|
|
 بشتنة
|
حسن نور الدائم المر شاب على اعتاب الخامسة والثلاثين من عمره، متوسط الطويل اسمر اللون. شعره كثيف يعمل موظفا فى احدى المؤسسات الحكومية.منذ ان حلت اسرة المر على حيينا كان حسن هو من لفت الانتباه فى هذه الاسرة فقد كان انسانا يحب الوحدة ولا يخالط الناس كثيرا، كان يهمل الاعتناء بمظهره وملبسه حتى اطلق عليه اهل الحي اسم حسن بشتنة. لم يكن حسن يدرى انهم يلقبونه بهذا اللقب او انه كان يدري ولكن لم يكن احد ليتجرأ ويناديه بهذا اللقب.
لا نعرف كثيرا عن ايام طفولته ومكان مولده فقد حضرت اسرة المر الى الحي وحسن فى السنة الثانية من المرحلة الجامعية. ومنذ حضورهم كانت طريقة حياة حسن كما هى لم تتغير الا بتغير اوقات الدراسة الى اوقات العمل. حتى بعد ان استلم وظيفته ظل مظهره كما هو، كان حذاءه يلازمه حتى يشتكى من طول الملازمة وتبدو عليه اثار البلى واضحة مما يضطره الى تغييره وكذا الحل بالنسبة لملابسه وبقية اشياءه الخاصة.
الغريب ان لحسن ثلاثة اخوة واختان وكانوا يختلفون عنه اختلافا كاملا فى سلوكهم ومظهرهم. سالت محمد اخيه الاصغر يوما عن حسن وعن سر اهماله لنفسه وهل تعرض فى حياته لصدمة نفسية اثرت فيه بهذا الشكل فاجاب بانه لم يتعرض لائ شي وانه نشأ هكذا رغم اصرارنا على تغيير سلوكه نحو الافضل الا انه ظل كما هو.
لم يكن حسن يهمل واجبه تجاه اسرته وكانوا يكنون له حبا واحتراما فائقا فقد بذل شبابه فى اعانة والده على تحمل اعباء الاسره.كانت امه تحبه حبا كبيرا وتتمنى ان يوفقه الله فى حياته. فى ذات مساء جلست امه معه وقال له :
- ما خلاص يا حسن يا ولدى نويت تسوى ليك بيت واشوف عيالك يا حسن انت ماك صغير وما قصرت معانا.
- لكن يمة انتى عارفة الحال وانتو لى هسع فى نص الطريق الاولاد ما اتخرجوا والبنات ما عرسن.
- يا حسن يا ولدى اخوانك ليهم الله ابقى انت على روحك والله بعينك على بيتك وعليهم.
بعد محاولات عديدة من امه بدأ حسن يلين لها فى فكرة الزواج وفى يوم من الايام قال لها:
- يمة انا غيرت رائي وداير اعرس.
- جد لى يا ولدى جد لى ان شاء الله ربنا يعينك ويديك بت الحلال.
- انا لقيت المرة الدايرا وداير اشوف رايك فيها شنو.
- دى منى يا حسن.
- سهام بت مصطفى.
- الدكتورة؟
- يا ها ذاتها يمة رايك فيه شنو؟
- هى يا حسن يا ولدى قول بسم الله. كدى شوف لينا واحدة تانية وخلينا من البت دى.
- ومالها سهام يمة سمعتى عنها حاجة؟
- ابدا يا ولدى لكن قالوا مد كرعيك قدر لحافك والدكتورة دى يكونوا مية احسن مننا دايرنها لى اولادهم، ما تسو لينا سيرة فى الحلة ساكت يقولوا حسن اتقدم لى بت مصطفى وابتو.
- خلاص يمة انا يا سهام يا بخلى العرس انا اصلى ما بلحيل عليه وانتى الاصريتي على.
لم تصل امه الى اتفاق معه وحاولت معه عدة مرات ذالك اليوم ولكنه كان مصرا على رائه واحست فى داخلها ان ابنها مغرم بهذه البنت لدرجة لم تكن تتصور ان حسن يمكن ان يصل لها، كما احست انه كان يدفن هذا الحب داخله ولم ينفجر الا تحت ضرباتها له بالتفكير فى الزواج.
