|
يلمّها النمل ويطاها مؤتمر الإعلاميين
|
الصادق القدر، اسم على مسمى، هو زميل دراسة وصديق وفي وعزيز، ومن أكثر الناس الذين أحبهم، لهمّته العالية وصفاء وطيبة قلبه، وقد اشتهر بالسخرية اللاذعة وبرود الأعصاب في أحلك المواقف.. اتصل عليّ البارحة في منتصف الليل.. انزعجت في بداية الأمر للاتصال وخفت أن يكون مكروه أصابه أو أصاب واحد من أسرته.. هو: كيفك يا معلم إن شاء الله بخير أنا: الحمد لله نحن كويسين .. إن شاء الله الأهل بخير.. مالك يا زول متصل في الوكت المتأخر ده، إن شاء الله خير.. قال: لا لا ما في عوجة.. بس حبيت أعرف منك ليه ما جيت السودان مع الجماعة.. قلت: جماعة منو؟ قال: جماعة مؤتمر الإعلاميين العامل بالخارج قلت: وأنا إيه دخلي بالإعلاميين؟ أنا لا إعلامي ولا عندي علاقة بالإعلام قال: كيف ما عندك؟ إنت مش قاعد تكتب في سودانيز أونلاين؟ قلت: نعم بكتب، لكن أنا ما إعلامي ولا قاعد أعمل في حقل الإعلام، وما بتخذ الإعلام كمهنة قال: طيّب عملك في سودانيز أونلاين تسميهو شنو؟ وهسه بكري ده ما قاعد يدفع ليكم مرتبات؟ قلت (بفارغ صبر): يا اخي مرتبات بتاعة شنو؟ ده منبر حوار ده مش قناة فضائية أو صحيفة يومية.. قال: سيبنا من بكري.. بالجد ليه ما جيت للمؤتمر؟ قلت: اللهم طوّلك يا روووح.. يا اخي مالك عاوز تجيب لي ضغط بالليل ده.. أنا قلت ليك أنا ما إعلامي.. قال: إنت قايل الحضروا ديل كلهم إعلاميين.. يا اخي ديل فيهم أطباء وبياطرة ومهندسين ومحامين ومدرسين ومندوبين مبيعات وبتاعين محلات تياب سودانية، وبتاعين تحويلات عملة، وأمنجية سفارات.. يا اخي حتى بتاعين ال delivery جوا للمؤتمر.. إلا إنت يا كافي البلاء الما اشتغلوا بيك.. قلت: الصادق يا كارثة.. عليك الله أنسى لي الموضوع بتاع المؤتمر ده واتكلم لي في حاجة فيها فايدة.. قال: طيّب هو إذا ما فيهو فايدة مضيعين المليارات بتاعة الشعب فوق شنو؟.. ديل قالوا ليك صرفوا عليهم صرف تقيل.. تذاكر مجانية لناس جايين من الصين وأمريكا وبلجيكا وإقامة مجانية في أرقى الفنادق وسفريات داخلية للمعالم البارزة للبلد.. يا ربي يكونوا مشوا قندهار؟ هاهاها.. وقالوا ليك صرفوا على المؤتمر ده صرف بذخي.. قروش الشعب بضيعوها في الحاجات الهايفة زي دي.. الإعلام شيء مهم لكنو في غياب الحريات بكون شيء ما عندو معنى.. أنا بستغرب دولة يتحكم فيها الأمنجية في إصدارات صحفها اليومية، وتقيم مؤتمر هلامي للإعلاميين زي المؤتمر ده عشان تصرف المليارات اللي كان أولى تصرف على المستشفيات والتعليم والصحة.. قلت: (محاولاً تغيير الموضوع): أخبارك إنت شنو يا مصيبة؟ قال: أنا تمام التمام... بس زعلان.. قلت: زعلان من شنو؟ الله لا يجيب الزعل قال: زعلان عشان ما دعوك للمؤتمر.. قلت: لا إله إلا الله محمد رسول الله.. يا اخي عليك الله ما تحرق أعصابي.. أنا ما عاوز كلام في الموضوع ده.. قال: موضوع شنو؟ قال: موضوع المؤتمر.. إنت إتكلمت في شيء غير المؤتمر الزفت ده؟ قال (ضاحكاً): على رسلك يا شيخنا.. يا اخي ما تزعل مني أنا.. لو في زعل المفروض تزعل من الحكومة.. قلت: أزعل من الحكومة عشان شنو؟ قال: كيف عشان شنو؟ عشان ما دعتك للمؤتمر.. عليك الله هسه رضيان تؤدي دور المواطن الكمبارس لمتين وحا تظل مهمش لمتين؟ إنت مواطن سوداني لكنك ما عندك حق في التصويت ولا حتى محسوب في التعداد السكاني، وعمرك خمسماية سنة وحتى الآن ما دعوك لمؤتمر واحد.. يا اخي الدعوة الوحيدة الجاتك كانت من ناس الخدمة الإلزامية.. ولولا الفيزا الجاتك من برة هسه كنت تكون من ضمن الشهداء.. قلت: يا جماعة الليلة شنو المصيبة الوقعت أنا فيها دي.. وقبل أنا أكمل كلامي قال: أظن الناس ديل خاتين نوعك ده لليوم الأسود قلت: يوم أسود بتاع إيه؟ قال: خاتنكم للضرائب.. في يوم أسود أكتر من يوم دفع الضرائب؟ إنتو تدفعوا وهم يصرفوا.. يلمها النمل ويطاها الفيل.. والله يا نملة.. أقصد يا حبيب.. كنت عاوزك على الأقل تشوف السد.. زمان ضيوف وزوار البلد بودّوهم يزوروا جياد وأي واحد بدوهوا عربية هدية.. هسه جياد المسكينة ذاتها بقت مهمشة، لحّقوها مشروع الجزيرة.. الزيارات الآن بقت للسد.. السد وبس.. الإعلاميين زاروا السد لكين ما أدوهم أي هدية.. اعتذروا ليهم وقالوا ليهم السد لسه ما ولّد كهرباء ، قال ضاحكاً (يا ربي السد يكون قاعد يتوحّم؟).. لكين ناس سوداني أزالوا الحرج وقالوا حيعوضوا الناس ديل ويهدوا موبايل سوداني فاخر لكل المشاركين.. قلت: يا مصيبة ، بالله عليك خلاص كلام في الموضوع ده.. أنا راجيني دوام الصباح.. مع السلامة يا اخ.. قال: مع السلامة، بس المرة الجاية حأكلمك عن موضوع الولائم الفاخرة والساونا المجانية وعن الإعلامية الكانت لابسة توب أوكامبو وقصتها مع ناس الأمن..
|
|
|
|
|
|
|
العنوان |
الكاتب |
Date |
يلمّها النمل ويطاها مؤتمر الإعلاميين | Nasruddin Al Basheer | 05-17-09, 09:33 AM |
Re: يلمّها النمل ويطاها مؤتمر الإعلاميين | Alshafea Ibrahim | 05-17-09, 09:53 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-17-09, 12:07 PM |
Re: يلمّها النمل ويطاها مؤتمر الإعلاميين | اسعد الريفى | 05-17-09, 12:20 PM |
Re: يلمّها النمل ويطاها مؤتمر الإعلاميين | osman righeem | 05-17-09, 12:43 PM |
Re: يلمّها النمل ويطاها مؤتمر الإعلاميين | نصر الدين عثمان | 05-17-09, 12:53 PM |
Re: يلمّها النمل ويطاها مؤتمر الإعلاميين | Nasruddin Al Basheer | 05-19-09, 09:35 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-18-09, 11:44 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-18-09, 05:17 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-18-09, 05:34 AM |
Re: يلمّها النمل ويطاها مؤتمر الإعلاميين | نصر الدين عثمان | 05-19-09, 09:46 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-19-09, 12:27 PM |
Re: يلمّها النمل ويطاها مؤتمر الإعلاميين | osman righeem | 05-19-09, 01:19 PM |
Re: يلمّها النمل ويطاها مؤتمر الإعلاميين | Nasruddin Al Basheer | 05-19-09, 02:07 PM |
Re: يلمّها النمل ويطاها مؤتمر الإعلاميين | حسن البشاري | 05-19-09, 05:53 PM |
Re: يلمّها النمل ويطاها مؤتمر الإعلاميين | saber alhawatti | 05-19-09, 09:51 PM |
Re: يلمّها النمل ويطاها مؤتمر الإعلاميين | Nasruddin Al Basheer | 05-20-09, 12:17 PM |
Re: يلمّها النمل ويطاها مؤتمر الإعلاميين | Nasruddin Al Basheer | 05-20-09, 08:07 AM |
Re: يلمّها النمل ويطاها مؤتمر الإعلاميين | عبدالدين سلامه | 05-20-09, 10:40 AM |
Re: يلمّها النمل ويطاها مؤتمر الإعلاميين | عواطف ادريس اسماعيل | 05-20-09, 12:37 PM |
Re: يلمّها النمل ويطاها مؤتمر الإعلاميين | عبدالدين سلامه | 05-20-09, 01:19 PM |
Re: يلمّها النمل ويطاها مؤتمر الإعلاميين | احمد محمد بشير | 05-20-09, 04:58 PM |
Re: يلمّها النمل ويطاها مؤتمر الإعلاميين | Nasruddin Al Basheer | 05-21-09, 11:28 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-21-09, 09:55 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-21-09, 08:18 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-21-09, 08:08 AM |
Re: يلمّها النمل ويطاها مؤتمر الإعلاميين | Nasruddin Al Basheer | 05-21-09, 08:09 AM |
|
|
|