كتب الكاتب الفاتح جبرا المتوفرة بمعرض الدوحة
|
|
 فار تكلنا وفاره التكل المجاور..
|
فتحت عليك باب الحزن
وقابلت المناقد جمره المشتاق بكل ارتياح
وانا ما قنع مني القلق لامن يموت شوقك ويتحول رماد
جد اتكيت في همبريب الحب عليك
جات حبيبه روحي ليك
مالك بتمشي و ما بترد حنيه الامات و دعوتن ليك شان تجي
مالك بتتنكر لكل تمرات دفعن حياتهن شان انت تدفع حق المدرسه
مالو الحنين جواك قسي
مالها مويه بيرنا ديك ما اتحللت جواك حنان
مالك نسيت ريدنا الزمان
انت من زمن الزمان
اتغيرت كل التفاصيل والاماكن والحوادث والتناكير والدساتير والدنانير
حب الفرع في ميلتو ديك حيطه الجيران
اتعودت طوبه عتبه الباب علي سفنجه حبيبي المغربيه وادمنت لمستها
زير علويه حبوبتي اعلن زواجه الابدي بالحماله
باب السنط حق جدي العمده ادمن صرير الصوت في فتحه
تمت مراسيم العشق بين فار تكلنا وفاره التكل المجاور واثمر الحب طاعونا الم بالحي باستثناء بيتنا والجيران ردا للجميل
يا طائر الشعناق صح باقصي ما يتسع منقارك المعقوف شوقا للهجره جنوبا
اهدت انثي الطاؤوس ثوبها المفضل لحبيبها المفضل وكشفت عوره الحب بياض بشرتها فبيعت مع الرقيق
كوركت السحليه من الشق الفي المدرسه مردده مع المعلمه حروف الهجاء والعشق و دخلت مسروره الي ضبها صائحه
وينها الكسبره الرسلتك ليها يا سجم
شبط عم علي التمرجي قال الروب من الشقيق وحوجته الي لوشن
بشكير ست الكوفير انتحر بالصبغه اثناء حوامته في رؤؤس الزبائن
النتيجه المعلقه علي جدار غرفتي اصابها ثقل الايام وامتلاؤها بالهم بالغضروف الغير مفاجئ
تلفون المنزل اعلن ملله من سماع كلمه مشتاقين المكرره و اعلن تمرده الابدي علي نقلها وقال لي بالحرف الواحد كان مشتاقين ما تتلاقو ياخ
جننتو الشوق جن
|
|
 
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
انا ذاتى ياتومى اخوتى
شوفى لى فارة
بس تكون فترانة جرت
وجرت لما فترت...
لكنى كرهت الجرى وراء الفرات
النشطات..
وكلما اقول اقبضها تدخل
جحر الجربوع..وتطلع بهناك
كمان مليت الادمان
فى مجارى الغربة النتنة...
كلما اقول اترك بلد
تلقانى مشيت بلد تانى...
حتى الوظيفة مليت التنقل
كل ما امشى شركة جديدة
تلقانى العام الجديد
فىواحدة تانية...
ياترى شنو المشكلة
فى انا ولا فى حظى المشاتر
كل ما اتكل على حيطة
القها مسنودة بشعبة مسوسة...
لكن بسالك يابت الناس...
انت مسكونة بالابداع..
تغيبى وتغطسى..وتجى مقلعة بهناك
زى الوزة فى بحر ابيض..كل يوم
نكتشف انك جزيرة مليانة طلاسم
وقوارب النجاة فقدت مساراتها
وربانها اضحو غذاء لقرش البحر...
وانت قاعدة تضحكى على الزمن المصنقر
فى متاهات الغياب....
ولك ودى
ابقوتة_ فى اول الدوام
| |
|
|
|
|
|
|
|
|
|
Re: فار تكلنا وفاره التكل المجاور.. (Re: abuguta)
|
وانت قاعدة تضحكى على الزمن المصنقر
فى متاهات الغياب....
هو داب ضحك لكن يا ابقوته
ابقوته انا جاده كده دايره ادعوك لمناجره شعريه
دي علي وزن مطارحه شعريه
لكن تكون ما جاده
الفكره دي جاتني قبل كم يوم مع ود عما لي والشجعني علي دعوتك انت تحديدا تاريخك النجري الفوري ابتداء من قائدنا الالمع الاشتر ديك انت قايلني نسيتها ليك
اها انا غايتو ما جاده انت جادي؟
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
قمتي تاني على إبداعك؟؟؟
Quote: تلفون المنزل اعلن ملله من سماع كلمه مشتاقين المكرره و اعلن تمرده الابدي علي نقلها وقال لي بالحرف الواحد كان مشتاقين ما تتلاقو ياخ
جننتو الشوق جن |
والله نجننوا طول ما فارة تكلكم فايره فوق فارة التكل المجاور
| |
|
|
|
|
|
|
|
|
|
Re: فار تكلنا وفاره التكل المجاور.. (Re: بدرالدين شنا)
|
بسسسس
الشرك قبض
بدر الدين نشاه
انت شنو عامل فيها مهم كده وقدر ما اقول ليك دايره انجر معااك لقاء تعمل فيها مافي
هو كان ما في الاحتفال داك شنو ما عاررف ليك
هوي ما تزعل والله انت مهم شديد
لكن الله جابك الليله في البوست ده اصلا هو فالت مني ما بتمرق الا امرق لي منك بلقاء قطع وبالعدم ميه دولار وبما انو الميه دولار معلومه ومعدومه لدي الجميع فلن نبخل علي الجميع ايضا بتعريف القطع
واللقاء القطع ماخوذ اصلان من الشبط القطع والمركوب القطع تشجيعا للصناعات اليدويه والجلديه مع مراعاه فروق الجلد وعدم التعرض لناس حرس الصيد
اها بتشجع المهارات الفرديه
ولا ننجر من ما نسمع
الرد سرييع لانو الصبر سافرت خلتني مع الشفقه بت ود علي
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
العفيفة الظريفة توما
تحياتي واشواقي الحااااااااااااااااارة
ياخي أنا ما عندي مانع من مناجرتك لكن بخاف من روعتك وإبداعك و فيرانك (جمع فأر) ولكن توكلت على الله واليحصل يحصل يلا أديني صورتك (للذكرى) أقصد تصور للفكرة ... والله خايف منك عديل كدا
ولا اقول ليك رسلي لي الأسئلة وأنا برسل ليك الأجوبة وبعد داك كان لقيتي الشغلانة بتستاهل ممكن تنزليها للجمهور
يا زولة إنتي السلَّطك علي منو؟؟؟
| |
|
|
|
|
|
|
|
|
|
عندك كلام تقولو (Re: توما)
|
بدر الدين نشاه وباصرار
بركه الجيت جدااا
جيت والله جابك
اول حاجه هو نجر حي اخو اللحم الحي وبعتمد اساسا علي التلقائيه وبما انو انا بثق في ذمتك كما اثق في ذمتي( ما شديد لكن )نقوم ننجز وعد كافي وشافي انو نستغني عن جميع الاساتيك الفي الدنيا و الديليت الفي الكي بوردات ونكتب ساي احسااس بس
تاني حاجه ما تفتكر انو انا نوع محضره اسئله وكده ..انا بكتب من راسي و الكي بورد طوالي
اها حقو نبدا طوالي من هنا مش عشان ما نبقيها رايك شنو و راي الفيران واعني الجيران
اها نبدا كيف دي المشكله
ضربه البدايه
بدر الدين سؤال محرج وحيكون جادي
انت خليت الكوميديا ولا هي الخلتك
وبالله استرسل كده
بعدين السؤال الاول دائما بايخ
ما تحمد الله الما بديت ليك باكلتك المفضله
ده برضو كان داير ممكن تجاوبو
وفي السؤال الاول داك
تقوم تحكي لينا عن ناس مهمين شديد وشكلو احساسك بالكوميديا وتضرب لينا امثله
زي ادم العجلاتي ولا عبد الله التمرجي كده يعني
بعدين ده طبعا بجرك لانو تقول لينا انت من وين اصلا ومن ياتو حته وجيرانكم بالحيطه ناس محمد منو
ما هو لازم يكونو ناس محمد وناس فاطنه
الاسئله طبعا زي ما اتفقنا ما مرتبه وجايطه عديل لكن متاكده عندك كلام تقولو
يلا قولو
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
والله الكوميديا ما تخلت عني ولا أنا تخليت عنها والحصل عندها ود عمها إتقدم ليها وقال دايرة
أسمعي الليلة الجمعة وأنا ماشي الصلاة وبدعو ليك معاي لكن ما تكلمي زول عشان ما يتشبكوا ... سمح؟؟؟
برجع ليك بكرة لو ربنا أحياني
| |
|
|
|
|
|
|
|
|
|
Rep (Re: توما)
|
الأخت الفاضلة توما
تحياتي،
أتابعُ ما تكـتبينْ !.
دعي الروحَ تكـتبُ نفـسَها، كما هـو
الحالُ كلما قـرأتُ لك ِ.
لاينقـصك ِ الذادُ ، توكـّلي :
بقـليل ٍ من الصبر ِ والشقاء اللازمين
أبدأً، ستبلغين ـ في الكتابة ـ المُرامْ .
حفـظ َ الله قـلمك ِ من الشرورْ.