فى تلك الليلة لم ينم حسن ظل طوال الليل يفكر فى سهام ويفكر فى كيفية مقابلتها وطرح رغبته فى الزواج منها. كانت ليلة عصيبة بالنسبة لحسن. تارة يقتله الهم والحزن لانه يتخيل ان سهام صدته واهانته، وتارة اخرى يتخيلها معه فى بيته وبين احضانه فيكاد يطير من سريره فرحا.
سهام مصطفى عبد اللطيف واحدة من اجمل بنات الحي ومن ارقى الاسر وايسرها، تخرجت من كلية الطب قبل اربعة اعوام واكملت فترة الامتياز والخدمة الوطنية وتعمل فى مستشفى الامل. تقدم لخطبتها نفر كثير وارتبطت فى فترة ما باحد الاطباء ولكن انتهت فترة خطوبتهما بسرعة ولسبب لا يعلمه احد وظلت بعدها لا تفكر الا فى عملها فقط.
عند الساعة الثالثة من ظهر اليوم التالى غادر حسن مكتبه واتجه مباشرة الى مستشفى الامل حيث تعمل سهام. لا احد يدرى ان كان فى وعيه ام ان قدماه ساقتاه الى هذا المكان ولكنه كان يسير باصرار عجيب. كان يرتدى بنطولنه الرمادى الذى اشتكى من طول الاستعمال وقميصة الازرق ذو الياقة المهترئة وجزمته التى تقوست من كثرة ارتدائه لها.
دلف حسن الى باب المستشفى وسال احدى الممرضات عن مكتب الدكتورة سهام فقالت له تمعنت منظره الغريب وهيئته المبشتنة طويلا:
- شايف الباب الاخدر داك.
- ايوة شايفو.
- اها ادخل طوالى على الباب البعدو تلقى جوة فى بابين دق على الباب اليمينك تلقاها هناك.
- شكرا يا اخت.
وسار حسن وهو فى حالة من اللاوعى، وحالة من الاصرار. دق حسن على الباب فسمع صوتا رقيقا يقول له تفضل فدخل وقلبه يكاد يخرج من بين اضلعه. عندما فتح الباب وراى سهام فى منتصف المكتب تصلب فى مكانه وعاد من حالة اللاوعى التى كان عليها واحس بمدى خطورة الخطوة التى اقدم عليها ولكنه الان فى موقف لا بد من ان يتخذ فيه قرارا وبسرعة لان اى تردد من الممكن ان يحرمه من تحقيق حلم حياته.
- حسن؟ اهلا وسهلا اتفضل.
- السلام عليكم يا دكتورة.
- وعليكم السلام كيف حالك اتفضل اقعد فى الكرسي دا.
جلس حسن على الكرسى واحس ان قدماه بتدأتا فى العرق كما احس بان الكرسي يتمايل تحته.
- مالك يا حسن ان شاء الله ما عندك عوجة وشك مخطوف.
- لا كويس يا دكتورة ما فى عوجة.
- طيب بتشتكى من شنو؟
- ولا حاجة.
- وجائي زيارة لى زول فى المستشفى؟
- لا انا جائي زيارة ليك انتى يا دكتورة.
- اهلا بيك شرفت والله.
استمر الحوار بين حسن وسهام لمدة خمسة او ست دقائق بصورة عادية احس حسن بعدها بانه بدأ يستعيد توازنه. وفى لحظة ما اللحظات شعر برغبة قوية فى طرح حبه لها ورغبته فى الارتباط بها. وبدون اى مقدمات قال لها ما فى قلبه وبصدق غريب واحساس قوى انتقل تاثيره بصورة مباشرة الى سهام.
نظرت سهام الى الارض ثم نظرت اليه وقالت له:
- حسن انت واعى للكلام البتقول فيه دا.
- انا قلت كلام غلط يا دكتورة؟
- لا ابدا لكن اخر حاجة كنت اتوقعها فى الدنيا انك تقول لى كلام زى دا.
- معيش يا دكتورة انا عارف نفسي وعارف وضعى وعارف وضعك لكن عشان اقدر اعيش باقى حياتى مرتاح لازم اقول الكلام دا. عارفك ما بترضى بي لكن المثل بقول اخر العلاج الكي وانا لازم اجرب اكوى جرحى النازف فى قلبى عشان يبرأ.
