|
الاربعين ( 1966 _ 2005 )
|
( 1 ) سنة واحدة بس ... والاربعين حيدق على ابواب مدينتك ... افتح الباب الكبير ... سنة واحدة بس ... شمسك خلاص بدات تميل نحو المغيب ... سنة واحدة بس ... اكوام قزاز مكسور ... وبحثك عن بصير يجبر كسور ... يا دون كيشوت العظيم ... ضيعتا عمرك يا غبى ... ضيعتا عمرك فى طواحين الهواء ... ( انا بعتقد , انا بفتكر ) ... ( الم الكتابة المؤلمة , وعى الجماهير لو تعى ) ... امشى اتلهى ... شوف ليك فكى ... يمكن حجابه يرجع العمر اللى ضاع ... وتبداء صاح ... وتنتهى ... مثل الجميع ما بيشتهى ... والاربعين جاييك جرى ... ود يا غبى . ( 2 ) ماتكون جبان يا اربعين ... تطعنى فى الضهر العليل ... راجل انا ... داير الرجالة تعال عديل ... جيب ما تجيب ... السكرى , ضغط العيون ... كمشة تجاعيد فى الجيوب ... جيب ما تجيب ... التهابات المثانة , الم البواسير الرهيب ... يلا الخلاء ... فارس انا ... عكازى مع شوال سنين تحت السرير ... وعضم كبير فوق السرير ... تحت المخدة كيس صعوط ... بداء الهبوط ... شيخوخة شاخ منك ضناك ... فارس دكر ... طااااخ , اااخ , انبرشت على السرير . ( ملحوظة ) دار المسنين استعدى ... على الطريق ... نزيل جديد . شاهين
|
|
|
|
|
|