|
|
 الموز ثم الموز ثم الموز (هل الموز أكل قرود)
|
تقديم:
نحمد الله علي مناخنا الإستوائي الذي وفر لنا هذه الفاكهه اللذيذة والمفيدة عِوضاً لنا وعوناً علي ما بنا!!!
يحكي أن احد الموظفين الغلابة ذهب الي الفكهاني وسأله عن الأسعار ( التفاح بي كم ؟ الحبة الفين جنية, والعنب بي كم؟ الكيلو بي 15 ألف جنية) فتمتم وقال ( أديني 2 كيلو من اكل القرود ده).
أحكي عن صديقي العراقي الدكتور البيطري عادل كعيد عندما كان في السودان لقضاء مهمة رسمية (أسأل الله أن يكون بخير وعافية وسط هذه الحرب الطاحنة) وكان يحب الموز كثيراً فطلب مني أن اجلب له كمية من الموز كلما حضرت زائراً (وكانت زيارتي له يومياً بحكم العمل) فقلت له يا دكتور نحن في السودان نسخر قائلين لمن يأكل الموز كثيراً (إنت قرد؟) فرد سريعاً برباطابيته العراقية (ما يخالف انتو غزلان ونحنا قرود بس هات لنا موز).
الموضوع:
هل تصدق عزيزي القارئ أن احدث اكتشافات العلماء كبديل طبيعي لهرمون الميلاتونين )المستخدم حاليا لمكافحة الشيخوخة) ظهر في الموز او الطلح كما ذكره القرآن الكريم في محكم اياته. حيث ثبت عملياً ان الموز هو المضاد للشيخوخة بكل معانيها وامراضها ومظاهرها السر ليس في الميلاتونين فقط بل في البوتاسيوم المسؤول عن التوازن في جسم الانسان، اطلقوا عليه قديماً طعام الفلاسفة والحكماء وانه يحافظ على الحيوية والشباب عمراً اطول.. اما الان وفقاً لما توصل اليه العلماء فإن فوائده لاتحصى وجميعها تؤدي الى هدف واحد وهو مكافحة الشيخوخة وامراضها وهو يزيد من مقاومة الخلايا ويقوي الجهاز المناعي ويعمل على سلامة وقوة العضلات والعظام وضغط الدم الشرياني والتي تمثل اهم واخطر مظاهر الشيخوخة ونظراً لاحتوائه على نسبة عالية من الحديد فإن ذلك يؤدي الى ارتفاع نسبة الهيموغلوبين ويقضي على فقر الدم وهو بالاضافة الى ذلك يقضي على الاكسدة داخل الخلية التي تعد السبب الرئيس لحدوث كل مظاهر الشيخوخة، والموز الناضج غني بالسكريات سهلة الامتصاص والمولدة للطاقة ويمكن الاعتماد عليها في النظم الغذائية الهادفة للحيوية والنشاط والرشاقة علاوة على وجود فيتامينات اخرى كثيرة فيه وهو يقضي على كل انواع الاكتئاب الذي يؤدي مباشرة الى الشيخوخة المبكرة... واشار الاطباء الى ان مادة السيرتونين من المواد المهمة لاحداث التوازن النفسي والعقلي والعصبي في جسم الانسان حيث يتم افرازها بصورة طبيعية داخل خلاياه وهي من الموصلات العصبية التي تحدث حالة من التفاؤل والارتياح الذهني والتركيز والاقبال على الحياة وهي الحالة التي تسمى بالمرح. إضافة الى ذلك فللموز فوائد تساعد على نضارة البشرة ومقاومة مظاهر الشيخوخة في الوجه لهذا يستخدمه خبراء التجميل في صناعة الغالبية العظمى في الكريمات والصابون والشامبو المستخدم في النظافة والنضارة معاً.
المصدر :صحيفة تشرين
علوم وتقانة
الخميس 8 كانون الثاني 2004
اعداد : امل صارم
إسماعيل
|
|
 
|
|
|
|
|
|
|
 Re: الموز ثم الموز ثم الموز (هل الموز أكل قرود) (Re: Ismaeil H. Mohamed)
|
الأخ اسماعيل..
