هل من المعقول أن تتزوج من امرأةٍ ثانية؟ .. دعوة للنقاش

Quote: دكتور صلاح بشير سلام والله يا دكتور كلامك سمح وادبك سمح تتكلم مع الناس براحه براحه تفلق وداوى على كيفك اندخل فى الموضوع يا دكتور الكلام اللتا قلتو وقالوهو الناس الشاركو ديل حيوصلنا لنو الرجال يعرسو فينا سكيتوها من الانبياء لغاية ما وصلتوها ناس مامون في امريكا يعني دايرنا نقول ليك شنو نكفر وكدي يادكتور تعال ديل مسيحين شنو ناس مامون ديل احنا جنبنا هنا دى اخواتنا اقباط قروا معاى كلامك ده ما صدقوا مشوا سالو القسيس بتاعم الغريبة انو ما نكر قال ليهم ايوه ديل جماعة مطرفين سمعنا المطرفين ديل ارهابين لكن جنهم عرس ما سمعنا بيه الا عندك المهم يا دكتور قالو الفتنه نايمه الله يلعن البصحيها وان والله ما دايره العنك لكن انت حتحرش لينا الرجال ونقعد نسمع في راجل المره حلو حلا لا نعرف نضحك ولا نبكي والله يا دكتور انا عندي صاحبة عرسو فيها وصاحبة عرسوها في مرة والنصيحة الاتنين صاحباتي والغريبة برضو مصاحبات بعض لمن اطاعن صاحبتي المرة الثانية المعرسين فيها تقوم تدافع ليها اقوم اقول ليها هى ما زي العرسوها فيك تقول لي لا ديك شالت راجلي لكن دي صاحبتي حيرني معاهن لكن شوف يا دكتور احنا كلكلو ما بندور الضر عارفين انو الراجل ممكن يعرس اربعه لكن ما بنرضا المغسة بتكتلنا وبعدين يعرس ليه الناقصه شنو نربي ونكبر وريحة البصل في جلابيتنا ما بتمرق وبعد ده عايز يجدد على فكره يا دكتور انا وصاحباتي القتليك عليهم ديل ضحكنا جنس ضحك في نكتتك بتاعت العايز يعرس مرت الشهيد والله كان راجلي قال لي كده الا ابقيهو شهيد هو زاتو كمان معاها مشاورة كمان يا دكتور انت شكلك كده ما معرس وبكلامك التا كاتبو ده انت ما عندك مره ياخ ما تبقى في روحك دى وخليك من رجالنا احنا ديل والله ما عندي مانع اكان وسطتنى اخطب ليك غايتو دخلتا فينا خلعه بقيت من الراجل يدخل البيت اقفل الكومبيوتر عشان ما يشوفني بقرا في شنو لغاية هنا وكفاية يادكتور شكرا اختك ن . ن