|
عطاء لتوريد عكـــاز مضبب
|
ذات نهار ساخن اشتهى قرجة بطيخة ...وحيث انه كان جائعا جوعة شديدة راى ان يذهب الى حيث ينتج البطيخ ...جلس في ظل البطيخة مستريحا بعض الوقت .ووقف يتحسسها ويلف حولها ويحتضنها ..ثم استل سكينه ووقف والبطيخة تتجاوز حدود راسه بمتر تقريبا ..اوغر السكينة في بطن البطيخة فاذا بفيضان من عصيرها يغمر صاحبنا ويطرحه ارضا ...بعد ساعات انحسر الفيضان بعد ان ارتوت الارض واستحم صاحبنا بماء البطيخ اللذيذ .
وقف صاحبنا على حبة بطيخ سوداء يجفف ملابسه ويجعل منها مركبا يبحث به عن عكازه الذي فقده في فيضان البطيخة .
بعد مسيرة يوم كامل في مياه البطيخ الاطلنطي عثر صاحبنا على عكازه ولكنه لم يرض بفعلة عكازه في ترك صاحبه يغرق حيث انه عكاز مجهز تجهيزا كاملا لانقاذ صاحبه حتى من الانقاذ زاتا ( شفتو كيف )
المهم اخونا عمل من عكازو مسواك يستاك به كل صباح ومساء بعد ان كان يحمله على قفاه صار يحمله في جيبه الصغير
ويبحث عن بديل جيد...ولا يهمه السعر
|
|
|
|
|
|
|
|
Re: عطاء لتوريد عكـــاز مضبب (Re: يازولyazoalيازول)
|
الاستاذ / قرجة - التحية والاحترام
قرجة وعايز عكاز مضبب - انت اخوى قانص ولا شنو ؟
انا عندى ليك سفروق وفرار ينفعو؟ - لو ما نفعوا بديك ام كرتبو
شكرا ليك رجعتنا الى القرية يا امير - المهم كلو جاهز بس ادفع الجمارك فى الاول
لك الود والتقدير
| |
|
|
|
|
|
|
Re: عطاء لتوريد عكـــاز مضبب (Re: على اسماعيل)
|
يا قرجة الجاتك في عكازتك سامحتك ومن ظاهر القصة الحكاية ما وقفت على العكاز طالما غرقت في موية بطيخة وهكذا الحال يا قرجة المحقة وصلت اي حاجة حتى المليون ميل مربع يمكن بكرة يصبح مليون كلم2 طبعا سمعت نكتة المصارعة وبحكيها ليك تاني قالوا عاملين مصارع دولية للقطط (الكدايس) وقالوا كديستنا التي تحمل علم السودان في صدرها صرعت كل كدايس العالم ووصلت للمباراة النهائية أمام كديسة الولايات المتحدة وفي اول خمس دقائق حسمت المباراة لمصلحتها ... ومع حيرة بطلة امريكا وزهولها من قوة الخصم قالت بطلة السودان مافي داعي للتعجب فأنا اصلا نمر بس من قل الاكل في السودان بقيت كدا... المهم خايف عليك بكرة تغرق في فنجان القهوة شوف ليك غطاية قلم وغطاية ببسي اشرب فيها الشاي والقهوة واعمل حسابك وأنت تقطع الطماطم
| |
|
|
|
|
|
|
Re: عطاء لتوريد عكـــاز مضبب (Re: على اسماعيل)
|
الصديق الاستاذ / علي اسماعيل
تحياتي يا غالي
Quote: انا عندى ليك سفروق وفرار ينفعو؟ - لو ما نفعوا بديك ام كرتبو
|
السفروق والفرار ديل بعرفن لكن ام كرتبو ده من اسمو ياهو زولي زاااااتو
تحياتي
| |
|
|
|
|
|
|
Re: عطاء لتوريد عكـــاز مضبب (Re: يازولyazoalيازول)
|
العزيز هشام
سبحان الله ...كتبت هذا العطاء وانا في بالي شكلنا الزمان ....هل تذكر كيف كان العكاز يخرج من الكي البورد ليكبع بلطف ...وكيف ان لقاء في سوق الكسرة قد جبر الخواطر وطيب النفوس ...
