دعواتكم لزميلنا المفكر د.الباقر العفيف بالشفاء العاجل
|
|
 أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!!
|
جياشة
جياشة
اوب على انا
جياشة
والجيش
نقلوا
فتاشة
اوب على انا
ده جيشنا جيش القوة اوب على انا
دخل الجبال جوة
اوب على انا
دخل الجبال جوة
ده الحارب يوسف كوة
ياعينى انا
ماعرفو
ماعرفوا
اوب على انا
ماعرفو
دبورى
بى طايقتو
اوب على انا
انا ماشة الرئاسة
اوب على انا
دى مكانة حساسة
اوب على انا
احب الامن كلو
بوليس
سجون
جياشة
اوب على انا
بالأخضر
بالاخضر
اوب على انا
بالاخضر
الجيش نقلوه المعسكر
اوب على انا
ماعرفو
ماعرفو
ده مجدى فى دوريتو
اوب على انا
برى
برى
برى
باللبنى
باللبنى
ياعينيا
حبيب نقلو ود مدنى
اوب على انا
جياشة
جياشة
اوب على
انا
جياشة
والجيش
نقلو فتاشة
اوب علينا
النبق النبق النبق ..
من هو مؤلف هذه الاغنية ياترى ؟!!
وهل كانت المطربة هاجر كباشى مقتنعة تماما بادائها لهذه الاغنية ومافيها من مدح للقوات المسلحة وقوات امن السجون والدياشة كما تغنت؟!!
شايفة ناس الامن سوقهم ماشى والبوستات تتطاقش عشانهم
فكنت بسمع فى الاغنية دى ..وقلت والله فكرة نعمل قرأة فى الموضوع ده من زاوية اخرى كده !!
اها لحدى مااجى ياناس الخبرة ممكن تنزلوا لينا الاغنية عشان يبقى النقاش حولها موضوعى بعد الاستماع لهاجر واحساسها بالاغنية !!
انا عندى لكن مابعرف انزلها للاسف !!
|
|
 
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: saif massad ali)
|
| Quote: ازيك يا ناديه كيف امورك وناس الامن معاكي |
انا كويسة جدا احمد الله
بس عايزة اقول ليك حاجة ياسيف
انا لاحظت حاجة فيك
انك مرات بترمى الكلام زى الطوب كده وعشان كده فى ناس فى المنبر بيزهجو من مداخلاتك
انا والله انت عارف بعزك جدا وعارفة انو قلبك ابيض ومازول خبيث..
لكن يعنى هسة لما تجى تووش كده وتقول لى كيف ناس الامن معاكى فى ناس هنا بقرأو طرف الكلام يقوموا يفتكونى ملازم اول ولاحاجة!!
ههههههههههه
يازول دى هاجر ماانا!!
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: saif massad ali)
|
الاخت نادية عثمان
لك التحية والود
اما بالنسبة لتنزيل الاغنية انا ليست لدي الاغنية وحتى انني لا اعرف من هو مؤلف هذه الاغنية ولكن الشيئ الذي يمكن ان اجزم على معرفته هو ان المؤدية للاغني لا تدرك معاني هذه الاغنية سيما وان سمعة رجال الامن والبوليس في بلدنا الحبيب غير جيدة خاصة في انهم يستغلون السلطة الموكولة لهم بحكم القانون بشكل يفوق صلاحياتهم الى التعدي الى حقوق المواطن كما انهم يشكلون خط الدفاع الاول للانظمة القمعية التي (حاكمت البلاد) منذ الاستقلال الى هذه اللحظة .
كما ان الجيش الذي تدخل في اكثر من مرة للقضاء مقدرات ومكاسب الشعب من الناحية الديمقراطية التي كان يمكن لها ان تتطور بشكل ايجابي خالقة توازن جيد في الحكم بين كافة اقاليم واتجاهات البلاد مما كان سيكفينا شر القتال وشر غناء مثل هذه الاغاني وكان يتفرغ الجيش لحماية حدود البلاد من اي اعتداء خارجي مثل الاعتداء على حلايب على سبيل المثال ولكن للاسف الانقلابات العسكرية وسيطرة الامن على كل مفاصل الدولة ونشر ثقافة عسكرة البلاد ادى بنا الى ما نحن عليه الان حتى اننا ربما ولا سمح الله قد نصل الى تقسيم البلاد .
واسمحي لي باستغلال بوستك هذا لنشر كلماتي المتواضعة هذه التي نشرتها من قبل في هذا المنبر.
كلا يا عساكر
دارفور يا أم الاكابر
ظلموك العساكر
منذ فجرك الباكر
لا مدارس لا مخافر
لا صهاريج ولا طناكر
لا مزارع لا مراعي ولا متاجر
بس حكومات العساكر تكابر
نسأل عن حقوقنا يقولوا كافر
بالقبلية والعنصرية تجاهر
وبمصلحة الوطن تقامر
وبمصير الامة تتاجر
****
كلا يا عساكر
اغلقتوا كل المنابر
أخرستوا كل الاكابر
بدهاء ماكر
شردتوا المناضل
وأكثرتوا السلاسل
هدمتوا الاساس
كتمتوا الانفاس
وبدون إحساس
قتلتوا الناس
جثمتوا على الصدور
ملأتوا القبور
سكنتوا القصور
حرقتوا البخور
فرحا وسرور
جورا وغرور
****
كلا يا عساكر
آن الاوان
فأذن الآذآن
ودقت الاجراس
فسمع الناس
أتاكم الطوفان
زلزال وبركان
فكيف الخلاص
عودوا إلى ثكناتكم
أحموا حدود بلادكم
كما فعل أجدادكم
و إلا
إذهبوا إلى الجحيم إلى النيران
لا جنان ولا حور حسان
****
يقول العساكر
ممنوع التفاكر
مسموح التآمر
تكذب تنافق تكابر
تبقى مواطن طاهر
زمن من يطلب الحق فيه كافر
زمن الدفاع عن الظلم فيه من الكبائر
****
كلا ياعساكر
درافور تباهي وتفاخر
بوحدة السودان لا تفاصل
من أجلو تجاهد وتقاتل
إلا عن حقوقها كمان تناضل
لا تهابي ولا تجامل
تذهب لكل المحافل
تحاور تفاوض ولا تجادل
عن إرثها تطالب
برغم وحشية الاسود ومكر الثعالب
فستنزع حقوقها من بين المخالب
كلمات : عبدالعظيم عبدالله
[email protected]
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: gamal elsadig)
|
الاكرم جمال حسين
Quote: إذا هي دعوة جادة لدراسة اغاني البنات بصورة عامة
والتي لها ارتباط (بالجيش ...الخ ) مثل التي اوردتيها |
عليك نور ..نعم دى فكرتى بس هنا عايزة نتطرق بالدراسة والشرح والتحليل للاغنيات التى تمجد الجيش وقوات الامن والشرطة بمختلف جهاتها..الشريحة دى خاصة وليس كل اغانى البنات بمختلف موضوعاتها..
