|
|
 Re: سارة الفاضل ....مناضلة ...اشتهرت بالتواضع (Re: نيازي مصطفى)
|
شكرا نيازى
وصال المهدي : الأسرة فقدت ركيزة مهمة
الأنصار يشيعون سارة الفاضل لمثواها الأخير
ام درمان : الصحافة
شيعت جموع غفيرة من جماهير الانصار وسكان مدينة ام درمان سارة الفاضل محمود ، حرم الصادق المهدى ،الي مثواها الاخير امس ، وشق الجثمان طريقه بصعوبة وسط الجموع المحتشدة من المنزل في حي الملازمين الي قبة الامام المهدي، حيث وورى الثرى هناك .
واحتشدت جموع المعزين في المنزل، واستقبل زوجها الصادق العشرات منهم من الانصار في مشهد اكتسى بمظاهر الحزن، التي كانت بادية على وجوه الجميع بفقد ام الانصار كما كانت الفقيدة تكنى .
وعبرت شقيقة الصادق المهدي وصال حرم الدكتور حسن الترابي لـ «الصحافة» عن حزنها العميق لفقدان سارة ، قائلة انها كانت تتمتع بصحة جيدة ولم تكن تشتكى من اى شئ حتي اللحظات الاخيرة من حياتها .
واضافت «ان الفقيدة عندما رحلت كانت فى عز نشاطها ، وان روحها فاضت عقب انتهائها من الاجتماع المشترك مع الحركة الشعبية فى اطار الحوار بين الحزبين حول مستقبل السودان» ، مشيرة الى ان هذا دليل على اهتمامها حتى فى اخر ايامها بالشأن العام .
واعتبرت، وصال الفقيدة متعددة المواهب وفائضة الامومة وحنونة على كل الناس بحسبانها ام الكل ، الى جانب ذوقها الرفيع فى التنظيم والتنسيق والابتكار ، فضلا عن صداقاتها الكثيرة والممتدة فى المجتمع السودانى بمختلف اشكاله والوان طيفه، ونشاطها فى العمل العام، والعمل الخيرى والطوعى.
وقالت وصال، ان الفقيدة رغم معاناتها من ارتفاع ضغط الدم، الا انها كانت تقوم بكافة التزاماتها تجاه المنزل والكيان والحزب، والدليل على ذلك اجتماعها الاخير مع الحركة الشعبية ، واضافت ان فقدها يعنى فقداننا لركيزة مهمة لنا في الاسرة ولزوجها الامام الصادق ، واضافت «وفاتها تمثل فاجعة كبيرة ».
ونسة إرشيفية مع سارة الفاضل
أولادنا كلهم مؤهلين لحكم السودان.. وإنتو عندكم منو غير الصادق
عندما اتصلت بالسيدة سارة الفاضل زوجة السيد الصادق المهدي وطلبت منها الموافقة على هذه الونسة، تحفظت هي على الحوارات في الجوانب الخاصة إلا انها وافقت بتحفظ.. ذهبت إليها في منزلهم العامر بالملازمين. استقبلتني في الطابق الارضي: أهلاً يا ولدي.. وابتدأنا الاسئلة وكانت اجاباتها حاضرة وسريعة وتلقائية.. إلا انها لم تنس ان تذكرني في النهاية او تحذرني بمعنى أصح: غايتو ما تمشي تقولني كلام ما قلته زي ما بعملوا بعض الصحافيين.. وهذا كل ما قالته..
* في البداية عندما قلت للزملاء في الجريدة اني متجه الآن لمقابلة السيدة سارة الفاضل، قالوا لي اذن انت ستحاور السيدة القوية..
- (تضحك)
* هل أنت فعلاً السيدة القوية؟
- أتمنى أن لا أكون السيدة الضعيفة في أي حال من الاحوال لكن اسألك عن قوية بياتو معنى؟ فإذا كانت قوة عزيمة أو قوة في الاصلاح أو قوة في العمل اتمنى أن أكون كذلك..
* ولو قلت لك اني فهمت انك السيدة الحاكمة في الحزب وفي البيت..
- أبداً.. الحزب عندو مؤسسات وهي البتعمل قراراته وبالمناسبة البيت ذاتو بقى عندو مؤسساتو...
