هل من المعقول أن تتزوج من امرأةٍ ثانية؟ .. دعوة للنقاش

Quote: دكتور صلاح شال السلاح الله يخليك يا دكتور انك اديتنا الفرصة دي عشان نعبير عن نفسنا بنتابع موضوعك ده باهتمام شديد ويا ريت الدنيا يكون فيها رجال زيك بعرفوا يسوقو الناس كويس بالشرع والدين والعلم كمان ولازم اقوليك ما انا براي معاي اربعة صاحبات وقررنا كمان نكلم اي واحدة بنعرفه طيب يا دكتور انا مرة تانية عايشة في امانة الله مع راجلي وحافظة حقو في المرة الاولى واولادها وبرغم انها ما بتدور تسمع سيرتي لكن يشهد الله انا ما بكرها بالعكس بساعد راجلي من قروشي اشيل واديها وهي ما بتعرف وامشي معاهو السوق اشتري لي اولاده قبل اولادي من ماهيتي ما تخت ايدك في راسك يا دكتور شايفاك البتتكلم معاك دي اخصائية بتعالج الناس ومرة معروفة في المجتمع وانا بكتب بالدارجي عشان ما عايزة زول يعرف انا منو وازيدك في الشعر بيت انا اشتريت لاولادوا من المرة الاولى قطعة ارض في منطقة لقطة في الخرطوم وهى ما عارفة وقبل ما اكتب ليك كلمته استاذنوا عشان اكتب واقول كل الكلام القلتو وما كتبته حرف الا بعد ما هو وافق عليهو حتى قطعة الارض ما عشان منة لكن عشان نوري الناس انو حتى المرة التانية ممكن تكون اضافة للاسرة وما كلو مرة تانية خرابت بيوت وانا ما عندي مانع انو يتزوج تالتة ما حاقول ليك ما حاغير لانو دي طبيعة المرة وانا كنت بغير حتى من المرة الاولى مع اني الاصغر وما عايزة اقول الاجمل لكن مع ذلك مستعدة اتعامل معاها زي الما حصل حاجة وبقول للاخوات العزيزات الموضوع ده ما موضوع حقوق مراة ده موضوع ليه ظروف خاصة جدا انا شخصية ما كنت بافتكر انو حاعرس راجل مرة لكن بالرغم من اني قابلت رجال كتيرة بحكم طبيعة عملي ومع ذلك قلبي اختار الراجل ده على الرغم اني ما كنت بعرفو وهو ما عندو علاقة بطبيعة عملي لكن زي ما بقولو لما العين تشوف العين والايد تصافحو اتمنى القى ناس لديهم وجهة نظر قريبة من وجهة نظري واتمنى اكتر لو بقوا نسوان زيي الحاجة الغريبة يا دكتور ما في اي واحدة مننا عرفت رايك شنو ثلاتة مننا قالو انت ما معرس واتنين قالوا معرس وكايس تتدبل وزي ما انت قاعد تسال الناس انحنا من حقنا نعرف انت واقف وين معانا ولا مع الخيانة اهه فتك بي عافية ت . ع