عثمان محمد صالح
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
السلام عليكم .... السلام عليكم
صلّينا .. ربنا يتقبل
يلا زحي شوية خليني أسترسل أصلو أنا الليلة عندي إسترسال شديد خلاس ما عارف أكلت شنو .. كدي ناوليني الكوميديا دي خليني أسترسل ليك فيها
زي ما قلت ليك أنا ما خليتها ولا هي تخلت عني حيث أنني ورغم ظروف الغربة ظللت أمارسها بين أفراد الجالية في إحتفالاتهم في النادي السوداني بسلطنة عمان والذين كانوا يستعينون بي في بعض لياليهم ومناسباتهم ولكنها لم تكن بتلك القوة ويصيبها الوهن في بعض الأحيان لأنها تحتاج للتفاعل والأحداث المثيرة والتي لم تتوفر لي خاصة وأنني أعيش غربة داخل غربة في صحراء ليس فيها من يفهمني وأذكر هنا حادثة أنني حكيت لواحد من الأخوة الخليجين نكتة وتوقعت بعد الفراغ منها أن يضحك ضحك شديد ولكنه فاجأني برد فعله الآتي (صحيح صحيح) ولكنني رغم هذا أفعِّلها بالإتصال ببعض السودانين حتى لا تتفلت مني كما تتفلت الإبل بالإضافة لإتصالاتي المستمرة مع مجموعة فرقة الأصدقاء وزياراتي السنوية لهم
أما بخصوص سؤالك عن مسقط رأسي فأنا عربي من عرب الجزيرة مولود في قرية من قرى الحلاوين إسمها (مناقزا) .. بتضحكي مالك؟؟؟
آي إسمها مناقزا ما سمعت بيها قبل كدا ولا شنو؟؟؟
يكون في علمك مناقزا دي حتى الإنترنت بعرفها أنا مرة سالتو منها طوالي جابها لي وجاب لي قرية جنبنا إسمها شرفت وجاب لي قصائد كاتبها واحد من مناقزا إسمو بدرالدين شنا أما جيرانا ناس محمد قرشي عبدالفتاح كويسين وطيبين والحمد لله
أما الأكلة المفضلة فهي
توما بتحب ماما وأنا بحب ملاح الرجلة رجلة رجلة رجلة
طبعاً بحب ملاح الرجلة لأنو أماني زوجتي بتريدو علماً بأنه بيعمل لي حيرقان
أماني الجندرية سلام
| Quote: الله يقطع غطى القدح وسنينه |
ما ياها ديك التراجيديا معرسها السودان كله مالوا ود عمها ما غطى قدحه
تحياتي الشدييييييييييدة ليك
العزيز عثمان محمد صالح
وعليكم السلام ورحمة الله تعالى وبركاته
إتفضل توما بتجي هسع
| |
|
|
|
|
|
|
|
|
|
Re: فار تكلنا وفاره التكل المجاور.. (Re: بدرالدين شنا)
|
صحيح صحيح
وعليكم السلام تقبل الله منا ومنكم صالح الاعمال
طبعا انفلات الحاجات ده واضح جدا واكتر انفلات لما نكون بنعمل في قونقليس بالشطه عندي اختي بتقول والله فكا مني وتعني انو ما زبط اها البوست ده قبيل كده قرب يفك لكن قبضتو
نرجع للكوميديا وانو فعلا الابداع بتولد من الممارسه اليوميه والمشاهدات الحيه
في عدم وجود الجو المناسب الابداع تفتكر بحدث نتيجه اجترار ولا خيال بحت ولا تضخيم حتي للاحداث البسيطه المسموعه او المقرؤه واستغلالها وتفتكر الانترنيت وتحديدا البورد خدمك في الحته دي ولا الي حد ما لخبت جواك بالاحداث العجيبه وتواترها
جدا يا نشاه
مناقزا مناقزا ما بيناتنا البركه في الناس الفيها
يلا طيب لحدي متين انت قعدت فيها والحتات المشيتها في السودان وكان ليها اثر في تشكيل وجدانك
شنو ومنو وليه ديل مهمات جدا
منو وليه ترجع لافراد حيين او لبو نداء ربهم الكريم
بعد داك في حاجه اساسيه بمناسبه ملاح الرجله واهميتهالا تكمن في الرجله نفسها كنبات اخضر وفعلا بعمل حيرقان ولكنها تتعلق بحب اماني للرجله وحبك انت لاماني والشوق والريد
اماني دي طبعا انا عندي اعتقاد جازم انها زوله كوميديه بشكل غير مقصود
ونتيجه للعدوي المتوارثه
احكي لينا عن حاله الضحك في البيت والممتده الي بيت العائله والاسره الكبيره
والحفلات القطع بت عم ناس القطع القبيل ديك البتكون بالجردل والعصريه سااي بدون اي مناسبه غير فلان بدا ليهو طرف غنيه والنبي يا بدر كان ما غنيت وصحي انت بتغني قالو مش
بدر الدين عندك مايك لانو ده بجيب اقتراح لو عندك
ياخييي سوعالاتي قربت تكمل
اها
استرسل
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
طبعاً نحن إتفقنا إنو الكوميديا والعمل الدرامي بشكل عام يحتاج للمارسة والتفعيل ولكن لا ننسى أن المعاناة أيضاً لها نصيب الأسد في ولادة النكتة فأنا إن كنت أعاني اليوم من الوحدة والصحراء (بالمناسبة دي أخت الغابة والصحراء) فكل هذه المعاناة والمشاهد اليومية تسكن فيما يسمى بالذاكرة الإنفعالية وتتدفق في الوقت المناسب في شكل إبداع
أما الإنترنت والبورد بشكل خاص أقر وأشهد أن العبد الفقير بدرالدين شنا أنه خدمني وطور مقدراتي بل ويعتبر عزائي الوحيد ولا أذيع سراً إن قلت أنني بعض الأحيان أشعر بأنني قزم أمام كثير من المبدعين فيه غير المشهورين وأظل أنهل من فيضهم وأنتي يا توما واحدة منهم وهناك الكثير أمثال أهل العوض والملا عمر وسجيمان وحبيب نورة وبت قضيم ودكين والمجنونة شيري وكثير وكثير
أما الحبيبة مناقزا فولدت فيها وترعرت فيها ودرست فيها حتى مرحلة الثانوي العام وبعدها إنتقلت للخرطوم الحلم في ذلك الوقت ودرست فيها الثانوي العالي والذي وجدت فيه أساتذة شجعوني على دراسة التمثيل وأذكر منهم أستاذ كرار حفظه الله (محمد عثمان كرار) أعتقد هذا إسمه فهو من شجعني وأخذ بيدي حتى وصلت إلى المعهد العالي للموسيقى والمسرح والذي أتاح لي فرصة التعرف على كبار الفنانين والمبدعين ووجود الأستاذ محمد السني كمعيد في المعهد والأخوة محمد نعيم وزكية كزملاء فصل سهل من مهمة إنضمامي لفرقة الأصدقاء المسرحية والتي لا زلت أفخر بها وعشت بين أعضائها أكثر من عشرة سنوات طفنا فيها كل أقاليم السودان تقريباً
نسيت أمبارح أذكر من ضمن أشيائي المفضلة وهي حسب الترتيب
أماني
الروب
الصعود
فعندما جاءت إبنتي غادة للوجود تركت الصعود
وعندما جاء إبني أواب تركت الروب
وعندما جاءت الصغيرة ربى وضعتني في مأزق وفضلت ترك السودان حيث أنني لا يمكن أن أتخلى عن أماني وبعدين زي ما قلتي أماني دي زولة كوميدية وحبوبة لكن مشكلتها ما بتغير (عشان ضامنة كوم الشنا الفوقي دا) وعارفة مافي زولة بتطمع فيني ودي بتذكرني المسجونين لمن قالوا لي واحد فيهم أعمل لينا شاي ولع ليه قشة كبريت وخت فيها حلة موية ولمن إحتجوا قال ليهم إنتو لاحقين شنو
والله ياريت لو كان عندي مايك كنت غنيت لأني بحب الغنا وخاصة بالدلوكة
لكن للأسف المايك ما بشتغل عشان السيرفر ضعيف هنا في الصحراء لكن ياتوما إن شاء الله بركة الله ألاقيك في عرس محاسن وأغني ليك غنا شديد ما هو لازم يكون في محاسن ويعرسوها .. عشان تاني تقولي لي جاركم محمد منو
يعني عشان لاقياني صغير كل مرة تسرسلي فيني
| |
|
|
|
|
|
|
|
|
|
Re: فار تكلنا وفاره التكل المجاور.. (Re: بدرالدين شنا)
|
Quote: ابقوته انا جاده كده دايره ادعوك لمناجره شعريه
دي علي وزن مطارحه شعريه
لكن تكون ما جاده |
تومة
انا قبلت الدعوة...لكن النجر دايرة فارة لوووووووووول
وبعدين جاك النجار الكبير...بدر السمح...والله دا ينجر
الطندب....يطلع المنجور ابنوس
لكن حصل مر عليك نجر من الصندل...