والله يا اخوي سؤال الموبايل ده ما بيروي علا بندور سلام تهتز له العمم ...والصفقة على الضهر تصحي النايم ...
| |
|
|
|
|
|
|
Re: عطاء لتوريد عكـــاز مضبب (Re: garjah)
|
الغالي قرجة ما زلت أتجول في بورصة العكاكيز لكن لم أجد المضبب الذي تبحث عنه وأثناء مروري اليوم ببورصة البطيخ دخلت وقلت يمكن ألقاهو هناك لكن لقيت البطيخ زاتو شكلو اتغير
أشوف باقي السوق وأجيك
| |
|
|
|
|
|
|
Re: عطاء لتوريد عكـــاز مضبب (Re: كبسيبة)
|
الحبيب
ايمو
والله مشتاقين
انت عارف اجمل حاجة في العكاز ان يكون حرا دون ضبضيب
فاذا نزل على راس احدهم تمتعت بمنظره وهو يتطاير اشلاء
بوركت خيرا وزوجت بكرا
كبسيبة
هاك اخوانو
| |
|
|
|
|
|
|
Re: عطاء لتوريد عكـــاز مضبب (Re: Raja)
|
العزيزة رجــــــــــاء
استجابة لطلبك ...اتينا به هذا ابوعراقي قصير
تتخيلي جبت ليهو جزمة وجلابية حلف ما يلبسن
كبسيبة
صاحبك استنكرت عليه الجري
وبيده عكاز ضخم زي ده
| |
|
|
|
|
|
|
Re: عطاء لتوريد عكـــاز مضبب (Re: garjah)
|
قرجة العزيز..
تتذكر لما الهكر الشين داك سرق ايميلي السنة الفاتت.. قام خالد الحاج عمل دعوة حلوة فيها كل وسائل الأمان.. عكازتك.. وشيطان البدري.. بالمناسبة دي هو وينو زاتوو..؟
من اليوم داك انا عكازتك دي بتعني الأمان لي..
لووووووووووول
أوعك تفقدها تاني..
| |
|
|
|
|
|
|
Re: عطاء لتوريد عكـــاز مضبب (Re: garjah)
|
أها يا قرجه يا أخوي على طريقة المبدع أبا جهينه نقوم نوثق للعكاز – أصلو أبو جهينه ده جنو توثيق – يلم في أخي حاجه يوثقها ويشد الوثاق إلى أن تلتف الساق بالساق ، أها في شأن العكاز هناك: العصا والخيزرانة والبسطونه والبنبقه والسفروج (وده شوف عيني ناس أوروبا عملو ليهو قومه وقعده وسو ليهو إتحاد قال رياضه ، والله لي أهلنا ناس الشرق الإخترعوهو). القرجه
| |
|
|
|
|
|
|
Re: عطاء لتوريد عكـــاز مضبب (Re: almulaomar)
|
الحبيب قرجة .. عوافي قديم عندنا في حلتنا شيخ مانع بلحيل .. قوي البنيان حتى بطيختك القت عليها دي .. يعصرها زي الليمونة وكان عنده عكاز يزيد على مرق العنقريب بى شوية .. يعني لامن يجي داخل البيت باب الحوش من أبواب الحراز المبطن بالحراز .. يعني مدعوم من الداخل .. فكان شيخنا الله يرحمه بعد الدخول للبيت يركز العكاز خلف الباب لزوم عواتي الرياح وعواتي الزمان .. فكان اذا الكوع حمى وتنادت الرجال أو سمع قولت : يا أبو مرووووووووة كان يصيح : يا بت ناوليني المطيرق العند الباب تسلم يا أخوي .. سيف
| |
|
|
|
|
|
|
Re: عطاء لتوريد عكـــاز مضبب (Re: saifkeli)
|
Quote: العصا والخيزرانة والبسطونه والبنبقه والسفروج
القرجه |
فارس التعقيب الملا
لا تنس ام كرتبــــو ...اللذكرها علي اسماعيل
الفارس
سيف كلي
انت عارف اخوك حضر ليهو نقاش بين جماعة من عينة شيخكم ده
وكل منهم كان يفاخر بعكازو ...ونوع خشبو وجمالو
قام قريبا لينا وكان شايل ليهو حاجة كدة زي حقت قريبك ده
وقال للجماعة انتو عكاكيزم دي كلها عكاكيز ( ستاتية )
وده ياهو عكاز الرجال
ولملمنا الموضوع بعد تعب ...خاصة ان الجماعة كان فيهم بعض وجهاء القوم ...وبعض من المؤلفة قلوبهم ( نسايب جداد )
| |
|
|
|
|
|
|
Re: عطاء لتوريد عكـــاز مضبب (Re: garjah)
|
قرجه اخوي كل عام وانته بخير رمضان علي الابواب ... خير مالك بس عجبتني حكاية الطماطم وقعاد البرش .... ياربي الحصل شنو ... الناس كشة من الرطوبه والا شنو .... استر بالبتستر