وقفت سهام للحظات وظلت تنظر فى عيني حسن. لقد رأت فى عينيه صدقا لم تألفه فى احد من قبل واحست فى نبرات صوته حبا جارفا، ورأت فى رعشات يديه رغبة كبيرة. كانت تراه امامها وكأنه كائن آت من عالم اخر، كائن يختلف عن بقية الكائنات.
قالت له:
- حسن انا خلاص وقت شغلى انتهى ودايرة امشي ممكن تنتظرنى برة والحقك بعد دقيقتين ارتب اوراقى واجيك.
- لكن يا دكتورة ما قلتى لى حاجة.
- بعدين يا حسن ممكن تنتظرنى برة.
- حاضر وانا بقدر اعصى ليك امر طلباتك اوامر يا دكتورة.
خرج حسن وجلست سهام على الكرسي وهى فى حالة من الانهيار التام. لم تكن تتخيل ان يأتى يوم ويفاتحها شخص مثل حسن فى الزواج منها، كانت متأكدة من انه لو حدث هذا الامر وبغير هذه الطريقة فان حسن او اى واحد من امثاله لن يسلم منها ولن يسمع منها الا التعنيف والكلام البارد والساخر. لكنها الان تحس بداخلها باحساس غريب، تحس بانها قريبة جدا من هذا الكائن المبشتن وغير المرتب. لم تكن تدرى ما السبب لعلها النظرية الفيزيائية التى تقول ان الاقطاب المتنافرة تتجاذب.
على اى حال احست سهام انها وجدت ما كانت تفتقده كثيرا، وجدت الاحساس الذى بحثت عنه فى ردهات الجامعة وفى صالات المناسبات وممرات المستشفيات. وجدت الشعور الجميل الذى كانت تتمنى ان تدفع عمرها لمن يقدمه لها. ان لله فى خلقه شؤون، كيف لها ان تبحث عن هذا الامر فى كل الاماكن وتجده الان عند ابعد الناس عن فكرها واكثر الناس اهمالا لنفسه.
فى الخارج وقف حسن لمدة احس بها اطول من العام. فى تلك اللحظات راوده احساس بانه ارتكب خطأ جسيما وتمنى لو انه لم يأت الى المستشفى. فى هذه اللحظة قرر ان يغادر المستشفى قبل ان تحضر سهام ويحدث له ما لا تحمد عقباه. وفى اللحظة ذاتها التى بدأ فيها فى مغادرة المستشفى وفتح الباب الذى يقود الى ممر الخروج سمع صوت باب يفتح ورأى سهام خارجة من مكتبها.
- شنو يا حسن شايفاك ماشي طولت عليك ولا شنو.
- لا ابدا يا دكتورة لكن كنت ماشي البيت خلاص المهمة الجيت ليها انتهت وما فى فايدة لى انتظاري.
- انت مالك بتعاملنى رسمى كدة يا حسن انا اسمى سهام لو ما بتعرف وما فى داعى للدكتور دى.
- حاضر يا دكتورة، معليش اسف يا دكتور سهام.
ضحكت سهام. وغادر الاثنان المستشفى. طلبت منه ان يركب معها فى عربتها لتوصله الى بيتهم فاعتذر وقال لها انه سيركب البص وليس هناك ما يجعله يركب معها.
- اركب يا حسن ولا بزعل منك.
- انا ما خليت حاجة اليوم ما تزعلك اكيد جبت ليك الضغط، معليش انا ما بركب معاك عشان ما يجيك سكري ولا حاجة تانية واكون انا السبب.
- حسن انت بتقول فى شنو؟ سكرى وضغط منو القال ليك انا زعلانة منك؟
احس فى صوتها بعدا جديدا لم يألفه منذ قدومه اليها، هذا الاحساس منحه الجرأة ليتقدم ويركب فى السيارة.
طلبت منه سهام ان يذهب معها لتناول الغداء فى احد المطاعم القريبة من المستشفى فاعتذر ولكنها اصرت وقالت له انها ترغب فى ان تتحدث معه فى الامر الذى اتى من اجله. لم يكن حسن يعتقد ان الامر سيتطور بهذا الشكل ولكنه وافق على الغداء بعد ممانعة طويلة.
