|
|
 ركن الدوبيت السودانى
|
بورسودان برّية الليلة سال فيك دم
دم أدروب حبيب فى الحارة بتحزّم
ياعروس الرمال سكنوك جيوش الهم
أوشيك أنا معاك ناخد القصاص حرّم
وعجبى !!
فنجان قهوة حار اشمعنى يتكسّر
ناس اوشيك حرام ليه يكتلم عسكر
بالدم الدفق عمق الجرح أكبر
البن باقى مر شان دفّقوا السكر
وعجبى!!
البلد الحزين ولّع بكل جنبات
فى الشرق الحبيب وفى غربنا الأموات
مسكين ياوطن مابشفى من أزمات
فيك فرسان تجقلب وفيك صراخ أمات
وعجبى !!
|
|
 
|
|
|
|
|
|
|
|
Re: عقبي (Re: سجيمان)
|
سجيمان
كيف حالك
Quote: انا ما بعرف ادوبي
جيت ابشّر بس |
يا اخوى إنت بتبشر فى المناحة? ذكرتنى النور الجيلانى و ناس الكدرو هو يغنى الرحلة الأبدية و هم يرقصوا رغم أن الأغنية كتبت فى رثاء فرقة النور الجلانى
والذين ماتوا فى حادث مرورى بعد أن رجعوا من حفلة بالكدرو.
| |
|
|
|
|
|
|
|
|
|
Re: عقبي (Re: سجيمان)
|
سجمان العزيز بشّر عديلة وفال
بالفرح النبيل نمسح حزنا الطال
غنى معاى نقول ونجر خيوط موال
قول ليا الجريدة واقولك المرسال
| |
|
|
|
|
|
|
|
|
|
Re: عقبي (Re: Balla Musa)
|
البلد الحبيب مين البيعدل مايلو
صارى الحزن ابدا فى حشاهو وشايلو
الزول الظلوم حتما تظلمو فعايلو
فى يوما قريب بيبهدلنو عمايلو
| |
|
|
|
|
|
|
|
|
|
Re: ركن الدوبيت السودانى (Re: حبيب نورة)
|
حبيب نورة الحبيبتك تجرى بس حفيانة
فيك يازول لسان حنّكت بيهو فلانة
باع عربيتو كامرى ومازدا برضو عشانها
مامهم جوع بطون وكت القلوب شبعانة
وعجبى وعجبكّّ!!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
نادية
Quote: حبيب نورة الحبيبتك تجرى بس حفيانة
فيك يازول لسان حنّكت بيهو فلانة
باع عربيتو كامرى ومازدا برضو عشانها
مامهم جوع بطون وكت القلوب شبعانة
|
بنت الناس حرام... يا الكل يوم فاضحانا
كترتي الكلام.. المنو الله........هدانـا
عربية شنو ؟ نحن الفلس........هدّانـا
ولي حق السجار تعبت معـاه.......خطانا
| |
|
|
|
|
|
|
|
|
|
Re: ركن الدوبيت السودانى (Re: حبيب نورة)
|
حبيب نورة
موبايلك يالعزيز رناتو ليه خلصانة
انعل ابو الفلس دائما ورانا ورانا
لو عندك قروش كان الرصيد كفانا
وفى اللاسلكى كان يازول نغنى غنانا
وعجبى جنس عجب !!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
Quote: موبايلك يالعزيز رناتو ليه خلصانة
انعل ابو الفلس دائما ورانا ورانا
لو عندك قروش كان الرصيد كفانا
وفى اللاسلكى كان يازول نغنى غنانا
|
الكمل قروشنا وخلي الجـيوبـــــــــ سجمانة 
حديث الزولة في ساعة الخلوق ........نجضانة
ابو عيالك دوام قاعد معانا.......... معانا 
لو ما بعد البلاد..كان يا نادية جانا أزانا
أجي يا بنتي!!!!
