|
|
 الرجال السائبون في بلاد الغربة ..
|
بتذكّر عاماً أول لمن كانت الدراسة حدّها الوسطى والبيقرا الإعدادية بيتخرج أستاذ واكن التعليم محصور على فئة محددة من أبناء الموظفين والفرص محدودة في مدرسة خور طقّت وخور أبو عنجة وخور عمر وخور بكري وخور مرزوق بتذكّر لمن عمّي جا لي جدّي وقال ليهو ياأبوي انا ماشي الخرتوم في شان التعليم فرفض جدّي وقال ليهو :
يا ولد سيب الإنطلاقة وسحسحة البندر دي (جدّي لكن ما بااااالغت في سحسحة دي) وخلّيك في زراعتك دي..
خدّر الحواشات دي بي ضراعك وشق أب عشرين وأب ستة شيل السلّوكة دي وهنوووك الطورية وداااااك المنجل ..
عمّي حرد القراية وقعد في البيت وأذكر جيداً كيف كان بيقعد في ركن بعيد في راكوبة القصب حيران وسرحان لمّن ضعف ووشو بقا شاحب ..
قعد بي حالتو دي لحدي ما بقا عمرو 18 سنة وحبوبتنا في النهاية خطبت ليهو بت خالتو من غير علمو ..
الغريبة انا الوقت داك ما ولدوني لكن بتذكّر الكلام ده كيف ما عارف !!
أسعلوني تاني؟
اسرد هذه القصة الحزينة لتوضيح كيف كان يعامل الرجل وكيف كان ينظر أجدادنا لسفر اولاد القرى للمدن من أجل التعليم ..
البندر فيهو القهاوي وفيهو السينمات تمشي امدرمان تتعلم لي الصرمحة والقعاد في قهوة جورج مشرقي وتمشي الخرتوم تعملا لي سينما كلوزيوم وما أدراك ما النيل الأزرق ..
هوووووووي يا ولد إنقرع وأرعى بي قيدك وشوف زراعتك دي ...
عايز تمشي تقرا في البندر عشان تلبس لي البنطلون متل الأفندية وتستحمّ لي كل يوم ؟؟؟
هووووووي يا جنا شد حيلك ..
تحت هذا الضغط فكّر معظم الشباب الزمن داك في السفر ولو من دون علم الوالد ..
بتذكّر كيف لمن جانا صديق النعمنو متعللاً بي إنو عايز يقلع ضرس وتكّل معانا في البيت قرابة الشهرين طلّع الباظبورت والجنسية وشتات السعودية جاك راعي...
أما النعيم ود الدّاية فكان حنكو مغايير وتعلل بي جاي يشيل ليهو بضاعة وراجع بعد يومين واليومين بقو شهرين والشهرين بقو سنة لحدي ما طلّع الباظبورط والجنسية وهيييييييييع ليبيا نفر..
يسافر الرجال لبلاد الغربة وكل واحد منهم يأمل في حياة رغدة ووظيفة مريحة وسكن راقي وعربية اخر موديل وحسناء الفريق يتزوج بها بعد أول سنة إجازة ..
مساكين هم الشباب يبعهم تجار الفيزا الوهم ويسلبون منهم أموالهم التي جنوها وأفنو من أجلها زهرة شبابهم بين بائع في سوق العدّة وساقي في موقف الشهداء وفارش جوار القبة الخضراء ..
وكل حاااااااااجة بي ميّة ..
أي حاااااااااجة بي ميّة ..
البنطلون ..بي ميييييييية ..
البلوزة . بي مييييييية..
ال..... بي ميييييييييية ..
كلو كلو بي ميييييييييييية ..
يصل الشاب لبلاد الغربة فيصطدم بواقع مرير فلا الكفيل موجود ولا الوظيفة موجودة ولا الشقة متوفرة لتتطاقش التلفونات للسودان :
عليك الله يا خالة رسلي لي رقم عاطف ولدك ..مش هو في الرياض ؟؟ لالالا عاطف في جدة ..
الو ..الو ..عمتي محاسن كيفكم ..والله مقصر معاكم ولمن سافرت ما كلمتكم عشان السفر كان فجأة ..كدي بحكي ليكم التفاصيل بعدين بس لو حافظة تلفون سمية بتك مليني ليهو سريع عشان الخط حا يقطع ..
وما بين نحت الراس وتقليب النوتة والأوراق المليئة بالأرقام ترسى ليك على بر ..
محمد ده كان صحبي شديد في السودان وما بيقصر معاي ..
عفواً هذا الرقم موقوف من الخدمة مؤقتاً ..
تنقضي فترة التلاتة شهور ولا كفيل ولا يحزنون وتنتهي فترة الإقامة وتبدأ رحلة التزوير ..