دخلا الى المطعم وكانت النظرات لا تفارقهما امرأة كما الوردة اليانعة ذات جمال اخاذ وترتدى افخم الثياب تسير برفقة رجل لا ملامح له كتلة من الاشياء والالوان المتنافرة.جلسا على احدى الطاولات وتجاهلا نظرات الناس. تناولا غدائهما وناقشا الامر بهدوء غريب. قالت له انها لم تكن تفكر فيه قبل الان وانه لو ان اى شخص اخر اخبرها بانها ستجلس مع حسن فى مثل هذا الموقف فسوف تعتبره مجنونا وان اخبرها احد انها سترتبط به فان هذا يعنى ان القيامة قد اوشكت. قالت له انها احست بصدق مشاعره تجاهها وبنقاء معدنه وانه يحمل فى داخله كائنا يمكن ان تقف له الدنيا احتراما ان قدم لنفسه ما يليق بها من احترام.
خرج حسن وسهام من المطعم وكأنهما حبيبين منذ اكثر من عشرة اعوام. كان وجه حسن يشع نورا وبدأ محياه كأنه لشخص اخر شخص كان يختبئ فى داخله. واتفقا على اللقاء غدا فى نفس المكان ونفس الزمان على ان لا يخبر احد منهما اى شخص بما حدث حتى يتقربا من بعضهما ويتعارفا اكثر.
كانت سهام فى طريقها الى قلب المدينة لمهمة عملية وقالت له انها ستوصله الى البيت وتذهب للعمل فقال لها انه ذاهب الى قلب المدينة لمقابلة شخص هناك. عندما افترقا ذهب حسن مباشرة لاحدى محلات الازياء واشترى ملابس جديدة واشياء كثيرة لم يكن يفكر يوما فى شرائها. لم يكن يدرى ما يفعل وانما كان يعمل على ان يكون فى وضع يليق بمن منحته هذا الاحساس وهذا الحب.
عندما هم حسن بمغادرة منزله صباح اليوم التالى احس جميع من فى البيت بان هناك شيئا غريبا فيه، فقد كان فى ابهى حلة وتعطر بعطر فاخر وكان وجهه يشع نورا. عندما حاولوا معه لمعرفة سر هذا التحول قال لهم انه احس بان حياته يجب ان تتغير وانه يجب ان يعتنى بنفسه بعض الشئ.
كانت امه هى الشخص الوحيد الذى احس بسبب هذا التغيير وانتابها خوف شديد على ولدها فهو الان يبدل فى جلده حتى يليق بالدكتورة. وهى تخاف عليه من الصدمة ومن ان تكون هذه التغيرات هى بداية لنهايتة. لحقت به امه عند الباب وقالت له:
- حسن يا ولدى ما تنسي كلامي القلتوا ليك اول امس، مد كرعيك قدر لحافك وقدر لى خطوتك قبال تخطيها.
- لكن يمة انا ما كان عندى كرعين قبال كدة عشان امدهن يا دوبك انا بفتش لى كرعى ولى روحى.
- دا كلام شنو يا حسن يا ولدى، انا خايفة عليك.
- ما تخافى يمة ان شاء ما يحصل الا الخير.
وتواصلت لقاءات حسن وسهام وازداد التقارب بينهما. كانت سهام على يقين ان خلف هذا الاهمال الذى كان يعيشه حسن يسكن انسان من نوع نادر ولم يخنها حدسها فقد تكشفت لها فى هذه الايام العديد من الاشياء التى لم تكن تحلم بها فى اى شخص فى العالم ناهيك عن حسن. وتبدل حسن الى درجة انه اصبح مثار حديث الحي فالكل كان يبحث عن سبب هذا التغير العجيب. حتى فى العمل اصبح حسن يعمل بطريقة مبتكرة ويقدم كل يوم مواهب لم يكن يستخدمها من قبل.
ولم يعرف اهل الحي سر هذا التغيير الا عندما انطلقت زغرودة طويلة من منزل حسن فى احدى الامسيات معلنة خطوبة حسن نور الدايم المر الشهير ببشتنة على الدكتورة سهام مصطفى عبد اللطيف.
