أنة المجروح
كلمات : سيد عبدالعزيز
يا أنة المجروح ..يا الروح حياتي تروح
الحب فيك يا جميل.. معنى الجمال مشروح
الحب ده نار فى الجوف زى الزناد مقدوح
منه الجبابرة تلين لصوت بلابل الدوح
وتصاحب النسمات تفضل معاها تدوح
بين نغمة الأشواق ومحاسن الممدوح
الناس تحب رؤياك بالخاطر المشروح
يا ملفت الأنظار يابسمة المفروح
وانا أهدى ليك الحب حب من فؤاد مجروح
حب الشحيح للمال حب الجبان للروح
سورية فى السودان بحبى ليكى أبوح
يا عنب جناين الشام أتمنى منه صبوح
وانشد فؤادى الضال بين الرياض مذبوح
وأرى الهلال فى ظلال تلك الخميلة يلوح
أنا لو ضمنت رضاك اكون سعيد ممنوح
يا من تسر رؤياك تفرح وتنسى النوح
تكسى النهار بجمال خديك جمال ووضوح
منه الغزالة تقيف فى موقف المفضوح
من الوله للقاك دمعى العزيز مسفوح
ناقم على الأيام مع أنه طبعى صفوح
انا والخيال فى جدال وانت بنداك منفوح
كل ما النسيم يغشاك زى الحديقة تفوح
رايق كحيل نعسان انسان رقيق وجموح
ساحر العيون بجمال لسواك ما ممنوح
ان كان تميس بتميس ان كان تموح بتموح
عدل الطبيعة جعل جور الحبيب مسموح