مناحة حميد ( بنيات الجرف) ... مهداة للعم حمزاوي .....

كلم بنيات الجرف تتبرا من بحراً غدر
اتغابى ما راعى الولف صاد الاخيتين بي غدر
ليك حق يعافيك الحراز واليسطفيك طرفي وعُشر
يا متوك الناس العزاز نابع قليبك من حجر
ما بتنفع انت بلا خريف الصاقعة والريح والمطر
تنزف نزيف ما بحوشه قيف لامن يقولوا عليك خطر
ما اظن نخيلك هز فوق سيرة عريس نازل البحر
ما طاله موجك ما بيضوق ما بضوق الناس غير كدر
***
كلم بنيات الجرف كل البنيات من طرف
ما ينظمن لي فد حرف في الخان عهودن وانجرف
يا ريته بس لو كان عرف حال البشابن بي لهب
لي حضنه المتلهف لي عز شبابن بس ختف
عودينله قشكن النشف يدغي ورويسات الزعف
مكسور خويتره بي قحف ترغي وتسف مليحات الأسف
***
عودينله والسنبر يرفرف جنيحاته بي الأشواق سحر
قاصد جريف ود شيخ يخب لي مويته من دون البحر
والليله زي غيماً رعف حين طال على ريحه السفر
يا حليله زينا ما عرف جوز القميريتين طفر
***
يا دنيا يانا رباط كتف
رغم الفجايع لا رجف
لا قال عوارضي أبت تخف
في باله كم تاريخ سلف
لو كان يشيل في الموج زرِف
دمعات أسى وحرقة وأسف
أو بالعلى الحال يعترف
كان عند رسول الله وقف
***
كلم بنيات الجرف كل المكاليم من طرف
الدنيا كلها كم حرف لا من يطول فيها الأسف
***