* كيف هي مؤسسات البيت اذا فهمنا مؤسسات الحزب؟
- يعني انحنا في بيتنا هنا ما بنتخذ قرار في موضوع كبير أو صغير إلا باجتماع يعقد لكل أعضاء الاسرة زوجات الأب الاثنين والأبناء والبنات كلهم ونتخذ قراراتنا اذا الموضوع بيخص أسرتنا الصغيرة دي..
* وين الازواج والزوجات للأبناء؟
- أنا جاياك.. اذا كان القرار بيمس الاسرة الكبيرة بندعو ليه أصهارنا..
* ده شغل سياسة بقى؟
- في الحقيقة نحنا نقلنا العمل السياسي ومؤسساتو للبيت.. حتى النواحي المالية بقت مؤسسة.
* بمعنى؟
- يعني كل ما يمتلكه الامام من مال في الدنيا الزايلة دي عمله في شركة كلنا فيها حملة أسهم عندنا جمعية عمومية ومكتب تنفيذي ومستشارين نستعين بيهم من بره فكل شئ في بيتنا ده يمشي بالطريقة دي..
* بالطريقة الديمقراطية؟
- أيوه بالديمقراطية والمؤسسية.
* مرات بتحتاجي تعملي لوبي عشان تمرري موضوع في اجتماع الاسرة؟
- اللوبي ده جزء من الديمقراطية ومن حق كل زول انو يعمل لوبي لوجهة النظر البفتكرها صاح ينجح أو يفشل بتوقف على وجهة نظر الآخرين المعاك.
* بترتضي النتيجة مهما كانت؟
- طعباً..
* دون أن تبدي غضبك عليها؟
- ممكن تبدي غضبك اذا بقت النتيجة ضدك شديد وتزعل لكن كمان بتلتزم بيها لانك ارتضيت القاعدة..
* في اجتماعات الاسرة هل للسيد الصادق صوت واحد زي العند واحد من اولاده؟
- بكون عنده نفس الصوت لكن في الآخر اذا الحاجة بقت النتيجة ضد اقلية وعددها لا يستهان بيها يقوم يفتش مخرج عشان الاقلية الكبيرة دي ما تضام ودي طبعاً الديمقراطية..
* .............؟
- لا، الرأي بمشي لكن بتعديلات طفيفة ترضي الاقلية.
* حاسة انو عملية وزن المعادلة البعملها السيد الصادق دي كويسة؟.
- شوف نحنا شعب اتعود على مسألة الجودية بعدين هي قد تكون سلاح ذو حدين.. لكن نحنا بناخد في الاعتبار خبرته وحنكته وتحليلاته وانا بالنسبة لي مش لأني زوجته لكن بالمعايشة لقيت تحليلاته في حاجات كتيرة جداً جداً هي الصائبة والغالبة والراجحة..
* مثلاً؟
- مثلاً في مؤتمر القمة الانعقد في الرياض وهو قام رسل ليهم توصيات تقريباً 80% كانت هي التوصيات الطلع بيها المؤتمر.. وبرضو رأيه في مسألة العراق وحرب ايران وهو بالمناسبة كان نشاز مع رأي العرب في الآخر كان هو الصواب رأيه في انتهاء الشيوعية في كتابه الديمقراطية وراجعه وأخيراً رأيه في نيفاشا.
* قاعدة تشوفي اخطاء السيد الصادق في السياسة؟
- طبعاً لو في بقولها ليهو..
* اذن طوالي انتو في جلسات نقاش سياسية؟
- ده الاحساس الغالب عند الناس لكن نحن في بيتنا عندنا همومنا الآخرى البنناقشها.. صحي بيتنا فيهو سياسة كتيرة مع زوارنا وناسنا وكده لكن انا وقت ألاقي الامام براي ما بفتح معاه اي موضوع في السياسة لانوا يا ابني الحياة حتبقى مملة جداً..
* لكن واضح انو بيتكم كله متفرغ للسياسة بداية بالسيد الصادق وانتي والاولاد والبنات اتجاههم للسياسة بيؤكد رغبتكم في السياسة..
- لا والله بالنسبة لاولادنا انا كنت راغبة تماماً انهم ما يدخلوها ابداً.. وكنت بتمنى انهم يبعدوا عنها.
* ليه؟
- السياسية شقاء وتعب اصلو ما معقول.
* يعني ما عندكم دور في دخولهم السياسة؟
- والله دخلوها دون أي ايعاز مننا.. لكن كمان دي رغبتهم..