افادك الله وزادك علما..انا سلفا كنت مقتنع بمسألة فائدة الموز وخفة ظله على جيوبنا والآن وبعد مقالك الشيق ازدت اقتناعا واعجابا به...لكن من الذى سيقنع الشفع وانهم الذين مارأوا تفاحا امام الفكهانى الا ووقفوا يتاملونه تأمل المحب الولهان كأنهم يتأملون فينوس ربة الجمال او بالميت كأنهم يتأملون فى بريتنى سبيرز..عموما اشكرك على المقال الذى امدنى بذخيرة معلوماتية كافية لأقناع الشفع ومن قبلهم امهم .
اخ اسماعيل,بالمناسبة ماناوى تترشح للبرلمان عشان اديك صوتى ؟
مع تحياتى.
| |
|
|
|
|
|
|
|
|
 الاخ الكريم قلقو (Re: Ismaeil H. Mohamed)
|
الاخ الكريم قلقو
لك التحية والود ...... اللهم . يتقبل دعاءك ويزيدنا علماً
مش عليك الله لذيذ .......والحاله لو كان ابو نقطة!!!
بس عليك الله ابعدنا من حكاية البرلمان دي أنا من بيت المال هس يقولو ناس بيت المال
اصلهم شنو وكلهم شنو ما عارف!!!!! (انا بضحك)
والله صوتك ده يشرفني جداً جداً حا أترشح ليك مخصوص
إسماعيل
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Ismaeil H. Mohamed)
|
اذيك يا اسماعيل
تعرف....
انا من ذمان عندى غرام مع الموز..و اعتبره اجمل فاكهه على وجه الارض
كنت دائما اقول ان مشكله الموز الرئيسيه هى توفره بكميات مهوله فى جميع انحاء
الكره الارضيه....تخيل مثلا انه اى الموز فى ندرة الكافيار وهو بيض بعض الاسماك!!
برغم توفره الكتير و المسيخ الا انه يظل الفاكهه الاولى فى العالم قاطبه..
قرات قبل فتره تقرير يقول ان الموز فى طريقه للانقراض , والسبب هو ان الموز كثمره
لا يحمل حبوب او ادوات البقاء (طبعا ماممكن نزرع القشر)...لا استطيع ان اتخيل الدنيا
من غير موز(ما بتجى)
تعرف المشكله وين!!! الموز المهجن..لا طعم له...نعم شكله جميل وبلمع(فيهو رقشه) لكن
يفتقد نكهة و لذه الموز الطبيعى(بتاع السودان)
اخشى ما اخشى ان يكون هذا النوع من الموز قد دخل السودان..فهنا لا تستطيع اكل موزتين
لضخامة حجمه , اما فى السودان فكنت فى صباى اقوم بخمسه كتصبيره.
فى منتصف الثمانينات حضر لزيارتى فى البيت احد الاصدقاء و كان يعمل حينها فى الشركه العربيه للتنميه الزراعيه, قد احضر معه عينات من منتجات الشركه (طماطم و جزر),,يومها
التف اهل الحله لمشاهده المخلوقات الغريبه, طماطم فى حجم الشمام (و كمان بتلمع)
احد الاصدقاء حكى لى مره انه ذهب لزياره الطبيب لعرض مشكله غريبه يعانى منها وهى نمو الشعر بطريقه غريبه فى مناطق عجيبه فى جسمه,, جاء تشخيص الطبيب ان السبب هو السلوك الغذائ و بالتحديد اكل الدجاج و طلب منه التوقف عن تناول اى دجاج ملقح او غير طبيعى
(هرمونات و كده)....بعد فتره(سنين) ذالت مشكله صاحبنا المشعر.