| |
|
|
|
|
|
|
|
|
|
Re: ركن الدوبيت السودانى (Re: حبيب نورة)
|
الكمل قروشنا وخلي الجـيوبـــــــــ سجمانة
حديث الزولة في ساعة الخلوق ........نجضانة
ابو عيالك دوام قاعد معانا.......... معانا
لو ما بعد البلاد..كان يا نادية جانا أزانا
حبيب نورة
شن تجدى القروش لو صحتك عدمانة
وكت روحك تمام الفلسة ماهامانا
بحبك ابو العيال زى مازمان حبانا
مابقول ليك شئ عارفك ولدنا جنانا
وعجبى لدرجة قف تأمل !!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
الللييييييييييييييييييللللللللللللل
ليل وليل ليل يا ليا يااااااااااااااااا
جعلى وشايقي ودنقلاوي إيش فايداني
غير خلقت خلاف خلت أخوي عاداني
هممممممممممممممممممممممم
بالكرم الجد معروف وما هماني
يكفي النيل أبونا والجنس سوداني
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
الليييييييييييييييييييييييلللللللل
محببي العلي خلاني راح متحرج
الحالة العلي خلاني يت متفرج
ليييييييييلللللللللل
يا الله العليم الحالة العاي تفرج
أصبح حظي جائر الجوكرين ومعرج
| |
|
|
|
|
|
|
|
|
|
Re: ركن الدوبيت السودانى (Re: ناذر محمد الخليفة)
|
كدي اول حاجة نشيل الفاتحة على ارواح الشهداء وبعد داك نشيل كباية الشاي ونعصر الفراش
حمد لله على السلامة يا 
ناذر يا خوي انت من جماعة السودان الجديد اياهم ولا شنو ؟؟؟؟؟؟؟؟ جعلية وشايقية ودنقلاية زنوجة الشمال الكارهين لانفسهم
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
Quote: ياعم موسى شوف البلة ولدك جار
ظلمنى ظلم شديد وجعنى وجعا حار
قال لشخصى قولا اثرو زى النار
لكن برضو قلبى بيقبل الاعذار ! |
ن نرجع تانى لى سطرى الكتبتو عتاب
ا الناس ليها بى المعلوم سلام و حباب
د دوبيتك قبيل حييتو دون اسباب
يه يهون لى ناس سلامك غيرى دون حجاب؟
| |
|
|
|
|
|
|
|
|
|
Re: ركن الدوبيت السودانى (Re: Balla Musa)
|
نرجع تانى لى سطرى الكتبتو عتاب
الناس ليها بى المعلوم سلام و حباب
دوبيتك قبيل حييتو دون اسباب
يهون لى ناس سلامك غيرى دون حجاب؟
العزيز بلة موسى :
سلام وكمان مربع والف منى حباب
سلام وبدون سلام مايانا نحنا اصحاب
يابلة العزيز مابينا ياخى عتاب
تدخل تانى توووش وبدون تدق الباب
| |
|
|
|
|
|
|
|
|
 Re: ركن الدوبيت السودانى (Re: نادية عثمان)
|
الأخت نادية عثمان تحياتي الحارة لك ولمن معك ، أعجبت جدا بهذا البوست لأنك باختصار استطعت أن تنقلي همك وقضيتك بصورة جميلة وغير مألوفة في البورد والانترنت وربما كادت أن تنقرض ، وأنا معجب جدا بصياغتك لكلماتك على نهج الدوبيت وقدرتك الفائقة" ماشاء الله" على صياغة كلماتك الجميلة المنمقة . لك أجزل الشكر
على الهامش: يقال أن الدوبيت هذا فارسي الأصل وهو بمعنى دو " اثنين" وبيت " بيت الشعر" لكن ربما لأهل اللغة والمعرفة شأن آخر .
لك التحية
| |
|
|
|
|
|
|
|
|
|
Re: ركن الدوبيت السودانى (Re: almulaomar)
|
العزيز الملا عمر
قلت:
يا بت الكرم يا نادية بت عثمان
نظمك للشعر إيقاع في إيد فنان
أنتي خير مثال لي عازة السودان
شرفتي المنتدي ورفعتي راسنا كمان
وبقول ليك:
ياود القبايل يسلم السودان
بلدنا شعارها نخوة وخير وحب وحنان
ياعمر البلد حقتنا فيها امان
بس قالو الصبر بيغلب بنى الانسان
وعجبى!
| |
|
|
|
|
|
|
|
|
|
Re: ركن الدوبيت السودانى (Re: خال فاطمة)
|
خال فاطمة العزيز
كتلنى الشعر عشقا وهزتنى القوافى
حبيبتى حروف وكلمة من الزمن الخرافى
بقت فى الغربة مآوى فى قلب المنافى
مصيبة الشعر أكبر فى دنيا الصحافى !
عن تجربة وعجبى!