كدى شوفى دى
بينى وبينك يامنى الدل جنجال
كل يوم توعدينى بكل وبعد كل
تم كدر تاه اسال ولا تسال
صدك وهجر فعل لى بهوت مشكل
هم بيار كرتا وتم شرا لال
يامدعج الاغ يامرد القال
ليك شعر ريان وكمر معزل
على المتن غطى بطول البال
حالك متل الرات بن النود عزل
هم كل جيا قار وللسودان راحل
سو بليس عودى لى وطل
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
حبيب قلبي أبوقوتة سلام
Quote: وبعدين جاك النجار الكبير...بدر السمح...والله دا ينجر
الطندب....يطلع المنجور ابنوس |
كدي يا ابوقوتة أنجُر أنا بريدك لي شنو؟؟؟
الجار القريب الحبيب إيهاب الطيب
تحية حلاوية
| Quote: والتحيه للا خ بدر الدين.. ودي مصادفه حلوه أنك تطلع حلاوي ..فأخوك من الولي |
كان كدي زح لي النفتخر بي معرفتك عشان أنا بريد الولي دي ريدة شديدة فهي تعتبر واجهة مشرقة للحلاوين فهي معقل المثقفين والمتعلمين
لك التحية
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
أبوقوتة المرهف
سلام مهووووووول
Quote: بدر الدين نحن بنتشابه فى الخضرة
وسبب الريدة هى الشنا |
هي يايابا تبرا من شبهي أنا
وسبب الريد عينيك وعينيا
إنت عندك فكرة إنو أنا ماعندي خد؟؟؟
بختكم إنتو أصحاب الأخدود
وأنا في الدنيا ماليش (خد) غيرك
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
لوووووووووول جدا
انت ما عارف محاسن عرسوها وانتهت
لكن ان شاء الله بنتقابل في عرس علويه
طيب يا بدر الدين ورغم محاولاتي الغير جاده لانو ما اضحك ضحكت
لكن ولا يهمك وبما انو ما لاحقين حاجه علي قول عم المسجون
نقوم نبدا من العالي وتجربتك المسرحيه والكوميديه فيهو
انا طبعا بقدر ما انو اللقاء ده نجر الا انو فيهو جانب توثيقي مخفي نحنا الاتنين ما قاصدينو
لكن فجاه خطر لي عشان كده حاقوم كل ما تقول حاجه عابره بتشبك فيها وارسلك تجيب الباقي وتسترسل
عموما في نص الكلام ده سعيده جدا بالتعرف علي اماني اللطيفه وغاده و أواب و ربي
ربنا يحفظهم ليك ويرجعك ليهم سالم وغانم ومعاك الحاجات
ومن العالي واحتمال الدوره المدرسيه لو امكن لحدي المعهد
وفي المعهد نقوم نقرش هناك لفتره طويله لو سمحت لحدي ما نشحن باكبر عدد من المبدعين والذكريات
الاثرها ممتد جواك لحدي يوم الليله
ولو سمحت ما تهبش لي فرقه الاصدقاء والمحطه الاهليه وتكمل علي كلامي
بحاول بقدر الامكان اديك مساحه حكي براك كده عشان تقول كل الكلام الما اتكتب فوق الدفاتر
وبتفق معاك في حاجات واعقب عليها ,الجميل انو كل جمله بتفتح باب قصه
علي ذكر المنبر انا برضو بدين ليهو بانو طور قدرات وفتح لي ابواب للتواصل والتناجر والقرايه والثقافه والظرافه
و
رغم الحاصل
برضو نواصل
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
ابو قوته النجااارر جدا
وحاه الله ما فهمت شئ
ده نجر هندي ولا شنو
لكن نجرك لبدر الدين عجبني جدا
ده الكلام
اها القافيه واو
وانت البديت
يا ابقوته بالنجر العجيب
ريده بدر
والهندي من شعرك عجيب
ده نجر ضعيف جدا اسمح لي بيهو كبدايه بايخه
القافيه با بلد الزمان ديك
وشعر بدر الدين ونجرو جايين عليهو تب
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
ايهاب صاحب المطارحه الشعريه ست الاسم
طبعا بركه الجيت عشان نستأذنك في استنساخ المناجره الشعريه من فكرتكم الاصليه الناجحه جدا وده بعد محاولاتي المستميته والابت تجيب عمار انو اقول معاكم لانو ما بحفظ كلو كلو
وطلعت من اهل ناس بدر الدين كمان
طبعا حبابكو عشره كلكم وناس العوض ديل عزاز علينا تب
وفي محاولات الزول يفتح ليهو موضوع باقه عسل في البوست ده كان يطلع ليهو بواحده
تاني حبابك عشره يا ايهاب
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
| Quote: نقوم نبدا من العالي وتجربتك المسرحيه والكوميديه فيهو |
الثانوي العالي دا كان طبعاً هو النقلة الكبيرة من مجتمع القرية إلى مجتمع المدينة وأذكر دي كانت بداية الشنا والشيب عندي لأنو لغاية الثانوي العام أنا كنت حلاوي حليو وشعري أسود ووشي زي القمرة تبارك ما شاء الله المهم
جيت العاصمة ومعاي كل طيبة ونقاء سريرة القرية ولقيت نفسي في دنيا مختلفة خالص وعالم جديد خاصة وأنني درست في مدرسة بيت الأمانة الثانوية العليا وهي كيان خاص حيث الطلبة أغلبهم ميسوري الحال ويظهر ذلك في ملبسهم ومشربهم وتصرفاتهم ولكنني وفقت بسرعة في الحصول على أصدقاء كانت تعجبهم عفويتي وسجيتي والنكتة التي كانت تخرج في غفلة مني وشوية شوية بدأت في الغناء والترنم بينهم في فسحة الفطور بعد شوية تنامى إلى مسامع المعلمين أنني أملك بعض الموهبة والتي تحتاج إلى رعاية علماً بأن أحد هولاء المعلمين هو الشاعر الكبير مهدي محمد سعيد والمرحوم الشاعر الفذ محمد عبدالقادر كرف بالإضافة لأستاذ كرار والذي كانت تربطه علاقة صداقة بعميد معهد الموسيقى في ذلك الوقت الدكتور خالد المبارك والممثل القدير أحمد إسماعيل .. وبيت الأمانة كانت قبلة للفنانين يستعينونا ببعض طلبتها في بعض الأعمال الإحتفالية والكورالات وأذكر مرة جاء الفنان إسماعيل عبدالمعين عليه الرحمة يطلب طلبة ليؤدوا معه بعض الأناشيد وكذلك الفنان الملحن عبدالله الفزاري فكان المعلمين دائما ما يخاطبوني في هذه الحالات ويطلبون مشاركتي ضمن المجموعة المختارة بالإضافة للدورات المدرسية والتي شاركت فيها مشاركة فعالة في الغناء والتمثيل ولكن تجربتي في التمثيل في ذلك الوقت ما كنت راضياً عنها لأنني كنت أمثل دور (المرأة) يعني على شاكلة بت قضيم وعشمانة ودي بداية أغلب الممثلين يعني زي كورة الشراب عند لعيبة الكورة كلهم ببدوا بي كورة الشراب وزي الحمام بالنسبة للمغنيين
كل ذلك جعل المعلمين يشجعوني للمضي في هذا الدرب فقدمت للمعهد كرغبة أولى في أورنيك الشهادة السودانية وكان لي ما أردت والحمد لله
أنا أيضاً سعيد بسعادتك بالتعرف على زوجتي وأبنائي
لك كل الحب
| |
|
|
|
|
|
|
|
|
 Re: فار تكلنا وفاره التكل المجاور.. (Re: توما)
|
Quote: وبعدين جاك النجار الكبير...بدر السمح...والله دا ينجر
الطندب....يطلع المنجور ابنوس |
والله بوست موبالغة عديل ووالله بضحك زي المجنون
لي زمن ما سمعت زول جاب طاري الطنضب وافتكر
في كثيرين لا يعرفون ماهو الطنضب وبالمناسبة
هو علاج ناجع لجروح مرضى السُكري اشكرك يا تومه
ويا بدر الدين شنا ادخلتم علينا بعض الفرح
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
الغالي ود الشيخ
سلامي وإحترامي
Quote: اشكرك يا تومه
ويا بدر الدين شنا ادخلتم علينا بعض الفرح |
كان تشيل شوال الفرح كلو شلت بعضه لي شنو نحن عندنا غيروا ولا أقول ليك شيل معاك سبيطة الفرح ديك هوادة
أبوقوتة حلال المربوطة
| Quote: (عدل بواسطة abuguta on 12-09-2004, 10:09 |
طالما في عُدل بواسطة أبوقوتة معناها في نُجر بواسطة أبوقوتة
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
بدون اي تعليق علي الشعر الاسود الفاحم
لكن بالله غنيت مع باب فزاري يا سلااااام
شفت لمن اقول ليك استرسل بجي بفائده كيف
ومالها بت قضيم عيبا لي حقيقي اجادها الفاضل سعيد بشكل مميز رغم راي والدته الله يرحمها انو بري من جنس اللغوسه البسوي فيها الفاضل ولدي دي
الا انو حقيقي قدر يجيب الضحكه الغائبه
وده سؤال صدفه كده ..هل انت كممثل عندك راي في اداء ادوار معينه ولا كل الادوار ممكنه تفتكر ؟؟
يعني بعض المشاهدين السودانيين يستنكرو علي المراه اداء ادوار محدده كمثال مثلا غير متوفر في الدراما السودانيه الا انو في ممثلات سودانيات ادو ادوار في فيلم صعيدي في الجامعه الامريكيه مع محمد هنيدي لو كنت شفتو ؟؟ رايك شنو ؟؟
ومن اورنيك التقديم والمعهد العالي للموسيقي والمسرح كرغبه اولي واتحققت
زي ما قلت نقرش هنا شويه واحكي لينا عن سنه اولي واول الدهشه بعالم الفن والاساتذه والمبدعين وحقيقي المعهد مدهش افرادا وجماعات ادهشني انا كزائر وحضرت كم عرض فيهو خلي اكون بمشي كل يوم
مع امنياتي بانو تكون مستمتع بالحكي زيي كده
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
اب قوته طبعا قدر ما قلت ما اضحك لكن لووووووووووووووول غير ممسوكه
لكن بت عمك بالغت في البعزمها من محفظتها ده
تاني رجعت لي باء بلد الرايحه دي
بت في ريدي القديم
ياني مستنيك تجي
شان تجيبي فرح معاك
والمني الما بتلقي
بتي في بالو اللئيم
سرقو ريدي انا الشقي
مت حاضن الليل عشم
وبرضي مستنيك تجي
اها القافيه شنو انقر
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
يابت انت نجرك مالو املس
تقول بمخرطة....
يا غراما كان
فى الحلم...
غادرنى
وودعنى الندم...
كلما انسى ريدتها
القديمة
يجينى خيالها
لابس هدم...
قلنا نشوف واحدة غيره
بس سكتى عاوزة ردم..
بقت زى جرفا منه
النيل جفل
كل لحظة ينزل منهدم...
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
| Quote: اها القافيه شنو انقر |
أوقوتة البركة البلغت القافية
مش أنا قلت ليك قدمت المعهد العالي للموسيقى والمسرح رغبة أولى
أها قاموا شالوني في المعهد لكن في قسم الموسيقى وزي ما قلت ليك قبل كدا أنا ما بعرف أغني إلاَّ بالدلوكة فقلت ليهم هوي أنا زول مسرح ما داير موسيقى قاموا بارك الله فيهم حولوني للمسرح
طبعاً إذا كانت العاصمة دهشتي الأولى فالمعهد كان بالنسبة عالم مختلف وكوكب غريب .. فنانين كبار زي الأستاذ الموصلي والأستاذ هاشم صديق وسعد يوسف وعزالدين هلالي والراحل المقيم مصطفى سيد أحمد رغم إنه كان دفعتي لكن يظل فنان غزير وإسم كبير وممثلات زي تماضر شيخ الدين ومريم محمد طيب والمرحومة الله يرحمها نعمات هارون بالإضافة للمشاغبة الذيذة بنت دفعتي دكتورة نجاة محمود (دكتورة بيان) والظريفة عشة مبارك (عشة بت فاطنة) ومن المبدعين الفنان والشاعر يحيى فضل الله والفنان عبدالحكيم الطاهر والشبلي وموسى الأمير ومحمد نعيم سعد يعني بي إختصار فيهم ناس كنا بنشوفهم في التلفزيون وفجأة لقيت روحي بيناتهم وبيني وبينك كنت كل يوم بحب لي واحدة من بنات المعهد (حب من طرف واحد) لكن ما بكلمك بالطرف ياتو بس كيتاً عليك .. هن يضحكن معاي وأنا أحب فيهن مالي ومالن والله على كيفن أي واحد تضحك أحبها
طبعاً المعهد فيه مساحة من الحرية والتقدمية فكانت بالنسبة لي أنا عايزة وكت عشان افهمها وأتعامل معها أنا الزول الجاي من القراية أم دق عشان اقرا لي كتاب ومنظرين زي أرسطو أو المدارس العبثية
أها بجي كل يوم من الفتيحاب لغاية بانت عشان أركب بص المعهد وفي بانت كان بتركب معاي عشة بت فاطنة ومن ما أركب في البص أشبكهم ليك غنا لمن أصل المعهد .. أها ناس الموسيقى كانوا بزهجوا مني شديد وخاصة الطلبة بتاعين (الكمان) لأنهم ناس هادئين ما بحبوا الإزعاج
دراسة المسرح أربعة سنوات والطالب يتخرج بدبلوم في واحد من التخصصات إما تمثيل وإخراج أو نقد أو ديكور أو أزياء المهم هو أربعة سنوات أنا قريتو في تمانية سنوات دخلت سنة 1980 وإتخرجت 1988
قريت أولى وتانية ورفدوني ضمن مجموعة من الطلبة بما فيهم محمد نعيم سعد لأسباب مختلفة أعفيني من ذكرها هنا المهم وبعد مجهودات من الأستاذ المحترم عزالدين هلالي والذي عاد وقتها من مصر قاموا بإعادتي أنا ومحمد نعيم ولكنهم أعادونا للسنة التي قرأناها المهم رجعنا وإتخرجنا سنة 1988 وفي هذه الفترة المعهد تنقل بين عدة أماكن بدأ بالعمارات ثم المقرن ثم قصر الشباب والأطفال حيث تم تخرجنا وإنتقل بعدنا إلى شمبات يعني بإختصار المعهد كان زي الفاصل المداري كل يوم مكان أنا كنت بنتظر النشرة الجوية عشان أعرف المعهد بكرة وين؟؟؟
أها تخرجت شهر ستة 1988 وتزوجت شهر تسعة من نفس العام يعني بعد تلاتة شهور أها دي إنتي بتقدري تسويها؟؟؟
أها القافية عرست
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
تخيلوا واحد جاي كداري من مكان بعيد وكله حفر وشوك وعطشان وجعان وغرفان من المناظر الموحشة,,,وفجاة يجد نفسه داخل حديقة مليلانة زهور وجداول مياه وكل انواع الفاكه والطيور تغرد بلحن فريد..
