|
|
 اذا كان امثال هؤلاء هم بورداب السعودية ،،، فابشر بطول سلامة يا منبر
|
قدمني لهذا البورد أخ و صديق عزيز و زميل دراسة و ابن حارة و قريب أيضا هو الأخ خالد عويس . لم أكن اعرف الكثيرين في هذا الفضاء ، اللهم الا مجموعة من زملاء الدراسة الذين التقيتهم في دروب الجامعة و فرقتنا الحياة و لم نلتقي منذ التخرج و لكنا نحفظ الود لبعضنا .
وددت التعرف علي الكثيرين هنا من خلال كتاباتهم فكنت اتداخل مع بعض من أحس أن بيني و بينة ستكون هناك الفة و تقارب و ود ، و كنت أحس في بعض الأحيان ان الطريق ستكون طويلة حتى اكتسب ثقة من أنشدهم كأصدقاء في المنبر و خارجة .
فكان اليوم الذي انزل فية معتصم دفع الله تلفونه الخاص في بوست الأخت نادية عثمان فقمت باستغلال ذلك الرقم – و ارجوا أن تسامحني الشاعرة الرقيقة علي هذا الاستغلال - فاتصلت بمعتصم دفع الله فورا و دون تردد . هذا المعتصم الذي لم يخيب ظني فيه ابدآ و كان كما توقعت و أكثر . رد علي بصوته الهادي المريح فعرفته بنفسي ( أنا برلوم معاكم في سودانيز اون لاين ) ، فزاد ترحيبه بيّ ، فتجاذبنا الحديث إلي أن طلبت منة تلفون نادر .
صراحة لم أكن متأكدا من وجودة بقربي إلي هذا الحد فقد طلب مني خالد عويس التعرف علي هذا الشخص النادر منذ أكثر من سنة ، و بالفعل أول ما استلمت الرقم من معتصم دفع الله بادرت بالاتصال به ، فكان التعارف سهلا مريحا أيضا كما توقعت ، و جلست أفكر طوال هذا اليوم في الأخ الجديد الذي اكتسبته في الغربة ، لم أكن أتوقعه بهذه الحميمة و اللطف . قمت بتسجيل زيارة لنادر بعد هذه المحادثة بيومين تقريبا ، و سرقنا الوقت و تحادثنا و تجاذبنا الكثير ، و لا اذكر كم من الوقت جلسنا ، بالفعل التقينا في الكثير من الأشياء و اشتركنا في عدد من الأصدقاء و المعارف الذين جمعونا معا ، أول من اكتشفنا علاقتنا المزدوجة بهم كانوا زملاء بالمنبر . حقيقة خرجت من عند نادر و أنا اشكر بكري أبو بكر في سري و علانيتي أن أتاح لي فرصة اللقاء و التعرف بهذا النادر .
بعدها بفترة قمت بزيارة عمل إلي الموقع الذي يعمل فيه نادر ، و بالطبع بعد انتهاء المهمة التي جئت من اجلها كان اول شيء أفعلة هو ان اطلب من المن مقابلة نادر فاذن لي ، وصعدت من فوري للدور الخامس من مبني جريدة اليوم ، و جلسنا نسترق بضع دقائق من وقت عملنا نتجاذب حديثا عاما نتطرق فيه أحيانا إلي المنبر و احواله ، فإذا به يدخل علينا في قاعة الاستقبال مسلما ، و أول ما بادرني بعد أن جلس ، قال لي :
ياخي انا بعرفك من زمان ، اتقابلنا قبل كده صاح ؟
فتفرست جيدا في وجهه الشاب الوسيم ، و نظرت إلي هندامه المرتب الأنيق ، لم يكن هذا الشاب أبدا غريبا علي ، فانا متأكد أن كل من يقابله يحس بأن هذا الشخص ليس غريبا علية ، فملامحه تجبرك علي أن تجزم بمعرفته من زمان بعيد ، و أن علاقتك به ستمتد إلي زمان ابعد ، تحلف بالله ثلاثا انك ستصادق هذا الشاب الصغير الكبير بدري ، و لن تتوقف عن هذه الصداقة أبدا. قال لي نادر :
دا بدري و أنا قاعد أقول ليهو كان بدري عليك .