* بتقبلوها ليهم لانها بتحقق نجومية مثلاً؟
- لا ما بنظر ليها من الناحية دي لكن من ناحية مردودها للمجتمع.. شوف يا ولدي نحنا كان ممكن نعيش مرتاحين ماكلين وشاربين ولابسين ونسافر نتفسح ونعمل نجومية بطرق أخرى أقل ضرر وأقل تشريد وسجون وتعب، واقل حرمان من اولادك وزوجك بمعنى الزوجة والزوج..
* كدي خلينا في الحرمان من الزوج دي عانيتي في الحتة دي اكيد؟
- طبعاً.. أنا مثلاً متزوجة من الامام لمدة 44 سنة حتي الآن والله الفترة القعدتها مع الامام ما بتساوي ربعها.. ولو دايره نجومية مريحة ممكن اعملها في عدد من الاهتمامات انا مؤهلة اعملها فيها..
* زي شنو مثلاً؟..
- أنا مثلاً بحب الفلكلور وبحب التراث السوداني سواء كان ملبس او مأكل أو مظهر او مسكن ممكن كان اعمل في احياء التراث السوداني لكن الزول بشوف انو انت مواطن البلد دي ليها حق عليك.
* يعني قدركم السياسة..
- أنا شاعرة كده..
* ومجبرين عليها؟
- ما مجبرين لأنو انحنا عندنا أولاد ما عندهم علاقة بالسياسة.. انحنا زوجتين عندنا عشرة اولاد ستة بنات واربعة اولاد ما كلهم شغالين في السياسة الشغالين فقط ثلاثة اربعة بس..
* الباقين وين؟
- فيهم أستاذ الجامعة وفيهم الزراعية والصيدلانية وبتدرس في جامعة والطبيبة والمهندس.
* أمكن لانو صوت السياسة غالب بنعتبر بيت الصادق كله سياسة..
- صحي وامكن تاني لانو الاشتغلو سياسة مننا صوتهم هو الغالب..
* بتتفقي معاي في انو صوت بنات السيد الصادق في السياسة أعلى من صوت أولاده؟
- شوف البشتغلوا سياسة من الاولاد أو البنات كلهم شغالين بدرجات ممتازة.
* طيب لو جينا وقربنا آراءهم في السياسة هل بختلفوا معاكم كجيل؟
- جيب أي محضر وقائع جلسة من جلسات المكتب السياسي لحزب الامة بتلقى فيه آراء متباينة جداً أي زول بقول رأيه..
* وقت ترجعي البيت وتبقى أمهم ما بتناقشيهم ليه قبيل اختلفوا معاك في الرأي؟
- لو عملت كده بكون هزمت مشروعي كله.. أنا بسببي لأني مرقت في مظاهرة في أم درمان الثانوية طلعوا بنات المهدي من المدارس وعملوا لينا مدرسة المهدي الثانوية، ودي برضو ما استمرت لانو تاني دخلوا الجامعات مع الناس.
* طيب هل في اجتماعات الأسرة حصل انك اتفقتي في الرأي مع السيدة حفية الزوجة الاولى للسيد الصادق؟
- كتير.. قد نتفق وقد نختلف وده ممكن يحصل برضو في الجمعية العمومية لمؤسساتنا الاقتصادية لكن بنطلع بره اخوات..
* يعني ما عندكم حساسية النسوان العاديات زوجة وضرتها؟
- دي حاجة فطرية.. كضابة لو قلت ليك ما بتحصل حاجة زي دي بين زوجتين لراجل واحد ونحنا ما ملائكة قد تكون الحساسية موجودة لكن لا تعني انك ما تشوف الحقيقة..
* خلينا نعرفك بصورة قريبة.. هل انتي اصلاً من بيت المهدي أم كان زواجك من الامام هو مدخلك لهذا البيت العريق؟
- أنا بنت المهدي الوسط أمي بت المهدي وأبوي ود المهدي.. أبوي الفاضل محمود عبد الكريم هو ولد ساتي علي اللي هو ولد حاج شريف، والمهدي ود حاج شريف ومتزوج بت المهدي أمي بت عبد الرحمن المهدي..
* معناها انت عندك في بيت المهدي زي ما عند السيد الصادق؟
- بالضبط..