Quote: في الغالب مثل هذه الاغاني لا يكون لها مؤلف معروف وقد
يكون لها اكثر من مؤلف بحكم الاضافة اليها حسب الحوجة |
يكون ليها اكثر من مؤلف ممكن ..لكن لو ماليها مؤلف تكون القالها منو يعنى ؟!! لابد من ان وراء هذه الاغنيات بشر ما..
ولك ملايين التحايا
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: هشام هباني)
|
الاكرم هشام هبانى
| Quote: الاغنية دي كلها كوم لكن حكاية يوسف كوة دي قصتها شنو يا ناديةوهو الجيش ده كان بكاتل يوسف كوة براهو وين التجمع ووين الحركة الشعبية والاسود الحرة والعدل والمساواة ولا تحرير السودان |
اها الكلام ده ممكن يجاوب عليهو اتنين اما مؤلف الاغنية المامعروف او الناطق الرسمى باسم التجمع وهو الحمد لله عضو معانا فى المنبر ..
| Quote: والكلام ده بزعل اهلنا النوبة وخصوصا اختنا العزيزة نور تاور وليك سلام . |
نور تاور اختنا العاقلة المكملة ورزينة تزعل منى انا ؟!!
الله مازعل منى زول فى الدنيا يارب!!
اها نور ممكن تزعل من هاجر كباشى او مؤلف الاغنية انا مالى ذنب!!!
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: نادية عثمان)
|
الرائعة كالعادة نادية
فى البدء تملكتنى دهشة شديدة عندما قرأت عنوان البوست لاول وهلة
فقررت الدخول فيه
وما ان دلفت داخله حتى وجدتك كما احببت ان تكونى
دعينى استاذنك فى الرد على البوست من خلال عدم التمحور حول النص الذى اوردته
بمعنى آخر اود ان اخذ لغط هاجر كباشى هذا كنموذج لحالة عامة بدأت تزدهر وتاخذ رواجها فى الساحة الغنائية السودانية
المتابع لهذه الساحة حتمآ سيلاحظ ان الغالب الاعم من الغناء اصبح على الشاكلة محور البوست
ولعلها ابرز ازمات الفن السودانى المعاصر التى لا أرى لها سببآ سوى انحدار مستوى الذوق العام وخصوصآ فى اوساط الشباب
بالرغم من ان حواء الابداع السودانى ما زالت ولودآ
وهى ما زالت تنجب النماذج المبدعة والتى يحق لنا ان نفخر بها
ولكن الخارطة السودانية عامة ومنذ امد اصبحت تجافى كل ما هو موضوعى فى شتى مناحى الفعالية الانسانية
واعتقد جازمآ ان للسلطة السياسية دور فى هذا
فمنذ استيلاء الاسلامويين على السلطة فى البلاد ومع بدايات حكمهم ما لبسوا ان حاربوا كل ما هو عداهم لا سيما المبدعين
فبدأوا بسن القوانين المقيدة لحرية العمل الابداعى عامة فى الطريق لاقرار مشروعهم للتمكين
التمكين الذى كانوا يقصدون منه التمكين السياسى لخطاب وطريقة تفكير مرتزقة هذا النظام
وبالفعل فقد نجحوا فى مشروعهم هذا حتى اضحت ابرز ملامحه هى تفريغ الوعى لدى الشعب السودانى قاطبة ولدى مبدعيه ومثقفيه على اعتبار انهم الوجدان النابض لهذا الشعب
فى اطار حملتهم هذه ومن خلال منهج البراجماتيزم الذى انتهجوه كان لابد لهم من فرض انماط اخرة لتحل بديلا عن هذا الذى هم بصدد اقتلاعه فكانت هاجر كباشى وامثالها
وليس غريبآ بعد كل الذى تقدم ذكره ان تتقرب نماذج الفجاجة هذه من السلطة بالغناء للجهات التى تمثل عضد السلطة وسندها اى الجيش
هكذا اصبحت الحالة بفضل رؤية شيوخ الزيف والضلال اهل السلطة الحاكمة
فتحول الوطن اجمعه من النقيض الى النقيض
حتى اصبحت اغانى البنات كما نطلق عليها فى السودان الى الشاكلة التى تفضلتى بايرادها فى هذا البوست
واذا اردنا المقارنة فشتان ما بين حواء السودانية التى تغنت ب...
ما دايرالك الميتة ام رمادآ شح
دايراك يوم لقا بى دميك تتوشح
الميت مسولب والعجاج يكتح
أحى يا على سيفك بسوى التح
شتان ما بين حواء التى نعرفها ونعتز بها وبين حواء النظام .. امثال هاجر كباشى
ولى عودة فى نموذج آخر باذن الله
تحياتى
وائل عبدالخالق
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: wail malik)
|
العزيز وائل عبد الخالق
شكرا جميلا على المداخلة الهادفة الثرة وبالتأكيد سننتظر منك المزيد المفيد
Quote: ما دايرالك الميتة ام رمادآ شح
دايراك يوم لقا بى دميك تتوشح
الميت مسولب والعجاج يكتح
أحى يا على سيفك بسوى التح |
نعم شتان بين هذا وتلك..ولكن الم نتفق ان لكل مرحلة افرازاتها السلبية ..بمعنى ان ماقيل فى الفترة التى كتب فيها هذا الكلام الراقى الحماسى الجميل ..لامجال لقوله الان اذا كانت الحكومات الشمولية قد قتلت مكامن الابداع فى الناس ..فاذا كانت هاجر كباشى ابنة لهذه المرحلة فماالذى كان يمكن ان تتغنى به سوى هذه الاغنيات ..؟!!
وهل اذا تغنت هاجر ب(مادايرالك الميتة ام رمادا شح) ستجد هذا الجمهور الكثيف الذى يلاحق حفلاتها الان ؟!!
| Quote: شتان ما بين حواء التى نعرفها ونعتز بها وبين حواء النظام .. امثال هاجر كباشى |
هل ترى ان الفنانة هاجر كباشى فنانة منظمة سياسيا وتعنى تماما ماتقوله فى اغنياتها الموسومة اصلا بالهابطة ؟!!
| Quote: ولى عودة فى نموذج آخر باذن الله |
مرورك يسعدنى دوما ياوائل ..فكن قريبا دوما .