عندها فقط عرف الجميع ان الحب يصنع المعجزات.
وعندها فقط فهمت مقولة مايكل انجلو "ان داخل هذه الصخرة يربض اسد وان ازميلى هو الذى يمكن ان يخرج هذا الاسد الرابض الى الوجود".
المعتمد
5 يوليو 2005م.
|
|
 
|
|
|
|
|
|
|
|
Re: بشتنة (Re: المعتمد)
|
المعتمد بالله عريسنا
سلام ليك وللمدام
| Quote: عندما افترقا ذهب حسن مباشرة لاحدى محلات الازياء واشترى ملابس جديدة واشياء كثيرة لم يكن يفكر يوما فى شرائها. لم يكن يدرى ما يفعل وانما كان يعمل على ان يكون فى وضع يليق بمن منحته هذا الاحساس وهذا الحب. |
دي روشتة قوية جداً
سمعنا بي الفحل ما بعاف لكن الدكتورة ما بتعاف دي أول مرة نسمع بيها
| |
|
|
|
|
|
|
|
|
|
Re: بشتنة (Re: المعتمد)
|
الاخ نادر
سلام
لك الشكر على مرورك وصبرك على قراءة ما نسميه بالقصة وان كانت تفتقد للكثير من اركان القصة.
وانا مبسوط جدا لانه اعجبتك ووجدت فيها ما يستدعى الوقوف عنده.
لك الود
والف باقة ورد
| |
|
|
|
|
|
|
|
|
|
Re: بشتنة (Re: المعتمد)
|
الاخ بدر الدين.
سلام
كيف اخبارك واحوالك.
سمعت ليك بى دكتورة بتعاف. كان بتعاف ناس البواسير حقهم ما راح الا يعالجهم زول زى العبيد الله يرحمه.
لك الود
والف باقة ورد
| |
|
|
|
|
|
|
|
|
|
Re: بشتنة (Re: المعتمد)
|
| Quote: سمعنا بي الفحل ما بعاف لكن الدكتورة ما بتعاف دي أول مرة نسمع بيها |
لكن الفحل بتعاف!
أفو!!
جنى
| |
|
|
|
|
|
|
|
|
|
Re: بشتنة (Re: المعتمد)
|
Quote: لكن الفحل بتعاف!
أفو!! |
وإنت هسع (منفحل) كدا مالك؟؟؟ أنا قلت ما بعاف ماقلت بتعاف وأنا عارفوا لابعاف ولا بعرف العوف
مشتاقين كتيييييييييييييير ياجني
| |
|
|
|
|
|
|
|
|
|
Re: بشتنة (Re: المعتمد)
|
الاخ جنى
الاخ بدر الدين
سلام.
حقيقة الفحل ما بعاف وما بتعاف لكن بتخاف.
الفحل منه خوفة.
مشكور الاخ جنى على المرور بهذا البوست
ولك الود
والف باقة ورد
| |
|
|
|
|
|
|
|
|
|
Re: بشتنة (Re: المعتمد)
|
الاخ القرضابي.
سلام.
خت فى بطنك قرضاية صيفى واتوكل وادخل توش.
فى مرة من المرات وانا راجع الحلة من الخرطوم فى الحافلة الجماعة قالوا اليوم عرس سعيد (سعيد دا واحد عامل بسيط وما عنده حاجة لا مال ولا منظر ولا كلام سمح يعنى حتى البيت بتاع (لا خيل عندك تهديها ولا مال* فليحسن النطق ان لم يحسن الحال) دى ذاتها ما عنده. قلت ليهم بالله سعيد داير يعرس؟ رد على واحد ساخر من الحلة قال لى يا المعتمد العرس دا ما زى الكنار دا (الكنار لمن لا يعرف هو كبري فى الترعة الرئيسية فى الجزيرة) لو نويت تدخله تغمد عينيك وتقفل نخريك وتقع فى الموية يا مرقت يا غرقت يعنى ما تفكر. قلت ليه فكرك سعيد دا بمرق ؟ قال لى قطع شك سعيد دا بحتل (بغرق). لكن سعيد ما حتل ومرق لى وش الدنيا بعد ما عرس وبقى يحسن النطق ويملك المال.
