|
|
 الشهيد القام جارى
|
[size=24][
يا زول مالك ؟ .. مالى ؟!! ... مالى كيف يعنى ... ما شايف الطاحونة دى واقفة ... والناس الجيعانين ديل دايرين الدقيق بتاعم .. طيب شنو الكهرباء قاطعة يعنى ؟ ... لا الكهرباء ما قاطعة لكن فى ناس قاطعين الطريق بتاع سير الطاحونة ... ودايرين شنو منها ؟ ... يا كافى البلا .. كابسونى من دغش الرحمن وحالفين الا اديهم اكياس الدقيق الفاضية ... قالوا دايرين يسووا بيها ناس حامية .. يحمّى ليهم موية حارة .. ويغطس حجرهم فيها .. عليك الله جنس الحالة دى شفتها قبال كدى ,,, حالة اخير منها تكون ماسك موية فى نص الشتاء والقمح عطشان ..لا ما عرفت قصدك ... كيفن يسووا بيها ناس حامية ؟ ... قالوا اكياس الدقيق والشوالات الانا خاتيها للقمح .. دايرين يودوها لناس الدفاع الشعبى ... استغفرتك يا مالك روحى ...وليه يلبسوهم شوالات الدقيق ؟ .. والله هم زاتهم يستاهلوا ما يلبسوا زاتو ... ملبسينهم لشنو ... انت عارف .. يومداك مشيت ليك مكان كدى قالوا بيدربوا فيهو الجماعة ديل .. وحات الطاحونة السيرا واقف دى ... لقيتهم ليك غبش الواحد تقول شغال فى الكتاحة .. يمين شمال .. فوق وتحت ... والجبخانة ما تديك الدرب ... تقول بيت عرس .. قام تعلمجى قال لواحد امشى اقيف فى اخر الصف ... مشى وجا راجع تانى .. ليه .. قال اخر الصف فيهو زول ... اها بتفرج فيهم تعال يا المجروس اب شلاضيم .. وبالمناسبة المجروس دة ضكر العربات ... جا داخل فينا توووش غير سلام لا كلام وجنابك لابس ليهو فنيلة خدرا .. ويتنفس زى الخرتيت بلا شغلة ... جنون تدريب ساكت ... قال للتعلمجى .. ارفعهم هنا يرفع طاقيتك سارية ... يجينى واحد نفسو قايم التقول داخل حرابة هسع ... قال لى اركب تركب الشوك .. قلت ليهو شنو ؟ اركب امشى وين .. تمشى مكان الرجال ... يا كافى البلا .. شوف عينى دى التقسيمات بين الرجال والعوين ما شفتهم الا هنا بس ... نزلونا ليك فى كبويتا ... واحدين متدربين ... وواحدين متجرسين ... وانا فربت ارورى من الخوف .. فى ذمتك الناس ديل ما شالوا حقى ساااى ؟ ... وتعال يالقرانوف اشتغل ... انبطحنا اجمعين دون مورابة ... لا نفع شنبى الكبير دة ... ولا دعوات شيخى سيد الطلح القلب الغنماية مكرونا بالقاورمة ... الجماعة واحد قال ليهم اعملوا ساتر ... والساتر الله ... ايدك تمدها على وشك ساكت تلقاها مافى ... كمين كارب .. داير ليهو فنان يغنى بس ... والجرسة كشفت عن ساقيها ... بالله ما خلوا فينا نفاخ النار ... ولا الخبر البيمشى الباقير الجماعة رقدوا سلطة اسود ...الدفعة كلها لحقت امات طه ... واخوك الكاشف يكشف حالو ... لابد اربعين يوم امزمز فى الجراد ... واحلى بى ابو القنفد ... لحدى ما لقيت لى طريقة وفتحتا ... يعنى فكيت البيرق ؟ .. دة كلام زول عاقل ... راسك الكلو دقيق طاحونة دة زى حواشة القطن ... ما اجرى كيفن !! .. وعلى الطاحونة اجعص زول فى مكانى دة كان زاغ ... مع الاعتبار انو حق السحلبة مرفوع هناك ...اها وكت وصلت الدمازين ... واحد من اهلى ديل قال لى بكرة ناس الولاية عاملين ليك عرس الشهيد ...الشهيد ياتو يا خوى ؟ .. انت .. الشهيد القام بعاتى ؟ ... اها جيت مدنى ... اشوف الناس رابطين احمر فى جبهاتهم زى اليابانيين والساموراى ... كل واحد عندو طبلة وكمنجة ومسطرين ... وهاك يا تحميييض .... تلوييين ... وانا لابد ساااى ... التقول الحفلة ولا العرس دة ما حقى ... على الاقل مفروض يجرتقونى وابشر فيهم واكشح الشيلة زى الخليجيين ... ناس الجزم ام سست ..اشوف ليك الزول يجوعر فى المايك ... والله العظيم لقد رأيته بالقرب من النبى ( ص ) فى الجنة ... والزول يبكى التقول مات حشاهو ... ابشرى يا ام الشهيد ... وشوالات حايمة وناس داخلين الصيوان ... وجنس قفاطين ... اها سألت جارى قلت ليهو الزول البيتكلم دة الوالى ؟ ... قال لى لا ... دة المحافظ لكن مركب مكنة والى .
الكلام دة كان فى تموز :<
تموز انت ويدوم خيرك[/size]
|
|
 
|
|
|
|
alfatih
فيس بوك
تويتر
انستقرام
يوتيوب
بنتيريست