|
|
 عودة حكـــايات زول (أشــتر) .. ومن سيربح المليون ؟؟
|
من سـيربح المليون
إنطلق الخبر في البلد زي النار في الهشيم وبقى في كل لسان .. الجاهل والراجل .. الشفع والحريم كلهم في (جورجي مرداحي) وما ليهم سيرة غير سيرة (علي ود حاجة نفيسة) قالو من غربتو في السعودية نادوهو ناس (التلفزيون) عشان يسوا معاهو (مسابقة) ويدوهو مليون ريال .. أتاري الدنيا ظلمتو في خليقتو جابتو يشبه (أم سيسي) علا دايره تعوضو (باقي الناس الشينين حظهم ضارب).. أهان (عركي سيد الدكان) قال : نان مليون ريال دي بي قروشنا القديمة وله بي قروشهم .. أكان بقت بي قروشنا كلها عشرة تالاف .. والله ولو من تعبه وجريها من بلد لي بلد .. قام شب فوقو (حسن الترزي) وقالو .. أزول البركة في منظرو ساي في التلفزيون (القروش تطير) .. وإن جيت لي القروش عليك أمان الله قالوا المليون ريال ليلتم تجيب شئ وشويات .. لكن بالظبطي كدي كم ماني خابره .. علا بتجيبلها لوري وتسوي كمينة طوب .. دحين مو بركة .. وسمعت قالوا تقضيلك العرس تب .. هو عليك الله إن بي القروش دي جاء وسوالو (طقم سنون) لي نفيسه أمو (تتمطق اليوم كلو بلا سنون زي البهم الكايس الرضاعة كدي) .. وإشترالو حماراً متعافي كدي لي (كارو) أبوهو بدل من حمارو (الجريبان) داك .. في أقل حمولة يبرك تب ومسافة يجرها أبوهو ومسافة يجرها الحمار وماتعرف البقول (حاو) للتاني منو ؟ .. وكمان لوهدم حيطة الجالوص دي سواها بالطوب وليسه أسمنت مو رحمة من الله .. غايتو ربنا يوفقو .. وإن بقي بدورلوا مشجعين ولا دلاليك ولا كان (كيتة) بنتفرجخ ليهو قدام (التلفزيون) ونشجعوا ما ينا ناسوا وقبيلتو ... نط (الريح سيد القش) قال : مني منو أكان لقى القريشات دي يجي يزرع أب عشرين ساي مع المطر ده .. ولا يسعالو بقرتين تلاته كدي وينتكي قدامن كدي في (عنفريب هباب) .. وقالو (كتر الرزق في السعية) ... أهان في نص كلام الجماعة جات ماره (ستنا ست الطعمية) قالت .. مو إنتو يا الرجال وكت تلقو القروش أول شي تفكرو في العرس (تدبلو) في نسوانكم يجازيكم الله .. علا جنا نفيسة شاطر بجيب القروش وبجي يشاور أمو وأخوانو أكان يسوي باظ في الحلة ولا حافلة في (الخرتوم) .. وأنا قاعد أسمع في كلامهم وساكت .. فجاءة (عركي) قطع سرحاني ده وقال لي .. إنت يا الأشتر ما تجرب (تدق) تلفون للزول الطيب ده ويمكن ينادوك يدوك شي تتم بيهو قرايتك ..باقي راسك المدوقس ده يمكن فيهو شيتن نافع .
