|
|
 Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! (Re: بكري الصايغ)
|
الكل فـي السودان اصـبـح يسـخـر مـن هـذاالتـعدادالذي خـرج مـنه 10 مليـون سـوداني بالخـارج ...وتـجـاهـل ايـضـآ تعـداد الـمغتـربييـن ولـم يعتـبـرهم سـودانييـن رغـم انـهـم كانوا دومآ ومازلوا ( الابـقار الـحلـوب )التـي تـدر علي النظام ( دولار اسـتـرليـنـي ريال يورو درهـم )!!، ....
الكل يسـتهزي بهـذا الاحـصاء السكاني الفاشـل الذي لـم يشـمل سـكان ( حـلايب ) وعادت فرق التعداد مـن الـحـدود السـودانية لقواعـدها في بورتسـودان بلا احـصـاء وبلا ارقام!!.
الكـل فـي بلـدنا يسـتـغرب وان تطـلق الـحكومة علـي هـذه الـمهـزلة اسـم ( الاحـصـاء السـكاني لعـام 2008 ) ولـم يشـمل مناطـق كبيـرة وكثيـرة بالبلاد!!!
وسـخـرت ايضآ وسائل الاعـلام الـمحـلية جـهارآ عـيانآ مـن (مـسـخـرة !!) التعـداد... وهـاكـم واحـدة مـن سـخـريات جـريـدة (السـودانـي):
التعداد السُلطاني!!!
------------------
جميع الحقوق © 2006 لصجيفة ( السودانى ).
العدد رقم: 886 2008-05-02
عبد اللطيف أحمد:
رفع المسؤول سماعة الهاتف وهو يتحدث بثورة غضب عارمة ويرقي ويزبد وهو يقول:
= اسمع تجيني هسا دي.. أنا عاوز أتناقش معاك وأعرف منك كل التفاصيل.
لم يمض وقت طويل حتى دلف إلى مكتب المسؤول شخص يحمل ملفاً ضخماً مكتوباً عليه سري للغاية وهو يتصبب عرقاً يقف أمام المسؤول محاولاً رسم نصف ابتسامة على وجهه وهو يقول:
- اعصابك سعادتك.. الموضوع ما مستاهل كل الثورة دي..
المسؤول منتفضاً:
= كيف ما محتاج كل الثورة دي.. والناس كلها بتقول ليك إنو ما جو عدوهم؟!
جلس المسؤول بعد أخرج منديلاً من جيب بدلته وهو يمسح على العرق الذي تصبب منه بغزارة ثم يقول:
- اشاعات يا سعادتك.. عشان تااااني بعد فترة يجو يقولوا الانتخابات مزورة..
= طيب وين النتيجة المفترض تجيبها لي هنا قبل اسبوع؟!
رفع الفائل الذي كان يتأبطه ملوحاً به وهو يقول:
- أهو دي سعادتك..
ثم يبدأ بقراءة ما هو مكتوب فيه لتهدئة خاطر المسؤول فيقول:
- أول حاجة أنحنا طبعاً اعتمدنا في التعداد دا على ناسنا بس.. والشعب البجعجع دا حالياً أنحنا ذاتنا ما محتاجين لي صوتو في شيء.. لأنو كل الناس تابعة لينا و(لله الحمد) من قبل ومن بعد.
= يا ريت تدخل لي في الموضوع طوالي عشان أنا وراي مليون حاجة وحاجة عاوز اعملها.
- جداً سعادتك..
ثم يبدأ بالشرح وهو ينظر إلى الأوراق التي أمامه ويقول:
= أول حاجة طبعاً أنحنا بعد العثرات المرا بيها التعداد قمنا كونا فرق عمل ميدانية.. وحصرنا العد في ناسنا.. ولقينا و(لله الحمد) من قبل ومن بعد إنو عندنا حوالى الخمسة ملايين ديل مسؤولين.