طولنا عليك
النصرى
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Ismaeil H. Mohamed)
|
الموز يا جماعه مشكلة كان إتلصق في هدومك تاني ما بطلع ، يعني يا تمشي وهدومك مبقعة أو تشتري غيرها أو تبدلها بي صينية بلاستيك مقاس صغير طبعاً وكان إستوى يا تاكلو يا تاكل نيم لأنو ببوظ وما بستحمل يقعد كتير كان في التلاجه أو في الكرتونه وعندو صفقه تقطع بيك البحر عديل كده وممكن تصلي فيها الظهر جماعه مع تلاته أشخاص قصراً والسبيطة لمن تملا في الشجرة إلا يتكلو الشجرة بي شعبه لأنو طوالي تجيبها الواطه وفي بدايات زراعة الموز لازم يكون حوله سور من أشجار أب سبعين عدسي تمسي إلخ لحمايته من الهبوب – الهوا – ولازم يزرع في الحوض برسيم خلال السنة الأولي عشان الجدوي الإقتصادية لأنو الموز ما بثمر إلا بعد فترة ، والموزه ركلة حره مباشرة برازيلية ماكرة لا يشوفها حارس المرمي ولا المشاهدين إلا بالإعادة البطيئة والموز أب نقطه هو ذلكم الفريق الذي يتوقف رصيده عند النقطة الواحدة ويتجمهر مشجعيه عند نقطة البوليس. وقشر الموز زلقتو والقبر طوالي يكسرك زيو وزي أى مدافع خشن في ميدان عقرب أو دار الرياضة أمدرمان لمن كانت تراب وقبل التنجيل أو حصان من حصين السواري ، والموز بعد الإنتاج الأول بيكون زيو وزي الوظيفة كل خمسة عشر يوماً تودي السوق والموز في ناس بتاكلو كده يعني بهيئة الموزية ، وفي ناس بتخلطوا باللبن وفي ناس بتعملوا في سلطة الفواكه ، وفي بعض الدول العربية – دول الخليج تحديداً – موزه إسم إمرأة.
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Ismaeil H. Mohamed)
|
| Quote: الموز يا جماعه مشكلة كان إتلصق في هدومك تاني ما بطلع |
يا ملا
انت بتتكلم عن الموز ولا العونكليب؟
ياخى الموز مافيهو مويه ذاتو....
بعدين المابطلع من الهدوم موية البلح...ذمان فى البيت كان عندنا نخله
صغيره و "بتلد" تعرف هدومى كلها باظت لمن اجى اقرم البلح ... مويته
تطير فى هدومى ..اصلو ما تتطلع تانى ...ما شالله صبغه بس
| |
|
|
|
|
|
|
|
|
|
الموز الجميل ولذيذ (ابو نقطة) (Re: Ismaeil H. Mohamed)
|
الأخ النصري
شكراً علي المرور والله ذكرتنا أيام حلوة , لكن اقول ليك ما تخاف
الموز لسه صغار وحلو عندنا بس الطماطم كبرت شوية وجلدهابقي قوي،
البلدية منهاتشوفها في السنة مره!!!!!
يا سيد الملا عمر الموز البطبع الهدوم ده نحن ما سمعنا بيهو!!
لكن باقي لي انت ما شاء الله ود زراعة ومربي في جروف النيل اللهم
لاحساده (بقرانين ساكت) ، ولا تكون شفتو تحت كبري النيل الازرق
جنب سنيما البي أن؟؟؟؟؟؟
لك التحية والود ..سعدنا أيما سعاد بمروركم.
إسماعيل
| |
|
|
|
|
|
|
|
|
|
Re: الموز الجميل ولذيذ (ابو نقطة) (Re: Ismaeil H. Mohamed)
|
أخي إسماعيل
أخي النصري
كان سمعتو بالورشال كان عرفتو موية الموز المستغربين منها دي وفي كل الأحوال عازكم تجو تزورونا في مزرعتنا الواقعة على بعد 40 كيلاً أو ميلاً لا فرق شمال بقعة المهدي بشرط أن تأتوا لابسين جلاليب ناصعة البياض ، أو ذا تعذر ذلك لوجودكم في دول المهجر ممكن أرسل ليكم الـ uniform – العراقي – الخاص بالزراعة وبالـ dhl كمان بشرط أن تتكفلوا برسوم البريد وبعدها يمكنكم إخضاع العراقي لمعاملكم وإن شاء الله يكون فيهو حمض نووي. وعندها فقط سوف يعلم الذين ما ناقشين موضوع الموز أى منقلب سينقلبون.
