاً، الشئ التاني المنطقة بتاعت الخرطوم جنوب دي كان فيها نشاط فني كبير جداً.. * طيب تفتكر دا كان رد فعل لما يحدث في أم درمان ولا صدفة بس؟. - مؤكد كان في شئ، لأنو عبد الله عربي لو اتصلت بيهو، هو من (القطينة) بالمناسبة، بيكون ملم بكل الجانب دا، لكن عثمان حسين لما ظهر في الخرطوم، لما غنى صلاح أحمد محمد صالح وغنى كلمات بازرعة فعلاً فرض لونية جديدة في الغناء، برضو ناس بدر التهامي، وكان في الفرق بتاعت السجانة والخرطوم جنوب والخرطوم تلاتة، أنا اشتغلت كتير فيها في 51 و52م الشباب والحركة الشيوعية والمظاهرات والإضرابات والأندية، فكان في عدد كبير جداً من الفنانين والعازفين شغالين معانا في الجانب دا، الواحد هسه انقطع، لكن كان الواحد فيهم بيجئ من الشغل وطوالي يقعد يعزف ويلحن ويغني لغاية آخر الليل، عبد الله عربي مؤكد حيديكم كتير جدا وأغاني وكيف اتلحنت، عثمان حسين اشتهر أكتر بأغاني صلاح أحمد محمد صالح وبازرعة وكانت أغاني جديدة بعدين الإذاعة كانت حاصرة نفسها في الحتة دي، الصباح بدري ويوم الجمعة، وبعدين بليل ما زي هسه، القهاوي، قهاوي الزئبق، قهاوي في بحري والعيلفون وأم درمان، الفونوغراف ثم المذياع، الجانب دا كان فيهو عمل كبير ماشي، بعدين الجانب بتاع الفنون التشكيلية، هنا في كلية (غوردون) كان في حاجة إسمها (إسكوول أوف ديزاين)، قبل المعهد الفني، المعهد الفني ورث دا، في حاجات لو توبعت بتدي إضافة للبلد دا وما بتكلف حاجة يعني، بعدين الناس ديل صوروا، يعني أي حتة مشوا ليها الفنانين ديل عملوا صور، أنا مشيت أسمرا ولقيت صور لناس سرور والجماعة ديل في الرحلة المشوا ليها، بعدين الترفيه عن الجنود، في جبهة ليبيا والجبهة البيهنا في كرن، يعني مثلاً أغنية خليفة خوجلي غناها عثمان حسين، انت ريدي يا ليالي أسعدينا.. تجمعينا كما كنا.. في الفن جيبي لينا روزينا.. وفي الرقص بيلندا وكترينا.. في مصوع في قرورة قرب الميناء.. اجتمعنا والحبايب حوالينا.. افترقنا والمطر بيصب علينا، وهكذا، و لكنك قد لا ترى لها اثر حينما تقرأ حديثه عن الاوضاع الساسية الراهنه و تحليله للأزمة السياسية-تحليل يليق بلقاء صحفي تخذ شكل الونسة او ونسة اتخذت شكل اللقاء الصحفي- : Quote: الجانب الاجتماعي المؤثر في مسار السياسة السودانية، هي كانت في زمن الحكومات البرلمانية وليست الأوقات الشمولية يعني الأحزاب الشمولية أثرت في البعد الاجتماعي لحل مشكلات السياسة زي الاتحاد الاشتراكي والمؤتمر الوطني، يعني الإمكانية اللكانت بتحل المشاكل السودانية أصبحت فوق، لأنو فوق ما بيستحمل البراح اللفيهو الحركة السياسية، المشكلة التانية حرب الجنوب الذي حاولوا حصره كتمرد في الاستوائية أو غيرها، سواء في طورها الأول اتفاقية أديس أبابا أو مع الحركة الشعبية لأنو السياسية السودانية في مستواها الرسمي ما قدرت تتعامل بجدية مع القضايا التي واجهت المجتمع في السودان، لأنو ما كان في سبب يدعي نميري أنو يتدخل في شغل حكومة الجنوب يعني يشيل ناس أبيل ألير ويجيب ناس آخرين، فخلق توتر وقوض اتفاق أديس أبابا، دفعت ناس الحركة إنهم يكونوا جيشهم وحركتهم، وهم قالوا تحرير السودان، وأن الجنوب لن تحل مشاكله إلا إذا حلت مشاكل السودان، نفس الصيغة دي انتقلت على دارفور، حركات دارفور بتتكلم انو مشكلة دارفور لن تحل إلا إذا حلت المشكلة المركزية في السودان، ناس الشرق أيضا، كحروب حالية، لقدام ممكن تعمل مشاكل، لأن شنو الحيجعل الطرفين يكون أكثر تأثير طرف المركز القدر يوحد ويجذب، ولا طرف الأطراف اللاتمسكت بمكتسباتها التي حصلت عليها، يبقى النزاع ما زال موجود وبيأخذ أشكال جديدة، الكلام عن مؤتمر قومي عام، ما بثير الاهتمام ولا يعطي الناس ما تريده كلها، ولكن هي قضايا يجب أن تبحث على المستوى القومي، بأي شكل من الأشكال الناس تشوفو، لكن لا يمكن أن تكون بين الحكومة والمعارضة، لا بد أن تتحول إلى مسالة قومية عايزا مشاركة الجميع لحلها بصبر،