ده بوستك ياتومه بالنسبة لي وطيورك هم بدرالدين ود مناقزا{مناططه}والجندرية وابوقوتا وكل الناس الحلوة
ويابدر في زول بيحكي نكته لي خلفان,,,كان نفسي احضر ليك عمل كومدي في مسقط,ولكنك كما قلت ليس هناك ارضية لعمل متكامل,ولا انسى ليلة عاصم البناء ومن بعده سميرة دنيا وكل ليالي النادي السوداني بمسقط التي كانت دومامتفرده
تاني وتالت شكرا يا توما على حسن ضيافتك,واقوم امشي عشان ديك الجيران ح يزورنا اللية...والمعنى واضح
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
اب قوته اها
كيتن في الباء
ممكن بكره الكهرباء تقطع
وممكن نور العالم يقطع
وممكن مويه الحب تتمنع
ويمكن حتي البسمع يبطل يسمع
وتبقا الدنيا يباس
ويا ابقوته
ما تتسمع للوسواس
سيبك من الحب واحوالو
مالك انت ووجع الراس
ديك مشكوره
وديك بت ناس
الا ان بقت الدنيا بحالها
برضها بكره تشق الراس
انسي الريده وميله حالها
وشان الباء الشايل حالها
برضو القافيه نغير حالها
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
اها يا بدر الدين
المعهد استقر وانت استقريت بركه والله
عقبال السودان
لكن برضو ما جاوبت لي علي سؤالي الفوق داك بتاع انو هل عندك راي في اداء ادوار محدده ولا اي دور ممكن والمثل الضربتو ليك ورايك شنو ؟ وكان سؤالي غايظك حبه او شديد ما بيناتنا نمكيجو ليك ..طيب ليه الكوميديا؟؟ اسا انت ممكن او حصل مثلت دور جاد كده؟؟ ولا بلغه المسرح (طبعا اللخت مثقفه وكده) دور تراجيدي مثلا ؟؟
وبعد داك ممكن نمشي سنه تانيه واحكي لينا اهم حاجه حصلت ليك في السنه دي وبخليك تمشي سنه تالته اتفقنا ؟
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
طبعاً أنا لمن إتكلمت عن تجربتي الخجولة في تمثيل دور المرأة وضربت المثل ببت قضيم لم أقصد التقليل من مقدار الفنان الشامخ وأبو المسرح الفاضل سعيد وهو لا يحتاج مني لتزكية ويكفي أنني ومجرد وصولي للخرطوم كان هو هدفي وزرته في بيته وطلبت الإنضمام لمجموعته ولكن ربما مشغولياته أو لأسباب أخرى لم تجد تلك المساعي النجاح
أما سؤالك عن هل عندي أدوار محددة كوميدية أو تراجيدية (يا اللخت المثقفة) فالإجابة لا طبعاً فذاكرتي الإنفعالية مشبعة بالإثنين معاً والحمد لله وكانت لي مشاركات تراجيدية آخرها كان في إحدى أعمال التخرج شاركت فيها بدور رئيسي وكانت أمام لجنة لرصد درجاتي في التمثيل وأعتقد أنني نجحت فيها ولكنني أجد نفسي في الأدوار الكوميدية أكثر
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
الغالي أبومهند حبيب حليمة
سلام وإكرام وإحترام وإحتفال بي زيارتك لهذا البوست يا رجل يا رائع في تقديري ويا ضايع مني
| Quote: كان نفسي احضر ليك عمل كومدي في مسقط |
وإنت وين هسع؟؟؟
تحياتي لحليمة وربنا يسعدكم
أبوقوتة أكَّال المالوتة
سلام محفوف بالمحبة ومنوَّت بالنوتة
| Quote: بكرة الزمن يجرى ويعملو معاى لقاء واذكر ناس البورد ديل كلهم....ومنهم بدر السمح |
إن غداً لناظره قريب وإنت بتستاهل الإهتمام وداك يوم السعد يا وش السعد
الحبيب ود الشيخ
سلامي وودي
Quote: اها ده كلامي وما بتختلف
كما عجبكم بسرعة بنصرف |
تنصرف وين؟؟؟ هو نحن ما صدقنا قبضنا قبضة من أثر الشيوخ
تسلم يا رائع
| |
|
|
|
|
|
|
|
|
|
Re: فار تكلنا وفاره التكل المجاور.. (Re: Saifeldin Gibreel)
|
نقول عين
قطع الشارع
ماشى متسارع...
جسمه نحيف
طوله فارع...
فكره سارح
فعله مضارع...
امونة المدرسة
مصاريف البيت
ديون الدكان
والريح بتصارع...
سيد العربة
اخر موديل
عنده مصانع...
فى البرصة
اسهم .عمائر
انجم سادة الشارع...
عنده سكرى
ومعاه ضغط
ونفسه طالع...
صدم الراجل
دمو ادفق
رحوه طلعت
وفات فى عدله
الله يرحمه
كان زولا طيب
عنده طفله وشافع...
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
صباح الخير يا ناس حوش توما
قلت اصبح عليكم لقيت بدر ودمناقزا خاتي لي رسالة تسلم يااخوي وانا هسع دي في بلد الخاخات بلد لغتها كلها معتمده على حرف الخاء(gبينطقوها خاء وchبرضو)باختصاركده في هولندا,كان اخير مسقط.
توما تسلمي ,ومذيد من الابداع ياريت ياتوما تعزمي شيري بالمرة خليها تجي تهترش لينا شوية
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
عزيزي أبو م(خ)ند
تحياتي الحااااااخة
إن شاء الله كان ما شفت هولندا ما أموت ياخي دي فيها أبومهند وفيها خالد الحاج وفيها عبدالعزيز خطاب وفيها أنور ابوغيداء أكتر من كدي أنا عايز شنو؟؟؟
العفيفة توما
ما قلت ليك ما زعلان خلاس تعالي نلعب
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
طيب يا بدر الدين ما دام مافي زعل
الحصل انو بس انا حسيت انك اتضايقت من حاجه
يا ريت الحوار يكون بمستوي انو يا توما انتي بالغتي او ياخي سؤالك ده بايخ او بطريقه تاني ممكن تسالني عديل انا قاصده شنو
تحديدا في سؤال الادوار المختلفه انا بفتكر انو الحاجه دي اصلا صعبه شديد
وبتحتاج توفر موهبه كبيره جدا في الفنان
انا بتذكر عندي ود خالي كان ونحنا صغار دائما بمشي يلبس التوب ويتبلم ويجي لحبوبه بالشباك يقول ليها حاجه فاطنه ازيك
وحبوبه طبعا بترد عليهو بكل ترحاب حبابك يختي اتي مِني ؟؟
وننفجر بالضحك ..وحبوبه تضحك ذاتها ..هي ده انت يا الممسوخ يا يمه اريتك راجل التاب واليابا ..
وزمن عدي وحبوبه اتوفت الله يرحمها ويرحمنا جميعا وكبرنا وكبرت احزانا ودخل ود خالي ده المعهد واتخرج الاستاذ المخرج ..
عشان كده بفتكر انو دي اصعب انواع المحاكاه وهي محاكاه الجنس الاخر دي
زمان ما تشوفني كده في الابتدائي مثلت في مسرحيه دور محامي ناجح جدا وكنت
مستمتعه بيهو جدا برغم انو البنطلون كان جنز شده وكده لكن افتكر انو من اصعب الادوار المثلتها علي قلتها.
وفيما يخص الاستاذ الفاضل سعيد انا شخصيا بفتكر انو تجربته ناجحه جدا بشهاده شباك تذاكر المسرح القومي بغض النظر عن التنظير الفني فيها لكن جماهيرياالتجربه ناجحه جدا وكم من مسرحيه استمتعنا بيها جدا بدايه من النصف الحلو ومرورا بتلاجتي الجديده ديك ..ونحييهو جدا بالقدمو للفن السوداني
وعليه سؤالي ما عندو اي قصد او نيه للتقليل من شأن اي شخص علي الاطلاق وخصوصا المتفردين باداء ادوار صعبه.. لكن مثلا كنت قاصده جدا ادوار ممكن تكون ممنوعه منعا اخلاقيا ساكت لعدم مجاهره المجتمع السوداني بيها كدور البنات المثلو مع هنيدي ديك والانا شخصيا استنكرت الوجه القدمو بيهو السوداني والاكدو بيهو اقوال القوالين عن الاعمال الغير مشرفه لبعض السودانيين في مصر
وانا افتكر انو الادوار القدموها دي ما خدمت اي غرض سوداني ..زي غناء جواهر ده ..انا اعتقد انو ما قدم للسودان ولا اضاف للسودان اي حاجه ايه اللي يا حماده وبتاع ..