المسؤول وقد أخذ نفساً عميقاً وهو يستند على ظهر الكرسي الجالس عليه ويقول:
= الحمد لله.. دي نتيجة ممتازة جداً.. ومطمئنة خالص.
- لا سعادتك.. دي ما النتيجة النهائية.. لأنو كل واحد من الخمسة ملايين مسؤول ديل عندو مدير مكتب.. يعني خمسة ملايين مدير مكتب زايد خمسة ملايين مسؤولين بتعمل معاك عشرة ملايين شخص..
- ياااااااما إنت كريم يا رب
= دا غير إنو أي خمسة ملايين مسؤول عندو سكرتير لمدير المكتب.. يعني خمسة ملايين مسؤول زايد خمسة ملايين مدير مكتب زايد خمسة ملايين سكرتير مدير المكتب يبقى الناتج خمسطاشر مليون نفر.. بالإضافة لخمسة ملايين سكرتيرة للمكتب.. زايد خمسة ملايين كمان سكرتارية تنفيذية للمكتب دي براها عملت معانا خمسة وعشرين مليون نفر.
= الحمد لله الذي وفقنا لأن ننجح.
- ونجاح باهر مش أي نجاح كمان..
= تعبنا ما راح هدر ساي.. بعد طمنطاشر سنة من المعاناة والجري والتعب.. من حقنا اننا نحصد.
- لسا سعادتك لمن تسمع الباقي!!
= لسا في باقي..
- أُمال سعادتك.. بعد الكلام القلتو ليك دا كلو من مسؤول لمدير مكتب وخلافو.. تاني عندك أي مسؤول من الخمسة ملايين ديل عندو اربعة نسوان يعني دي عشرين مليون تاني، وأي مرا من نسوان المسؤولين الخمسة ملايين ديل طبعاً عندها سواق.. يعني خمسة ملايين سواق ديل كلهم بيدينو لينا بالولاء والطاعة..
المسؤول واقد انتفخت أوداجه:
يعني بالصورة دي ممكن نعمل اكتفاء ذاتي من المسؤولين.. ونمزق (فاتورة) الشعب دا قريب..
- أكيد سعادتك.. دا كلو بفضل رعايتكم الكريمة لينا.. وكمان ما تنسى إنو المسؤول الواحد بيعادل ليه ولاية كاملة.. من حيث المنصرفات والنثريات.. يعني البصرفو مسؤول واحد بس بعادل ليه منصرفات تلاتة أربعة ملايين نفر من الخلق الحايمة دي.
= وممكن كمان نعمل منهم تصدير للخارج..
ثم رفع رأسه إلى سقف المكتب وهو يقول:
= يعني ممكن في موسم الحج نودي لينا زي كم مليون مسؤول مع (الهدي) البمشي من هنا.. دي براها ممكن تشيل عن كاهلنا رهق فواتير الموبايلات والكهرباء وغيرو.
- جربناها في الموسم الفات الفكرة دي.. لكن ما لقت رواج!!
= الما لقى رواج شنو.. الهدي واللا المسؤولين؟!
- الاتنين مع بعض!
= يبقى الغلطة كانت منكم لأنكم ما وديتو ليهم مسؤولين نقاوة..
- بالعكس.. انحنا ودينا ليهم مسؤولين نقاوة النقاوة.. دخلناهم معسكرات و(أعفينا ليهم اللحى).. لكن برضو هناك زي ما انت بتعرف عملوا ليهم كشف نفسي.. ولقوا عندهم أمراض كتيرة.
= أمراض شنو؟!
- لقوا نسبة (الفساد) مرتفعة في دمهم.. وكمان عملوا ليهم فحص (ذمم) لقوا جزء كبير منهم ذممهم منتهية، والجزء الأكبر ما عندهم ذمم من الأساس.. وكمان مصابين بداء (الاختلاسات)..