مساكين هم الشباب فها هم يضحّون بشرفهم ويغلظون في الحلف إنهم من قوم لوط وأن عجوز الغابرين هي حبوبتهم وأن بلادهم تمنعهم شرف الإنتماء لهذا القوم وعندما سمعنا أن لدينا أجداد وأباء وأخوان هنا عندكم أتينا نبحث عنهم فهل من مرحب ..؟؟
لتجد فيهم الفتيات من بنات العم سام ضالّتهم وتستدرج الواحدة منهم هذا المسكين ليشاركها السكن ويدفع عنها فواتير الهاتف ويشاركها السرير والدولاب والحمام ..
وقليلاً قليلاً يسقط الشاب المسكين في فخ الجينزي ..
والجينزي ما جينزي.. وووووووب انا تعال لي ..
اللابسو مارينزي ..وووووووووووب انا تعال لي ..
وتقنعه بأن لبس البرمودة لهو أشرف له من الجلّابية البيضا مكوية وحماده بيسرحوك لييييية ..
وحبيبي خصّمتك حلّفتك ..
حبيبي حلّفتك خصّمتك ..
وأوعاكا تنسى الوصيّة ..
أب برمودة بيسحروك لييية ..
وقليلاً قليلاً يسقط الشاب المسكين في فخ الجينزي ..
والجينزي ما جينزي.. وووووووب انا تعال لي ..
اللابسو مارينزي ..وووووووووووب انا تعال لي ..
شويتين الموضوع يجيب ليهو بكيني وما أدراك ما نادي العراة ويسقط هذا الشاب العفيف الطاهر في فخ الغربة ويدخل في باب الرجل السائب ..
وهذا ما حدى بالشيخ شوازنجر والي ولاية كلفورنيا حفظه الله ومدّ في أيامه بإرسال تعميم لجميع المخالفين بمغادرة هذه الولاية والبحث عن ولاية أخرى تقبلهم وذلك خلال شهرين من تارخه وإلا فالغرامة 100 الف دولار مع توزيع البيتزا لكلاب السكان هناك لمدة سنة ..
هي دعوة لكم أيها الرجال السائبون بلادكم تنظركم فلا تصدقوا من باعوكم الوهم فعدوا لبلادكم وكما قال الشاعر الجاهلي :
بلادك حلوة أرجع ليها ..دار الغربة ما بترحم ..
وعلى حكومتنا الرشيدة في السودان التشديد على عدم سفر الشباب لوحدهم دون ولي فربما يكون هناك شاب سيقوم بإجراء عملية (البروستاتة) دون علم ذويه ..
|
|
 
|
|
|
|
|
| العنوان |
الكاتب |
Date |
| الرجال السائبون في بلاد الغربة .. | عمر الفاروق | 12-04-07, 08:12 AM |
| Re: الرجال السائبون في بلاد الغربة .. | Ahmed Abdallah | 12-04-07, 08:23 AM |
 Re: الرجال السائبون في بلاد الغربة .. | فيصل نوبي | 12-04-07, 08:24 AM |
| Re: الرجال السائبون في بلاد الغربة .. | عمر الفاروق | 12-04-07, 08:30 AM |
| Re: الرجال السائبون في بلاد الغربة .. | عمر الفاروق | 12-04-07, 08:33 AM |
| Re: الرجال السائبون في بلاد الغربة .. | Hatim Yousif | 12-04-07, 08:51 AM |
| Re: الرجال السائبون في بلاد الغربة .. | abuguta | 12-04-07, 08:58 AM |
| Re: الرجال السائبون في بلاد الغربة .. | سامى عبد الوهاب مكى | 12-04-07, 08:40 AM |
| Re: الرجال السائبون في بلاد الغربة .. | على محمد على بشير | 12-04-07, 08:50 AM |
| Re: الرجال السائبون في بلاد الغربة .. | فيصل نوبي | 12-04-07, 08:54 AM |
| Re: الرجال السائبون في بلاد الغربة .. | عمر الفاروق | 12-04-07, 09:14 AM |
| Re: الرجال السائبون في بلاد الغربة .. | ابو جهينة | 12-04-07, 09:29 AM |
| Re: الرجال السائبون في بلاد الغربة .. | عمر الفاروق | 12-04-07, 09:16 AM |
| Re: الرجال السائبون في بلاد الغربة .. | سامى عبد الوهاب مكى | 12-04-07, 09:21 AM |
| Re: الرجال السائبون في بلاد الغربة .. | عمر الفاروق | 12-04-07, 09:24 AM |
| Re: الرجال السائبون في بلاد الغربة .. | فيصل نوبي | 12-04-07, 09:33 AM |
| Re: الرجال السائبون في بلاد الغربة .. | سامى عبد الوهاب مكى | 12-04-07, 09:28 AM |
| Re: الرجال السائبون في بلاد الغربة .. | عمر الفاروق | 12-04-07, 09:48 AM |
| Re: الرجال السائبون في بلاد الغربة .. | ابو جهينة | 12-04-07, 11:18 AM |
|
| |
عمر الفاروق
فيس بوك
تويتر
انستقرام
يوتيوب
بنتيريست