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
Quote: فنجان قهوه كارب
يعدل مزاجنا يروق
عايزين يدلقوه
يبقي الادب مدلوق
ادروب اللسد
حالف يجيبلو حقوق
من زولا ظلوم
اب راس عديم طايوق |
الطايوق ظهر بس تحتو مافيش راس
الزول اللعين كل فهمو ببقى مداس
الخيل لو كبن البركه فى الفراس
باكر تب بفوت يـا موصلى الكباس
| |
|
|
|
|
|
|
|
|
|
Re: ركن الدوبيت السودانى (Re: osly2)
|
اوسلينا الكريم الدنيا باقيه حزينه
شايف ابو الدقيق الليله حرق المينا
مكتول الصباح الليله... كيف امسينا
باقيلك كده ظالمنا ... بقدر لينا؟؟
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
الموصلى ود الخال
ادروب بكرة ياخد حقو دون نقصان
ثروة وسلطة ياخد دون فرز كيمان
الدم غالى جد فى الغالية بورسودان
لو سكتو الرجال مابسكتو النسوان
وعجبى!!
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
الموصلى الغالى ود الخال
قلت:
عاد يابت اخوي باكر بجي الميزان
والظالم بروح بي شرو... بالكيمان
وان كتر كلام نديهو... بي البمبان
ونخم العسل..... ونغرفو بالكيزان
وبقول ليك :
معمول العسل بالخاصة للسودان
عسلنا كتير بكفى بغرّق الحيشان
بس الطمع البغيض بيقرض بنى الانسان
ومسيخ العسل لو غرفوا بالكيزان!!!!
وعجبى من هنا للصبااااح ياموصلى!!
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
الموصلى
السودان بلدنا بلد ابوى واحبابى
لو جاها الضرر بتفوت سمومنا الدابى
لابنقول عروبة ولاجنس غرابى
لازول جنجويد لابنعرف الجلابى !
وعجبى جد جد!!
| |
|
|
|
|
|
|
|
|
|
Re: ركن الدوبيت السودانى (Re: shazaly gafar)
|
الاخ شاذلى جعفر
قلت:
يا بت عثمان سلا م ينجيك من السَّاسه
فى بورسودان غُبُن مردومه فوقو حِساسه
الجرح الكبير ما بتنفعو الكركاسه
كل ما نقول نعمِّر تِتْردم من ساسه
وبقول ليك:
زمان وصفو السياسة وقالوا عليها شينة
لاصادقة فى وعودها لاطيبة وحنينة
تخلى الناس تغير صفاتها وحتى دينها
تسيب الغازى حرا وتعتقل الرهينة !
وعجبى جد جد!!
| |
|
|
|
|
|
|
|
|
|
Re: ركن الدوبيت السودانى (Re: ناذر محمد الخليفة)
|
العزيز ناذر محمد الخليفة
وحاة ربى العظيم دوبيت اكيد ياناذر
بس ماكتبت اسمك اصلو اسما نادر
من معنى النذور الوصى بيها القادر
ياود الخليفة تعال ندوبى لباكر
وعجبى!
والله رديت بس بدخل عليك توش من غير مااكتب اسامى وهسة برضو بلة قال نفس الكلام ياشباب البيت بيتكم وانا والله سعيدة بوجودكم ودوبايكم معاى ويلا نقول وندوبى بدون عتاب لانكم كلكم ااخوان واصحاب..سمح
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
-1-
تقول لِى شنو
وتقولى لِى منو ،
-2-
أنحنَا السَّاسْ
ونَحنا الرَّاسْ
ونحن الدّنيا جبناهَا
وبَنيناها..
بِويت ..فى بِويتْ
وأسْعل جدى ترهاقَا
وخلى الفَاقة .. والقَاقا
-3-
تقول لِى شنو
وتقول لِى منو ،
-4-
تَالا أبوى .. بعنخى لَزَمْ
وتَالا اللُمْ..أَبوىْ أوْلبَابْ
وأمى مهيرة بتْ عبودْ
وأخويا المهدى ..سيد السيفْ
والخلى النصارى تقيفْ
هناك ..فى القيفْ ،
-5-
تقول لِى شنو
وتقول لِى منو ،
-6-
ونحن الشينْ
ونحن الزينْ
ونحن العقبه والعتمور
ونحن القِبله .. والقرعانْ
ونحن الشانْ
ونحن النانْ
أتينا عشانْ
نسوى الدّنيا للإنسانْ
تقول لِى شنو
وتقول لِى منو ،
-8-
ونحن الصّافى
والوَافى ،
ونحن الشّافى
والكافِى ،
ونحن الزادْ
ونحن العِينه