عموما ده ما افتكر لب الموضوع ده بس كان توضيح مطول جدا زياده عن اللزوم للموقف العام
ومن هنا بقول ليك اي سؤال ما يعجبك او تحس انو ما بخدم الكلام البنقولو ده ممكن جدا تلفت نظري ليهو و اظن لازم نكون مرآه بعض ونصحح اخطاء بعض ولا يكون مافي اي فايده من الحوار..
التقول اللقاء معاي انا استرسلت جنس استرسال
وعشان شكلي لخبت معاك بديك الفرصه الجايه تحكي من اي حته عاوزها ونفسك تبدا
بيها من غير ما اسالك ولا سؤال لكن حاقول ليك حاجه واحده بس
استرسل 
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
| Quote: وزمن عدي وحبوبه اتوفت الله يرحمها ويرحمنا جميعا وكبرنا وكبرت احزانا ودخل ود خالي ده المعهد واتخرج الاستاذ المخرج .. |
أول حاجة خليني أعزيك في حبوبتك الله يرحمها ويحسن إليها ويرحمنا جميعاً
وكم كنت أتمنى أن تعرفينا على ود خالك والذي تشبه بداياته بدياتي خاصة وأنه خريج للمعهد ولكنك إكتفيتي بالنقط ...
بالمناسبة أكتر الأدوار التي أجيدها هي أدوار الحريم الكبار حيث أنني أحب مجالستهن ولكنني بعد أن ظهرت في التلفزيون أصبحن يخافن مني خاصة لمن القاهن متجمعات في مناسبة وأجي داخل تنط واحدة تقول ليهن هوي أسكتن وحات الله ود عشة دا هسع بصوركن ويجيبكن في التلفزيون
الله يديهن العافية الأمهات الوطن
يعني إنت مثلتي قبل كدا وأنا أقول الروعة دي جاية من وين ... يلا يلا طلعي المستخبى وأكشفي المستور وورينا إنتي منو بالضبط على كل حال أنا مستمتع بالحوار والبوست دا شديد
تعرفي يا توما والله الفنانة سمية حسن دي مثلت معاي موقف جميل خلاص وعايز أحكيهو ليك وللتاريخ
طبعاً زي ما قلت ليك أنا ساكن الفتيحاب والمعهد في العمارات شارع 57 أها قمت مرضت مرض شديد وما قدرت أمشي الفتيحاب فطلعت فوق في راس العمارة بتاعة المعهد وكان في أووضة صغيرة نحن مسمنها الجخنون دائما ما يتواجد فيها بعض الزملاء من فرقة السديم (ناس يحيى فضل الله) المهم رقدت فيها وأنا أعاني فعلمت الفنانة سمية حسن بمرضي هذا وأخذتني للطبيب ومن هناك أستأجرت تاكسي وقالت ليهو وديهو الفتيحاب فهذا الموقف لا زال يطوقني بدين لهذه الفنانة الإنسانة
أما بخصوص الأدوار التي سميتيها بالأدوار اللا أخلاقية فأنا رأي إذا كان في المجتمع أشياء لا أخلاقية فلابد أن تتبعها أدوار تمثيلية خاصة إذا أردنا بترها فالمسرح هو طبيب المجتمع (أعطني مسرح أعطك أمة) والطبيب لا يتخير علاج بعض الأمراض عن غيرها ولكن تبقى المسالة في كيفية الطرح ... والله أعلم
| Quote: ومن هنا بقول ليك اي سؤال ما يعجبك او تحس انو ما بخدم الكلام البنقولو ده ممكن جدا تلفت نظري ليهو و اظن لازم نكون مرآه بعض ونصحح اخطاء بعض ولا يكون مافي اي فايده من الحوار.. |
أها وكان سؤالك صعب ساكت كدا وغلبني أسوي شنو؟؟؟ أكلمك قدام الناس؟؟؟ فكثيراً ما شعرت بأنك تتفوقين علي في مجالي وأكل عيشى الذي بخل علي وخلاني آكل من بيع الحشائش في مزرعة مرمول في صحراء عمان
عليك الله ضوقي حلة القصيدة دي وأديني رايك فيها
قمري الشفيف
***
أنا يا قمر دايرك هنا
كل ايام السنة
تطرد الليل الهزيم
وتبقى بس إنت الهِنا
أو تبقى بس إنت الهَنا
دايرك قمر دايرك وتر
ترويني من فيض الغنا
تنثر شعاعك في الفنا
وأطفالنا تلعب هودنا
أنا يا قمر عارفك قدر
منذ الأزل مكتوب علي
راجيني وافق منتظر
تهديني أجمل سوسنا
واهديك انا
قلباً سرح نبضو المعاك
أصبح بعيداً مو هنا
أنا يا قمر دايرك تطل
دايرك تحدق في الضلام
شايل معاك باقات سلام
وأحلى الكلام وأجمل حروف
قمري الشفيف
مالو لو جافى الخسوف
واصبح ولوف قرب دنا
كل العيون حوله بتطوف
نظرة تأمل ممعنه
تغسل أحزان المنافي
وتنسل الهم الخرافي
بسمة منك في المشافي
للسقيم تبري وتعافي
بعناية ربنا
أنا يا قمر دايرك تهل
تزرع قنادل الفرح
تخلع هديمات اليتامى
تلبس هديمات الأمل
تمحي الضلامات والعتامى
وأنا يا قمر دايرك هنا
كل ايام السنة
تطرد الليل الهزيم
وتبقى بس إنت الهِنا
وتبقى لي إنت الهَنا
| |
|
|
|
|
|
|
|
|
|
Re: فار تكلنا وفاره التكل المجاور.. (Re: ابو مهند)
|
الغالية توما والمبدع بدرالدين شنا
سلام وحب كتير
أحييك ياتومة علي مقدرتك المستهبلة الرقيقة في تحريك السكون الذي سكن هذا البدر المكتمل.
بدرالدين شنا يسكنه تواضع جم لايعرف فنون تلميع موقعه ومكانته وموهبته غير اولئك من الفنانين من الممثلين الذين كونوا أسماء ومكانات من غير موهبة حقيقية وفن وأدب رفيع.
نحن في إنتظار المزيد
أستاذة توما ممكن أنجر؟
وياريت يكون الحرف باء
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
بدر الدين نشاه
تحياتي جداااااا
والله يبارك فيك ويرحم حبوبه ويرحمنا جميعا ان شاء الله
اما عن ود خالي ف انا ولا داساهو ولا حاجه لكن هو من الدفع الاتخرجت في السنتين الفاتو ديل تقريبا فما اظن تعرفو
وعن تجربتي انا كانت بسيطه جدا وعلي قدر حالها كده ومعظمها كان مع الوالد ربنا يرحمو ويحسن اليه لاهتمامه الشديد بالكتابه للاطفال وتقديم اعمال بشكل متواصل في التلفزيون و قدمت معاهو عده حاجات في التلفزيون ..وحبه ادوار شفع كده في جنه الاطفال ..وكم دور كومبارس كده ..
وبتذكر مره كده عملنا مسلسل اطفال في رمضان وعملت منو 230 جنيه اتخيل ده كان سنه كم كده ما عارفه اظن سنه83 غايتو انا كنت فرحانه جنس فرح اولا انو اول مره في حياتي اعمل قروش من عرق تمثيلي وامشي كمان اصرفها من الاذاعه في الصف الطويل داك والصراف يناديني باسمي وبابا يديني رفعه كده عشان امضي كمان ..حكايه الامضاء دي اكتر حاجه كان عاجباني وبعد داك القروش بمسكهم برااي مالي ما بعرف قايلين غايتو كانو كترت ورقه ام عشره ديك المخليني اتذكر انهم كانو كتار انو اشتريت منهم حلق دهب لي ولاختي الصغيره وهدوم العيد كلها لينا الاتنين وبعد ده فضل لي كميه كده ..
لكن ليها جواي ذكريات جميله جدا وكونت علاقه لطيفه مع الحيشان التلاته هناك لارتباط الوالد واختي بيهو الشديد ..
اها ده فيما يخص البحر للبحر الذي فيما يخص البحر
نجي ليك انت يا فنان يا مبدع
وطبعا الابداع ده انا بفتكر انو زي جحر كده زي جحر فارتنا ده لو مديت راسك ومرقت منو برضو محسوبه ليك ..وجوه الابداع ده في ناس متعدده المواهب زيك كده
وفي الحقيقه انا كنت جايه للنقطه دي علي مهله شويه لكن بمده راس الشعر جوه البوست انفتحت سيره الشعر والكتابه وتجربتك معاهم او معهما كحاجتين اثنين بعبرو عنك وبترجمو احساسك ..وزمان لما بدينا موضوع المناجره ما حبيت اخرم بيك عن الموهبه الاساسيه عندك وادعوك تشاركنا ..
مافي كلام انو القصيده جميله وحله شعركم طاعمه جدا ..وتعرف اكتر حاجه بتديها طعم مميز هو الصدق الفيها ..صدق الاحساس والمقصد ..مع بساطه التعبير وزيت مازولا للتحمير ..تطلع حاجه ما تخلص ..اما عن قصيدتك في بوست الوطن عجبتني جدا واتمني تواصل تكتب
يلا احكي لينا عن تجربتك مع الكتابه وهل الحاجات بتكتبك ولا انت بتكتبها
وعند ياتو فكي
بمناسبه التمثيل عجبني جدا كلامك عن انو المسرح طبيب المجتمع وفعلا لو الفن اتوظف صاح بيؤدي رسالتو تماما ..
