|
|
 كمال سينه الخواجه ....
|
كمال ( سينه ) الخواجه ...
مع بداية المدرسه الوسطي انتقلنا من حي الملازمين الي الهجره لكي يكون والدي قريبا من توئم الروح توفيق صالح جبريل الذي يسكن القلعه في حي القلعه . و مشوارنا الي مدرسة بيت الامانه كان عادة في صحبة الاخ كمال سينه و الاخرين ، منهم ابشر شقيق عباس دليبه . و ابشر في نفس الفصل في السنه الرابعه وسطي في مدرسة الاهليه .
و سينه يحضر من الصينيه التي في تقاطع شارع الوادي مع شارع الدومه . و في نفس الوقت و كانما بتوقيت اتفق عليه يحضر ابراهيم الشيخ و والده عسكري في الاشلاق الشمالي غرب سوق ود نوباوي و الشفيع الذي ياتي من زمراوي المحطه بعد السوق الجديد ، و شقيقي الشنقيطي .
و المشوار يصير سهلا لطيفا مع قفشات و حكاوي سينه الي ان نصل منزل عبدالله خليل رئيس الوزراء الذي تلي الرئيس الازهري ، فيتجه سينه و ابشر شرقا و نواصل نحن الي مدرسة بيت الامانه بالقرب من الاذاعه القديمه و علي بعد امتار من بيت الخليفه . و لم تتوقف ضحكاته و نكته و قفشاته حتي و هو في فراش الموت في المستشفي كما كان يحكي لي الشقيق ابن امدرمان معتصم قرشي . و عندما اعطوه كتابي الاخير باهداء له قال ساخرا ( كتاب بس ، ما فيهو حاجه جوه ؟ ) .
اجمل نكاته و التي اعتبرها انا نكته رباطابيه و هو ليس برباطابي ، في اثناء مرور موكب الملكه اليزابيث ملكة بريطانيه سال احد المشاهدين ( دي منو دي ؟ ) فرد سينه ( دي ملكة بريطانيه ) و واصل السائل ( و جايه السودان تسوي شنو ؟ ) فكان الرد ( جايه منقوله !! ) .
توقف سينه علي عجله امام سيد دكان و قال له ( ادينا دفتر ) و القصد طبعا دفتر لف ، فطلع صاحب الدكان علي السلم و نفض احد الدفاتر و قدمه لسينه فقال سينه ( عندك قلم ؟ ) و بعد استلام القلم قال ( يللا بعد ده اديني املاء ! ) .
عندما لعب سينه للمريخ كان حسن ابو العائله مسيطرا علي لجنة النادي و بما انه لاعب سابق فلقد كان يحسب ان له الحق في ان يفرض ارائه علي الاخرين خاصه بعد ان رقي الي رتبة صاغ في الجيش . و في احد الايام بعد التمارين اكثر ابو العائله الكلام و الارشادات و الانتقادات فاخرج سينه جنيها من جيبه و قال لبلال الفراش ( بالله يا بلال شاي بي قرش و جيب تسعه و تسعين صاغ ) .
و صداماته مع ابو العائله لم تكن تنتهي و في الطريق من مباراة في بورتسودان لم تقلع الطائره و كانوا في انتظار الكابتن الذي تأخر فقال ابو العائله ( وين الخواجه ؟ ) فرد سينه ( ما هو ده قدامك ) . سينه عرف في صغره بالخواجه لاجادته لعب الكره . و واصل سينه ( يا ابو العائله الطياره دي فيها خواجات اثنين ) . و تخلف من بعض التمارين و عندما راجعه بعض اعضاء اللجنه لماذا لا يحضر قال ( ما انا كمان عاوز ظرفين ، واحد بي تحت و واحد بي فوق ) . فلقد كانوا يدفعون مصاريف للمواصلات و النثريات للاعبين و تدفع في ظروف .
زميل الدراسه الدكتور امين النور شقيق الشهيد بابكر النور و هو الان في انجلترا رجع في الاجازه و اراد ان يشتري ترتاره لاهل البيت للتنقلات البسيطه فاعطاه صديقنا عبدالحميد حجوج رحمة الله عليه الذي كان قد اشتري كل سيارات الخرده من حكومة السودان سياره . و امين و اهله يسكنون شرق الدومه ( العربيه كويسه بس عاوزه ليها عجلات و مكنه و جربوكس و ...فقال سينه و الله الحاجات دي كان ركبتها في اي عنقريب حيمشي ).
و في احدي المرات قالت والدة سينه ( يا ولدي يا كمال قالوا في المدرسه معاكم ولد صعلوك اسمه سينه ما عافيه منك كان اتكلمته معاه ساكت ! ) و كمال يقول لها ( معقول يا امي !!). الي ان اتي بعض اصحابه يوما و هم في طريقهم لتمرين كرة القدم و صاروا ينادونه من فوق الحائط ( يا سينه ...يا سينه ) . فقالت والدته ( هي سجمي ده هو انته ! ) .