فكان اول تعارف لي مع بدري الذي اكتسبته عن طريق المنبر ايضا ، و أتمني الا افقده ابدا . بعدها وعدني نادر و بدري بتعريفي ببقية بورداب الشرقية عمك تنقو و آخرين سالتقيهم حتما هنا او هنافي الخبر، حينها فقط أحسست بانني لن احس بمرارة الغربة مرة اخري .
|
|
 
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
بالطبع لم ينتهي دور معتصم دفع الله بتزويدي برقم تلفون نادر ، فقد وعدته بزيارته عند أول زيارة أقوم بها للرياض ، جد انا متلهف جدا لهذه الزيارة فهي التي ستعرفني ببورداب الرياض عن قرب ، و الذين أحس ايضا بأنني سأجد فيهم مجموعة طيبة من الأصدقاء ، تمبس ، خضر حسين ، و آخرين كثر أقراء اسهاماتهم و اعجب بها ، و بالذات أعضاء رابطة الصالحية ، و الذين كنت اعرف عددا منهم منذ العام 98 فترة اقامتي بالرياض ، و لكن دروب المعيشة داخل السعودية لم تتيح لي التعرف عليهم اكثر ، بعد ان عرفني صديقي و قريبي صديق الجيو بعدد منهم امثال صديق الموج ، طارق عبد اللطيف ، محمد حميد ، كبوش بالاضافة للريس عبد المنعم طبعا . اتمني ان اعيد ما انقطع من بداية معرفة لهؤلاء الكرام ، و التي بالتاكيد ساعمقها في دروب هذا المنبر باذن الله .
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
العزيز
حمد فتح الرحمن
تحياتي الحارة
بداية أثناء قراءتي لهذا البوست كان العريس صداع عبيد (بالمناسبة اسمه صداح) معي في الماسنجر قلت ليهو والله أنا في حاجة واحدة غايظاني أنو حمد المسكين ده عتر (العين مكسورة) في بدري ده ...
تعرف يافتح الرحمن بالجد لكم تمنيت أن التقي بك ضمن بورداب الشرقية لكن لاحرج فأثار معاركنا باقية أنت بس أمش لي بدري وحيوريك (متحفنا)
لك التحايا وأنتظرك يافي التلفون يافي ارض الله الماهلة دي
يلا تحياتي
خضر
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
حمد فتح الرحمن
دللتني وأنا لا استحق ذلك كله ... ولي في المعارف الأسفيرية قصص وحكايات وأصدقاء كُثر لعل أبرز الأصدقاء الأسفيريين الذين لم أحظى بلقائهم إلى الآن صديقي السمندل ذلك الرجل العذب الجميل .. ولعلنا كمجتمع سوداني له خصوصية اجتماعية مميزة قد عوّضنا غلبة الحنين في داخلنا بما أتاحته لنا العولمة من تواصل عبر هذه المنابر الأسفيرية؛ ولو أننا حتى هذه الأسفرة أصبحنا نسيء استخدامها فيما يمكنك أن تراه الآن من خصومات وجدل فارغ كأننا نجيّد الخلاف ولا نجيّد أدبه، يعج البورد كل فترة بكمية من المفاهيم والألفاظ والأشياء الغريبة التي ما حسبت يوماً أن ثلة من المفترض فيها الوعي الثقافة والاستنارة أن تخوض وحله؛ وبالمقابل يجود البورد بأمثالك وبدري في صباح شديد الألق كذلك اليوم ...
أنا ممتن لسودانيزأونلاين أن أتاحت لي معرفة العديد من الأصدقاء، ولن أعددهم لعلمي أني سأسقط بعض الأسماء لكن وكما يقول البورداب في العبارة المشهورة عن عزة المهاري (أصبح البورد وطن في زمن اللاوطن) وهذه حقيقة تتجدد كل صباح أمامك وأنت تضغط على الماوس تتلقى أخبار السودان والسودانيين في كل مكان ...
عزيزي حمد أتمنى أن تدوم بيننا الصلات؛ فأنت رجل يُشد له الرحال؛ وأعذرنا لتقصيرنا في الترحيب بك بما يليق لكنها المشغوليات وقديماً كان العرب يقولون (كل صاحب عيال لا يفلح) وتقال في شأن من يرتبط أسرة وأعباء وحياة جديدة ظاهرها وباطنها مسئولية جمة، وأنا أصبحت صاحب عيال لكنك تستحق أن نفلح لأجلك الفلوات ... فأربط الحزام وسنبدأ ببرنامج رمضان وحأنفضليكم التراب من عمك تنقو وأطلعو من صومعتو اللابد فيها
سأعود مجدداً صايم الليلة والكلام مابي يطلع ... والمصومني معاه نايم ..