والزِيّنه ،
ونحن – يمين – أهالينا
أهلى سرورْ
ووكَتين ينزل المستورْ
تَرَانَه النور
-9-
تقول لِى شنو
وتقول لِى منو ،
-10-
ونحن الجبنه واللبريقْ
ونحن قداحنا سَاوات ضيقْ
ونحن بيوتنا مفتوحاتْ
مَسَاىْ .. وَصباحْ
ونحن وشُوشنا
مطروحاتْ
مَسَاىْ وصباحْ
ونحن السَمحه
والقَمحه
ونحن الطله .. واللمحه ،
ونحن الصِيدْ
ونحن العيدْ ،
-11-
تقولى لِى شنو
وتقولى لِى منو ،
-12-
ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب – يا زويل – منْ قالْ
إنّك .. تانى لينا متيلْ ،
تقولى لِى شنو
وتقولى لِى منو ،
-13-
ونحن الحَجه والتوبه ،
ونحن الهِجره .. والأوبه ،
ونحن كُتَارْ
ونحن كُبَارْ ،
ونحن – يمين – جُمَال الشيلْ
ونحن – يمين –نَضِمنا قليلْ ،
-14-
تقول لِى شنو
وتقول لِى منو ،
-15-
ونحن مِحايه
نحن طِرايه
نحن فِدايه
نحن سِمايه
نحن حجاب
ونحن اللوحْ
ونحن شَرَافه فى الدنيا
ونحن كِتاب عِلمْ مفتوحْ
على كل البُلودات ..نُورْ ،
ونحن – يمين – مَداين نورْ ،
ووشنا نورْ ،
-16-
تقول لِى شنو
وتقول لِى منو ،
-17-
ونحن الحِنه والجرتقْ
ونحن الزفه والسيره ،
ونحن ..أبشرى والشبال ،
ونحن السَىْ
ونحن الوَىْ
ونحن الرقبه .. والتُمْ تُمْ
ونحن اللَمْ ..
يكون فى الدنيا ..متلنا ..لمْ
-18-
تقولى لِى شنو
وتقول لِى منو ،
-19-
ونحن العَاجْ
ونحن الصَاجْ
ونحن البوشْ
ونحن الحوشْ
ونحن الناسْ
وكتين الديارا ..يباس
وإن درت العديل والزين
تعال يا زول ،
وإن كست الكعب والشين
أرح .. يا زول
-20-
تقولى لى شنو
وتقول لى منو ،
-21-
ونحن السورْ
ونحن الحُورْ ،
ونحن بناتنا محروساتْ
ونحن وِلادنا ضُلالاتْ
ونحن أُماتنا ياهِنْ ..ديلْ ،
وجِيب ورينى زيىِّ منو ،
وتقول لِى شنو
وتقول لِى منو ،
-22-
ونحن فَزَعْ
ونحن وجَعْ
ونحن اليُمه ..واليَابَا
ونحن أريتو بالتَابَه ،
ونحن – يمين – إذا حَرّتْ ،
نخلى الواطه ..رُقَابه ،
-23-
تقولى لِى شنو
وتقولى لِى منو ،
-24-
ونحن زَغَاوه والعطرونْ
ونحن الدُونَا ..مافيشُ دونُ
ونحن وِلاد مَلك خِرتيتْ
وسَابَ الجرْ
وحجَر السِكه ،
والتاكا ،
وسيّدنا الفى الجبل ..دَاكَا
ونحن – يمين – نضِمنا كُتُرْ
وشيَتنا كُتُرْ
وأسعَل ناس كَرن والطُورْ ،
وأسعَل كَررى .. والعَتْمُورْ
وأسعل – يا جنَاَ – الخرتُومْ ،
وشوف كيفن زعلنا كُتُرْ ،
وشوف كيفن فرحنا كُتُرْ ،
أنحنا الـ للرجال خُوسَه ،
ونحن –يمين – جِنَات موسى ،
-25-
تقولى لِى شنو
وتقول لِى منو ،
-26-
ونحن الدوكه
والضُلاله ، والدونكه ،
ونحن الدانقه ،
والراكوبه ، والواطه ،
ونحن الفَكَه
والشِبكَه
ونحن الحجزه .. والعكَه ،
ونحن الجُودْ ،
ونحن أسودْ ،
ونحن النَانْ ،
حديثنا إذا أرِدتو رُطَانْ
وحين دايرين ..نسوى بَيَانْ ،
-27-
تقول لِى شنو
وتقول لِى منو ،
-28-
ونحن الخَلوهَ والدايره ،
ونحن تَكيه العايره ،
ونحن الضُّلْ ،
ونحن الكُلْ ،
ونحن سبيل غريب الليلْ ،
ونحن صباح مسافر الليلْ ،
ونحن فَنَاجرةَ الدّنيا ،
ونحن حَبَابْ
حديثنا حَبَابْ
تعال شَرِف .. وشوفنى منو ،
وتقولِى شنو ،
وتقولِى منو ،
-29-
أقيف لِسَعْ
وأقيف وأسمعْ ،
ونحن صديرى منضوم ويلْ
ونحن القَرمصيص ..بلحيلْ ،
ونحن التوبْ
ونحن الووبْ
وناس حبوبْ
وناس حَرّمْ
ونحن إذا رأينا كبيرْ
نقيف طولنا ..ونقولْ لُه ..حَبَابْ
ونديه البُكَان ..ترحابْ
ونحن. اليَانَا ديل .. يا زولْ
وتسعلنى .. وتقول لِى منو