و لانه كان جارا لجعفر نميري فلقد كانت الكلفه مرفوعه بينهم و في احد الايام طلب سينه مبلغا من جعفر الذي اعتذر بانه لا يحمل معه نقدا هذا بعد ان صار نميري رئيسا . فنظر سينه لدكتور بهاء الدين و قال له ( طيب ما تشوف باب الله ده ) . اشاره الي عمنا باب الله الذي كان ملازما للسيد عبدالرحمن .
الخواجه اشتغل فى المعاشات وفى ذلك المكتب اشتغل احد مشاهير امدرمان برعى عكس كذلك . تردد احد الناس لمعامله على سينه وقال محتداًً الحكايه شنو كلما اجى ما القاك فى طربيزتك فقال سينه ( شنو طربيزتك انا جزار . انا موظف عندى مكتب ) .
فى طريقى الى المدرسه وسنه يحمل سندوتش مدنكل توقفنا امام دكان العم جريس بعد طاحونه كلوبوس المشهوره وبعد جامع النحاس وقبل حوش القزاز وسأل سينه يا عم عندك شطه . وبما ان المتجر فاخر والعم جريس موظف كبير فى المعاش كان الدكان بالنسبه له نوع من التسليه فرد العم جريس بحده يا ابن الكلب ده دكان شطه فقال سينه انا سألتك من شطه ولا بنقو .
الاخ الخير موسى الذى عمل فى الاذاعه منذ ان كانت المنزل الصغير بالقرب من بيت الامانه وهو كذلك من ظرفاء امدرمان وصديق سينه وهو الذى قال لنميرى عندما اجتمع بالعاملين فى الاذاعه بعد الغزو الليبى سائلاً عن طلباتهم فقال الخير موسى يا ريس بعد ده عاوزين علاوه بدل خلعه لانو كل يوم الدبابات جايه كابسه الاذاعه .
عندما احتفل الخير موسى بمنزله فى الثوره اجتمع كل ظرفاء امدرمان . فطرق الباب شخص يسأل عن منزل صديق . فدعاه الخير موسى للدخول ومباركه الدار فصار يسأل ده بيتك بالله يا الخير بالله ده بيتك انت يا سلام ده بيتك انت فقال الخير ( ليه ما يكون عندى بيت اصلو انا سكينكم) فضحك الضيف حتى شرق . وبعد يومين رجع الخواجه مستسلماً قائلاً للخير والله يا الخير النكته دى انحنا بنفهمها طايره لكن دى غلبتنا فقال الخير الراجل يا كمال جزار وسكين الجزار دى طوالى شغاله ما بسووا ليها بيت . وقال الخواجه دى اول نكته تغلبنى .
سينه كان واسع الانتشار يجالس البروفيسرات امثال علي المك او العربجيه امثال الاخ الصادق الحصان او الوجهاء و الاغنياء امثال الخال عبدالرحيم عثمان صالح الا رحمة الله عليهم جميعن . و هذا ما اتذكر في الوقت الحاضر .
شوقي
|
|
 
|
|
|
|
|
|
|
|
Re: كمال سينه الخواجه .... (Re: shawgi badri)
|
أسـتاذنا شـوقي بدري
ليك التحية و الله إديك العافية و إنت بتتحفنا بي تاريخ مدينة أم درمان العامر و الثر بكل الأسماء التي دخلت في تاريخ أم درمان و سينا من الأسماء اللي فعلا كل ناس أم درما بتذكروها و أغلبهم لم يشاهدوا سينا و لكنهم سمعوا كثير من الحكايات عنه و بلطفه و خفة دمه
لك الشكر و أنت تحكي لنا عن تاريخ كنا نسمع عنه القليل
[\red]
| |
|
|
|
|
|
|
|
|
|
Re: كمال سينه الخواجه .... (Re: ABUHUSSEIN)
|
عزيزى ابو حسين
عنما قريب سينسى الناس كمال سينه كما نسوا كل الرائعين من الواجب ان يكون باسمه شارع او ميدان فى امدرمان لانه احب امدرمان لدرجه انه قال الجنه دى كان بقت ما فيها امدرمان ما عاوزينها .
شوقى ...
| |
|
|
|
|
|
|
|
|
|
Re: كمال سينه الخواجه .... (Re: shawgi badri)
|
شوقى هاك ديل عن الخواجة..... مرة فى عيد الضحية الجماعة فاطرين معاه فى البيت قام واحد من الجماعة قال لى كمال يا اخى ده لحم سمح والله خروف زى ده زول من امدرمان ما يعرف يختارو... الخروف ده بكون اختارو ليك واحد من اولاد الاقاليم ..قام كمال قال ليه ابدا لا اشتريتوا ولا اخترتو ،الخروف ده جانى هدية..قام واحد قال ليه لكن يا كمال الضحية ما بتجوز هدية الا تكون من حر مالك قام كمال قال ليه ،،بالله هو سيدنا ابراهيم زاته مشى ليه الزريبة ما جاهو هدية.