ويستمر الاسترسال
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
فرح بن عمي عندنا
يا مرحبا يا مرحبا
طبعا بالجد بدر الدين فنان وما عامل اي هاله ولا جوطه لروحو
عشان كده اقعد معاي هنا نشخبتو ونلخبتو ونخليهو يطلع الداسيهو ده
جد مبسوطه بجيتك
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
الشفيف أبومهند
تحياتي لك ولمهند وأم مهند
أشكرك على ثنائك على القصيدة وياريت يرجع زمن شليل وهودنا ذلك الزمن الجميل
أنا عاجبني تحشِّرك دا
تسلم
العزيز عبدالماجد فرح ود عم توما
سلامي وتشكراتي
ياخي الكلام دا كبير ما بتلبس لي شوف لي مقاس أصغر
شكري على كلماتك الطيبات وأنا سعيد بك وبي تومة عائلتكم
شايف توما دايرة تتفق معك علي بالله لوسمحتوا شوية شوية
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
المتألقة دوماً توما
سلامي وإحترامي
أنا سعيد جداً بي تجربتك مع الأطفال وتشجيع والدك الله يرحمه وكم شوقتني لمعرفة من هو والدك (والله كان لقيت لي كباية مسنجر) كنت عرفت حاجات كتيرة
توما سنة 83 إنتي طفلة وأنا طالب في معهد الموسيقى والمسرح وممثل في التلفزيون وشعري أبيض .. هوي أنا ما عايز اللقاء دا خليتو
أما عن تجربتي في الكتابة فهي محاولات في مجال الشعر وليس المسرح ففي المسرح كانت مجرد افكار شاركت بها مع المجموعة لأن أغلب اعمال الفرقة وخاصة الإسكتشات كانت تتم بمشاركة الجميع (طوبة طوبة) وليس هناك نصاً جاهزاً فهي تعتمد على الإرتجال يعني مثلاً نكون بنتونس يقوم واحد يمشي على الزير (طبعاً ما كان عندنا تلاجة) والبيت زاتو كان فيهو شعبة في النص وجنبو مخزن فيهو هدوم وسخانة يعني لمن تجيك طلعة أي مشوار تقوم تغسل من طرف وتلبس وأذكر موقف هنا مر بي شخصياً كان عندي مشوار ومشيت على المخزن وإخترت قميص (سمني) وقمت بغسله جيداً وأنا أمني نفسي بسهرة جميلة وعندما فرغت من غسيله وجيت أشره في السلكة نفضته نفضة واحدة أكان القى ليك لياقة القميص في يدي وباقي القميص مجدوع هنااااااااااااااك ... أنقري ما شريت اللياقة؟؟؟
أها نرجع لي موضوعنا ممكن الواحد يمشي على الزير ويملأ الكوز والكوز ماشي على خشمو تجيهو فكرة إسكتش يقوم يخت الكوز في الزير ويجي طاير يحكي للمجموعة وفي أثناء الضحك يضيف الآخر (والله كمان لو حصل كذا) ويضيف الثاني والثالث وبدون ما نشعر نلقى هناك إسكتش ولد باسنانه وجاهز للعرض أما كتابتي للشعر فحقيقة كان هناك شعر الوالدة لكن حلقناه مش بقولوا شعر الولادة لازم يحلقوهو عشان يقوم شعر أفضل منو أها برضو الشعر (بكسر الشين) برضو أنا حلقتو وهو عبارة عن تلك البدايات التقليدة والتي لم تجد التشجيع بل ووجدت السخرية من البعض عشان كدا حلقتو ... أها قبل أربعة سنين تقريباً وأنا في صحرائي هذه يقوم لي شعر (برضو بكسر الشين) وبسرعة شديدة حيث أنني في ظرف سنة أو أقل كتبت 30 قصيدة وبعد داك شعري إنحتا مرة تانية وبقيت أصلع القصائد فالقصيدة المذكورة في هذا البوست كانت آخر ما كتبت أما أول قصيدة كانت هي قصيدة (سليمة بائعة اللبن) وهي الآن بحوزة الفنان حمزة سليمان وأعتقد أنه فرغ من تلحينها ولكنني لم أسمعها منه حتى اللحظة
كدي النملِّح ليكم القصيدة دي إن شاء الله تعجبكم
عصير الفيتو مر بالحيل
******
عصير الفيتو مر بالحيل
ودومة النيتو ما بتنكد
وشغل الضر
والتوقيع بـ لي اليد
علي شيكاً نضيف ابيض
حالة ما بتسر
وفي الطابور
لامن يجيك الدور
وكل الخلق تشهد
جلادا عيونه حمر
من طرف يجلد
ودماً في العرق يعقد
ونفاثة كل يوم ترعد
وتصعير خد
هزيمة تقيلة حيل منهد
وعين العدل صبحت قد
قدود الشملة ما بتنسد
ولقيمة القوت
نازلة علينا بالبراشوت
بالبلاء المتلاحق
عليها كمان ختم طاغوت
وللتأكيد
كل رغيفة وراها قذيفة
وكل قذيفة وراها رغيفة
محشية استبداد
متبلة بي نفس أوغاد
وملاعب الأطفال
مزروعة بالألغام
وين حقوق الجن
حرقت حريق البن
غلطت بنادق بوش
كتلت حمار ابريش
الكان هناك مربوط
لا مول إرهابي
لا عبّ ليهو جيوش
لا رسلو جمرة تتش
ولا ظرف مغشوش
لا خت ليهو طربوش
غلطت يا ود بوش
وما بتنفعك معليش
غلطت يا ود بوش
وما بتنفعك معليش
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
بدر الدين
تحياتي
طبعا مساله الارتجال دي اكتر حاجه ممتعه في المسرح كما ا عتقد فيما اعتقد
لانو قبل اي حاجه الزول بمتع روحو دي مش كده ..اظن اكتر زول بختار مهنتو بحريه تامه
هو الممثل وحاجه مؤسفه انو الظروف تبعدو عن الحاجه البحبها وانا متمنيه بشكل صادق انو
قريب جدا كل اسباب بعادك عن الوطن والتمثيل تزول وترجع جنب كل الحاجات البتحبها المسرح
والاولاد واماني وملاح الرجله ذاتو
طيب يا بدر الدين نقوم نطلب منك حاجه
انو نحضر معاك عرض التخرج لو ممكن
ودي متروكه ليك تحددها ..المكان ..الزمان ..تاليف ..اخراج..المشاركين ..الحضور ..الاهل
الزغاريد..والحلاوه..ومبروووووك ..وفراق المعهد
عشان بعد داك نخرجك من المعهد ده لانو دايره نتكلم عن التجربه الفنيه ما بعد المعهد
وبدون مجامله شعرك جميل ومميز وفيهو احساس البلد طاغي شدييد واظن البعاد ده ذاتو
بخلق تداخل في مفهوم الوطن الام والحبيبه والاولاد
والعصيده او القصيده جميله شديد وبالذات المطلع حقيقي بهبش قضيتنا وربنا يستر علينا الليله تحديدا من ناس الفيتو النيتو ديل .. وعلي فكره انا بعجبني تلحين حمزه سليمان جدا من ما سمعت ليهو باب سنط عقد الجلاد ..ويا ريت نسمع سليمه بائعه اللبن منو قريب ..شوقتني اقراها يا ريت تنزلها لينا
اما عن النجر الليله اتذكرت كوزكم الفي الزير البجيب الارتجال داك بسخينتنا الليله النجرت لي بوست افتكر مشاركتك فيهو بتكون اساسيه
والله يا بدر الدين ضحكت لامن اتفقهت غلي قول امي من ياقه القميص الشريتها ..
بركه الشريتها يشرها البلا المحرجه
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
Quote: انو نحضر معاك عرض التخرج لو ممكن
ودي متروكه ليك تحددها ..المكان ..الزمان ..تاليف ..اخراج..المشاركين ..الحضور ..الاهل
الزغاريد..والحلاوه..ومبروووووك ..وفراق المعهد |
مكان العرض كان قصر الشباب والأطفال مرتع بهيمة المعهد في تلك الفترة وهي العام 1988 وأنا سبق وذكرت تجوال المعهد من منطفة إلى أخرى والزمان كما هو واضح 1988
طبعاً للتخرج بدبلوم (التمثيل والإخراج) يتم إمتحانك للتمثيل في مسرحيات زملائك والتي تشارك فيها بالتمثيل أما الإخراج فيتم تقيمه من أخراجك لمسرحية تختارها وتختار ممثليها وديكورها وأزيائها وأكسسواراتها وإضاءتها أي بمعني أدق كل ما يحيط بالعرض وتكون هناك لجنة للتقييم والتي تقوم بمناقشتك بعد العرض مباشرة في كل صغيرة وكبيرة فأنت كمخرج تختار نصاً جيداً لتحركه من سكونه في الورق إلى عرض يمشي على رجليه بواسطة كل الأدوات المذكورة من ممثل وخشبة مسرح وإضاءة وديكور .... الخ واضعاً فيه رؤاك الإخراجية والتي قد تختلف مع رؤية كاتب النص إذ ليس بالضرورة أن تتفق الرؤى وقد تحتاج في أحايين كثيرة للإضافة أو الحذف حتى توصل جملتك أو رؤيتك الإخراجية وقد تقوم أنت أو من ينوب عنك في إعداد ذلك النص إعداداً كاملاً حتى يتفق مع رؤياك
فمشروع تخرجي كان بمسرحية أسمها (الإستلاب) وهي قصة بسيطة تتحدث عن زوجة مولعة بشراء الأثاثات المنزلية بدرجة الهوس والجنون الشئ الذي يسبب ضيقاً لزوجها ويجعل حياتهما مستحيلة ليس من ناحية الصرف وإنما من ناحية إنشغالها عنه بهذا الهوس بالإضافة لإمتلاء البيت حيث أن لا مساحة لدرجة أن لقاءهما داخل البيت أصبح مستحيلاً بسبب العفش داخل البيت (ليس على مسئولية صاحبه وحده) فقمت بتحريك هذا النص في هذا الإتجاه في جملة أخراجية تتحدث عن التكنلوجيا التي بدأت تسلبنا قيمنا وموروثاتنا وأن بعض الأشياء يصنعها الإنسان وتكون سبباً في دماره وفي أحدى اللقطات وفي إشارة إلى ممارسة الزوجين لحقهما الطبيعي في ممارسة الجنس أن إستعانا بحبل طويل وكل واحد منهم في ركنه القصي ممسكاً بطرف الحبل في فمه بغرض أن يقبل الآخر
شارك في هذه المسرحيه الممثلان المميزان محمد نعيم سعد في دور الزوج والممثلة القديرة آمنة أمين في دور الزوجة أما بقية الممثلين فهم ذلك العفش المكدس داخل البيت لأن الدولاب مثلاً في لحظة من اللحظات ممكن يكون ممثل إذا خاطبه أحد الزوجين أو تعامل معه أما الحضور فكان كثيفاً حيث أن عروض الدبلوم لها جمهورها الخاص والذي يأتي سنوياً لمشاهدتها بالإضافة لطلبة المعهد من القسمين الموسيقى والمسرح أما من أهلي فتشرفت بحضور زوجتي التي كانت خطيبتي وقتها بالإضافة لأختي وبعض الأهل وخاصة نسيبي والذي يبدو أنه لم يكن مستمتعا وهو يترك زراعته ليحضر للعاصمة ففي بداية أي عرض يتم إطفاء الإضاءة ثم تشغيلها إيذاناً بالبدأ فعندما تم هذا الإطفاء نسيبي قال (الحمد لله الكهرباء قطعت) وبعد عودتها قال (أمك جات) المهم كان عرض وإستمتع به الحضور أما أنا فكانت عندي (أم هلاهلا) خائف من أي خطأ يحدث وخائف من نقاش اللجنة ولكن الحمد لله كلو تم على خير وتخرجت وأذكر أنني عملت حفل تخرج في قريتنا وطبعاً عندي عمي الله يرحمه شغلانة التمثيل دي ذاتها ما راكبة ليهو في راسو خلي كمان يسووا ليها حفلات فقال للجماعة (هي المحاكا كمان عندها تخريج)؟؟؟
وإستجابة لطلب المعجبين فهذه قصيدة سليمة بائعة اللبن
سليمة بائعة اللبن
*****
بنيّاتاً لي سليمة في بيتنا جن
قاصدات زيارة أم الحسن
قعدن مسافة وروحن
سألت أمي
سليمة لسة بتبيع اللبن؟
ضحكت وقالت..