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: نادية عثمان)
|
ميلاد امرأة فى الزمن الصعب
اقترح عليك ان يكون هذا عنوان ديوانك القادم
حاولى ان تكتبى فيه عن بت عثمان نادية التى كل ما طالعنا بوستآ لها ذادت عظمة حواء عندنا
لا أجد نفسى اختلف معك البتة
ولكن ليس بالضرورة ان تكون هاجر كباشى منظمة سياسيآ
لانه طالما انها تصب فى خانة من يخدمون مصلحة النظام فهى بالضرورة جزء من نسيجه البالى
هل جماعات الاسلمة العصابية منظمون بالجبهة ؟ لا
ولكنهم جزء من نسيجه
هل كان بن لادن منهم؟ لا
ولكنه ثبت اركانهم لما يزيد عن نصف عقد من الزمان
هل كان صدام او جميع فرق الاستعراب الاعتباطى هذه منظمون سياسيآ لدى النظام؟ لا
ولكنهم جميعآ خدموا مصالح النظام
سواء كان كل الذين تقدم ذكرهم فعلوا ما فعلوه عن قصد او عن غير قصد
فالمحصلة النهائية واحدة
مزيد من التهتك الاجتماعى .. مزيد من حالة الهبوط العام
ومزيد من تفريغ الوعى الجماهيرى
غير انى قد اجد للساة السياسيين الذين اسلفت ذكرهم بعضآ من العذر على اعتبار السياسة
ولكنى لا استطيع ان اجد للفنان عذرآ فى هبوطه
الفن اما ان يخدم قضية عبر المضون الفنى للنص
او ان يهزم هذه القضية عبر نفس المضمون
ولى عودة فى موضوع فنى ساخن
اتوقع ان اعرف رايك فيه بصراحة
واتمنى ان يكون داعمآ
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: نادية عثمان)
|
اها يا نادية خليك من الجياشة ديل ....
عندنا هنا مطربة إسمها مريم عضلات بتغني غنية بتقول ...
أووب علي من ناس النظام طبنجة ورا والقاش قدام ..
دي طبعا بتغنيها لي ناس النظام العام لمن الساعة تفوت حداشر ولمن يجوا كابسين الحفلة هي بتقوم تغني الغنية دي ليهم .. هم طوالي يقوم قلبهم يموت وينسوا الشغلة الهم جو عشانا .. طوالي يطلعوا القاشات ويقعدوا يبشروا ليها ولي ناس الحفلة ويتعشوا ويدوروا عربيتم ويتخارجوا ..
واحد من أصحابي حضر المنظر إتأسف وقال .. هييييييه حتى مريم ركبت موجة الغناء للأنظمة 
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: ست البنات)
|
سلام عليك يانادية من الخرطوم بحري
وحاليا أنا في مقهي نت في شارعكم وكنت قبلها مع حاج عثمان مختار وكلهم بخير بس أرسلي الأقراص بتاعتو اللي خلصت
أما عن جياشه ووب عليكي .. فهذه ياستي من سنة حفروا البحر
حاليا الموضة أغنية في الحفلات وتتحدث عن الراحل عوض دكام .. ولكن في سياق الأغنية فقط .. ومش عن شخصيته - الله يرحمه ويحسن إليه
كلااااااام يا عوض دكام
السيرة لي قدام ياعوض دكام
والحفلة الليلة تمام ياعوض دكام
مدني بس ساعتين ياعوض دكام
وسندة في الكاملين ياعوض دكام
والعسل قدام ياعوض دكام
إلي آخرها
وشايف عمرو عامل لينا بيها خوتة في البيت عندما يعود من الجامعة
تحياتي
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: ست البنات)
|
ست البنات..
السمحة يا ست البنات
يا ستنا .. يا ستنا
صابر معاك
صبرا طويل
كاتم العليْ
أصلو العليْ ما مرّ يوم بخيال بشر
إن قلتي قيس
والله قيس بالنسبة لي
لا ضاق عزاب لا شاف ألم
لا قاسا مُر
***
من كم سنة؟
يا ستنا؟
من كم سنة؟
ما قلتي لي
أخبارك أيه؟
مالك مشيت من حيّنا؟
ولا جيتي مارّة علينا يوم
زرتينا يا جارة الهنا
ولا قلتي يوم
أسأل عليهو
الزول قريبنا ومننا
***
مخلوقة إنتي تعيشي فوق
وتكوني فوق
ما جنبنا
ما.. ست سماحة
وست جمال
ما.. زي بناتنا
وزيّنا
تعبانة ليه؟
ما تسألي
مجبور عليك أسأل
أنا.
مع كل التقدير والاحترام
لا أعرف شاهر هذه الأغنية ولكنها للفنان الرائيع العطبراوي
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: ALGARADABI)
|
العزيز القردابى
Quote: الأخت نادية عثمان
كل يوم NEW LOOK
والله بالطريقة دى يوم تكتولى ليك زول.....
على العموم عينا بارده... |
بالنسبة للنيو لوك..والله لامتعمد ولاحاجة..كل الحكاية انى حاسة انى هنا مع سودانيين بحبهم وبعرفهم ومفروض يعرفونى برضو شكلا وموضوعا ..وياريت انت زاتك تخت صورتك كمان
Quote: بالله أبعدى من الموضوعات البتدخل التابوت دى..
لأنو لو توبتوك ..البورد حا يقفلو... |
لا خلاص ..الحمد لله التوابيت كلها اطلق سراح موتاها ودى كانت مرحلة وعدت ..
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: hanadi yousif)
|
نادية واللة ما عرفتك
تاني الجيش والعساكر
عموما قانون المصنفات الفنية القادم (أي اغنية ولا شعر فية كلمة عساكر ولا جيش حا ................ما عارف لكن حيتعب.
انتي عارفة ناس الجيش لما يكون عندهم جكة بغنو شنو
(عليك النبي كان تجري التوب الدنيا صقط خلي عندك زوق )
(الدنيا كوارع جو جو والعيش في الشارع جو جو )
وبعد شوية يقوم واحد يكورك (ورررررررررررررررررررررر).
طبعا عشان ما يفهمو دايما بقولو نصوص لا تغني ولا تسمن من فهم .
هسة عليك اللة فهمتي حاجة.
تاني ما تكرريها
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: hanadi yousif)
|
انا ماشة الرئاسة..دى مكانة حساسة..احب الامن كلو ..بوليس ..سجون ..جياشة !!