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Ismaeil H. Mohamed)
|
الأخ الفاضل إسماعيل..
السلام لك ولضيوفك..
مرحب بيك اولا...
الموز هو فاكهة الفلاسفة حسب ما عرفت من بعض القراءات..
طبعا المعلومة دي ادتنا ثقة في عدم تشبيهنا بالقرود.. وهو الفاكهة المحببة لي.. ولولا المنقة لكان الفاكهة الوحيدة التي أاكل..
لما امشي عشان اشتري موز.. باخد كمية قبل الوزن وأبدأ أكلها وانا أوزن وأعزل وافاصل..
واتعلمت أطبخو زي اللاتينين بتاعين امريكا الجنوبية.. واديكم الوصفة السريعة دي:
خت شوية زبدة في الطاسة.. وخت أصبعين أو تلاتة وانتظر حتى يبداو يسيحو شوية وصب عليهم سكر..
واااااااااااااو
جربوها وأدعو لي..
تحياتي..
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Raja)
|
رجاء الوصفة جميله والطبخه من واواتك دي تبدو شهية بس المشكلة اللي ما يطول العنب والسب يا رجويه إنك أقحمتي الكثير من المواد باهظة الثمن ، الزبدة والسكر وبعملية حسابية بسيطة أخير لي أطبخ لي حلة عدس و فاصوليا أو لوبا عفن - إسمو كده والله ولو ما مصدقين أسألوا الرحمابي أو أهل العوض -
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: almulaomar)
|
الملا العزيز..
والله ما أكلة ناس "فافي"  ديل المساكين بتاعين البرازيل ووين ما عارفة قاعدين ياكلوها..
خت الرحمن في قلبك.. ووفر معلقتين سكر كده.. اها كده ضمنا السكر
قوم اغلي اللبن.. وخليهو يبرد ويعمل جمادة.. شيلها على جنب
تاني يوم اعمل نفس العملية حتلاقي عندك قشطة مش زبدة..
اها الطاسة اقطع ليها قلبها.. جيب الحلة البتعمل فيها لوبا شنو ديك  .. واعمل فيها الموز المطبوخ بجمادة اللبن ومعلقتين السكر..
وبرضو
واااااااااااااااااااو
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Raja)
|
رجاء واو عليك وواوين علي أنا
ناس البرازيل وكولمبيا وهاييتي وبورتريكو وفنزويلا ومن جاورهم ديل خليهم لأنه المزارعين فيها بعملوا مظاهرات شوف عيني عاد في بعض الفضائيات قبل أن يقطعوا عنا البث وبس ، أها نحن اتحاد مزارعي كشا مشا لينا الله لا بنلبس بناطلين جينز ولا بوت ولا طاقية ولا جونتيات ومع كده مع مرتاحين من ناس لا لا ، دايرين زكاه وقبانه وعشور وضريبة يضربهم الضريب إن شاء الله.
أما عن اللبن فقد جف الضرع من زمان يا رجويه وما تكوني داقسه لأنو البنبيعو في العاصمة المثلثه ده ما لبن دي غباشه أو موية مضافاً إليها شئ من لبن ، يعني غش عيني عينك والمعاملة بالمثل.
وصدقي أو لا تصدقي المزارعين بقت في بيوتهم علب النيدو والفورموست والكاني وآه ياني وشويتين التي شيرت والموكيت. وأنا وإنتي ضيعنا الموز
| |
|
|
|
|
|
|
|
|
|
عراريقنا جاهزه وكمان معاها مركوب جزيزة (Re: Ismaeil H. Mohamed)
|
أخي الكريم الملا عمر
عراريقنا جاهزه وكمان معاها مركوب جزيزة من دكان عمك عثمان في ود نوباوي!!