* زواجك من السيد الصادق كان عادي؟
- ما عادي.. لأنو السيدة حفية بت خالتي أخت أمي.. أمي وخالي الصديق وخالتي شامة أم حفية أخوات بنات أم وأبو.. وأنا وحفية اتولدنا في بيت واحد.. لذلك هو ما عادي لكنه تم ومشى بطريقة ممتازة وهسة أنا وحفية عايشين في بيت واحد بعد ما الانقاذ شالت بيت الامام المهدي وبقت هيئة شؤون الانصار ما عندها بيت الامام طلع من بيت ود نوباوي للهيئة وجينا نحن الاثنين نعيش هنا مع الامام.
* لكن أي واحدة في حياتها المنفصلة؟
- طبعاً أي واحدة بحياتها المنفصلة من مطبخ وأماكن..
* هل حصل انكم تدخلتم في زواج أولادكم ولو بطريقة غير مباشرة؟
- شوف أنا وحفية قريبات جداً من الامام، هي بنت عمته زي ما أنا بت عمته ونحنا الثلاثة حبوبتنا وجدنا واحد عشان كده من البداية هو قال لي أولادنا حكاية انت داير منو وراغب في منو دي ما بتحكمها قواعد أو قوانين لكن بقدر الامكان حقو تبعدوا من الاقرباء.. لأنو دمنا قريب من بعض جداً ولو حصل أولادنا اتزوجوا أقرباءهم ده قد يصيب أولادهم بضعف ومشاكل صحية بس للسبب ده..
* وابتعدوا عن الاقرباء؟
- اتنين بس فيهم شبهة قرابة اللي هي زوجة صديق وهي جدها أبو أمها السيد عبد الله الفاضل وأبوها من ناس البرير والامام الحلو متزوج رنده وهو ود الخليفة علي الحلو ونحنا بنعتبر الخلفاء اقرباءنا برضو.. عبد الرحمن الغالي انصاري بس.. عادل شريف والواثق البرير ومرتضى كمال خلف الله ديل حتى اتجاهاتهم ما انصاريه..
* أنا كنت داير أسألك عن ده.. يعني معناها ما في شرط لانصارية الزوج أو الزوجة لأولادكم؟
- لا.. ديل حتى اتجاهات أسرهم ما أنصار وفي دي ربنا نحنا اكرمنا.. وربنا اكرمنا أنا وحفية حتى في عدد الأولاد أي واحدة مننا عندها ثلاثة بنات وولدين يعني بالقسطاط ودي موزونة الهياً..
* انت عايشتي تجربة السيدة وصال في زواجها من الدكتور حسن الترابي؟
- لا أنا كنت في أمريكا في الدراسة هناك لكن وأنا راجعة من أمريكا وكان وقتها خالي الصديق اتنقل للدار الآخرة عليه رحمة الله، نزلت ليهم في باريس عشان أعزي وصال قبل ما أجي السودان.. لكن ما عشت فترة قبل زواجها.
* لكن سمعت عن احداث ما قبل الزواج..
- هي كانت حالة غريبة في بيتنا.. السيد الصادق كان موافق أبوها كان متحفظ..
* هسة بتتعاملوا عادي مع بيت الترابي؟
- هسة وانت داخل علينا انا كنت بتكلم مع وصال.. اولاد د. حسن الترابي عاشوا معانا هنا في البيت ده واتولدوا هنا.. اولاده بقولوا لي أمي وأولادي بقولوا ليها أمي ونحن أصلاً ما عندنا عمتي وخالتي كلهم أمي وأبوي..
* لكن بالضرورة أيام الانقاذ الاولى واعتقال السيد الامام حصل شوية توتر..
- مؤكد..
* اذن الأبناء بدفعوا ثمن خلافات سياسية للآباء..
- صحيح لأنهم عاطفياً هم عاشوا في حتة واحدة.. مثلاً أيام انقلاب مايو والجماعة ديل في السجون الامام والترابي طبعاً بنمشي اتنين للزيارة مثلاً وتقعد واحدة مننا الثلاثة أنا وحفية ووصال مع الاطفال وهي بتكون أمهم وكان عدد الاولاد الوقت داك 12 وصال عندها 4 وانا عندي 4 وحفية عندها 4 البتقعد دي بتكون أمهم كلهم.
* و..............؟
- مثلاً يوم صديق ولد وصال كان في جنوبي ضربو والله أنا شفقت عليه ذي ما بشفق على عبد الرحمن وأمكن أكتر لا نوم لا اكل وقلق شديد..