جياشة
جياشة
اوب على انا
جياشة
والجيش
نقلوا
فتاشة
اوب على انا
ده جيشنا جيش القوة اوب على انا
دخل الجبال جوة
اوب على انا
دخل الجبال جوة
ده الحارب يوسف كوة
ياعينى انا
ماعرفو
ماعرفوا
اوب على انا
ماعرفو
دبورى
بى طايقتو
اوب على انا
انا ماشة الرئاسة
اوب على انا
دى مكانة حساسة
اوب على انا
احب الامن كلو
بوليس
سجون
جياشة
اوب على انا
بالأخضر
بالاخضر
اوب على انا
بالاخضر
الجيش نقلوه المعسكر
اوب على انا
ماعرفو
ماعرفو
ده مجدى فى دوريتو
اوب على انا
برى
برى
برى
باللبنى
باللبنى
ياعينيا
حبيب نقلو ود مدنى
اوب على انا
جياشة
جياشة
اوب على
انا
جياشة
والجيش
نقلو فتاشة
اوب علينا
.....
.....
اها رايكم شنو
بالصوت كمان
.....
.....
نادية الحساب كتر
واللا اقوليك ....ما بيناتنا
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: الملك)
|
**** والكلام ده بزعل اهلنا النوبة وخصوصا اختنا العزيزة نور تاور وليك سلام .
*******
نادية سلامات تصدقي انا شايف العنوان وما خشيت قلت نادية دي قلبت ولا شنو ؟؟؟
والله يا هشام سبقتني نور فعلا مهمومة بقضايا اهلها العادلة لكن ما بتزعل من نادية عثمان لانو نور انسانة مثقفة وعاقلة جدا ودا البخلينا كل يوم نحترما مع انو انا شخصيا مقصر معاها وهي عارفة واتمنى انها تكون متفهمة وربنا يرجعا المنبر كما كانت كانت في سفر ما عارف رجعت واستقرت ولا لسه
انتي يا نادية كل صورة بشكل ولا شنو
| |
|
|
|
|
|
|
|
|
 Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: محمد حسن العمدة)
|
الأخت الظريفة نادية .. ســـــلام
هذا اللقاء من صحيفة الرأى العام السودانية
أتمنى ألا يكون خارج الجو العام للبوست
حنان بلوبلو ترفض وصف غنائها بالهابط
الرقص هوايتى: ما فى زول بغنى زى الصنم..!
حاورتها: ماجدة حسن
وصفها كمال ترباس بأنها الفنانة الاستعراضية التى لم ينجب السودان مثلها. واشاد بها الفنان الكبير محمد وردى، وخاصة جمعها بين الرقص والغناء.
ومثل الكثيرات من رائدات الفن السودانى، لم تجد حنان بلوبلو طريقها إلى النجاح سالكا . فقد كان عليها ان تغالب الظروف غير المواتية لعشرين عاماً من أجل أن تحقق الرغبة التى لازمتها منذ الصغر، أن تكون فنانة. أن تحقق ذاتها. وأن تجد الاعتراف من المجتمع بدورها ورسالتها كمبدعة، فى قاعدة واسعة من جمهور المعجبين.. على مشارف العقد الثالث من عمرها الفنى، المديد باذن الله، تلقى حنان بلوبلو، عبر الحوار التالى، ضوءاً على مسيرتها الفنية، وآفاقها..
* بداية نريد أن نعرف متى إتجهت للغناء واول حفل ظهرت فيه وأول أجر لك..
- بدايتى كانت مع جنة الأطفال عبر الاناشيد ومن ثم إنتقلت إلى مركز شباب امدرمان عام 86 وبعد ذلك إتجهت للغناء فى الاعراس والمناسبات وأول شريط قمت بتسجيله كان «حمادة دا» وفى ذلك الزمن لم تكن شركات الانتاج متوافرة لذا طلبت منى شركة سارة تسجيله لها وكانت الاشرطة تسجل من المناسبات، كما شاركت فى العديد من الحفلات فى الحدائق ودور السينما، كما غنيت فى الاقاليم وأول أجر تلقيته كان عشرة آلاف جنيه سنة 86.
* لا شك أن هناك العديد من الصعوبات التى واجهتك نريد أن نقف معك على أطرف واحرج موقف مرَّ بك..؟
- أهم المشاكل التى واجهتني هى عدم موافقة أهلى على غنائى .. فمنذ الصغر كنت أحلم بأن أكون فنانة وأصررت على ما أريد.. والمواقف المحرجة التى واجهتها كثيرة خصوصاً وان الفن في تلك الفترة كان مرتبطاً بالاستعراض، لذا واجهت بعض المشاكل ففكرة أن تغنى البنت فى المسارح والحدائق كانت مرفوضة.
* من من الفنانين تعاونوا معك وتأثرت بهم؟
- في البداية وقف معى الفنان كمال ترباس الذى يعتبر بمثابة اب للاسرة وكانت له وقفة قوية واضحة خلال مسيرتى الغنائية، كما وقفت معي العديد من الاقلام التى ساعدتنى حتى أحقق النجاح كما ان جميع الفنانين لم يقصروا معى وكانت لهم مواقف جيدة تجاهى.
* إشتهرت بلوبلو بغناء البنات لماذ لم تتجهى لأغانى أكبر وهل هناك شعراء معروفون يكتبون لك و هل يوجد ملحنون..؟
-يظهر عليها الانفعال وتقول انا ظهرت منذ البداية بغناء البنات وهذا لا يعنى انى لا يمكن أن أغنى أغانى أكبر او يكون لى شعراء وملحنون كتب لى المرحوم عوض جبريل (لى ايام ما بيلاقينى) واسامة بريش (مرة زورنا) والتيجانى حاج موسى (خلاص سيبنى وانسانى) وعبد اللطيف خضر (تتغابى فينا العرفة).
- مقاطعة- رغم ما ذكرت.. لكنه لا يعدو كونها أغاني بنات حتي من اسمائها..
-يزداد انفعالها.. (لى ايام ما بيلاقينى) مسجلة بالاذاعة كعمل كبير..
* لماذا لا تسجل لك الاذاعة الآن.. هل هناك ما يمنع؟
لم أسجل عبر الاذاعة لان الاغانى العاطفية كانت موقوفة (بحدة) الاذاعة ما عندها معاى اىة مشكلة.. وصوتى مجاز ومن حقى كمواطنة سودانية صوتها مجاز أن تسجل لى.