في الحقيقة كلام (عركي) ده وقع لي طب .. وقلت في خاتري أسي علي ود نفيسة (الدلاهة) (الأفه الما بتلافة) ده أحسن مني في شنو ؟ وكان بدوهو مليون بس .. أنا بدوني (قدرو خمسة ) .. ونويت من أصل (الخرتوم) أقوم (أدق تلفون) لي (جورجي مورداحي) وأكمل فهمو تب .. وأطايبو وأكلمو بي ظروفي كلها وبي قرايتي .. وفعلاً من وصلت (الخرتوم) من السوق الشعبي إتصلت .. ورجعت كلمت ود عمي بالحاصل كلو وقلتلو .. الجماعة يمكن يتصلو عليك في موبايلك دحين خليك صاحي وأديني خبر .. وسكتنا على الكلام ده يومين .. أكان يوم يجي ودعمي طاير زي (ود أبرق) يصيح تلفون يا الأشتر من بره .. ختفت التلفون من يدو بسراع و أسمعلك الزول قال ( معك جورج قرداحي من محطة mbc من برنامج من سيربح المليون .. بدنا إياك تشرفنا وتجي لاعنا مشان تشارك في مسابأة من سيربح المليون) .. قلتلو .. مليون مليون ولا كلام ساي أقوم أجي لاعندكم تقولوا لي (الكمره الخفية) دحين .. أحلف طلاق .. أو قول (بركة النهار الحار وشيخي حسن نصار) أو قول (بركة الخلاوي وحنكوشناالهيثماوي) إنو الكلام ده صح .. قال لي ( خيو تأبر ألبي .. منجد أكلمك .. بنرسلك التذاكر على وكالة السفر .. وناطرك بالبرنامج إذا بتريد ) وقام قفل السماعة .. بالله قلبي قال شح .. ومخي قال تح .. وكرعي ماتن .. والموبايل وقع من يدي .. وود عمي يناضم فيني وأنا شايفو (رهاب رهاب) .. وبراحة كدي مشيت إتكرفست رقدت لي في نص سرير كدي بقيت زي (أس الأسود) ليل الكشتينة معنقل في النص .. وبقيت أتخيل لو جابوني في (التلفزيون) (شايل وردة في يدي ولا بس جلابية العيد) وقلت كدي وربحت المليون .. أسوي بيهو شنو ؟ لقيت إنو طموحاتي ممكن يحصل ليها (عسر هضم) و (تطرشق) عدييل من المبلغ الكبير ده .. الرياضيات القريته كلها ما إتعدينا فيها الرقم الستة أصفار.. يعني رويسي برضو ح (يطرشق) .. قعدت أحصر أحلامي وطموحاتي وأقصى حاجة ممكن أتخيله لقيت إنو أبعد طموحي .. إنو أكمل قرايتي .. وأشتري لي حافلة (25 راكب وتكون روزا بالأخص كده) في خط البلد (أكان جاتني ليلة القدر).. وأعرس (حنتوشتي) البريده وسيده ريدي وريدي سيده .. وأحجج أمي وأبوي (إن شاء الله ما يزوغو مني كمان !) .. وأسوي لي برندة لي جامعنا في الحلة .. وحبوبتي (تشمها قدحة) وتبقى ليها بي (عشم الكلب في موية الإبريق أكان يقدر يشرب) أكان أحججه ولا أديها قرش أحمر .. كفاية زاغت في العمرة وخلتي أجي صادي البلد براي (نسمع بيها مزمبعة من مكة لي جدة) زي (النقل الجماعي .. بقت (طويلة العمر) عدييل .. أهان قلت لازم تتغير الأحلام دي وتطور شوية .. يعني بدل حافلة في خط البلد أشتري بص سياحي خط (بورسودان) .. وأبدل حنتوشتي بي (حنكوشتي) أشوف واحدة من بنيات الخرتوم (المشحتفات المقلوظات المبرومات ديك) (الشايهن ببسي وفطورن جلكسي ) .. وبدل برندة الجامع أسوي (كافتريا) في نص السوق العربي .. ومن حق الكافتريا أسوي لي (قبة) أسميها قبة الفكي (جورجي قرداحي) ( يلحقنا بي ملاينو ويفزعنا)..
قعدت أفكر وأسرح ولقيت إنو أحلامي وطموحاتي الجديدة بقت زي (الفيل) يتوطأ أو يدوس علي كل الأحلام الصغيرة .. وأحلامي الصغيرة الحلوة الممكن تتحقق خطوة خطوة ح يجي سيل ويبدلها بأحلام (معلبة) جاهزة ما ليها أي طعم ولا رائحة .. وأتغير التغيير ده كلو بين يوم وليلة .. وأتنكر لي بلدي ولي حلمي .. وشيطاني يقعد يكبر ويفنجط .. قالوا الله كان داير يمتحنك بغنيك ... أهان بقيت بين أمرين وأبليس قعد يطوطح فيني شمال ويمين .. وبيني وبينكم المليون بداوي جروح كتيرة .. وقعدت أقول (يارب مدد) ..
فجأة في وسط الهدوء أسمع ليك ود عمي (زي جنى الشيطان) يضحك بي طول حسو لامن واقع في أرض الله من الضحك .. وقال لي : بي سرحانك ده أكيد بنيت قصور من الرمال وشربت لامن رويت من موية السراب وبقيت سلطان زمانك . تعيش وتاخد غيرها .
دحين ما تعيش الوهم ده .. ده (نزار) صاحبي كلمتو يسوي فيك المقلب ده ... وقدر يبرلمك !! فرفش يافردة
وأنا ..... وراء البسمات كتمت دموع وبكيت من غير يحس بي ... وسلام يا بلد
|
|
 
|
|
|
|
فيس بوك
تويتر
انستقرام
يوتيوب
بنتيريست