أيــام وليــالي من ذاكـرة البركس......1998 - 2002م

Quote: واصلوا وأحكوا لينا ذكرياتكم الجميله مع البركس, وبجيكم راجعه .. بوست لذيذ وفيهو معلمين كبار كيكي وقيقراوي والحكي الجميل عن أم نخيل

مرحبتين بالعزيزة أماني
كبير كيكي ياخ انا الدفعة القدامكم طوالي . . شفتي كيف ؟
عارفك قاصدة شنو لكن برضو كبير كيكي براهو !
ما اجتمع في جملة بالعطف الاستاذ والتلميذ ، الا و كان بينهما( ثم ) تفيد الترتيب اقل شي ( فاء) . . فاء قيقراوي ياخ !

ثم سانياً : البركس بالنسبة لدفعتنا كان زي حلم جميل و عبارة مشبّعة بمضامين كبييييييرة - غير العمر طبعًا - البركس يعني السنيرة - الاكسبيرينس و الاكستيرنال و الربيت ، يعني فيمايعني التكت و التحرر من جور الصندوق - ديل طلاب ، لكن ما كانوا بدعموا معانا و لا حاجة ياخ ؟! - نحن برانا طلاب دعم الصندوق ، اهلنا يبعوا في بقرم و يرسلوا لينا القروش منها نعيش بيها، و نشتري بعض مراجع و مذكرات ، و الباقي ندعم بيو الصندوق !! و لا جزاء و لا شكورن منهم يبنوا في العمارات السوامق و يركبو الـ VXR و يشتروا لمنسوبهم بناطلين الجنز الاجنبية " كونز " - كلو واحد من منسوبي الصندوق بكون أقل شي عندو واحد بنطلون براهو ؟! - و نحن الداخلية كلها بكون عندها 2 يا تلاتة حسب متوسط الاحجام !
البركس بعني لينا كرم السناير و فائض تكتم - زائد تكت اولاد العاصمة - و معناها يا الباسطة امانة ما جوك الـ " لُقاط " وجاك اللهط الجد جد، البركس برضو كان بعني معقل المعارضين الخايفين علينا منهم ، و فارزننا في ترهاقا ، و بقية منافي البرالمة في شمبات و الصحافات و جبرة على ما اعتقد . العرفني شنو ؟ - البرالمة سنة ناعمة ناس هندسة / اعدادي علوم / بزنس - ودونا ترهاقا كمستقرٍ لنا ، و حكموا علينا بسنتين ، و حكمنا عليهم بلعنة البرالمة الجايين بسنيناتم و اظنهم شافوا حاجة ، و آمنوا ذاتو !
البركس كان بعني البعد عن تهمة "التعريب " ، و آخر الطلاب المحصنيين من ناحية اللغة .
دي و كتير غيرا

لكن دا كلوا ما بعني انو مافي ذكريات !

اها يا فردة
ان عدتم ؟ عدنا بمشهادنا

مع خالص الشكر لصاحبة الضيافة
و عليك الله اعذري خرمجتنا و اعفي لينا بحق " البركس " عليك و علينا






من كترة الاخطاء الاملائية بقيت بين امرين : يا اجي اقراها لأي زو براهو ، يا كمان اعدلها على دفعتين
اها اخترتا الخيار الاول

(عدل بواسطة قيقراوي on 10-30-2009, 06:28 PM)
(عدل بواسطة قيقراوي on 10-30-2009, 06:33 PM)