اها انت غمض (نخريك) واقفل (عينيك) وادخل يا غرقت يا مرقت.
لك الود
والف باقة ورد
| |
|
|
|
|
|
|
|
|
 Re: بشتنة (Re: عبد الحميد البرنس)
|
قصة رائعة.. بديعة.. فاتنة.. بالغة الجمال. ممتلئة بالتحولات المنطقية العميقة التي يحدثها الحب في الذات البشرية كرؤية للعالم. صدق في الحوار وسلاسة. وتفصيلات دقيقة تصنع متعة حقيقية أثناء القراءة.
| |
|
|
|
|
|
|
|
|
 Re: بشتنة (Re: عبد الحميد البرنس)
|
المعتمد
تقديري
جميلة جدا جدا
وعجبتني جدا
وعندها فقط فهمت مقولة مايكل انجلو "ان داخل هذه الصخرة يربض اسد وان ازميلى هو الذى يمكن ان يخرج هذا الاسد الرابض الى الوجود".
عارف العناوين في البورد ده مشكلة الواحد محتاج يعيد النظر في قرايته للعنوان ودخول البوستات ، لما قريت العنوان ما كنته متخيل انو جواهو الحاجة اللذيذه دي ..
تقديري مرة ثانية والمزيد من فهم المقولات .
ايمن تابر
| |
|
|
|
|
|
|
|
|
|
Re: بشتنة (Re: المعتمد)
|
الاخ عبد الحميد
سلام
| Quote: قصة رائعة.. بديعة.. فاتنة.. بالغة الجمال. ممتلئة بالتحولات المنطقية العميقة التي يحدثها الحب في الذات البشرية كرؤية للعالم. صدق في الحوار وسلاسة. وتفصيلات دقيقة تصنع متعة حقيقية أثناء القراءة |
الكلام دا لما يجي من زول متخصص فى مجال الادب بالتاكيد هو دعم معنوى كبير.
بالرغم من ان هذه اول محاولة لكتابة القصة الا اننى وجدت اشادة من اشخاص لهم باع طويل فى هذا المجال وهذا ما سيكون دافعا للمواصلة فى هذا المجال ونسأل الله التوفيق.
لك الود
والف باقة ورد
| |
|
|
|
|
|
|
|
|
|
Re: بشتنة (Re: المعتمد)
|
المعتمد
احلف ليك بي شنو عشان تصدق انها لذيييييذة بمعنى الكلمة
والله خلتني اسرح معاها (ما تخاف انا معرررررس وعندي ولد كمان وماعندي نية اعرس لي دكتورة)
لكن بالجد البشتنة كدى واللا بلااااش
***ود المسيكتاب ***
| |
|
|
|
|
|
|
|
|
|
Re: بشتنة (Re: Saif aldin Hassan)
|
حسونه دا زول عصامى شكلهو بسبه لى زول فى حلتنا بس الفرق بينو وبين حسن انو داك بتاع مغالكات فى الكوره
حلوه لكن القصه يا معتمد
| |
|
|
|
|
|
|
|
|
|
Re: بشتنة (Re: المعتمد)
|
الاخ ايمن
سلام.
لك الود على هذه الكلمات الجميلة وان شاء الله ربنا يوفقنا ونكتب ما يعجب الاخرين.
Quote: عارف العناوين في البورد ده مشكلة الواحد محتاج يعيد النظر في قرايته للعنوان ودخول البوستات ، لما قريت العنوان ما كنته متخيل انو جواهو الحاجة اللذيذه دي ..
تقديري مرة ثانية والمزيد من فهم المقولات |
حقيقة هناك عنوان لا توحى بما فى داخلها. وعنوان القصة هو غريب لكن لا يوجد عنوان انسب منه ويحوى ما تريد القصة ايصاله للقارئ.
لك الود
والف باقة ورد
| |
|
|
|
|
|
|
|
|
|
Re: بشتنة (Re: المعتمد)
|
الاخ المعتمد
سلام
وقبل اي حاجة الف مبروك ياعريس عرفته متاخر تمنياتي بحياة زوجية سعيده..