بس موضوع شمال أمدرمان والزراعة دي ذكرني تعليق طريف لاحد الاصدقائي
كنا في رحلة في اوئل الثمانينات (بدون تقليق) الي منطقة الجزيزة إسلانج (قرب السروراب) وهي منطقة مشهورة بزراعة البصل وكان صديقنا المذكور لأول يري فيها شجرة بصل – ان صح التعبير- فسأل صاحب الدعوة وهو من اهل الجزيزة قائلاً ( انتو زارعين تعاشيق ولا شنو؟) قاصداً زهرة البصل في شكلها الدائري اعلي الساق – لمن لم يري شجر البصل.
الأخت رجاء
لك التحية والفضل
ولحضورك الدئم فأنا كثيراً اقرأ في بوستاتك،
واُحيك علي مداخلاتك النًيرة المستمرة ،
لك الود
والله وصفتك دي ذكرتني بورتسودان والمخبازة يا ربي تكون مخبازة برازيلين ، لكن انا أكيد حا اجربها.
بيني وبينك لي عشق خاص مع المطبخ ، بي فن كمان.
إسماعيل
| |
|
|
|
|
|
|
|
|
|
أظنك عاوزني اليوم كله أحكي!!! (Re: Ismaeil H. Mohamed)
|
والله يا ملا يا عمر
كلام ده برضو ذكرني طريفة آخري أظنك عاوزني اليوم كله أحكي!!!
يحكي عن شيخنا ومولانا الشيخ عوض الله صالح وعن طرائفه ، أن خرج يوماً لبائع اللبن وهو يحمل إنائين وقل له ( أديني لبني هنا و مويتي هنا أنا بخلطم براي) يبدو أن الغش ليس بالجديد.
لك الود .
إسماعيل
| |
|
|
|
|
|
|
|
|
|
Re: أظنك عاوزني اليوم كله أحكي!!! (Re: Ismaeil H. Mohamed)
|
أخي إسماعيل في الشأن البصلي فإن شجرة البصل كما تفضلت في هذا الطور الذي تتكور فيه تسمي تلك الزهرة البيضاء بالكاو وهي ليست البقرة الإنجليزية أو الهولندية إنما تلك الزهرة التي تحمل في داخلها كل بذور البصلة والبصل شأنه شأن الكثير من الأشياء في السودان دائماً رأساً على عقب تجد الثمار داخل التربة والبذور في أعلى قمة النبات.
أها الكلام بجيب كلام خليني أقول ليك حجوة حبوبتي دي:
لوح صابون في الوطه مدفون ، أها يا أبو السباع كان عرفتها أعمل لي مس كول.
السروراب تلك القرية الوداعة تحولت بفعل توجهنا الحضاري إلى مدينه لا تحمل من ملامح المدنية غير حديدة تم تثبيتها على طريق الإنقاذ الغربي الذي يشبه برش صلاة قديم وخطت بخط لا هو كوفي ولا ديواني ولا نسخ ولا رقعة وحتى تلك البوهية أو الطلاء فعلت به عوامل التعرية فعلتها فأنقلب الأزرق إلى اللالون والأبيض كذلك ، وما أن تصعد تلا أو تهبط وادياً إلا ويتكرر المنظر مع إسم قرية أخرى. ونحن كنا نعاني الأمرين في رحلتنا إلى قريتنا الظالم أهلها وسوف سرد عليك حكايتهم إن شئت أو لم تشأ في مقال آخر.
الموز مرة أخرى ، فقد ذكر في القرن وجاء بإسمه الآخر وطلح منضود ، والطلح هنا هو الموز مش الحطب الببيعوهو مع الشاف.
يقول أحمد قدامه في قاموس الغذاء والتداولي بالنباتات:
الموز في الطب القديم ينفع من حرقة الصدر والرئة والسعال وقروح الكليتين والمثانة ويدر البول وينشط الفحولة ويلين البطن ويسمن كثيرا والاكثار منه يضر المعدة ويثقل ويزيد في الصفراء والبلغم ودفع ضرره يكون بالسكر والعسل والزنجبيل وإذا طبخ في دهن اللوز أصلح الصدر سريعا وإذا مزج بالخل أو عصير الليمون وطُلي به الرأس الأقرع يفيد كثيرا وطبخه مع بذر البطيخ ودهن الوجه به يجلو الكلف وينعّم البشرة ويحسن اللون وان وضع ورقة على الأورام حللها. إنتهى
| |
|
|
|
|
|
|
|
|
|
أخي العزيز الملا عمر (Re: Ismaeil H. Mohamed)
|
أخي العزيز الملا عمر
افادك الله وزادك علما، والله كلما كتبت إزدادت معرفتنا
وإزددناظماًلمداخلاتك.