وتقولِى شنو ،
-30-
أقيف لسعْ
وأقيف .. وأسمعْ
ونحن التَايَهْ
والاندايَهْ
والزِريعهْ
والعيزومهْ
واتفضلْ ،
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه
-31-
تقول لِى شنو
وتقول لِى منو ،
-32-
وأما عجيبْ
وأما غريبْ ،
وأقيف لسعْ
وأقيف .. وأسمعْ ،
-33-
أنا الكَعَب البسوى الويلْ
وأنا الزول السَمِحْ ..بلحيل ،
وداير ..منَِّهُمْ .. يَاتُو ..،
تقولى لِى شنو
وتقول لِى منو ،
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
ود الخال الموصلى الغالى
قلت:
يازول الشرق... يالبرصاص ..كتلوه
انسانك غرق في بحر..... دم خلوهو
ديل ظالمين عديل والظلم ماسابوهو
والشعب الحزين ناسينو. ما بطروهو
وبقول ليك:
ادروب زول نجيض بالطلقة مابكتلوهو
بيقلع حق ابوه مامنحة بس يدوهو
الزول الجسور فى الحارة مابنادوهو
تلقاه فى الوطيس فارس يهابو عدوه
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
الموصلى العزيز
قلت :
الزول الجسور كان قام بولع نار
والسيف عندو تب قاطع رهيب بتار
وادروب ان سخي جيشو بيكون جرار
يفخر بي شهيدو الاسمو.. ود كرار
وبقول ليك:
ادروب ساعة يقوم تبقى الدعاشة غبار
مابرضى الحقارة وماهو زول حقار
مزاج قهوة وظريف لكنو ماغدار
كتلوهو العساكر ظلم واستهتار !!
وعجبى لدرجة الدهشة والله!!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
ياناديه بت اهلي قلتي
ادروب ساعة يقوم تبقى الدعاشة غبار
مابرضى الحقارة وماهو زول حقار
مزاج قهوة وظريف لكنو ماغدار
كتلوهو العساكر ظلم واستهتار !!
وانا بقول
ادروب ياناديه فاهم عارف مقام الدار
مابرضي الحقاره والظلم..... مابندار
مابعرف الدسديس مابيرضي.. بيهو هظار
ادروب ان ظلمتو..... لازم بجيب التار
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
الموصلى الغالى
قلت:
ادروب ياناديه فاهم عارف مقام الدار
مابرضي الحقاره والظلم..... مابندار
مابعرف الدسديس مابيرضي.. بيهو هظار
ادروب ان ظلمتو..... لازم بجيب التار
وبقول ليك:
لو كمل الرصاص ماكملن الحجار
اوشيك ان وقع ادروب بقيف زنهار
بيجيب حق اخوه وحق ابوه والجار
السودانى زول شايل الرجالة شعار
ومن دون عجب!!
| |
|
|
|
|
|
|
|
|
|
Re: ركن الدوبيت السودانى (Re: Kamel mohamad)
|
العزيز كامل محمد
الف مرحب بالمرور ..والف شكر على روعة الهدية
وقد صدق حبيبنا الحردلو المبدع
تقولى شنو ..وتقولى منو
نحنا فعلا مابشبهونا ناس ..السودان وشعبه خير امة اخرجت للناس ..وزيهم فى الدنيا مافى!
كن حاضرا ايها الاخ العزيز وواصل الحوار
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
الأخت نادية دي من زماااااان أنا عارف هوايتها العجيبة التي ظنناها حكراً للرجال (باستثناء نساء شوييييية). هواية التعبير بآداة الدوبيت. لكن الليلة الملا راسي ده هو أستاذنا يوسف الموصلي. تابعت كل مجادعاتك مع الأخت نادية أبحث عن خللٍ ما .. فلم أجد!!. يوسف الموصلي .. صدقني إنت مثال للمثقف "العضوي" الحقيقي. غايتو أنا متكيّف منك إلى ما لا تخوم ولا حدود ولا بظبورطي ولا جناسي. لكن في الحقيقة إنت أصلاً مدوْزن في أعماق إحساسك بالحرف والنغم .. فما أظن يغلبك الدوبيت وتقعيد بـحرو المفارِق لشروط العولمة. نادية قريبتك دي طفشت ليها زمن مع دميرة الدوبيت .. وإنت برضو خليك زي ما إنت: مثال للمثقف إبن الأرض، إبن الناس، إبن الطين، إبن الكل.
