|
مع نانسي عجاج في هارلم- نيويورك ( اشجان مهاجرة)
|
انا عاوزة اشاركم واحدة من حكاياتي في بلاد العم سام يا جماعة . وحا ابدا لكم بحكايتي مع غناء نانسي والجري والجرسة
مدخل اول ( زي مابقولوا ناس الشعر ومثقفاتية ايام الجامعة) اها ... ولأن الدم بحن صرت من سكان هذا الحي العريق.... واتجول في شوارعه بروح انتماء عاليه لهذه السحنات الوجوه مثل تلك الوجوه في امدرمان ..والخرطوم وعطبرة اها.. هنا توجد موضة السماعة في الأذن واي زول قافل اضانه بسماعة وعايش في عالمه.. قررت ان اعيش عالمي ايضاً ونزلت ليك اغنيات في الموبايل بتاعي واشتريت السماعه الماخمج ... وللزوم الغربة والشجن والكلام الصعب داك قمت نزلت اغنية رفيقي للجميلة نانسي عجاج ومعاها بلدا هيلي انا وتميت الناقصة بالطير المهاجر لوردي.. واها من اليوم داك بقيت طرشا في الغادي والرايحة غازا سماعتي وماجايبا للدنيا خبر... ومرات كتيرة اطلع السماعة عشان الجنبي يسمعوا الغنى السمح ده بدل دش دش حقتن دي (استعلاء ثقافي ومقدره على الهامش الامريكي). اها الليلة قررت اعمل رياضة الجري (طبعا دي كلها محاولات عشان نخش السيستم الامريكي ياجماعة وننسى الغبار والكتاحة بتاعت عطبرة ونتأمرك شوية). اها ركبت السماعة وشغلتا اغنية يارفيقي ... لكن مع الجري ليقت انها مابتظبت الا على ايقاع الله فوق زوزو ياحلاة زوزو الله فوق وزوز ياحلاة زوزو.. وانا جارية ونانسي تغني معاي يارفيقي بلحن الله فوق زوزو ياحلاة زوزو ( دي الموصلي ما حايقدر عليها) ضحكت على نفسي وعرفت انه دخول السيستم ده مشروع فاشل ... مش لو جرينا في نيويورك وطلعنا ناطحات السحاب .وكتاحة عطبرة مباريانا مباريانا ..وجرينا الزمان داك وراء الجياشة في الداخلة ونشيل معاهم الله فوق زوزو ياحلاة زوزو دي ما حاتفكنا ليوم الدين. اها بعد مسافة 20 متر النفس انقطع والحيل اتهد وقلبتا الاغنية لبلداً هيلي انا وهاك يا بكاء ومخاخيط في الشارع وطبعاً الجماعة هنا حساسين لما يشوفو ا زول ببكي Are you ok? I am ok. Thank you حتى عباسية (إمرأة بوليسية بمصطلح السودان) سالتني.. المهم قررت من اليوم داك ما اركب سماعة وما اسمع نانسي الا في البيت عشان فضايح القلب الرهيف ويانانسي شكرا لهذه الروعة منتظرنك بشوق ولهفة يانانسي في امريكا ... وبكاء حار وشديييد منال ذات صباح من ايام الجرسه هارلم شرق. نيويورك ابريل 2009
|
|
|
|
|
|
|
العنوان |
الكاتب |
Date |
مع نانسي عجاج في هارلم- نيويورك ( اشجان مهاجرة) | Manal Mohamed Ali | 04-25-09, 02:04 PM |
Re: مع نانسي عجاج في هارلم- نيويورك ( اشجان مهاجرة) | الفاتح يسن | 04-25-09, 06:37 PM |
Re: مع نانسي عجاج في هارلم- نيويورك ( اشجان مهاجرة) | MAHJOOP ALI | 04-25-09, 08:50 PM |
Re: مع نانسي عجاج في هارلم- نيويورك ( اشجان مهاجرة) | Rawia | 04-25-09, 08:58 PM |
Re: مع نانسي عجاج في هارلم- نيويورك ( اشجان مهاجرة) | naeem ali | 04-26-09, 00:46 AM |
Re: مع نانسي عجاج في هارلم- نيويورك ( اشجان مهاجرة) | سيف الدولة كامل | 04-26-09, 01:00 AM |
Re: مع نانسي عجاج في هارلم- نيويورك ( اشجان مهاجرة) | Hawari Nimir | 04-26-09, 01:43 AM |
Re: مع نانسي عجاج في هارلم- نيويورك ( اشجان مهاجرة) | Manal Mohamed Ali | 04-26-09, 05:02 AM |
Re: مع نانسي عجاج في هارلم- نيويورك ( اشجان مهاجرة) | طارق ميرغني | 04-26-09, 05:40 AM |
Re: مع نانسي عجاج في هارلم- نيويورك ( اشجان مهاجرة) | maia | 04-26-09, 06:51 AM |
Re: مع نانسي عجاج في هارلم- نيويورك ( اشجان مهاجرة) | Abdel Aati | 04-26-09, 12:30 PM |
Re: مع نانسي عجاج في هارلم- نيويورك ( اشجان مهاجرة) | Abdel Aati | 04-27-09, 10:44 AM |
Re: مع نانسي عجاج في هارلم- نيويورك ( اشجان مهاجرة) | بابكر عثمان مكي | 04-27-09, 02:32 PM |
|
|
|