* كونك واحدة من بيت المهدي الكبير والعريق ده ما حاسة انو اعتقلك مقارنة بي اقرانك؟
- طبعاً.. اعتقال شديد انت ما سمعت بالمثل البقول الاسم مرفعين سيدو.. (تضحك) بحدك من أشياء كتيرة انت في نفسك تعملها زيك وزي أي زول آخر لكن غايتو من ما تتذكري انتي منو تقيفي..
* لكن في نفس الوقت أداك فرصة انك تسافري بره السودان في وقت باكر جداً وتقري وكده؟
- أيوه... شوف هو سلاح ذو حدين يا رفعك يا كمان نزلك للحضيض لانو الوقعة من العالي مؤلمة.
* طالما جبنا سيرة الدراسة نسألك بالضرورة عن دراستك الجامعية.. أنا بتخيل انها في العلوم السياسية؟
- لا.. انا درست علم اجتماع واجناس حتى الماجستير برضو فيها وناس جامعة الاحفاد ادوني دكتوراه فخرية قبل 3 سنوات..
* متين دخلتي السياسة رسمياً؟
- أنا في امريكا كنت في اتحاد الطلاب العرب واتحاد الطلبة الافارقة وأنا بعد سفري بي 3 أسابيع حصل انقلاب عبود رجعت دخلت معارضة نظام عبود.. بعد مايو وبعد ما انسجن كل الناس انا بقيت في السياسة بالدرب العديل ومسؤولة مباشرة..
* لكن حياتك كسياسية اطول من حياتك كزوجة؟
- كتير جداً لكن السياسة ظلت تخصم دوماً من حياتي كزوجة لكن الواحد عزاءه في انو تظهر قبل ما نرحل للدار الآخرة نتيجة ما قمنا به..
* لم تظهر أي نتيجة بعد؟
- في حاجات ظهرت لكن النتيجة الدايرنها نحنا اننا نبقى ديمقراطيين وناس تداول سلمي للسلطة وتنتهي الخلافات الماعندها حد..
* متفائلة بمستقبل السودان؟
- أيوه لأنو السودانيين طيبين واستاهلوا كل خير وتانياً السودان واعد والشعب السوداني ده عندو عبقرية وانا بتمنى يحصل انفراج لكل ازماتنا بطريقة مبتكرة من الشعب السوداني المعلم..
* بتشوفي ايجابيات نميري؟
- العملو فينا نميري كشعب سوداني كبير هو البدأ الخراب ده كله.. الانهيار الاقتصادي ابتدأ بنميري التنمية والاستثمار بغير اولويات وما مر شده ابتداها نميري الدكتاتورية والسجون وانواع العذاب والاهانة عملها نميري ما كانت عندنا في السودان برضو الحرامية ابتدت مع مايو..
* انا قصدت تتكلمي لي عن ايجابيات نميري؟
- والله الايجابية الشايفاها انا هي الطفرة الحصلت للمرأة في عهده ودي قد ما تكون مست المرأة في الجذور لكنها أدت المرأة المتعلمة الفرصة لترتقي.
* وايجابيات الانقاذ؟
- (بعد صمت طويل) والله الا انهم مؤخراً وافقوا على ان يكون هناك حوار وجلوس في طاولات المفاوضات لكن برضو سلبوها من معناها.
* (نضحك) يعني يا سيدة سارة حتى الايجابية الوحيدة للانقاذ لكنتيها في النهاية..
- (نضحك) ما قادرة أشوف والله..
* انتي مصدقة الانشقاق بين الوطني والمؤتمر الشعبي؟
- الانشقاق حقيقي لكن انا ما مصدقة انهم ما حيرجعوا تاني.. وهم ناس الشعبي ديل دايرين الناس يصدقوهم يقولوا انو كل العملوه زمان غلط.. لكن احتمال يرجعوا تاني لي بعض.. احتمال كبير..
* هل عندكم أمل في نيل الغالبية في الانتخابات القادمة؟
- اذا هي انتخابات نزيهة وقبلها تعداد سكاني نزيه حزب الامة حيفوز بالاغلبية.
* يعني السيد الصادق هو رئيس الوزراء القادم؟
- هو انتو عندكم غيرو منو؟.. أنا ما شايفه غير الامام الاصلح لحكم السودان نحنا هسة في ضياع..
* أمنيتك انو يرجع يحكم السودان؟
- أنا لو بمرادي انو ما يبقى تاني رئيس وزراء..