بس ما تغرق.
| |
|
|
|
|
|
|
|
|
|
Re: ركن الدوبيت السودانى (Re: Shinteer)
|
العزيز شانتير
اهلين الف مرحب بيك اخوى شانتير
يوسف اصلو فالح من صباهو صغير
كان فى الروضة شاطر وفى الموسيقى خطير
وكان بيقعد يغنى والاغانى تطير !!
وعجبى!
| |
|
|
|
|
|
|
|
|
|
Re: ركن الدوبيت السودانى (Re: ناذر محمد الخليفة)
|
العزيز ناذر محمد الخليفة
قلت :
حيوا معاي بنت الأصول ديك نادية
زارعالنا الفرح زهراتو لينةونادية
غيرت لي زمنا من طباعن شينة وسادية
فرهدت جوز ولوز يرويهاعزن وساقية
تسلم ياعزيزنا الغالى جدا ناذر
يازولا كريم بالطيبة ديمة تبادر
حوش جدك كبير بالخير مدفق عامر
ومن سودانا هابة علينا نسمة بشائر
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
نادية عثمان يا مبدعة تحياتي وهاك مشاركة
الليلة البلد مليان مشاكل وغيوم
والدنيا الرايحه ما بتستاهل هموم
احسن نوحد جهودنا سلام وتنمية ومحبة
من شرق لغرب وجنوب وشمال وحتى الخرتوم
| |
|
|
|
|
|
|
|
|
|
Re: ركن الدوبيت السودانى (Re: luai)
|
العزيز لؤى
قلت:
الليلة البلد مليان مشاكل وغيوم
والدنيا الرايحه ما بتستاهل هموم
احسن نوحد جهودنا سلام وتنمية ومحبة
من شرق لغرب وجنوب وشمال وحتى الخرتوم
وبقول ليك :
ياوطنى الجميل يالمافى زيك زى
حبيبك ليك بعود طال ماهو مرزق حى
خليك فى العليك وخلى العليا على
لو يتجسّر عدوك بنأكلو لحما نئ
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
نادية...
سلام يشبهك..
ايتها المبللة بالصياغات...
هذا هو العبث...
مطر أصم..ينتظر الولادة..
ومازلت ألوك الدهشة..
وهذه رجفة أولي..
وساعود..متي ما سمحت قصاصات الوقت..
سلملم....
| |
|
|
|
|
|
|
|
|
|
Re: ركن الدوبيت السودانى (Re: Elmosley)
|
ودعوة للحب ..الاخاء ..التسامح..الصفاء ..السلااااااااااااااااااااام ..السلام ..السلام
جون ياأهلنا زول وحدة ومقاصدو سلام
قال من نمولى لى حلفا بيربى حمام
أطفال مروى فى رومبيك سنا الاحلام
وأولاد زاندى فى شندى وصغيرهم نام !!
وبدون عجبى !!
**** ***** *****
الحرب القبيل مالقينا فيها هوادة
حقول الغام ونار لابدّ من اخمادها
من أجل التحول لازمة لينا ارادة
جنوب وشمال بلدنا ونحنا كلنا سادة!!
**** **** *****
منو القال بت شمال مايعرسولا جنوبى
شول سيد البلد متل الشمالى النوبى
يمين لو دار بنيتى أديها ليه بى توبى
ومن بقرو الحلوب لبنا يكون مشروبى ..
***** **** ***
الزول المجاهد يوم دخل للغابة
شان يحمى الجنوب مايسرقوه عصابة
الزول شان يعيش لابد يكونلو مهابة
فى ظل السلام الوحدة تبقى حبابها ..
| |
|
|
|
|
|
|
|
|
|
Re: ركن الدوبيت السودانى (Re: munswor almophtah)
|
منصور العزيز
هلا بالطلة :
السلام كان ديمة مطلب وكلو جارا ليهو ساعى
بس بخاف المدة تطول ونحنا هدتنا المساعى
الحجج والنقة كترت مابشوف كان ليها داعى
الوطن الجرحو نوسر كان جميل لو ليه نراعى !!
ومن دون عجبى!!
