ياجماعة أنتو تمبس رجع...!

Quote: لاحظ انو البرلمان بقى هادئ والجهة بتاعت المعارضة الفيها الشيوعيين (صااااانه)..قالوا والعهدة على نكات الشيوعيين التى تخلو من الظرافه والطرافة انه سأل وهو يتثأب..أنتو ياخوانا وين الوليدات الكانو بجوطوا هنوك..

النكته دي يا حاتم فيها تجرد غريب خلاص .. بتاعين الادارات الاهلية ديل الحاجة السمحة فيهم بختوها طااخ كدا والواحد لا عندو زمن لي نقد ذاتي ولا تثبيت علاقات
احيي الادارة الاهلية شديد ..
زمان يا حاتم ايام نقاط التفتيش الثابتة وحظر التجول والحركات دي .. مشينا حفلة في الكلاكلة .. انا ومعاي صاحبي الحفلة كانت حقت قرايبم .. مش نحن جايين خبراء اجانب واي حاجة .. قمنا للاسف فرتقنا ليك الحفلة اقرب سلك كهربه لي جريتو .. ما عارف ليه .. وربك القادر في رجعتنا من الحفلة في العربية .. لما فينا ضابط اخلاقو ضيقه خلاص .. خمانا كلنا ودانا الربط قال عاملين ازعاج عام في الشارع .. حتة بوليص بي نجمتين يسوق ليهو بص سيرة كامل القسم .. المهم الجكس ودوهو بي البص ونحن رحنا فيها والدنيا خميس فكونا تاني يوم الصباح بي قدرة قادر .. على امل انو نجي يوم السبت ناخد الفيها النصيب ونتخارج .. جينا السبت الصباح ودخلونا لقينا ليك عمك بي جلابيتو وزول هيبة كدا .. زي ناس البرلمان ديل .. دخل ليك العسكري في حتة ضيقه جدا .. جرجرو ليك في اسئلة طلعو ليك الطيش .. ونحن طبعا جايين ناس دق ساكت .. غايتو السؤال الختم بيهو الفلم دا قال ليهو حسع الاولاد الصغار ديل كانو في الحبس برضو ..؟ قال ليهو ديل هم الكانو بكوركو زاتم .. قمت نطيت ليهو طوالي قلت ليهو ماسكننا من الساعة اتنين صباحا لحدت الساعة تسعة .. لا عشاء ولا فطور ولا شاي صباح .. وقلت ليهو بالمناسبة دي حسع لحدت الآن ما فطرنا ..
تخيل عمك حكم علينا بلا جلد .. ونهزر ليك الضابط دا لمن عرف حاجة .. وبعداك ادانا حق الفطور ..
شفت البرلمانات بتاعت السودان القديم واعيه كيف ؟؟
حسع ابوساندرا تقول ليهو حول لينا عشرة الف دولار قلبنا واقف .. يدخل بي حمد ويطلع بي خوجلي .. ويجيب ليك الازمة العالمية ومعدل الدخل للفرد الواحد بالنظام الأمريكي والضرايب ,, وفي النهاية يطلعك مطالب