عزيزي خضر حسين مشتاقين وفقدت الشرقية بفقد جهد لا يُعوض أمنياتي لك بدوام التوفيق والنجاح في كل مساعيك وزي ما قلت ليك في مداخلة سابقة بعيد ليك نفس الكلام (الحِميدي المحبووووك)
يصحى الشجر اليابس
أخضر
يضحى الأخضر
زائد وأنضر
يرجع طيراً
غِصب إتهجر
وشوش ..
عشعش ..
وعمَّر روحك .
... ... ...
يترى الحلم
الفينا إتحجّر
وندرأ نزوحك
تالا المدن ..
المصّت دمِّك
ودسَّت فوحك
قسّت همِّك
وقصَّت موحك ..
... ... ...
يا متخبية ...
وأنا مفضوحك
رنّة فرحك ..
صنّة ترحك ..
وين ما أقبِّل
ياني بروحك
أجمل باقة ورد مع خالص الحب لكم جميعاً
| |
|
|
|
|
|
|
|
|
 Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
الأخ الحبيب حمد فتح الرحمن
تحية تقدير وثناء ..
جميل هذا العالم السايبيري حينما يجمعك باناس تعزهم وتقدرهم ..
يحملون هم الوطن وقضاياه وإنسانه ..
كم كانت سعادتي كبيرة حين أتاني صوتك على الطرف الثاني من الهاتف ..
أحسست بعمق العلاقة والإنتماء وهذا ما يميز أبناء بلدي أين كانوا ..
دائماً مادين أياديهم بالمحبة والمودة ..
شكراً لك أخي حمد فقد منحتنا فرصة معرفتك عن قرب ..
وشكراً لكلماتك الرقيقة التي أخجلت تواضعنا ..
ربنا يديم علينا نعمة المحبة والسلام ..
وأن يجمعنا في أرض الوطن الحبيب سالمين وعلى أحسن حال ..
أسعدني لقاءك بالرائعين نادر وبدري فهما نعم الأصدقاء ونعم الأحباب ..
والأجمل حين تلتقي بقية العقد الفريد وأولهم العم الجميل تنقو ..
لك ولهم كل الود والتقدير ..
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: معتصم دفع الله)
|
معتصم دفع الله
كنت دائما افكر في النرجسية السودانية ،
لماذا يعتقد السوداني دائما انه افضل الناس ، و يري الشعب السوداني ان اخلاقهم و صفاتهم لا يدانيهم فيها بشر .
حقيقي يا معتصم بعد ما لاقيت المجموعة الطيبة دي و ممني نفسي بي لقاقكم ، حقيقي انا حاسي بي انو السوداني دا انسان مختلف .
صدقني الطيبة و العفوية و حسن الظن دائما بالاخرين قل ان تتواجد بكثرة الا في شعب هذا البلد الطيب .
عشان كدا يا معتصم و الله حرام انو يكون في شعب فيهو امثالكم يضام و يظلم زي ما حاصل لينا .
| |
|
|
|
|
|
|
|
|
 Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
دكتور حمد
سلامات ومليون مرحب بيك
لكن
طالما أنت مسكتها من الشرقية وجيت بيها من فوق .. وتحديدا من الزول البشبه اسمو ده ( نادر )
وكمان بدري .. ح تلقى ليك فرقه تشوفنا بيها كيف تاني ؟؟
انا عندي قناعة لحدي الآن انو نادر باستطاعتو يطعم ليك الملح زاتو بي ترحابو واناقة كلامو
نفس الطريقة بدري .. وشلة القلري ( صداح عبيد العريس ، وبن بن ، والبقية )
وإذا كنت محظوظ خالص تقدر تقلع عمك تنقو من صومعتو ..
اما
خدر حسين فعاملين ليهو كنترول هنــا .. ومافي طريقة ( فرفره )..
وطالما
دخلت ببوابة النجوم ( عن طريق معتصم دفع الله ) فإنت بلا شك وصلتنا تب .. والخوف انك تطلب نقل من الشرقية .. للرياض
لكن احسن حاجة .. اننا ح نكون في انتظارك .. تدخل ( الميس )
محبتي
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: tmbis)
|
اول حاجة يا تمبس دكتور دي فكاها فيني صداح عبيد دا ساكت و الله ،
يا زول انا الدكترة دي ما جيت ماشي بي جنبها ، ما تخلوني اصدق ساكت اني دكتور بالجد .