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
العزيز انور ابو غيداء
قلت:
زى الراسيات صحه وثبات ورزانه
كم قابلنا بى وحها بشوش واجزانا
لم لا نمدحهبالال سن العجزانه
وبقول ليك :
السودان عموم وجها بشوش وجميل
مابعرف العوج تلقاهو دربو عديل
مابرضى الحقارة ومابتلاقى ذليل
السودان معلم جيل وراهو الجيل
| |
|
|
|
|
|
|
|
|
|
Re: ركن الدوبيت السودانى (Re: munswor almophtah)
|
محاولة أولى عشان خاطر هذا المنبر الراقي:
شوف تاريخ بلادي تلقاهو ابدا شاهد
الوطن الكبير عايزلو قلبا زاهد
مو قلبا عقيم للزايلة دايما جاهد
للسلطة الخؤون تلقاهو صدرو يناهد
مادي غصن سلام والسونكي خلفو يلابد
مانا الداقسين
ولانا بنكاري زليم
السكران حدانا
في الجبهة ببقى هميم
وأم حاجبا رفيع
في الدارة تبقي جحيم
غايتو "زليم" دي كان ما نبذ زي ما أنا فاكر عدلوها زي ما "تكرهوا".
العوض أحمد الطيب
| |
|
|
|
|
|
|
|
|
|
Re: ركن الدوبيت السودانى (Re: Elawad Eltayeb)
|
العزيز العوض احمد الطيب
قلت:
شوف تاريخ بلادي تلقاهو ابدا شاهد
الوطن الكبير عايزلو قلبا زاهد
مو قلبا عقيم للزايلة دايما جاهد
للسلطة الخؤون تلقاهو صدرو يناهد
مادي غصن سلام والسونكي خلفو يلابد
وبقول ليك :
اوعك تخاف واغرز خناجرك فى صميم قلب الريئس
انت الشروق لو اظلمت وانت البتستر للبنيات ياعريس
قلمك درع حبرك رصاص يحرق حشا الاسد الكديس
انت الطريق مرسوم عديل واصلو العوج درب التعيس
ومن دون عجب!!
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
العزيز انور ابو غيداء
بقول ليك :
مسكين يابلد جرحوك أهلك وناسك
طعنوك فى فؤادك ونزّفوك احساسك
أولادك زمان ماكان بيرضوا مساسك
وهسة بعد جنوبك جه غربك يقطع رأسك !!
وعجبى شديد والله!!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
التحية ليك يانادية على البوست الجميل دا
والله فعلا متعة لا توصف وخاصة مجادعات المتداخلين
ولكن للاسف ما بعرف ادوبى زيكم ...
لكن بالجد حاجة حلوة
لى قدام ....
| |
|
|
|
|
|
|
|
|
|
Re: ركن الدوبيت السودانى (Re: ودالعباسية)
|
العزيز ود العباسية
لك التحايا الطيبات والف مرحب بالمرور
قلت :
(ولكن للاسف ما بعرف ادوبى زيكم ...)
يازول يكفينا شرف الطلة ودى بالدنيا ولى قدام نعبر عن فرحنا ووجعنا وهمنا مع بعض !
ولى قدام على رأى العزيزة بنية
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
مسكين البلد يا نادية كيف الشورة؟
انقطع الرسن والجتة عادمة شعورة
من بدل العرس سموهو موت الكورة
بي عقول الرجال والله لعبوا الكورة
يا نادية البلد باكر تجيك اخبارة
راقدة علي النعيم والسلم فيها امارة
ماتغرك دقونم والله ديل سمسارة
راس مالم بضيع والباقي كلو خسارة
| |
|
|
|
|
|
|
|
|
|
Re: ركن الدوبيت السودانى (Re: عبدالله وداعه الامين)
|
العزيز عبد الله وداعة الامين
قلت :
مسكين البلد يا نادية كيف الشورة؟
انقطع الرسن والجتة عادمة شعورة
من بدل العرس سموهو موت الكورة
بي عقول الرجال والله لعبوا الكورة
وبقول ليك :
ياود الامين الحالة فيها خطورة
باللون السواد جد شوهوها الصورة
مكشوف حالنا بس وكل الخلق مستورة
الحرة بتموت تب مابتعيش بشطورها !!
وقلت :
يا نادية البلد باكر تجيك اخبارة
راقدة علي النعيم والسلم فيها امارة
ماتغرك دقونم والله ديل سمسارة
راس مالم بضيع والباقي كلو خسارة
وبقول ليك:
اخبار البلد ياريت تكون بس سارة
الموت والخراب كسرين بدون جبارة
تربية الدقون بالجد بتبقى عوارة
لو سابوا البلد بناسها تولع نارها !!
