أبناء ولاية نهر النيل...حبابكم عشره

Quote: ظل نهر النيل بعظمته وجماله ظل نهرا متمردا كم مرة أصبح فيها نهرا ارهابيا هاجم القري والجزر في واحدة من هذه الهجمات كان لابد من التحدث معه تري هل نجحت في مخاطبة النهر العظيم النيل والتساب أنشودة الخريف....وأغنية كل عام يا نيل دا ما كان التساب يا نيل دي ما كانت دميرة في لحظة واحدة نسيت عهودك وإنو لينا معاك جيره وفي ضفافك قام زرعنا وقام شتلنا وقام تمرنا وساقية تترنم علي طرف الجزيرة وفي الجداول موية جاريه يا سلام يشجيك خريرها وكنت يا نيل في تراثنا وأغنياتنا من زمن غنت مهيره وياما طنبور ليك يشدو وصفقة في الضل كان هديرها وفي فرحنا سبر زيارتك نمشي ليك في أحلي سيره يجيك عريسنا يشيل يغسل في وشيهو يحت علي مويتك ضريره واستمر معاك فر حنا وانت خيراتك وفيره أنت أصلك من جنان الخلد نابع ومن بطون أفريقيا أعلنت المسيره جيتنا جبت الخير معاك الخضره والمويه النميره البنات وردن حلاتن عبن القرب الكبيرة وغسلن تيبان كتيره هديك شروهن هناك فوق النجيله والولاد جرو المراكب مره في شان الزراعه ومره للحفله المثيره والجبابيد من بطونك جابن الحوت ما هو صيره وكنت ساحات التلاقي نسجن من شجدرك خميلة ويا ما لينا معاك حكاوي وذكريات كانت جميلة *** وفجأة يا نيل أنت خنت خنت عشرتنا الطويلة نسيت عهودك وانو لينا معاك جيره وجيتنا دافر يا سلام يا نيل حساده هي والله غيرة انت لا خليت مساجد لا مدارس لا مساكن لا رواكيب لا شديره والبلد صبحت خراب الناس قعادن فوق حصيره وحتى أطفالنا الصغار يا نيل مقيلن في الهجيره لا سراير لا بنابر لا مفارش والبيوت السمحة ديك راحت حليله والقرى المخضرة غرقت والتجار صبحت فقيرة البوابير وين مكانن..والجناين والنخيل والزراعة الكان نضيره كلو راح يا نيل في لحظه وانت لسه في بدايات الدميره *** رغم مأساتنا الكبيرة ورغم مأساتنا المريرة برضو في الناس باقي إيمان والنفوس بالله صبحت مستجيرة والقلوب الفيها إيمان بالصبر دائما جديرة ما بهز توحيدنا طوفان أو زلال أو دميره والقرى الراحت معاك باكر البنيان مصيرها في العوالي تكون قرانا العيون صبحت بصيره ونحن قررنا وخلاص تبقي دي النكسه الأخيره وتاني يا نيلنا المبارك ما بنخاف من يوم تسابك ومابنخاف من الدميره شعر: علي الكرار هاشم محمد- الرياض