إت بي صحّك يا الحسن
والله عندك جنس محن
ولا في شان كنت غائب في اليمن
الحمد لله الماقلتو قدامن
كانن بكن
سليمة البقيرات باعتن
في شان تسوي لوليدها الجواز
وباقي أغراد السفر
لي دار الحجاز
قصّير الفوقنا ده حولو
وقالوا إلليل ما اشتغل
ياكل ينوم متل البغل
وسليمة رجعت تشتغل
وشن الشغل
ترى العواسة الفي التكل
تعوس لي محاسن وسميّة وزحل
والبنيّات الشفتهن
الكبيرة تلقط في القطن
والصغيرة تقرأ في مدرسة المهل
والصغار حايمين متل النحل
المسكينة صبحت من غير عقل
سليمة بتبيع اللبن؟
إنشاء الله خشمك فوقو اللبن
دحين مع السفر فضلت بهيمة بتنحلب
ولا فضل جنايّاً يحويلو بقرة
الكل سافر وإغترب
ما فضل زول بين العرب
الأّ الكبار المتل أبوك
الما فيهم سبب
ويا حليل زمان وكتين يقولو
طه بالبهائم سرب
والبنيّات يفزعن للحطب
كلو إنتهى وحلّ الغضب
من رب العباد
شان العباد دايره تاكل بالغصب
والدنيا باقيالهم درب
نسألك يا ربي العفو والعيشة الكريمة
ونسالك يا ربنا ترجّع البقيرات لي سليمة
عشان تبيع لينا اللبن
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
هي المحاكا كمان عندها تخريج
لووووووول لولللللين عديل كده
والله عمك الله يرحمو ويرحمنا جميعا ان شاء الله
وناسف للتاخير الذي لم يمهلني طويلا
شكرا بدر الدين للدعوه الكريمه لحضور العرض معاك وللوصف المممتع
طبعا بما انو حضرتك ممثل ومبدع ومخرج بشهاده المعهد ..الا انو بشهد ليك
بابداع تاني وهو قدرتك اللطيفه جدا والمميزه جدا علي السرد بطريقه ممتعه وانتزاع الضحك
الكبار كبار العدم الا سوق اسود
واسجل اعجابي الشديد بسليمه بائعه اللبن فكره و وصفا ومضمونا
من الملاحظ جدا انو اهتمامك بالاخرين واحساسك بيهم عالي جدا واعتقد عموما
الممثل بكون منتبه للبحصل حولو والتفاصيل اكثر من الاخرين
بعد التخريج
احكي لينا عن انضمامك لفرقه الاصدقاء التي اعتقد انو انضميت ليها قبل التخرج
لكن طبعا عندك الخبر اليقين ..
طبعل نحن بنعرف الاصدقاء بفكره المشاهد العادي من بره وانو بخلقو الفرح ويمتعونا بالضحكه
يا ريت وانت واحد منهم تورينا الوجه التاني الما بنعرفو عنهم ..
اولي مشاركاتك ..التنقل بين اقاليم السودان المختلفه ..وبالجد عندي سؤال منو الاطلق اسم
الاصدقاء ده علي الفرقه وهل كان عندها اسم تاني قبلو ..حقيقي الاسم جميل ومعبر
يا ريت تحكي لينا عن الاصدقاء نعرفهم ونحبهم اكتر وهم متعونا وحقيقي هم احدي الفرق الصمدت جدا
في ظل ظروف السودان المختلفه
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
وانا اقول الشافعه مى شافعة نصاح
اتاريك ربيبة مسرح ...وبت مسرح ومنك ولة المسرح؟؟
عرفتك
عرفتك
عرفتك
وما تخمين ..كلمونى بيك ..ويا الف فخر بيك وبى تجربتك وتجربة شقيقتك الجميلة المبدعة
ولى داسه روحك ومتلبدة ؟؟؟
لغتك حية ...تمشى من جحر لى جحر...وتنبض بالحب والحياة والتكل...منى ليك تحية قدر الهجمة وحب قدر الليلة وباكر ..واستحسان جمور كامل
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
الغالية تماضر
سلامي وإحترامي
لمن شفت إسمك ضمن المتداخلين فرحت جداً وقلت أكيد عندها تعليق على ما ذكرته في هذا البوست خاصة وأن رأيك يهمني جداً ولو كانت المسنجر شغالة أنا كنت عزمتك زمان أو إستعنت بيك في بعض المواقف والأسئلة الصعبة وفرحت جداً وقلت لابد أن لديك تعليق فيما قيل وخاصة السلبيات ولكنك يا صديقتي فضلتي أو آثرتي الصمت والصمت في بعض الأحايين هو رأي ولكنني كنت أفضله رأياً مسموعاً حتى أتدارك أي تقصير أو معلومة خاطئة حتى لا أظلم القراء هنا والتاريخ يا تماضر يا حبيبتي لا يرحم
ولك التحية
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
الحمد لله المرة دي نسيتي كلمة (إسترسل) عشان أنا فترت من إستراسيلك
فرقة الأصدقاء سميت بهذا الإسم (الأصدقاء) لأن مكونيها هم أصدقاء قبل تكوينها وهم مجموعة في حي واحد في الثورة وتربطهم علاقات حتى على مستوى الأسر
أن تكون ممثلاً في فرقة الأصدقاء لابد أن تكون صديقاً في الأول ثم ممثلاً ناجحاً يعني بتحتاج تقعد فترة في (دكة الإحتياطي) حتى تتعرف عليهم ويتعرفون عليك
ظاهرياً وتنظيمياً هناك مكتب فيه رئيس وسكرتير للفرقة وسكرتير فني وسكرتير مالي و...و ... ولكنك لاتحس بهذه السلطات التنفيذية من خلال التعامل بين أفراد الفرقة فهي شكليات لتنظيم دولاب العمل فقط
الأعمال الفنية
يغلب عليها الطابع الكوميدي وهي إما مسرحيات أو إسكتشات قصيرة فقد تحدثت سابقاً عن ولادة الإسكتش وأطوار نموه في أحضان المجموعة أما المسرحيات فهي إما من تأليف محمد نعيم أو مصطفى أحمد الخليفة من الفرقة أو تكون أعمال مسرحية لكتاب عرب أو أعمال مترجمة وغالباً ما يقوم مصطفى أحمد الخليفة بإعدادها أما الإخراج فأغلب الأعمال كانت من إخراج الفنان المميز محمد نعيم سعد
أما إنضمامي لهذه الكوكبة فكان عبر بوابة المعهد وكان ذلك في العام 1980 عندما إلتحقت بالمعهد ووجدت نفسي مع هذه النجوم في فصل دراسي واحد وأنا الذي كنت أشاهدهم ضمن برنامج (محطة التلفزيون الأهلية) حيث أن البرنامج لم يكون حصراً على الفرقة فكان يضم مجموعة من الفنانين منهم العميري فهو صاحب القدح المعلا في البرنامج أن صح التعبير وكذلك الفنانة تماضر شيخ الدين وعبدالحكيم الطاهر وكثيرون لم يسع المجال ذكرهم جميعاً
فكانت مشاركتي في المحطة الأهليه أولاً ثم صداقتي بأعضاء الفرقة ثم إنضمامي رسمياً للفرقة ومشاركتي وتجوالي معهم في الأقاليم والتي كنت أتقدمهم في الرحلة ومعي البعض لنقوم بالتجهيز للعروض وهذه حال أي شخص يأتي جديد لابد أن يتدرب على المشاق في السفر قبل كم يوم من العروض حيث هناك ترتيبات لابد منها وهي عمل الدعاية بالمايكرفون داخل عربة تطوف بك أرجاء المنطقة لتغطية الدعاية بالإضافة لذلك إلصاق (البوسترز) الخاصة بالعرض وهي أعمال ليست بالسهولة بالإضافة لزيارة بعض الدوائر الحكومية هناك لتسهيل مهمة نجاح العروض والتذاكر وإيجار الكراسي في بعض الأحيان وإيجار كارو لنقل الكراسي قبل وبعد نهاية العروض وأذكر مرة قلنا لي واحد من الجماعة أمش جيب لينا عدد 2 كارو عشان نشيل فيها الكراسي فبدلاً من الإتيان بعدد 2 كارو جاء بكارو واحدة بحصانين ولم يفكر في مسألة (السعة) فهذه الرحلات لها فوائد كثيرة وحقيقة نحنا بنستمتع بيها شديد وبيحصل تداخل بيننا وبين المواطنين الطيبين والذين تعودوا على إكرامنا بمائدتهم وبتذوقهم لأعمالنا المسرحية
تقديري للجميع
| |
|
|
|
|
|
|
|
|
|
Re: فار تكلنا وفاره التكل المجاور.. (Re: بدرالدين شنا)
|
ملعون أبو الكى بورد و ملعون أبو الديليت و يا حليل الأستيكة التى تترك بعض الأثر
كتبت كلاما كثيرا .. أظنه كان حلوا .. وقبل أن أضغط "أضف رد" وجدته قد إتلحس .. أحس بألم عندما أتذكر أن قصديتى الفأرية كانت وسط الملحوس
على أية حال .. سأرجع و أتعنقل "كما كت" فى بنابر المشاهدين
توما الخطيرة .. ســــــــــلام
ود أهلى ابشيبة .. عافى منك يا حكّاى
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
يا تماضر بضم تاء التماضر والتانيث والابداع
كما يناديك الاهل والقريبين
انا ذاتي عرفتك اها شن قولك
وما تخمين
ولا كلموني بيك
علا بس شوف عين
ومن علايل اب روف
السمع وشوف
شفت ابداعك
وليكي انتي دي يا فنانه اعجابي بحاجه هبشتني جدا
وبكيت فيها بكا عدم النصاح
الا وهي النص او القصيده او الحب الكتبتيهو لامك الغاليه
ربنا يرحمها ويرحمنا جميعا
شكرا ليك
ولحضورك الجميل
والكتابه حقيقي فضله خيرك
بعدين رغم زهجك وجيتك من الشغل بعد ساعات طوال
اظن ممكن تسمعي بدر الدين نشاه ده بقول في شنو
وزي ما قال مستعدين لاي اضافه
اها اضيفي علي وزن استرسل
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
بدر الدين يا نشاه
نأسف للصبه الغير مقصوده