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
انور ابو غيداء
قلت :
سودانيه سود
عاليين الهمم
بنسند الضعيف
وما بناكل الرمم
ومين زينا
وبقول ليك:
السودان حبيبى علا منو بخاف
سبب خوفى الملاريا وبردها الرجاف
من انثى الانوفليس نفسى ديمة تعاف
بعد حمى وطراش حلقى يابس جاف !!
| |
|
|
|
|
|
|
|
|
|
Re: ركن الدوبيت السودانى (Re: anwar abu gaidaa)
|
العزيز انور ابو غيداء
ياعاشق الجمال اعرف انحنا جمالنا مالو مثيل
انحنا الفركة والسوميت وقولة السى معاها عديل
انحنا الخمرة والدخان والريف دور فتيل فى فتيل
معانا بتعرف ايه الحب وبدونا أخير تقع فى النيل !!
سودانية بس فى الكون حباها المولى أحلى جمال
غنج معجون من الصندل وبسمة وأغلى تيه ودلال
لآدنة طرية زى مخمل ومشيتها زى عظيم مختال
سودانية بس فى الكون توزنها بالدهب والمال !!
ومن دون عجب!!
| |
|
|
|
|
|
|
|
|
|
Re: ركن الدوبيت السودانى (Re: نادية عثمان)
|
كلام سمح تب استاذه ناديه... تعجبني موهبتك .. اها نشارك بي حاجة قديمه...
يا الماشي الخلا سلم علي القلدونا
الانقليز بالكنترات ملكونا
كل صبح جديد زي الغنم عدونا
يا رب يا كريم تبرد حشا الولدونا
| |
|
|
|
|
|
|
|
|
|
Re: ركن الدوبيت السودانى (Re: عبدالله وداعه الامين)
|
Quote: الماشي الخلا خليهو شوف الجونا
كيزان السجم خلو البلد محزونه
يزرعو في الحرب بقت البلد طاحونة
تطحن في الخلق بي الدم تعجن المونة |
وشوف مونة السجم زى ناسا كم ملعونه
كل مدماك يقيف فوق راس تكون مسحونه
الناس بالحرب يا شوقى شاحب لونا
والكيزان هناك مادين كروش مدهونه
| |
|
|
|
|
|
|
|
|
|
Re: ركن الدوبيت السودانى (Re: osly2)
|
اوسلى 2
قلت:
وشوف مونة السجم زى ناسا كم ملعونه
كل مدماك يقيف فوق راس تكون مسحونه
الناس بالحرب يا شوقى شاحب لونا
والكيزان هناك مادين كروش مدهونه
وبقول ليك :
البلد العزيز تسلم عشانا عيونها
كم خيرات كتير فى جوفها جد مدفونة
مهما نحنا نقسو تظل بلدنا حنونة
ننعم بى جمالها وروعتها وفنونها !!
| |
|
|
|
|
|
|
|
|
|
Re: ركن الدوبيت السودانى (Re: عبدالله وداعه الامين)
|
العزيز عبد الله وداعة الامين
قلت:
الماشي الخلا خليهو شوف الجونا
كيزان السجم خلو البلد محزونه
يزرعو في الحرب بقت البلد طاحونة
تطحن في الخلق بي الدم تعجن المونة
وبقول ليك:
ياود الامين الدنيا جد مجنونة
وهمومنا الكتار مابقينا نعرف لونها
طاحونة السجم فيها العيال مطحونة
لكن يالعزيز ارواحنا مابنخونها !!
| |
|
|
|
|
|
|
|
|
|
Re: ركن الدوبيت السودانى (Re: Mohamed A. Salih)
|
الاخ محمد صالح
قلت :
يا الماشي الخلا سلم علي القلدونا
الانقليز بالكنترات ملكونا
كل صبح جديد زي الغنم عدونا
يا رب يا كريم تبرد حشا الولدونا
وبقول للوطن عبرك :
الحواليك مرتزقة وفيك طامعين
عاملين انهم حلوين وهم شينين
ناس لابتعرف الله ولاكتاب الدين
لاحمدوا الآله لاسجدوا يوم شاكرين !!
| |
|
|
|
|
|
|
| |
elhilayla
Balla Musa
سجيمان
صديق الموج
حبيب نورة
ناذر محمد الخليفة
saif massad ali
انور الطيب
خال فاطمة
munswor almophtah
Elmosley
osly2
Abdelrahman Elegeil
shazaly gafar
Kamel mohamad
Abo Amna
Shinteer
luai
ودالعباسية
فيس بوك
تويتر
انستقرام
يوتيوب
بنتيريست