باركوا لي تخرجي من كلية الموسيقى (معهد الموسيقى والمسرح) !!!!

Quote: اولا كل عام وانت بخير والف الف مبروك التخرج وان شاء الله عقبال الشهادة الكبيرة

وتسلم كتير على الحضور

الأخ فايت ..

Quote: تعالوا نبارك للجوهرة بالتخرج الف الف مبروك تخرجك يا رائع ..

الله يبارك فيك مع إني عارف إنك متا حا تقرا الرد دا لإنك هسي في الدمازين

الحبيب جدا عادل إبراهيم ..

Quote: ناذر مبروك وعقبال المزيد من النجاح

والله نفسي أقابلك بس عشان إشتقت ليك وداير أعضي أضانك

وشكرا على اللوحة الهدية الرائعة ...

الأخ عبد الله عقيد ...

Quote: واهديه للفنان الكبير دافنشي عشان يآمن

إنت قصدك ليوناردو دافنشي ولا واحد تاني !!!

لإنو حسب علمي إنو دافنشي مات نصراني ومافي طريقة ليو عشان يأامن


العزيزة نهال كرار ...

Quote: أنا التورتات دي بلقاها مرمية في الشارع ولا شنو !!

والله انا قلت كدا عشان خبرك جاني وقالو لي إنتي بت راقية جدا جدا وحنكوووووووووووشة وبتاعت تورتات وهامبيرقرات وحاجات تانية حامياني

وتسلمي كتير على التورتة الشيكولاتية الأوتومسفيرية دي

العزيزة لنا ...

Quote: الحبيب ناذر ألف مبروك والى الامام دوما محبتي لنا

والله حقو الواحد بعد دا يقول ليك خالتو لنا
الزول عندنا لمن يبقى خال أو خالة معناها زول كبر خلاس
الله يبارك فيك وسلامي للأسرة الكريمة ... وألف مليون مبروك ..

الأخ بريمة ...

Quote: الأخ ناذر تهانينا الحارة وعقبال الدكتوراه .. ألف مبروك للسودان ولنا بك .. بريمة

الله يبارك فيك يا رجل ...

كنت قبل ايام في سيرتك مع بعضا من قراء هذا المنبر المتابعين غير الأعضاء فذكروا لي أنك صاحب أطول نفس في هذا المنبر وما بتخلي الموضوع إلا تجييب أخرتو وحسب تعبيرهم فأنت لايوووووووق وما بتفوت حاجة ساكت

لك التحية مني ومن الذين يتابعونك ..

صنفرة :

والله تعبت من المياركات والسلام الكتير
ضهري ووجعني ما بلقى لي زول يطقطقوا لي

Quote: بعدين ياخي ما جيتني راجع في كبوشية مالك؟!

لكن تاكد حا أجي في الوكت المناسب ..

الأخ كامل محمد ..

Quote: فوق من أجل الرائع الدكتور. ناذر الخليفة

يا سلام عليك وعلى كلمة دكتور ناذر من بئك

أنا بعد إسبوعين تلاتة كدي كان ما في زول قال لي دكتور ناذر لا حا أرد عليهو ولا حاجة

الأخاالعزيز جدا عجاج ...

صدقني قد تكون هذه أول مرة نتقابل فيها في هذا الفضاء وقد سعدت جدا أنك إبن المربي الفاضل أستاذ عجاج ... فوالله يرجع إليه كل الفضل في ما انا عليه الأن من علم بفنون الموسيقى المختلفة ...

هو من درسني مادة الصولفيج التي كنت لا أستسيغها وهو من حببني إليها ..
وهو من أعطاني دروسا إضافية في فنون ألة العود وطرق العزف عليها ..
وهو من جعل صوتي يصل إلى ما هو عليه الأن بفضل النصائح العلمية والتدريبات الشاقة التي كان يريدنا ان نواظب عليها ..

وهو .. وهو .. وهو .. !!!!!!!

لا أستطع ان اعبر لك أكثر عن تأثير والدك المباشر في شخصي ..
لك وله أجل التهاني والمنى والتبريكات ..

الأخ ناصر خليل ..

Quote: الأخ العزيز ناذر مليون مبروك للنجاح والتخرج وبالمناسبة دي منتظرين منك غنية أو كليب نشوفوا منك في المنبر

الله يبارك فيك وسترى قريبا ما يسرك بإذن الله تعالى ..

الأخ محمد عبد الرحمن ...

أعجبتني والله هذه اللوحة الرائعة التي تزين بروفايلك !!!

الله يبارك فيك وشكرا على الحضور والتهنئة ..

صنفرة :

أنتهز هذه الصنفرة لأورد الشكر الجزيل للأستاذ عجاج والذي فوجئت ولأول مرة بأن إبنه عضو معنا في هذا البورد ..

Quote: مش يا عمو ناذر إنت إتخرجت وبقيت فنان؟؟؟ يلا غني لينا

العزيز جدا أبو جهينة ..

الله يبارك فيك وشكرا جزيلا للحضور الطيب ..

Quote: الاخ ناذر تحياتي والف مبروك وعقبال الدكتوراة تقع عليك ورفاقك الخريجين مسئولية عظمى لاتنحصر في اكل العيش فقط كما تعلم اخي ان الموسيقى هي تعبر عن وجدان الامة وجداننا ياخي العزيز معتقل موسيقيا ومن هنا تنبع عظم المسئولية (اعادة صياغة الوجدان السوداني) هناك حراك موسيقي لكن نريد المزيد امنياتي بالتوفيق

يا أخوي إنت قديم خلاص والفن ما فيهو أكل عيش وزلا حاجة .. ختى عشا الفنانين الكان زمان ما خمج هسي إتقلص وبقى شاورمة ومرات كدة تحرد تمشي لي أقرب دكان عشان تحشي ليك جبنة وطحنية تتعشابا

أما إعادة صياغة الوجدان السوداني والحراك الموسيقى فذاك يحتاج لفهم الدولة لماهية الموسيقى وأثرها المباشر على تشكيل الوجدان وذلك للأسف غير متوافر الأن ولكن هناك جهود فردية ومحاولات هنا وهناك للقيام بهذا ..

أشكرك مرة اخرى على الحضور المشرق ..

Quote: الاخ ناذر الف مبروك وعقبال الماجستير والعرس

الله يبارك فيك يا عزيزي