* بلو بلو إشتهرت بالرقص فهل أنت راقصة أم مغنية..؟
- أنا في الأصل مغنية.. وسبب شهرتى ليس الرقص لان الكاسيت ليس به رقص والكاسيت هو سبب شهرتى الحقيقىة ورغم ذلك تركت الرقص، ولا زلت ومنذ سنين شغلت بالبيت والاولاد وتركت الرقص فظروفي الحالية تختلف عن السالف كنت أقابل الشعراء والملحنين أم الآن فلا أعرف ما يدور في مجال الرقص..
* هل هناك اسباب وراء الرقص..؟
- بانفعال- انا في الاصل كنت علامة عرائس والآن لو جاءتني عروس سوف اعلمها فالرقص هوايتى ولا أظن فى ذلك عيب وتركته الآن لأن توجه البلاد لا يسمح به، كما أن لى اولاداً وبنات أصبحوا كباراً وفى مثل ظروفى هذه فان ذلك سيعتبر طيشاً.
* لماذا إخترت الجمع بين الرقص والغناء دائماً..؟
-تأخذ نفساً عميقاً... أنا ظروفى «جات كده» وهذا ما رأيته.. عبر التلفزيونات والفضائيات فالجمع بين الرقص والغناء فن و«ما فى زول بيغنى زى الصنم» تنفعل.. ما حنان براها كل العالم برقص وبغنى واحياناً الناس لا يفهمون الغناء وإنما تحركهم الموسيقى والايقاع فيرقصون.
*هل هناك رقصات معينة كنت تؤديها ومن هو مصممها..؟
- أولاً انا أصمم رقصاتى بنفسى ولا أحد يساعدنى لأن الرقص في الاصل موهبة.. والاغانى التى أؤديها هى دائماً اغانى راقصة وهو الرقص المعروف في البلد، التم تم والسيرة وكلها رقصات معروفة..
* كيف كانت استجابة المجتمع لرقص وغناء حنان بلوبلو؟
- وجدت قبولاً كبيراً من الجمهور.. مما جعلني أتقدم أكثر وأكثر رغم الصعوبات والموانع التى قابلتها.. إلاًّ ان التجاوب الكبير انسانى كل شئ وكنت عندما أضع شيئاً فى رأسى أقوم بتنفيذه ورغم صغر سنى فعلت ما أريد.. فأنا كما قلت بدأت من العاشرة ولم أتقاعس حتى وصلت إلى ما اريد. ولم اخف من أىة تجربة..
* أين انت من تجربة البلابل..؟
- أنا اختلف كثيراً عن البلابل لأني أميل الى غناء البنات واحب غناء البنات والمستمع عرفنى بأغاني البنات فعندما أغنى أغانى كبيرة يقابلها الجمهور ببرود لأنهم لا يريدون ذلك، وما أن انتقل إلى اغاني التم تم حتى يعودوا للتجاوب معى.. وليس من السهل أن أنقل الناس وأغير فكرتهم عن أغنياتى.
*لماذا لم تتأثرى بما يجرى بساحة الغناء وتغنى أغانى الفنانين؟
- الاغانى الخفيفة مطلوبة وكذلك الايقاع السريع ونحن فى عصر السرعة وانا أستمع الى أغاني الفنانين الكبار وأحبها ولا أغنيها حتي لا اشوهها كما يحدث الآن ويستحسن أن اكون حيث انا واغني اغانى البنات.
* ما هى اكثر اشرطتك نجاحاً..؟
- (حمادة دا) و(حب العنب) وأنا أعتبر جميع اشرطتى ناجحة ومرغوبة.. لأن اغاني البنات خفيفة وسريعة ومطلوبة جداً.
* هل لك تجربة فى تأليف الأغانى مثل الفلاتية مثلا..؟
- وترد بثقة أنا أؤلف أغانى وأشهرها «يمه زولي ما جا» واستطيع التأليف أثناء اللحن وذلك بإدخال بعض الجمل وعادة أزيد والزيادة فى أغانى البنات شئ عادى ولكنى لم أجرب التلحين ولكن التأليف دخلته.
* من من الفنانات فى الساحة لفت نظرك.. ؟
- تبتسم - الساحة مليئة بالمغنيات وكل واحدة لها قاعدتها وجمهورها واسلوبها.
* هل يمكن ان نقول أن بينكن تعاوناً..؟
- نعم نحن نتعاون وهناك تعاون كبير بيننا فعندما نجلس سوية كل واحدة تسهم بكلمة إلى أن تكتمل أغنية ونعطيها لأحسن من تؤديها أو تطلبها..
* من من الفنانات لفتت إنتباهك؟
- سميرة دنيا.. صوتها قوى جداً وهذه حقيقة لا أنكرها فدائماً تذكرنى بعائشة الفلاتية والفن الأصيل، فسميرة «بإعجاب» اجادت أغانى الفنانين عندما أدتها بصوتها. وعلى العموم جميعهن اخواتى وصديقاتى واتمنى لهن التوفيق.
* خلال عشرين عاماً لم تشاركى فى حفلات بالخارج لماذا..؟
بالعكس.. انا شاركت كثيراً بالخارج بواسطة المتعهدين وأحييت العديد من الحفلات الخارجية ولى جمهور وقاعدة بالخارج «كويسة جداً».
* انت مقلة فى الظهور في التلفزيون لحد الغياب.. لماذا..؟
- تجلس بانتباه.. في الحقيقة ليست لدى أىة مشاكل مع التلفزيون وفى وقت قريب سجلت لتلفزيون ولاية الخرطوم وكثيراً ما يستضيفنى ولكن لا أدرى لماذا يقاطعنى التلفزيون القومى..
* رغم ما تدافعين به عن نفسك إلاَّ ان غناءك يوصف دائماً بالهابط..
- هابط -باستغراب- «حنانة» «ود الغرب» و«الجيش سلاح» دى فيها شنو..؟ وأنا لا أراه هابطاً .. والآن انا اسمع اغانى أستاء منها وانا كنت أعبر «بوصفات» من المجتمع ونداءات ليس فيها عيب.
*رغم وصفه بالهابط إلا أن الناس يقبلون عليه بكثرة.. ما رأىك؟
- لانهم يميلون للأعمال الخفيفة وهذه الأغانى تمتاز بالخفة والايقاع السريع مطلوب..
*تجربة الثنائيات ماذا أضافت لك..؟
سجلت مع محمود عبد العزيز وفرفور وقدورة وهذه ثنائية عبر الشريط لأنى لا اقابلهم أنما تطلبنى الشركة لاسجل بصوتى فقط، كل فنان يسجل لوحده وتقوم الشركة بالباقى، على العموم التسجيل معهم كان شيئاً جميلاً وإستفدت منه كثيراً ولن أندم عليه.