وعليه
اها بعد الاصدقاء الجميلين جداااااا
نقوم نمشي علي كراس اللقاءت الزمان داك والمر باي زول في الدنيا دي قرا الابتدائي
والبكون وليداتك عندهم زيو اسا
ونستلف لينا منو كم سؤال كده
يلا قول لي باحساسك الحاجات دي وقعها جواك بدر الدين الفنان والانسان معا شنو؟؟
الوطن
الغربه
الحب
الاصدقاء
المسرح
مناقزا
السخينه
راس البيت
الضحك الكبار كبار
قطع الكهرباء
شنطه السفر
البوست ده
وبالمره نديك تلاته وردات تهديهم لمنو ؟
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
علي الحلاوي
طبعا حبابك بقدر شكيتك للتايه علي الله
وطبعا ما تفتكر انو الديليت بحلك
تمشي اسا دي تجيب الكلام ده وتجي
وكدي يعني بلا صغره قوم من بنبر المشاهدين ده
ناول بدر الدين ده سؤال من التكل داك
راجينك طبعا
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
| Quote: يلا قول لي باحساسك الحاجات دي وقعها جواك بدر الدين الفنان والانسان معا شنو؟؟ |
الوطن
اليوم بدار الرياضة بأم درمان الوطن ضد الحرية
الغربة
هي الضياع بعينيه وليس بعينه
الحب
اللهم أرزقنا محبتك ومحبة نبيك وأجعلها أكثر من محبتنا لأنفسنا وأهلنا ومالنا وولدنا
الأصدقاء
كيان مهم جداً في حياتي
المسرح
أعطني مسرح أعطك أمة
مناقزة
هي رحمة وسكن لي
السخينة
إششششششششششش حي حي
رأس البيت
من الله خلقني ما شفتو .. زمان فيهو بعض الألعاب البعلقوها مننا أهلنا هسع مليان حقن فاضية
الضحك الكبار كبار
بفشَّني ويريحني ويكبرني
قطع الكهرباء
نرتاح من العولمة
شنطة السفر
أحبها يوم تكون مليانة هدايا وأكرهها يوم يكون فيها ويكة وبهارات وحلومر
البوست دا
سواقو زينة وحالف ما يدلينا
حرك فيني أشياء كنت أجهلها
| Quote: وبالمره نديك تلاته وردات تهديهم لمنو ؟ |
وردة أولى
أهديها لأمي وزوجتي وعيالي
وردة ثانية
أهديها للشفيف بكري ابوبكر
وردة ثالثة
لك أنتي وللوطن ولكل جميل
تحياتي واشواقي
صديقي وود أهلي علي الحلاوي
| Quote: ود أهلى ابشيبة .. عافى منك يا حكّاى |
الحكاي عاد الله علم بيهو .. إنت يوم داك ما دهشتني بي إبداعك؟؟؟ نسيت ولا شنو؟؟؟
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
بما انو شكلو آن لهذا البوست ان يترجل
وبمناسبه الرجلين وعليه بلغه مسرحيه نقوم نطلب منك طلب صعب جدااااااا
انو ترتجل لينا موقف او مشهد اسسسسسسسسسا دي
وكمان زياده في الصعابه
كتابه بالتنوين
وعليه يتم اطلاق سراح البوست وبالتالي حامله
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
حالفه وقاسمة البوست ما يترجل الا ارد على "الشفيف" اب دما خفيف بدر الدين جمــــــــــــال على لومو الرقيق...وعتابو الحنين
يابدر الدين ...انت عارف انت مين؟؟؟
من يوم ما دخلت كراعك فى هذا العالم المرهف المدعو عالم التمثيل ...وانا احمد الصدفة المباركة التى وضعت الرجل المناسب فى الكواليس المناسبة ...الفنان المناسب فى اداته المناسبة ...وكم يضيع المثيرون من جراء الاختيار الخطأ او الصدفة المجلية ...الا فى حالتك يا بدر السما...كلك حيوية وطاقات متفجرة ..من تمثيل ...وحضور بديهة وقبول ..واحساس...صوتك تعبث به كما تود...احبك جمهورك واصدقاءك لصفاء سريرتك ونقاء سيرتك...شناتك التى تتندر بها كانت مصدرا لسعادة الكثيرين وفرحهم ..تجربتك مع فرقى الاصدقاء فى ذاكرة الجمهور ووجدانه...تجربتك معاى انا كمخرجة واظنها تجربتنا الوحيدة مع بعض ..كلها عطاء ولن انساك ممثلا او اخا صديقا...تجربتك معاى كأخو وواحد من الاسرة ...ووجودك غى دائرة اصدقائى الجميلين تبعث فى روحى الانتعاش والضحك...
بتذكرك يابدر التمام وبضحك...على شنو ما بعرف...بتذكرك وبحزن على الايام الجميلة الاندثرت...ما بترجع تانى كنت اب شيبة حسة بقيت اب شيت ...كتير كورة دقيق كاملة اتكبت فى راسك من وراى..وعندك بنات حلوات وبتمشى الجامع والحج وبتغنى للصحاب...وعندك شعبية ما ساهلة فى البورد
احفظ ودك...حتى القبر يا اخى الجميل
احبك بكل ما تتيح الدنيا لنا من محبة الاصدقاء "بمحرم" واكن لك كل ايات التقدير والمودة
ازيدك ولا كفاك؟؟؟
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
ولا تقنطوا ياناس البورد من رحمة تماضر ورحابة صدرها وحبها وإبداعها
الغالية بت الغاليين تماضر
سلامي وإحترامي وإحتفالي وإحتقان حبي لك
كفاي كفاي كفاي يا تماضر كان زدتي أكتر من كدا شناتي دي بتروح وببقى بدرالدين ساكت (شنا لِس) وعندها ممكن أتعرض لي أي نوع من الحب وأنا بحب أماني
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
الرائعة توما
سلام وإرتجال
أذكر في إحدى رحلاتنا الفنية للأقاليم مشينا مدينة (بدون ذكر أسماء) بغرض أداء عروض مسرحية في المدينة وأطرافها فكان مركزنا المدينة ومنها ننطلق فكنا كل يوم نشيل عفشنا ونمشي لقرية من القرى المجاورة وبمجرد ما نخت العفش يضرب سكلي يقولوا في راجل مات وهذا يعني أنا لن نستطيع تقديم أي عرض مسرحي نرجع المدينة اليوم التاني نمشي لقرية أخى ويضرب السكلي في مرة ماتت وبهذه الطريقة أكتر من تلاتة قرى المهم في النهاية لقينا قرية ومافي زول مات وقدمنا عروض إسكتشات خفيفة وكان بين هذه الإسكتشات إسكتش فكرته أن جماعة موجهين أنظارهم صوب (صوب دي حلوة مش؟؟؟) السماء بغرض رؤية هلال رمضان لأن هناك جهة رصدت جائزة لمن يرى هذا الهلال وفي أثناء البحث المضني بين طيات السحاب أفلح أحدنا في رؤية الهلال وبشرنا به وعلت الأصوات بأن فلان رأى الهلال وجاء مسئول الجهة صاحبة الجائزة وسأل عن الشخص حتى يريه الهلال ودار الحوار التالي
المسئول : وينو وينو؟؟؟
الرائي : ياهو داك
المسئول : وينو؟؟؟
الرائي : شايف السحابة الغبشا ديك بس بعدها بي شبر تقريباً
المسئول : سحابة غبشاء سحابة غبشا .. آآآآآآآآي والله فعلاً ياهو إنت عارف الجائزة كم؟؟؟
الرائي : كم؟؟؟
المسئول : مليون جنية
الرائي : مليووووووووووووووون جنيه ... (أدار وجهه للناحية الأخرى) وقال داك واحد تاني
المفاجأة ناس القرية كلهم أداروا وجوههم تلك الناحية معنا
إنتهيت من الإرتجال وباقي لي الترجُّل
تحياتي لكي ولكل من دخل هذا البوست وشارك بالحرف أو بالقراءة وأعتذر لكل من أصابه خدش أو رشاش كلمة أو خطأ مني بغير قصد
ولكم ودي
| |
|
|
|
|
|
|
|
|
|
شكرا بحررررررررررر (Re: توما)
|
تبعا بالتاء تماضر سعيده ايما سعاده باضافتك الحقيقيه للبوست لانو ده شوف عين عدييييييل وعرفه حقيقيه لبدر الدين لا سمعتوه ولا جابوهو لينا فشكرا ليك عليها
ولا يفوتني في هذه اللفه انو اشكر كل من ساهم في احياء البوست واطعام فئرانه
وكل من مر بخاطرو ودق الباب وجانا
وطبعا بعد الشكر ده
نجي لسيد البيت والبوست
الاستاذ بدر الدين
حقيقي شكرا ليك
شكرا كتير امتعتنا
وبجيتك اسعدتنا
وبحكاويك الصادقه جدا والعفويه جدا والامينه جدا والممتعه جدااا برضو
ولانو اكتشفنا جوانب تانيه لبدر الدين شنا
وسعيده بالبوست القطع والقلع ده
اها قبل ما نقوم نرسلو للارشفه والتاريخ مسموح ليك باي اضافه تود اضافتها او استضافتها
اما بعد
شكرا بحررررررررررر
ليك وللوطن الجابك
توما كالعاده
اها حتضيف
ولا نقيف
| |
|
|
|
|
|
|
|
|
|
Re: فار تكلنا وفاره التكل المجاور.. (Re: توما)
|
العفيفة توما
سلام مضبب ومهذب
Quote: اها حتضيف
ولا نقيف |
نقيف بي لبن
باقي (النقيف) بتاع الغداء نقطعوا في اللبن ونتعشا بيهو
رايك شنو نأجرو؟؟؟
شوفي الفئران مما جبنا سيرة اللبن نططن عينيهن
يا توما يا مبدعة أشكرك على اللحظات الجميلة والكلمات الطيبة وفعلاً كان بوست ممتع بالنسبة لي
لك الشكر والعرفان والدرجات العلا
| |
|
|
|
|
|
|
| |
توما
abuguta
بدرالدين شنا
الجندرية
Osman M Salih
Ehab Eltayeb
Saifeldin Gibreel
عبدالماجد فرح يوسف
حبيب نورة
Tumadir
فيس بوك
تويتر
انستقرام
يوتيوب
بنتيريست