* رأيك شنو في الرأي البقول انو عيب السيد الصادق في ناسو؟
- أنا اشتغلت في الديمقراطيتين ومع ناس من شتى الاحزاب وسافرت في وفود لمؤتمرات في الخارج وسافرت لاتفاقية نيروبي في شهر 11 والله الناس العندنا نحنا فيهم نور من ناحية الوطنية والجدية والله وقت اشوف ناس الاحزاب التانيين بقول ناسنا فيهم نور ناسنا اكتر جدية واكتر نزاهة واكتر اخلاص..
* منو الفي اولادكم ممكن يحكم السودان أو بمعنى اقرب بشبه ابوه سياسياً؟
- كل اولادنا مؤهلين لحكم السودان، وكل واحد منهم فيه شئ من ابوه..
* خلينا ندخل معك في البيت.. هل بتهتمي بتفاصيل البيت اليومية؟
- طبعاً والا اكون عملت نفسي ماكينة سياسة انا بشوف جنينتي وبشوف نضافة البيت وفرشو ومخزني فيه شنو.
* بتختاري الاكل؟
- ايوه وبرسل للخضار وبدخل المطبخ اشوف طبخوه كيفن..
* معناها ما بتطبخي؟
- لا لانه هسة ضهري واجعني لكن زمان كنت مرات بطبخ رغم انو معاي طباخ طول عمري لكن في حاجات متخصصة فيها.
* زي شنو؟
- زي فطور الامام ما ممكن اوكله على زول. يعني هو بشرب شوربه لازم اعملها براي بالاضافة للاشراف على غسيل ومكوة هدوموه.
* بتختاري ليه يلبس شنو؟
- لا دوري بنتهي في انو هدومو تكون مغسلة ومكوية ومرتبة..
* بتتضايقي اذا كان مشغول بكتابة او قراية او اجتماع وانت محتاجة ليه في موضوع بعيد عن كل هذا؟
- طبعاً.. كتير يكون محتاجة اناقشه في حاجة اساسية في البيت هسة مثلاً انا محتاجة بشدة ألاقيه اناقشه في موضوع سفري للعلاج بره السودان ما لاقياهو وبكون زهجانة والتلفون ما بديك الفرصة الكافية.
* لكن بتلقى ليه العذر؟
- عاد كان ما لقيت ليه العذر اسوي شنو؟
* شعرت الآن بمدى تعبك الكبير؟
- يا ولدي هي الدنيا دي دار راحة؟ ما دار راحة.
* لكن على الاقل ما شايلة هم اقتصادياً طالما الشركة شغالة واموركم فيها مرتبة..
- كدي يا ولدي انا اسألك في حاجة في البلد دي مرتبة؟ (تضحك) عاد نسوي شنو؟ البيجيبو الله كله كويس وانحنا اتعودنا اننا نعيش حالة الفقر المدقع وحالة اللقا المريح..
* يعني يا سيدة سارة انتو عشتو حالات فقر؟
- كيفن ما عشنا.. الانقلابات كلها عشنا فيها فقر.. زمن مايو كله كنا عايشين فقر لانهم بعد احداث الجزيرة أبا شالوا مننا أي حاجة لدرجة بعنا أي حاجة عندنا عشان نعيش بعدما منعو الناس حتى انهم يدونا هدية.. حتى الهدية يصادروها مننا..
* طبعاً ما كان ممكن أسألك عن عمرك لكن من هذه الجلسة اشعر انك صغيرة مقارنة بسيرتك واسهامك في الحياة السياسية والعامة؟
- صغيرة أنا؟.. أنا اكبر من السيد الصادق بي سنة.
* ما غريبة؟
- ما غريبة ولا حاجة، السيدة خديجة رضى الله عنها كانت اكبر من سيدنا محمد صلى الله عليه وسلم وأم الامام ذاتها كانت أكبر من أبوه بي سنتين.