* هل لديك جديد الآن..؟
- الآن الغناء موجود ومن المفترض تقديمه للجمهور منذ رمضان الماضى ولكن لظروف خاصة توقفت لكن سوف أباشر العمل وقريباً سوف يرى النور
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: hanadi yousif)
|
الغالية هنادى يوسف
Quote: الكاكي لون جميل ياناس لبسوه حمير
لكن معليش ياحليل الجيش
الجيش دا زمان ياناس
جرى جرى ود المراة
لابس كاي وجرى جرى
والكاكي ما كاكي جرى جرى |
عارفة ..انا كنت بزعل جدا من حكاية الكاكى جميل لابسينو حمير دى !! لانو فيها ظلم والله لعساكر كتير شرفاء قدموا حياتهم فداء للوطن الجميل ده..
| Quote: هل العسكر الذين تربو في الجيش الوطني بيجروا؟ ام الجروا ديل ناس كشوهم من السوق ؟ |
يكونوا ديل قوات الاحتياطى المركزى بيفرقوا فى مظاهرات ولاحاجة !!
| |
|
|
|
|
|
|
|
|
 Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: Agab)
|
الاستاذه الرائعة / نادية
لك التحية باعتباري متداخل جديد لنج ،، أولاً تناولك لهذا الموضوع فيه الكثير من الأريحية للبورداب يعني بالعربي فيه متنفس لحالات الاحتقان السياسي ،، ومثل هذا النوع من الغناء (البناتي) قديم من زمن مهيرة بس ما كان في ناس أمن زي الوقت الراهن ثم جاءت المبدعة الراحلة عائشة الفلاتية التي لم تكتفي بأداء الغناء الحماسي الذي يشجع المقاتلين في الحفلات والأماكن العامة بل ذهب بها الحماس لأن تذهب إلى جبهات القتال في كرن لبث الحماس في نفوس المقاتلين الأشاوس ( يجو عايدين انشا الله عيدين يا الله والفتحو كرن بينين ياالله) ( الله ليا الليمون سقايتو عليا ياحاجه لا )
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: عبدالرحمن عبدالله أبوشيبة)
|
الاكرم عبد الرحمن عبد الله ابو شيبة
اهلا بيك ونورت المنبر
| Quote: ومثل هذا النوع من الغناء (البناتي) قديم من زمن مهيرة بس ما كان في ناس أمن زي الوقت الراهن ثم جاءت المبدعة الراحلة عائشة الفلاتية التي لم تكتفي بأداء الغناء الحماسي الذي يشجع المقاتلين في الحفلات والأماكن العامة بل ذهب بها الحماس لأن تذهب إلى جبهات القتال في كرن لبث الحماس في نفوس المقاتلين الأشاوس ( يجو عايدين انشا الله عيدين يا الله والفتحو كرن بينين ياالله) ( الله ليا الليمون سقايتو عليا ياحاجه لا ) |
معنى الكلام ده انو هاجر كباشى براءة ياجماعة
الزولة جات لقت اغنية بغنوها الناس للجيش الزمااااااااااااااان .. وفى ناس بس عملوا ليها شوية تغييرات تواكب المرحلة الراهنة ، والمستجدات الحالية ..
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: نادية عثمان)
|
(انا لاحظت حاجة فيك
انك مرات بترمى الكلام زى الطوب كده وعشان كده فى ناس فى المنبر بيزهجو من مداخلاتك )
نادية سلام يالحبيبة ومشتاقين والله ،
المقتطع ده للتوثيق ساكت !
والله هاجر كباشى صوتها جميل ومبالغة ! ( بعيدا عن كلمات الأغنية )
وعلى ذكر المرحومة عائشة الفلاتية :
الله ليى الليمون
سلامة برية يا حاجة لا
الله ليى يا هتلر الألمانى
الله ليى موسيلينى يا الأيطالى
الله ليى كان تضرب السودانى
تطلع قرش برانى ما يسير هنا
الله ليى موسيلينى قالوا أسير
الله ليى ربطوهو بالجنزير
الله ليى ختوهو فى الراكوبة
وتقرصو الباعوضة ما يحكها
الله ليى جاهل صغير وحمامة
الله ليى يوم لبسو الكمامة
الله ليى ودوهو خشم القربة
يا الله عودة سلامة للعاصمة
الله ليى فى البحر غواصات
الله ليى فى البر دبابات
الله ليى
فى البحر غواصات
فى البر دبابات مجنزرة
الله ليى طيارة جات بى فوق
الله ليى شايلة القنابل روق
الله ليى جات تضرب الخرطوم
كتلت حمار كلتوم ست اللبن
الله ليى الليمون
سقايتو عليى يا حاجة لا
---
ست البنات .
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: نادية عثمان)
|
هاجر فنانة موهوبةولكن لم توفق في حارب يوسف كوة لانهاببساطة ماعارفة من هو يوسف المناضل الجسور المقاتل الصلب اما التانية ندي القلعة غني وكلمات وشعرا وحلاوة وجيها وانا كان عرست مابجيبة عشان ما تمسخ علي العروسةاغاني البنات اغاني معبرة ودة تراثنا ونحن نفتخر بة وهو لونية خاصة بنا وليست هابطة كما هناك غني الحماسة والحقيبة الطمبور والنقارة الخ..وهناك مثلا دي كدي صنفوها لي يعني علي وزن اغنية الحب الطاهر
الجوع الكافر بي ورا الافران انا وحدي بدافر
والجوع علي بطني ياحبايب ظاهر
هووى اسبابي الجوع الكافر
لو عايز تشبع ويبقي عيشك وافر
بس قوم النجمة وزي حرامي تدافر
طويلة ولكن نكتفي واوعي تقولوا حلمنتيش
لانها عبر عن ازمة الدقيق في السودان
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: نادية عثمان)
|
الموضوع شيق والعنوان رائع حد الدهشة وملئ بالحس الصحفي والإثارة الإعلامية على شاكلة لا تقرأ هذا الخبر.
إبتداء فلتسمح لي كاتبة المقال أولا تسمح بأن أخرج عن الموضوع ممارساً هوايتي المفضلة بأن أكتب في الهامش أو أترك الحمار وأتشعبط بالبردعة كما ذكر في زمان سابق أخونا الدكتور أبكر آدم إسماعيل وهو ما صنفه بعض أهل الخبرة والعلم بما يعرف بالتفرع الشجري ، أو التنطيط مثل حملان الخريف.
لست ناقداً ولا باحثاً فكلاهما فضل لا أدعيه وإن كنت أتمناه وأعجز عن الوصول إليه بعد أن أخذت أم أحمد وإخوته قسمتهم كاملة غير منقوصة في ثروتي وسلطتي وأنا على قيد الحياة فأصبحت لا أملك من الوقت ما يكفيني حتى لأخذ دقسة أو نومة متقطعة تشابه في كثير من جوانبها نوم الديك في الحبل.