= وانتو ما كان تعملوا ليهم عمليات تجميل يعني على الأقل كنتوا تعملوا ليهم (زراعة ذمم) أو (غسيل ذمم) حتى تودوهم!!
- أدينا كل واحد يعمل عمليات (شفط دهون) حتى إنو يزيل أعراض أمراض الفساد (البارزة) على اجسادهم.. لكن ما نجحت لانو الفساد بقى مستشري في كل جسمهم.. وعمليات شفط الدهون بقت عمليات (شفط القروش).
رفع المسؤول سماعة الهاتف الداخلي وهو يقول لمن بالطرف الآخر:
= جيب لي أربعة محاسبين وتلاتة مراجعين.. خليهم يجيبوا معاهم كم آلة حاسبة بالله..
وضع سماعة الهاتف.. ثم يقول للشخص الجالس:
= واصل واشجينا.
- جداً سعادتك.. بس إنت عاوز المحاسبين والمراجعين ديل لي شنو؟!
= كيف ياخي.. انت بتتكلم عن ملايين ودي انا بفتكرها ثروة (حزبية).. ولازم نكون دقيقين في حسابنا.. عشان ما يجينا واحد بُكرة يقول لينا (اختلستوا) مني زول واللا شلتو مني نفر!!
- أكيد سعادتك..
ثم يعود مرة أخرى إلى الشرح وهو يقول:
بعد العدد الضخم دا من جيش المسؤولين حسب التعداد السُلطاني الخامس وضعنا هامش للناس الما محسوبين.. يعني عندك ملايين المسؤولين طبعاً بكون عندهم مراسلات وفراشين وعمال وخدم في البيوت وحشم دي انحنا واضعين ليها زي تلاتين مليون.. دا غير افراد اسر ملايين المسؤولين ديل من اب وأم وعم وخال.
يميل إليه برأسه ثم يقول بصوت هامس:
= أهم حاجة الشعب.. الناس دي كلها بتقول إنكم ما جيتو عديتوهم حسب التقارير الوصلتني.
- الشـــــنو؟!
= الشششششششعب..
- قصدك الخلق الحامية في الشوارع دي.
= ايوا.. ديل برضو مهمين كان مفترض تشوفوا ليهم حاجة تضايروهم بيها.. خصوصاً وانو طموحاتهم ذاتها تافه.. يعني ما كان بكلفنا حاجة لو عملنا العمليات القيصرية مثلاً مجانية.. وخلينا دواء الملاريا برضو مجاني.. ونزلنا الأسعار شوية.. وعملنا ليهم ظلط ظلطين يفرحوا بيهم.
- لا سعادتك.. ما محتاجين ليهم في حاجة.. نعمل بيهم شنو..
= كيف ياخي نعمل بيهم شنو.. أمال الاغاثات والاعانات الح تجينا بعدين دي نشيلها باسم منو.. انت عارف الاحزاب والمعارضة و...
مقاطعاً بسرعة:
- احزاب شنو ومعارضة شنو الإنت بتقول فيها سعادتك ديل اختلافاتهم بس بقت عاوزة ليها (تعداد) سيبك منهم..
= لكن برضو انا بشوف إنو الشعب مهم.
شعب ايه الإنت جاي تقول عليه.. أنحنا حسب سياستنا إنو لمن نرتقي بأننا نعمل شعبنا كلوا مسؤولين فدا بعني إنو حتى الاغاثات بتجي محترمة لشعب مسؤول ومحترم.. ومع ذلك انحنا ما قصرنا وعملنا تعداد سكاني.
= ممتاز.. والحصل شنو.. لقتوهم كم؟!
- الحقيقة أنحنا شلنا عينات عشوائية كدا من كل مكان.. ولقينا حسب الاحصائيات العملناها إنو ربع الشعب دا صالح عام.. ودا زي ما انت عارف شعب معارض لسياساتنا و(مشروعنا الحضاري)!