ومرة وهو شغال فى ديوان شئون الخدمة جاء طلب من ناس الرى مدنى طالبين 3وظائف غطاسين
و3 وظائف مساعدين غطاسين..قام كمال خلى وظائف الغطاسين وشطب وظائف مساعدين الغطاسين قام مدير الديوان وقتها كان الاستاذ كمال شمينا قال ليه ياكمال الجماعة دايرين 6 وظائف قام كمال قال ليه يا سعادتك دى الوظيفة الوحيدة الما فيها مساعد لو الجماعة ديل بغطسوا نعملهم 6 غطاسين ولو ما بغطسوا يبقوا ما عندهم شغلة..واردف قايلا انت عارف ديل المستهبلين بتاعين الكورة ديل دايرين ليهم وظائف لى لعيبة جداد وفعلا هذا هو ما كان...رجم الله الخواجة كمال بقدر ما امتع الناس وادخل البهجة على قلوبهم والتحية ليك انت استاذنا شوقى على هذا التاريخ الناصع تسلم،،،،
| |
|
|
|
|
|
|
|
|
|
Re: كمال سينه الخواجه .... (Re: shawgi badri)
|
عمنا العزيز شوقى
الشكر الجزيل وعميق الامتنان لايفائك الوعد
ايوه كده ، خليك و خلينا فى ناس ود نفاش والخواجه ديل و دعك عن حرب الدكاتره و حرب البسوس زاتها
باكر انشاء الله حا اعمل تلفون مخصوص لعمنا عبد الرحيم الشيخ صديق والدى الذى اصبح صديقى فى
السودان وحا ابلغه سلامك واطلع ليك منه بنكتتين تلاته عن ظرفاء امدرمان.
شكرا مره تانيه وماك قصّّّّّّّّّّّرت معانا تب
| |
|
|
|
|
|
|
|
|
|
Re: كمال سينه الخواجه .... (Re: shawgi badri)
|
الاستاذ شوقى بدرى
لك التحية والشوق وتحياتى لك ولكل اهل ام درمان وشارع دكاكين الطاهر وناس خال العيال وحاج نقدالله وحاج صديق كننى وناس عنبو وجيلهم اللاحق ناس عزت وعروجى .
استاذى العزيز شوقى بدرى
اصدر الدكتور محمد عثمان الجعلى كتاب اسمه رحيل النوار خلسة تحدث فيه عن جيل على المك وعن بحرى وام درمان بصفة خاصة والكتاب لمعلومية الجميع يباع فى دار عزة للنشر بالسودان ويمكنك يا اخ شوقى ان لم تكن تملك منه نسخة ارسال عنوانك بالبريدالالكترونى وسوف ابعث لك نسخة هدية منى لانك رجل تستحق ذلك .
التحية لاهل امدرمان ولكل السودان
| |
|
|
|
|
|
|
|
|
|
Re: كمال سينه الخواجه .... (Re: shawgi badri)
|
الابن احمد البشير ... شكرا لتذكيرك لى بعبد الرحيم الشيخ الذى لم اقابله من سنه 64 والغريبه يا احمد يا ولدى بعد مداخلتك بيوم اشوف عبد الرحيم فى برنامج عوض ابراهيم عوض وكنت اتمزق فى داخلى . حب امدرمان شئ لا يوصف ومهما يحاول الانسان ان يفتك من قبضه هذا الحب تذداد القيود والارتباط . لك التحيه
| |
|
|
|
|
|
|
|
|
|
Re: كمال سينه الخواجه .... (Re: shawgi badri)
|
الاخ طه .... لك التحيه والموده يا من تشاركنى حب امنا امدرمان . نحن نحب امدرمان ليس لاننا نستخف بالآخرين ولكن لان امدرمان هى بلد الجميع لا تسألك من اين انت ومن انت بل تحتضنك وتقول مرحباً يا ابنى بعد طول غياب . شكرا على المداخله ..
| |
|
|
|
|
|
|
|
|
|
Re: كمال سينه الخواجه .... (Re: shawgi badri)
|
الابن ضياء وليس ( ديه ) هذا عرض ذى ما قال رجال المافيا AN OFFER YOU CAN NOT REFUSE العنوان يا سيدى مع التلفون وكل البيانات فى البروفايل لكن للضمان العنوان من قبل 32 سنه هو
BOX 321
20123 MALMÖ
SWEDEN
ولك التحيه ...
| |
|
|
|
|
|
|
| |
shawgi badri
ABUHUSSEIN
صديق الموج
jini
Ahmed Al Bashir
طه حسن عبدالله
omar_ragab
Dia
عاطف عبدالله
فيس بوك
تويتر
انستقرام
يوتيوب
بنتيريست