بعدين بن بن و صداح ديل خليهم شوية لانهم لسع عرسان ، خلينا نزازي بي نادر شوية لغاية ما يتكتف بالجد ، نكون مرقنا الراهب تنقو من الصومعة .
حكاية الرياض دي خليها شوية عندي شهر حاجي اقعدو معاكم ، و الله الا تشردو مني .
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
صديقي حمد فتح الرحمن يحمل طيبة أهملنا في الشمال الحبيب، أولئك الذين ظلوا في إباء يضحكون لسنوات السودان المعطوبة بكبرياء وعزة يندر أن تجد مثلها، هم قوم ترفض نفوسهم العزيزة أن تُظهر بؤس عيشهم وشظف حياتهم فكانوا "تحسبهم أغنياء من فرط كبريائهم" جلسنا في أول زيارة له لي ما يقارب الساعتين مرت من روعتها كدقيقتين ... شكراً حمد أن توّجت قائمة أصدقائي بوجودك المتألق ... وشكراً أن جمّعت كل هؤلاء الأصدقاء الرائعين هنا ... ولو تكلمت في شأنهم لما أستطعت أن أوفيهم حقهم كاملاً أبداً لذا دعني ألوذ بالصمت فهو جمال في حرم هذه النجوم المضيئة ...
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
العزيز حمد
أولاً آسف اني ما شفتا بوستك الجميل دا الا بعد اتصال بيني والصديق معتصم
ثانياً ياخي أشكر لك اطرائك الجميل وأتمنى ان تدوم صداقتنا واتمنى ان أتشرف بزيارتكم لمنزلنا انت والعزيز نادر وان شاء الله حنعرفك على باقي الاخوة بورداب الشرقية
دكتور سي جي
متابعكم من بعيد لبعيد فدنيا المال والأعمالوالعقارات على الانترنت لا ناقة لنا فيها ولا جمل فالعاملين عليها يتفرجوا بس 
خضر ياخي مشتاقين رغم ازعاجك الدائم لكن دوماً نفتقدك يا صديقي وما زال مكانك شاغراً ونتظرك يا صديقي
صداح الجميل
مالك خاشي لفت انتا من اسي بقيت تهضرب بالدكاترة
سيف مرحب بيك
نادر النادر فعلاً
كل ماالتقي بالرائع الهادئ شتات اول حاجة يسألني نادر كيف؟؟؟ وهو كل ثقة انو انا بعرفك وكم مرة قال لي انو نادر دا زول رائع جدير بانه الواحد يتعرف بيهو وبالفعل من سمع ليس كمن رأى يديك العافية يا نادر وبالمناسبة نحنا أهل العريس 
معتصم دا بقى خليهو لمن تشوفوا لانو قدر مااحكي ليك عنه ماحأوفيهو حقه وانتت ما حتصدق انو في زول بالروعة دي
ود المايقوما
بورداب الشرقية قاعدين يا عزيز وقريبين وانتا طالما وصلتا محمد صلاح وسامو خلاص وصلتني وبماانك بتعرف ديل فشكلك كدا من عندينا
تمبس
تمبس تمبس بسكويت يرددها خضر حسين دائماً بعد الساعة العاشرة ليلاً
ياخي مشتاقين يا لذيذ وبعدين يا تمبس نحنا اديناكم خضر حسين بحالو ما كفاكم دايرين تشيلوا مننا حمد انتوا بس ابقوا عشرة على خضر وخلو ناس الشرقية يزيدو ويكتروا
وبعدين ياحمد تمبس دا برضو ذي معتصم دا بس مشكلتو ضرسو واجعو طوالي
بس نصيحة ما تتعود على درب الرياض لأنو ممكن تدمن أنا غايتو عمك تنقو اداني عين وريحني من السفر الكتير قال قال لي انتا ناس الرياض ديل كابين ليك موية سكر ولا شنو طوالي جاري الرياض اها أسي متربط هنا وقاعد وبالجد في الرياض ناس بعمق الدهشة الخال ود قاسم والرائع صلاح شتات ووليد 399 ومحمد الشيخ واحمد حنين وحمزاوي وابو جهينة وعمك صديق الموج والمقاتل احمد حنين وابو وجيدة الشاعر الرقيق يوسف حمد النيل وود الباوقة وقرنفل واخوة كتيرين متأكد انهم حيدخلوا جواك السرور من الوهلة الأولى
شكراً ليك حمد لأنك جمعتنا مع اخوة نحبهم في بوست جميل
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: Badri)
|
عارف يا بدري انا اول ما جيت الخبر سنة 2002 ما بعرف فيها اي بني ادم ، كنت بمشي الرياض من يوم الاربعاء الساعة 4 العصر و ما بجي راجع الخبر الا يوم السبت الساعة 8 صباحا ، اسبوعيا بالشكل قريب 6 شهور ، جد لو بالغت في الشرقية كنت بقعد فيها 15 يوم واجري تاني علي الرياض ، لغاية ما اتعودت الان علي الشرقية ، اسي اخر مرة مشيت الرياض كانت قبل شهرين و لي شغل ما مشية ساكت ، لكن يبدوا بعد معرفتي بالشباب ديل الظاهر حليمة حترجع لعادتا القديمة ما لم يمرق تنقو من صمعتو و تتسدا الفرقة تب .