من الواضح كلنامنا عاشق لامدرمان وإن اصابنا الضجر من البشر.
لك ودي انت تضيف الي البوست كثيراً
إسماعيل
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Ismaeil H. Mohamed)
|
يا سلام..الزول ماينوم يعنى ....اعود و اجد البوست اذداد دسامه
اول حاجه نبدا برجاء
يا رجاء ناس امريكا اللاتينيه ديل بياكلو حاجه زى الموز شكلا... (و اظنهم
اولاد عم) زى البطاطس و البطاطا...اول ايامى فى امريكا مشيت السوق و شفت
الشئ ده , بصراحه عجبنى شكله و افتكرته موز , لمن رجعت البيت الجماعه ضحكو
فينى و عرفت انه لا يشبه الموز فى الطعم و به قليل جدا من السكر و لا يمكن اكله
كفاكهه..لكن عند الطبيخ تزول الحواجز بين الموز و ود عمه و تساوى النار بينهما.
اما اخونا الملا
اول حاجه اوعدك اول زياره لى للسودان ساقوم بزيارتكم فى المزرعه و ساكون مرتدى
عراقى ابيض ساكوبيس و نشوف الموضوع ده على الطبيعه.
ايضا
| Quote: أما عن اللبن فقد جف الضرع من زمان يا رجويه وما تكوني داقسه لأنو البنبيعو في العاصمة المثلثه ده ما لبن دي غباشه أو موية مضافاً إليها شئ من لبن ، يعني غش عيني عينك والمعاملة بالمثل |
اذكر فى نهاية التمانينات كنت عضو فى فريق يعمل على تقديم دراسه لتطوير العمل فى مصنع
منتجات الالبان فى حله كوكو...تم بناء المصنع فى الاساس للاستفاده من مزارع الالبان المنتشره فى حله كوكو و مناطق شرق النيل بصوره عامه ..كانت المفاجاه ان المصنع لا يجد
الامداد الكافى من الالبان و يضطر لاستيراد اللبن المجفف من هولندا للتشغيل...
يبدو ان المزارعين فى المنطقه بفضلون بيع منتجاتهم بانفسهم(بعد خلطها بالماء) بدلا من مد المصنع باحتياجاته....فى النهايه صار المصنع يعتمد كلية على الالبان المجففه المستورده و تم تعديل طريقه التشغيل لتلائم الموقف.
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Ismaeil H. Mohamed)
|
الاخ اسماعيل
حكى لى صديق( بعد قراءه البوست)
قال...
يحكى ان احد الشحادين وقف امام احدى محلات بيع الفاكهه مادا يده
للمساعده..قام صاحب المحل بقطع بعض قطع الموز من السبيطه و مد يده
للشحات لاخذها...هز الشحات راسه بالرفض و اشار باصبعه للتفاح المرصوص
بعنايه..تغيرت ملامح صاحب المحل وقال للشحات
" شوف ..امشى محطه الباص ديك ..اركب الباص البوديك معسكرات الدفاع
الشعبى ..امشى حارب ..يدوك طلقه فى نص راسك ..تموت ..تمشى الجنه..هناك
حتلقى التفاح"
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Elnasri Amin)
|
زي ما قال النصري..
يعني الزول ما يمشي يشوف الرزق ولا ينوم يجي يلاقي البوست بقى دسم..
طبعا يا النصري نكتة الشحات والدفاع الشعبي ما حصلت..
انا قصدت بالوصفة الموز زاااتو.. والفرنسيين بعد السكر بيكبو ليهو نبيذ كمان.. طبعا انحنا حدنا لغاية السكر بس..
