|
|
 Re: عاشق ومغرم بك (Re: احمد العربي)
|
ده سؤال كويس
أوريك كيف:
تعرف يا أحمد العربى فى أوكات كده بتمر على "الشخص" ..وبيكون هو هنا وروحو مخدرة ..ولا هايمة ولا ما فيشة ما عارفة لكن ما بتتلم عليه
تكون موجود الا ربع كده
لا نعسان لا صاحى
لا فرحان لا زعلان
لا فى جيهة ترمى عليها اللوم لا انت اتلومت مع جيهة معينة لكن اللوم هداك قدامك عينك ليه ...
ليه فى ناس بتتحرم من أهم الاحتياجات وناس بطرااااانة كدى ؟
ليه البترول غالى كدى؟؟
وليه مشكلة دارفور ما بتتحل كلو كلو ؟؟
وليه أوباما بغير رايه بعد حبيناه وقلنا جاية بى جيتو الحلول المستحيلة؟
وليه ا" الشخص" ده من دون الناس يطلع أسود و "امرأة" وأجنبى ومهاجر وبعيد من أهلو ...وبراهو فى طاهرة الدنيا دى كان مات مافى زول يعرفو مات متين؟؟ وليه الاصدقاء بيجورو عليك ؟ وليه الدنيا مغمدة عين وفاتحة عين؟ وليه الحكام بيظلموا ناس الجيهة البهناك دى
وليه الشمس ساطعة مرة ومتحجبة بالسحاب مرات
وليه الجوع شديد فى محلة والشبع مشحم الناس فى جيهات تانية
وليه منظمات الاغذية والادوية بتغش الناس وتاكل قروشهم والناس مكتشفنهم وما بيقدروا عليهم
وليه اكسيكون بتدفع قروش لى ناس اللوبى عشان يتآمروا على الكرة الارضية كلها ويكذبوا على الناس فى مسألة القلوبال وورمنق لحدى ما نتورط كدى؟؟
وليه كل العالم يا أما قايم على الاستعباد يا على الاستعباد يا على الاستفقار يا على الاستمراض يا على الاستجهال يا على شغل الجهال ده؟؟
والناس عندها خبر ومعلومة وما بتقدر تواجه الانظمة ولا الحكومات ولا أسياد السلطة وتقول ليهم الكلام ده كده غلط والصاح كده
وهو صحى الصاح شنو؟؟
اها روحى رايحة منى ليها ساعة ونص ...قعدت أسمع فى اليويتيوب
لقيت روحى بديت بى اسرار بابكر ..لفيت على عصام النور مشيت لى ود اللمين غشيت سيد خليفة اتذكرت انه عثمان حسين ده عنده غنا زانى لى طولت ما سمعته مشيت فتشت ابراهيم عوض وخليل اسماعيل
قلت اشوف اطفال حلوين بيعملوا حاجات حلوة
لقت بتاع منا منا ده
وسيخان ومجيديع ...لكن ناقش ومشحون بالايقاع ...وسنونو مكسرات والالحان مزاحماه فى طفولتو المجهولة دى ....ياخى عجبنى وأجاب لى على سؤالات كتيرة جدا ...
تعرف الفن ده .ملخبط بالكوميديا الداكنة دى .....يمكن يكونو فيهم خلاص العالم
المهم روحى لسه ما وصلت لكن شايفاها جاية على ...
قلت اشرك الاصحاب فى السمع الحلو دة يمكن يردوا لى روحى
الاصحاب زاتهم ظاهر عليهم محرشين ...ولا انشدهو ولا نسوا العشرة ...البركة فى جيتك يا العربى
يازول هذا هو عرضحالى ...فما بالك انت ...؟؟
كفاك ولا ازيدك؟؟
علا بمش انوم 
|
|
 
|
|
|
|
|
| |
Tumadir
فيس بوك
تويتر
انستقرام
يوتيوب
بنتيريست