التحية لـ| Quote: الخال ود قاسم والرائع صلاح شتات ووليد 399 ومحمد الشيخ واحمد حنين وحمزاوي وابو جهينة وعمك صديق الموج والمقاتل احمد حنين وابو وجيدة الشاعر الرقيق يوسف حمد النيل وود الباوقة وقرنفل واخوة كتيرين |
اتمني اني الاقيهم في اقرب وقت .
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
ياحمد
مرحب بيك في الشرقية . وانت تب وصلت وغربتك حاتكون عسل طالما وصلت الشباب اللذيذين
بن بن وصداح وبدر ونادر وخضر واوصيك تتعرف على الرائع تنقو لانو لسع عذابي وعندوا فرقة باعتبار ان بدر صاحب عيلة مكونة من الاب والام والاخوان
نحن ناس عجايز ساي انا واخوي الكاشف خالد الطيب لكن عندنا اذن يوم الخميس في اي مكان والاسبوع كلوا ممكن تجينا في البيت . تلفوني في البروفايل يالذيذ " لازمة بن بن "
يلا نشوفك ونتوقع اتصال منك الليلة
| |
|
|
|
|
|
|
|
|
|
Re: اذا كان امثال هؤلاء هم بورداب السعودية ،،، فابشر بطول سلامة يا منبر (Re: حمد فتح الرحمن)
|
بالتبادي
بدري
أذيك يامزعج
تعرف كلما تزكرت تلك الليلة (غرفة الشفيع) بقوم مخلوع ومصدع من النوم أذيتونا جنس أذايا ... عامل شنو وكيف أحوال أيامك الا ذلت تتنقل من عمل لاخر مثلك مثل (كوراث) أم أن الغربة فتحت عينيك أكثر . بالامس قابلت صديقنا(منقو ) صداااع عبيد . كان هادئاً أكثر من أي وقت عرفته لاادري السبب ربما العرس وربما أشياء أخري .
ماذا عن الشرقية تحياتي لبندوا ولطيفة ولكل اللطيفين بالعباد من أمثالهم أؤلئك الذين ظللوا علينا (أنا وقرين صاحبي) سماوات الغربة بأريحيتهم . تحياتي لكل العاملين بطرفكم .
تمبس
بدري قال أنو أنا بردد (تمبس تمبس بسكويت) بعد العاشرة ليلاً الان ياصديقي أصبحت لاارددها كثيراً (الرياض وحشة أوي أوي أوي) .
أنتو ين ؟
عوض ياهارون
أذيك ياعوايل (اولاد عوايل وعندنا فايل)
أنتظر تلفونك البعد نص ساعة حتي تاريخه .
الحاصل شنوا
خالد الطيب
فليمثلنا صداااع عبيد منذ اليوم في مجلس الشيوخ .
حمد
سننتظرك علي احر من الحر ذاتوا .
خضر
| |
|
|
|
|
|
|
| |
حمد فتح الرحمن
سجيمان
خضر حسين خليل
saif massad ali
معتصم دفع الله
tmbis
Badri
awadharoun
محمد اشرف
صديق الموج
فيس بوك
تويتر
انستقرام
يوتيوب
بنتيريست