يرفع المسؤول حاجبيه في دهشة وهو يقول:
= ربع الشعب صالح عام!!
- أيوا سعادتك..
= طيب والباقين.. لانو بنفس الحسابات دي لو ختينا إنو ربع الشعب دا اربعة ملايين شخص فدا بعني إنو الاربعة ملايين ديل تمانية ملايين بزوجاتهم.. وممكن يكونوا عشرين مليون باولادهم واخوانهم و...
- لا سعادتك.. انحنا حاجات زي دي ما بتفوت علينا.. لانو (بحمد الله) غالبية نسوان الشعب واولادهم (حسب سياستنا) ماتوا بأخطاء طبية وإهمال من عمليات ولادة وخلافو بالنسبة للنسوان.
= طيب والرجال والشباب؟!
- ديل (بحمد الله) وزعناهم على كذا جهة لكن الغالبية ماتت في شوارع الموت العملناها زي شارع (التخطي) الخاطئ ودا اسمو مستنبط من الشعار البقول (إنو الحادث وقع نتيجة للتخطي الخاطئ والسرعة الزايدة) الوضعناه في الافتتاح البقولوا أي مسؤول يمسك إدارته.
= فعلاً الشارع دا ومعاه شارع (ندمي) خدمونا خدمة كبيرة.. أنا افتكر نعمل ليهم تكريم ونسمي كم وزارة باسمهم.
- انحنا فعلاً عندنا حاجات مسمية باسهم وهي اسم على مسمى يعني زي الخدمة الـ(مدني)ـة دي أخطر من الشارع نفسو وبتحصد كل زول بتقدم عشان يقضي حاجة من حواجه والميزة إنها بتقتل وما بتخلي ولا دليل إدانة واحد عليها.. يعني البقدم لقطعة أرض وهو في عمر خمسة وعشرين سنة بنرد عليه بعد ما يصل ارذل العمر.. وردنا دا هو البوديه في خبر كان وعلى ذلك قِس.. وعندك كمان (الدفنس المدني).. ديل برضو كمان ما بقصروا بمشوا بعد ما خلاص كل حاجة تكون...
المسؤول مقاطعاً:
= طيب أنا حالياً بفكر لي في حاجة تاني.. يعني ممكن نضيف الشوارع دي لوسائل تنفيذ الإعدام بكون أفضل عشان يكون في مبرر لقصة الموت الكتيرة في الشوارع دي.
- يعني قصدك ندخل شوارع المرور السريع ضمن وسائل تنفيذ الأحكام الحدية..
= بالضبط كدا.
- فكرة جميلة.. ويكون الحكم حكمت المحكمة حضورياً على المتهم فلان الفرتكاني المدان تحت المادة 130 القتل العمد بالإعدام (سيراً) على شارع مدني.. بدلاً من الاعدام شنقاً حتى الموت.
= ايوا كدا.. لازم انحنا نخلي المقادير تلعب دورها في قصة الموت دي.. عشان إنت عارف الغرب وتربصو بينا وبُكرة يجونا يقولوا لينا ادوات موتكم دي مخالفة لحقوق الإنسان.. ونلقاهم تاني يوم معانا هنا.
صمتا لبرهة ليقول المسؤول مرة أخرى:
= نرجع لموضوعنا..
- ياتو موضوع؟!
= التعداد السكاني بتاع الشعب.
- أيواااا.. أها زي ما قلت ليك.. لقينا إنو ربع الشعب صالح عام.. وتاني عندك زي (10%) من ربع الصالح العام ديل كانوا الغاء وظيفة.. بالإضافة لربع تاني ديل بقوا (بايظ) لـ(حريق) الخصخصة والاستثمار.
= طيب لحدي هسا انت بتتكلم عن ربع الشعب.. أها والباقين؟!