أغاني البنات في تقديري المتواضع تنبع من صميم الواقع وهي عادة ما تنتشر بسرعة لسهولتها وبساطتها ومعانيها القريبة والبعيدة وهي تحمل الكثير من البلاغة في معانيها بما تحمله من تورية تقتضيها ظروف المجتمع وما تفرضه العادات والتقاليد من حدود لا يجب تجاوزها ، ولكن برغم هي – أغاني البنات – تمارس تحايلاً خفي على كل الأعراف والتقاليد في المجتمع وتقفز قفزاً مشروعاً فوق كل الحواجز.
ورأي المتواضع أيضاً يضع أغاني البنات ويصنفها في خانة الفن الرائع الجميل لأنها وببساطة تضع الواقع أمامنا بكل تجرد وشفافية وصدق وتخاطب الجميع بلغة بسيطة يصحبها إيقاع وأنغام جميلة تزيد كلمات الأغنية بعداً آخر يجعلها أكثر جاذبية. فإن كان هناك هبوط أو وضاعة في معانيها فهذا مرده للواقع لأنها مرآة تعكس واقع المجتمع.
مصيبتني أن أنعم الله على بداء النسيان فلا أحفظ إلا قليلا ، كنت أسمع أغاني تمجد على سبيل المثال الإغتراب ووضع المغترب وبعد حين من الدهر تدهور فيه الكثير من أحوال المغترب فكانت أن إنقلبت الأغنية من المدح إلى القدح محاكية الواقع المعاش لهذه الشريحة ، والحال كذلك بالنسبة للكثير من الأمور المتأرجحة بين القمة والقاع.
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: almulaomar)
|
الأخت نادية، والجميع,,, تحية لكم... أولّ حاجة بصراحة أعجبتني مداخلة الأخ العزيز مولانا الملا عمر السابقة!!.. بالنسبة لموضوع بوستك؛؛ في الحقيقة في أغاني كتيرة بتمجد في الجيش السوداني، وأحد الأخوة أيضا أشار للراحلة عشة الفلاتية التي غنت لهم في معسكراتهم،،، ول(جيشنا جيش الهنا!!)؛؛ وطبعا كلنا (تربية دكتاتورية وشمولية وعسكرية)... وعلى ضوء نكتة الأخ ست البنات عن ال (دياشي المستفيد) فالآن أغلب الأمهات تتمنى لو ولدها يطلع ضابط ( وكمان يعمل إنقلاب)،، سبق أن أنزلت أنا قصة للكاتب الراحل زهاء الطاهر بهذا المعنى تتحدث عن أهل أحد الضباط الذين يلومون في أبنهم لأنو ( ما عمل ليهم إنقلاب ليرفع رأسهم بين القبائل!!)... وهناك برضو فنانين كباااار غنوا للجيش وبسالته؛ ولكن ببساطة: هو جيشنا دا من الله خلق الدنيا بحارب في منو؟؟ الإجابة: في السودان والسودانيين،،، سواء كانوا يوسف كوة أو غيره...من جهة تانية: أنا بالنسبة لي كل أغاني البنات التي لا تحمل مضمونا معينا أعتبرها من نوع ( كلام الزبير في الطير) يعني دي ال(ماشة الرئاسة) مثلها مثل: قالوا أمو حنكوشة وبتتكلم بي رموشا الخ... يعني بسمع ليها وتعجبني أحيانا طرافة كلماتها، لكنها لا تحرّك في شي مثل ما تفعل أغاني (وطنية) أخرى مثل ( يا الإصرارك سطرا سطرا ملا كراسك)،، أو أغاني عادية ولكن راقية مثل كل أغاني كبار الفنانين عندنا... لكي الود وربما أعود...
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: نادية عثمان)
|
الاخت نادية سلامات عوافى ..
انا عموما ما عندى راى فى انة الغنا يكون للجيش ولا لغيرة لانة اتخيل لى
الغنا دة قديم وما مربوط بجيش الانقاز وعلى ما اعتقد انها كانت اغانى
يرددها العساكر داخل مراكز تدريبهم ثم انتقلت للشارع العام .. المهم
فى الموضوع انة المدح بصورة عامة ما فيه هبوط للذوق الهبوط بيكون فى
العبارات الواصفة للمدح متبوعة بموسيقى محددة ممكن تؤدى الى (النبق ..
النبق .. او برى .. برى .. برى ) كما عند هاجر كباشى الان واتخيلها الان
مع كل قولة برى هنالك هزة كتف والشباب يصفر .. نمشى قدام شوية ..
غناء البنات عندنا فى السودان مربوط بايقاع زارى (الزار) وبتأليف
يكون حسب الايقاع دة وبرضو بقول انة تأليف وقتى لانة فى زاكرتى غناء
الحكامات فى فترة من الفترات وهو كان امتداد لية غناء البنات الان
يعنى الحكامة كانت كلو ما تشوف واحد واقف وجيب جلابيتو ملان طوالى
بتألف فية مقطع سريع ولو ما لحق دفع بيتحول المقطع من المدح للهجاء
السريع .. لكن البحيرنى انة بعد مرات بتكون فى غنية هابطة جدا فى
كلماتها بعد دة بتلقى الواحد مستمتع شديد بيها دة ما بيعنى انه هو
هابط ولا زوقة تعبان لكن فى ايقاع محدد مع كلام ممكن تضحك فية .. ديل
الاثين بيعملوا مسرحية احيانا قد تستمتع .. وغالبا ما يكون البنات
هسه داخل البوست مستمتعات جدا بالاغنية (بينى وبينك يانادية ما مستمتعة)
اما بالنسبة لانحطاط الاغانى .. دة كلام كتير .. لكن بقول الاتى
انة فى انحطاط عام فى كل شيئ غناء - كورة - صحافة - ثقافة - ......الخ
بالتالى دة بياثر فى الزوق العام ...
نتلاقى تانى
علاء الدين
| |
|
|
|
|
|
|
|
|
 Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: ala elfaki)
|
يا نادية عثمان
ما هى حكومة الجبهة ما كتلت الناس بى بنادق وبس..
ليها مليون نوع من انواع السلاح والاغنية دى واحدة منهم...
مالهم ومال يوسف كوة والراجل عمل العليه وقابل وجه كريم؟
مالهم ومال الناس الكتلوهم ما هو ريحهوم من عذابهم؟
فى شنو تانى؟!