الصحافة
8/2/2008
|
|
 
|
|
|
|
|
| العنوان |
الكاتب |
Date |
| سارة الفاضل ....مناضلة ...اشتهرت بالتواضع | الكيك | 02-07-08, 07:21 AM |
| Re: سارة الفاضل ....مناضلة ...اشتهرت بالتواضع | Saber Abdelhadi | 02-07-08, 07:35 AM |
| Re: سارة الفاضل ....مناضلة ...اشتهرت بالتواضع | الكيك | 02-07-08, 11:29 AM |
| Re: سارة الفاضل ....مناضلة ...اشتهرت بالتواضع | الزنجي | 02-07-08, 11:42 AM |
| Re: سارة الفاضل ....مناضلة ...اشتهرت بالتواضع | الكيك | 02-10-08, 04:56 AM |
| Re: سارة الفاضل ....مناضلة ...اشتهرت بالتواضع | نيازي مصطفى | 02-10-08, 05:21 AM |
| Re: سارة الفاضل ....مناضلة ...اشتهرت بالتواضع | الكيك | 02-10-08, 05:53 AM |
| Re: سارة الفاضل ....مناضلة ...اشتهرت بالتواضع | الكيك | 02-10-08, 06:27 AM |
| Re: سارة الفاضل ....مناضلة ...اشتهرت بالتواضع | الكيك | 02-10-08, 06:49 AM |
| Re: سارة الفاضل ....مناضلة ...اشتهرت بالتواضع | الكيك | 02-10-08, 09:34 AM |
| Re: سارة الفاضل ....مناضلة ...اشتهرت بالتواضع | الكيك | 02-10-08, 10:20 AM |
| Re: سارة الفاضل ....مناضلة ...اشتهرت بالتواضع | الكيك | 02-17-08, 06:31 AM |
| Re: سارة الفاضل ....مناضلة ...اشتهرت بالتواضع | Sabri Elshareef | 02-11-08, 04:27 AM |
| Re: سارة الفاضل ....مناضلة ...اشتهرت بالتواضع | الكيك | 02-11-08, 10:59 AM |
| Re: سارة الفاضل ....مناضلة ...اشتهرت بالتواضع | الكيك | 02-12-08, 05:13 AM |
| Re: سارة الفاضل ....مناضلة ...اشتهرت بالتواضع | الكيك | 02-12-08, 07:22 AM |
| Re: سارة الفاضل ....مناضلة ...اشتهرت بالتواضع | الكيك | 02-12-08, 10:03 AM |
| Re: سارة الفاضل ....مناضلة ...اشتهرت بالتواضع | الكيك | 02-12-08, 10:20 AM |
 Re: سارة الفاضل ....مناضلة ...اشتهرت بالتواضع | Yasir Elsharif | 02-12-08, 10:14 AM |
| Re: سارة الفاضل ....مناضلة ...اشتهرت بالتواضع | الكيك | 02-12-08, 10:42 AM |
| Re: سارة الفاضل ....مناضلة ...اشتهرت بالتواضع | محمد عبدالرحمن | 02-12-08, 05:14 PM |
| Re: سارة الفاضل ....مناضلة ...اشتهرت بالتواضع | Sabri Elshareef | 02-12-08, 05:30 PM |
| Re: سارة الفاضل ....مناضلة ...اشتهرت بالتواضع | عمر ادريس محمد | 02-12-08, 06:20 PM |
| Re: سارة الفاضل ....مناضلة ...اشتهرت بالتواضع | محمد عادل | 02-12-08, 10:02 PM |
| Re: سارة الفاضل ....مناضلة ...اشتهرت بالتواضع | الكيك | 02-13-08, 05:35 AM |
| Re: سارة الفاضل ....مناضلة ...اشتهرت بالتواضع | المسافر | 02-13-08, 09:09 AM |
| Re: سارة الفاضل ....مناضلة ...اشتهرت بالتواضع | الكيك | 02-13-08, 09:43 AM |
| Re: سارة الفاضل ....مناضلة ...اشتهرت بالتواضع | من الله | 02-13-08, 02:17 PM |
| Re: سارة الفاضل ....مناضلة ...اشتهرت بالتواضع | abubakr | 02-13-08, 02:49 PM |
| Re: سارة الفاضل ....مناضلة ...اشتهرت بالتواضع | من الله | 02-14-08, 05:51 AM |
| Re: سارة الفاضل ....مناضلة ...اشتهرت بالتواضع | الكيك | 02-14-08, 06:44 AM |
| Re: سارة الفاضل ....مناضلة ...اشتهرت بالتواضع | الكيك | 02-17-08, 04:29 AM |
| Re: سارة الفاضل ....مناضلة ...اشتهرت بالتواضع | الكيك | 02-17-08, 07:55 AM |
| Re: سارة الفاضل ....مناضلة ...اشتهرت بالتواضع | محمد عبدالرحمن | 02-21-08, 09:02 AM |
|
| |
الكيك
فيس بوك
تويتر
انستقرام
يوتيوب
بنتيريست