- الباقين ديل عندك ربع الشعب بقو مجانين.. ودا انا بفتكرو (ضُعف إيمان) منهم.. والشعب الانت بتتكلم عنو دا شعب ضعيف جداً انحنا ما محتاجين ليه في حاجة.. يعني تخيل الواحد يكون شغال في وظيفة محترمة وبياخد آخر الشهر راتب ممتاز يقوم يجن عشان ماعندو مصاريف المدرسة.. طيب من البداية مفترض (تتصرف) انت مش عارف إنو عليك مصاريف دراسة.. ويقعد يقول الحكومة ما وفرت لينا مجانية التعليم.. ما هو انحنا ديل بـ(نتصرف) ونقري أولادنا بالشيء الفلاني.
= ممكن نبدلهم بشعب من شرق آسيا وندفع الفرق.. خدومين وما بكلفونا ربع تكلفة الشعب النقناق العاوز مجانية في العلاج والتعليم وتخفيض في الأسعار وكل حاجة؟!
- جنن تعرفو ولا جنن ما بتعرفو.. الشعب دا صدقني ما بنلقى زيو في كل الدنيا .. ما هو انت شفت الحصل في شمال الوادي زادو ليهم الرغيف زيادة خفيفة قاموا وعملوا مظاهرات.. هسا انحنا كل يوم والتاني نزيد في حاجاتنا زي ما نحنا عاوزين زول بفتح خشمو مافي.. لا بعمل مظاهرات.. لا بضرب عن عمل لا بهش ولا بنش.. شعب زي دا الحكومات كايساه بالقروش وما لاقياه.. لكن لو انت مُصر على قصة البدل دي فممكن نبدلو بـ(عِدة) و...
المسؤول مقاطعاً مرة أخرى:
= بي كدا يكون دا نص الشعب.. أها النص التاني حسب التعداد السُكاني الخامس؟!
- نص الشعب التاني بقى كلو (تحويل رصيد)، و(هايسات)، و(قريسات) و(امجادات)..
ثم انتصب واقفاً بعد أن ترك كل الأوراق على طاولة المسؤول وهو يهم بالخروج من المكتب ويقول:
و(ركشات) و(كشات)!!
لسعة:
نُعيب تِعدادكم والعيب (فيكم) ومالتعدادكم عيب (سواكم)..
____________________________________________________________________________
|
|
 
|
|
|
|
|
| العنوان |
الكاتب |
Date |
 مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 08:19 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 08:24 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 08:30 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 08:56 PM |
 Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 09:11 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 09:41 PM |
 Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 11:10 PM |
 Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 11:29 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | SAMIR IBRAHIM | 04-05-08, 11:36 PM |
 Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-05-08, 11:45 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-07-08, 05:56 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-07-08, 06:18 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-07-08, 07:20 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-08-08, 11:38 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-09-08, 00:15 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-09-08, 00:49 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-09-08, 01:00 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-09-08, 01:20 AM |
 Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-09-08, 10:56 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-10-08, 00:17 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-10-08, 03:52 PM |
 Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-11-08, 02:25 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-11-08, 10:50 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-15-08, 09:35 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-21-08, 11:42 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 04-22-08, 00:03 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-02-08, 01:44 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-06-08, 01:26 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-06-08, 11:42 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | Ro3ah | 05-07-08, 02:54 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-07-08, 11:03 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | Ro3ah | 05-07-08, 12:51 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-07-08, 10:40 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-10-08, 00:53 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-20-08, 00:55 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | AMNA BAGRAB | 05-20-08, 05:58 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-20-08, 06:46 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 05-26-08, 04:43 PM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 06-04-08, 08:06 AM |
| Re: مـهزلة: الانقاذ يستورد من الكويت مصطلح (بدون )ويطبقه علي عشرة مليون سوداني بالخارج! | بكري الصايغ | 06-04-08, 08:16 AM |
|
| |
فيس بوك
تويتر
انستقرام
يوتيوب
بنتيريست