غايتو يا الملا حننتني عديل كده.. لا سكر.. لا جمادة لا بناطلين جينز لا جوانتيات لا لبن يا كافي البلا  ..
اسماعيل صاحب دكان الموز.. موضوعك مميز وحقيقي كسب للمنبر..
| |
|
|
|
|
|
|
|
|
|
الموز الجميل ولذيذ (ابو نقطة) (Re: Ismaeil H. Mohamed)
|
الأخت الحبيبة رجاء:
(اسماعيل صاحب دكان الموز.. موضوعك مميز وحقيقي كسب للمنبر.. )
بوجودكم الدسم سيصبح الدكان تلاجة موز كاملة
لك الود.
يا عم النصري:
( عم دي للتقدير وليس العمر - النصري انت عارف)
نكتة الدفاع الشعبي دي قوية جداً جداً حا اصرفها ليك يمين وشمال
وحقوق الطبع محفوظة.
ياخي والله مشتاقين.
إسماعيل
| |
|
|
|
|
|
|
|
|
|
حلة كوكو (Re: Ismaeil H. Mohamed)
|
أخي الملا
من طرئف حلة كوكو:
واحد اول مرة يمشي حلة كوكو فقال لي سواق الحافلة
" عليك الله لمن تجي حلة كوكو كلمني عشان انا ما شفتها
فرد السواق - حلة كوكو دي ما بيشوفوها ،، بشموها"
إسماعيل
| |
|
|
|
|
|
|
|
|
|
Re: حلة كوكو (Re: almulaomar)
|
الأخ / إسماعيل
أشكرك على هذا الموضوع الشيق .
من طرائف الموز روى لي أحد الظرفاء أن أسداً ـ ليث ـ كان يقيم في حديقة الحيوان في أيامها الأخيرة وحينما شعر بأن الجماعة فكروا في بيع الأرض و تشريد الحيوانات الغلبانة و إحالتها للغابة التي لم تعد آمنة ، فكر ذلك الأسد ملياً في مستقبل لبوته و أشباله و وجد أن الحل يكمن في الهجرة خارج الوطن كما فعلها غيره من أقربائه ،، المهم أنه خاطب أقاربه و من بينهم قريب له يعمل في إحدى دول الخليج الذي و بعد جهد جهيد حصل على فيزة عمل في أحدى حدائق الحيوان لذلك الأسد المكافح ، غبر أن المشكلة أن المهنة في تلك الفيزا كانت ( قرد ) .
المهم أن هزبرنا و بعلاقاته الواسعة تمكن من إستخراج كافة الأوراق الثبوتية من جواز سفر و شهادات رسمية وفقاً لمهنة الفيزا و أكل إجراءات و خروجه و سافر إلى الدولة الخليجية المعنية و أستلم عمله بحديقة الحيوان منذ أول يوم وصل فيه ،، و بعد جهد شاق في إرضاء الزوار إنتهى يوم عمله الأول .. و فوجئوا بعد إنتهاء العمل بالشخص المشرف على خدمته و هو يحضر له طبقاً من الموز الكاريبي الضخم .. تعجب صاحبنا و أسر في نفسه قائلاً .. و الله العرب ديل غريبين فعلاً متين التحلية بقدموها قبل الغدا ؟؟ ـ المهم أكل ما تيسر له و نام .
تكرر الأمر في اليوم الثاني ،، فظن صاحبنا أن في الأمر سوء فهم ،، لكنه عاد و تكرر ثلاث و رباع و خماس حتى أن صاحبنا أصابه إمساك مزمن ،، فكره يومه الذي رمى به في هذا البلد ،، و حين أشتد عليه الأمر قرر أن يخبر المشرف ـ الهندي ـ ليصحح ذلك الوضع البائس فأنتهز فرصة قدومه و هو يحمل طبق الموز الذي كرهه باطناً و ظاهراً وقال له ..