اقل شئ الواحد يقوله فى الاغنية دى انها ساقطة
وخاصة اذا تخيلتى الحفلة والرقيص والعجاجة لى رب السما
والاجسام تتهز..
من المؤخرات الى مقدمات بن خلدون الى اليدين والرجلين
وهم فى حالة طرب ونشوة
يغنوا ويمجدوا فى الاجرام بتاع الجبهة..
ويا ربى نست الاعتداءات الجنسية بتاعة العساكر والامن والجياشة ليه؟
ما دى برضوا اميز صفاتهم البطولية!
قبحهم الله فردا فردا...
وانشا الله هاجر كباشى تموت...
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: nour tawir)
|
نادية
ما معقول
انا ما بحب الجيش
لكن اسمي مكتوب في الاغنية دي
إية رايكم يا جماعة لو سميناها الملحمة (ما قاصد الجزارة ) ملحمة الجيش
معقول ما في فرق بين هاشم صديق وونص جياشة المامعروف الكتبو منو ,اي زول ممكن يزيد فيهو بيت بيتين .يعني الفنان واحد وكوم بتاع شعراء معقول
تخريمـــــــــــــــة بسيطة
واحد هندي في السعودية داير يقول لي واحد سعودي (يا ود الحرام )ما عرف يعبر, فقام الهندي بي زعلتو دي و قال لية (انت ماما واحد لكن بابا كتييييييييييييير).
يا هو ديل
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: nour tawir)
|
الأخت نور تاور
أتفق معكي أختي أن جيشنا ليس هو الجيش الذي يجب أن نتغني له وكذلك النظام الحاكم فالحروب الأهلية ليست بطولات والحرب ليس فيها منتصر وأحسب أن كل من يقود أو يدخل حرباً يمكن تفاديها هو مجرم لا بطل ، مجرم في حق نفسه ومبادئه إن كانت له مبادئ وشعبه ووطنه.
الكثير من أغنياتنا هي فقط حشو وقص ولصق تتبعها موسيقى صاخبة تجبرك إما على الفرار أو الرقص على الحبال بطريقة يحسدك عليها أمهر لاعبي السيرك.
إهتزاز الأجسام من مقدمة إبن شيطون إلى مؤخرة السرادق في الحفلات هي شهادة نجاح للعمل الفني أياً كان ففي هذا الهرج والمرج أصدق معاني التفاعل حد تغييب العقل تماماً كما يحدث في حلقات الزار بدستور أولاد ماما أو دستورها الإنتقالي ، الكثير من الأغاني هي فقط لحن وصولات موسيقية وعزف منفرد. فأغنية على شاكلة ما أوردته أختنا نادية عثمان هي أفضل ألف مرة في نظر الكثيرين من أغاني كوكب الشرق و كاظم الساهر أو عبد الكريم الكابلي وماجده الرومي وفيروز
فالذي تطربه كلمات على شاكلة جياشه والجيش نقولو فتاشه بما فيها من دلاليك ومزازيك ربما نجد له العذر في عدم إدراك كلمات أغنية
هل رأى الحب سكاري مثلنا بآهاتها وأناتها وأنفاس مطربتها المتلاحقة متبوعة بصوت النأى والقانون
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: نادية عثمان)
|
الملاحظ هنا أن هذه الشاعرة أو الحكامة قد أغفلت عمداً حرس الصيد وناس السجون والآن ناس الجمارك بإعتبار أنهم عسس وفات عليها حرس الحدود وناس المطافي ، وأجد لها العذر حيث أن حرس الصيد يبيع الصيد والمحميات بحفنة من الدراهم والدنانير والريالات الخليجية وهم يعملون بما يتعلمونه من الخدمة في السلك العسكري والتي من أهم مبادئها حاميها حراميها بما يملكونه من منطق أعوج يري في الرشوة هدية وفي الإبتزاز حق. أها يجوك ناس المطافي وهم أيضاً من أمهر الناس في لعب الضمنه والسيجة بسبب عطالتهم المقنعة ، فقد أقسم أحدهم قسماً غليظاً في مجالس من مجالسنا المهتمة بتوافه الأمور أنه وخلال خدمته في هذا القطاع والتي إمتدت سنوات طوال لم يطفئ كوشة حتى ، ويمكن لهؤلاء النفر من القوم وبما يمتلكونه من خبرات جيدة في لعب السيجة والضمنة أن يمثلوا السودان في المحافل الدولية ويحرزوا لنا ميداليات في هذا المجال إذا فكرت الفيفا في إضافة مثل هذه الألعاب في الأولمبياد القادم.
أكتفي بهذا القدر حتى لا أخرب البوست وأخرجه عن مساره ويقيني بأنني فعلت .
النبق النبق النبق
هي ذات العبارات التي يختتم بها سيد الجردقة مواله وهو ينادي على بضاعته في زمان غابر لم نكن نعرف في شيبس البطل ولا تسالي
| |
|
|
|
|
|
|
|
|
|
Re: أنا ماشة الرئاسة..دى مكانة حساسة..أحب الأمن كلو ..بوليس ..سجون..جياشة !!! (Re: Abdulla Ageed)
|
الاخت ناديه ازيك
كيف ناس عين شمس
اغاني البنات دايما تميل لتمجيد الوظيفه او الوضع الاجتماعي البيكون سوقو حار ,,وهنا جاء الدياشه لما يمثلونه من سلطه ومن مركز اجتماعي واقتصادي يداعب احلام الكثير من الفتيات ,
وحتى في الفلكلور الشعبي نجد امثله كثيره لذلك ,, مثلا في فتره من الفترات كانوا بغنوا لي سواق اللوري ,, كباشي كان برضى ,, وغيرها ,, وفي فترات كان التمرجي ,,, وفي عصرنا بقو الجماعه ما بفرزو وبقى يقولوا لي سيد الكارو تعال بالشايلو ,,, بعد ما كان الغنا للمغترب ولي تاجر الغرب ,,
وربنا كريم
| |
|
|
|
|
|
|
| |
saif massad ali
عبدالعظيم عبدالله
ست البنات
هشام هباني
gamal elsadig
بلدى يا حبوب
ناذر محمد الخليفة
Abdulla Ageed
Abulbasha
ALGARADABI
hanadi yousif
مجدي شبندر
الملك
Agab
عبدالرحمن عبدالله أبوشيبة
Nour Kamil
samwal ebrahiem
قاسم المهداوى
بدرالدين كاجوري
mazin mustafa
ala elfaki
nour tawir
Marouf Sanad
فيس بوك
تويتر
انستقرام
يوتيوب
بنتيريست