| |
|
|
|
|
|
|
Re: عطاء لتوريد عكـــاز مضبب (Re: willeim andrea)
|
الحبيب اندريا
وييينك يا راجل
من خروفك شرد تاني ما شفناك
قلت لي حكاية الناس كشت دي عجبتك
يازول حليل زمان وايام زمان
ناس يازول ديل
كانو بيلعبو حرينة وبيرفعو ليها كرعينهم الاتنين بدل واحدة
وام الصلص كانو بيلعبوها بالبراميل
| |
|
|
|
|
|
|
Re: عطاء لتوريد عكـــاز مضبب (Re: garjah)
|
أخوي قرجة .. مودتي وفي السمعناه كمان قالوا: العكاز داك كان مضبب .. لكن بضنب شنو ما تسعلني
يمكن تكون ضبة تفصيل .. يعني جلد عنسيت
في حاجة إسمها سرهيتة يعني نوع من الأخشاب الجيدة للعصي .. لكن نوع الشدر حقها دة ما بعرفوا بجي من وين وليها خلايف .. يعني نتوءات متناسقة أفيدونا أفادكم الله
| |
|
|
|
|
|
|
Re: عطاء لتوريد عكـــاز مضبب (Re: willeim andrea)
|
السيد المحترم قرجة و شركاؤه
بالأشاره لأعلانكم الصادر بصحيفة المشاكل العدد 7653348779 بتاريخ 41/15/1901 و الخاص بعطاء لتوريد عكـــاز مضبب, نود أن نتقدم بالعرض التالى:
1. عكاز مضبب جلد تور اب جاعورة السعر 1,000,000 دولار 2. عكاز مضبب جلد سحلية عاقر السعر 9,000,000 دلار 3. عكاز مضبب جلد فأر أعور السعر 4,000,000 دولار 4. عكاز مضبب جلد تماسح عشارى السعر 7,000,000 دولار 5. عكاز مضبب جلد نمر ورق السعر 8,000,000 دولار
مقدمه:
على الحلاوى
الشركة العالمية للتضبيب الثورة الحارة 653 تلفون مكتب: 011229875649824567896210245 موبايل: 0912265649746478946467964694564697964646547711
ملحوظة: الأصفار الواردة فى الأسعار أعلاه نتيجة خطأ مطبعى
(عدل بواسطة Ali Alhalawi on 09-22-2004, 07:49 AM)
| |
|
|
|
|
|
|
Re: عطاء لتوريد عكـــاز مضبب (Re: Ali Alhalawi)
|
Quote: 1. عكاز مضبب جلد تور اب جاعورة السعر 1,000,000 دولار 2. عكاز مضبب جلد سحلية عاقر السعر 9,000,000 دلار 3. عكاز مضبب جلد فأر أعور السعر 4,000,000 دولار 4. عكاز مضبب جلد تماسح عشارى السعر 7,000,000 دولار 5. عكاز مضبب جلد نمر ورق السعر 8,000,000 دولار
|
الحلاوي
يجازي محنك يا الحبيب
قلت لي الفار الاعور والسحلية العاقر فيهن جلد ختيير
اسحب الاصفار الزايدة وادخل العطاء في ظرف حكومي مختوم بالشمع الاحمر وارسله بالبريد المسجل
لعناية
قرجة
واكتب على الظف بخط واااضح
بلاد العجايب
مدينة الوجع
حي السهر صباحي والنوم وقافي
شارع الضهب المتفرع من التعب
شقة
ياهو ده السودان
| |
|
|
|
|
|
|
Re: عطاء لتوريد عكـــاز مضبب (Re: garjah)
|
الفارس
سيف
Quote: في حاجة إسمها سرهيتة يعني نوع من الأخشاب الجيدة للعصي |
وهذا اسم جديد تضيفه لقائمة العكاكيز ....وبخصوص الفتوى
فلا يفتى والملا في المدينة....فهو خبير عكاكيز...
كولا
حبيبنا
ويييينك ؟؟؟؟؟
نورة بتسلم عليك ...اما بخصوص البتيخ فيبدو ان كبسيبة اصبح مورد بتيخ دولي بعد كسدت تجارة الحاسوب ....
اظهر وبان
عليك الامان
كبسيبة
مطلوب مترجم فوري
| |
|
|
|
|
|
|
Re: عطاء لتوريد عكـــاز مضبب (Re: garjah)
|
عزيزنـا الخلوق قرجة ـ عكاز دا غايتو انا ما من ناسو ـــ بس ممكن اورد ليك قشـة ـ داير نوع القشة اليتعلق بيها الغريق، واللا القشة التقصم ظهر البعير ، واللا القشة الما تعتر ليك ؟؟ ـــ
| |
|
|
|
|
|
|
|