يا أخوي هوي إنتو شنو شابكيننا موز موز .. إنتو البلد دي ما فيها لحم .. ثم ثانياً أنا أسد .. تعرف يعني شنو أسد يعني ما نباتي .. ياخي صبرنا لكن كرهتونا ياخي أنا أسد أسد فاهم ؟
رد عليه الهندي بإستهبال واضح و بلكنة عربي بومباي اللطيفة :
صديق ليش إنتا في قرقر قرقر كتير .. أنا مألوم إنتا في أسد .. أيوة ليون ما في مسكلة .. بس أنتا يجي هنا بي فيزا بتاع قرد لزم آكل موز .. هاذا كفيل كلام ..
فأسقط في يد صاحبنا و أمسك إمساكاً دائماً عن الكلام .
| |
|
|
|
|
|
|
|
|
|
Re: الموز ثم الموز ثم الموز (هل الموز أكل قرود) (Re: Ismaeil H. Mohamed)
|
يقول اسماعيل
| Quote: والله وصفتك دي ذكرتني بورتسودان والمخبازة يا ربي تكون مخبازة برازيلين ، لكن انا أكيد حا اجربها |
.
هذه المخبازه اسوا اكله فى الدنيا , لم يجتهد مبتكرها كثيرا....وناس الشرق يفترض يتبرو منها.....طحنيه و موز و زبادى و ما اعرفش ايه... هذه المخبازه اسوا من العصيده (ونطلق عليها فى امدرمان لقمه)
هل تعرفون اصل و تاريخ العصيده؟ يقال ان بعض القوم لديهم كميه زائده من عيش الفاتريته.. قامو بطحنه و وضعه فى وعاء فى تلك اللحظه جات كديسه جاريه و سكبت ماعون المويه فى دقيق الفاتريته....نظرالقوم الى العجين و قررو الاستفاده منه فقامو يغليه فى الماء و كانت النتيجه اكتشاف العصيده.
اما الكسره فهى تختلف تماما ....فهى ابتكار و ابداع من البدايه الى النهايه
يكفى الكسره فخرا ان معظم النساء لا يعرفن عواستها...
ولا ننسى الطايوق و استخدامه كماده لاصقه فى الصاج(منو البقدر يفكر فى حاجه زى دى)
ان شعبنا يجب ان يكون فخورا لاكتشافه الكسره
| |
|
|
|
|
|
|
|
|
|
مرورك أسعدنا (Re: Ismaeil H. Mohamed)
|
أخي الكريم / عصام دهب
مرورك أسعدنا أكثر من متعتنا بي هزبرك المغترب!!!
يبدو أن الموز فاكهتنا اللذيذة في طعمهاً والممتعة في طرائفها
لقد أثرت فيا شجون بذكرك لحديقة حيوان الخرطوم، فـ لي فيها ذكريات
وأيام جميلة جدأ جدأ ونحن أطفال نمرح ونلعب فيها في كل الأعياد.
لك ودي
حبيبنا النصري
والله انا كنت خجلان من ناس الشرق عشان كدا ما قلت راي في المخبازه
لكن بعد دا ما في طريقة .... 100% معاك في الرأي ،
أما في المعشوقة العصيدة واختها الكسرة انت من درب ونحن من درب.
إسماعيل.
| |
|
|
|
|
|
|
|
|
|
Re: نحن في إنتظار المعلومه (Re: Ismaeil H. Mohamed)
|
الاخ الفاضل اسماعيل اعتذر عن التاخير
بخصوص منع الموز عن المصابين بمرض السكري بسبب صعوبة هضمه وبالتالي زيادة نسبة السكر في الدم مما يحتاج لمزيد من الانسولين ولفترة اطول حتى يحصل التوازن المطلوب وهذا للاسف ما يعجز عنه مريض السكر - ويمنع عن مرضى الكلى لغنائه بالبوتاسيوم وكما نعلم ان مريض الكلى يحتاج الى التخلص من الاملاح والشوائب المرافقة للدم مما يزيد من مصاعب الفلترة لدى المصاب
لك الود
| |
|
|
|
|
|
|
| |
Ismaeil H. Mohamed
قلقو
almulaomar
Raja
فيس بوك
تويتر
انستقرام
يوتيوب
بنتيريست