Quote: لكن لا يوجد عنوان انسب منه ويحوى ما تريد القصة ايصاله للقارئ.
|
اتفق معك 100% ولم يكن اكثر من عكس انطباعي الاول والمشكلة كانت خاصة اكثر من مرتبطة بقصتك الجميلة ، وهي اني حديث عهد مابعرف غالبية الناس ومجالات اهتماماتهم ، عشان كده حصل مريت بالعنوان كذا مرة وما خشيت .. بعد قرايتي للقصة حسيت فعلا انو ده العنوان المناسب وندمته.
على الهامش
تجربة مليانة جدا ..ياريت نشوف ليك انتاج اغزر ..
لك تقديري مرة تانية
ومودتي والف باقة ورد ليك ياعريس
ايمن
| |
|
|
|
|
|
|
|
|
|
Re: بشتنة (Re: المعتمد)
|
الاخ سيف الدين
سلام.
لك الشكر على هذه الاشادة.
Quote: احلف ليك بي شنو عشان تصدق انها لذيييييذة بمعنى الكلمة
والله خلتني اسرح معاها (ما تخاف انا معرررررس وعندي ولد كمان وماعندي نية اعرس لي دكتورة)
لكن بالجد البشتنة كدى واللا بلااااش |
ان شاء الله كدة تلقى الزولة البتفهمك وتفهما ما شرط تكون شنو لكن الاهم انك تحبها وهى تحب لان الحب يصنع المعجزات.
لك الود
والف باقة ورد
| |
|
|
|
|
|
|
|
|
 Re: بشتنة (Re: المعتمد)
|
يا رائع
زي ماقلت ليك انا عندي تب من زمااااان موش بنحب بعض بس كمان راقدين قرض وميتيت موت الضاااان
قلت ليك يازول وعندي ولد كمان(جدو)
علا قصتك عجبتني تب واكان ما بخاف الله بقول ليك عشتها عديييل عشان كده مبسوط منها ومنك
دحين ارقد عافية
***ود المسيكتاب***
| |
|
|
|
|
|
|
|
|
|
Re: بشتنة (Re: المعتمد)
|
الاخ فرح
سلام.
لك الود والتحية.
قول لى حسن بشتنة حققكم الحكاية بقت فيها حاجات اهم من الكورة يتغالطوا فيها.
والله الواحد سعيد لانه القصة عجبتك وذكرت ناس حلتكم معناها فيها شئ من الواقعية.
لك الود
والف باقة ورد
| |
|
|
|
|
|
|
|
|
|
Re: بشتنة (Re: المعتمد)
|
الاخ سيف الدين
سلام.
معليش لهذا اللبس وانا خايف الحكاية تكون عملت ليك نقة مع ام العيال.
ان شاء الله ربنا يهنيكم ببعض ويسعدكم ويخلى ليكم جدو الصغير
لك الود
والف باقة ورد
| |
|
|
|
|
|
|
|
|
|
Re: بشتنة (Re: المعتمد)
|
Quote: الاخ المعتمد
سلام
وقبل اي حاجة الف مبروك ياعريس عرفته متاخر تمنياتي بحياة زوجية سعيده..
Quote: لكن لا يوجد عنوان انسب منه ويحوى ما تريد القصة ايصاله للقارئ.
اتفق معك 100% ولم يكن اكثر من عكس انطباعي الاول والمشكلة كانت خاصة اكثر من مرتبطة بقصتك الجميلة ، وهي اني حديث عهد مابعرف غالبية الناس ومجالات اهتماماتهم ، عشان كده حصل مريت بالعنوان كذا مرة وما خشيت .. بعد قرايتي للقصة حسيت فعلا انو ده العنوان المناسب وندمته.
على الهامش
تجربة مليانة جدا ..ياريت نشوف ليك انتاج اغزر ..
لك تقديري مرة تانية
ومودتي والف باقة ورد ليك ياعريس
ايمن |
الاخ ايمن
سلام.
الله يبارك فيك ويسعدكفى ايامك.
حقيقة فى كثير من الاحيان يختار الواحد منا مواضيعه التى يقرأها على ضوء العنوان وفى بعض الاحيان على اسم الكاتب. ولكن هناك بوستات جميلة جدا لا يوحى عنوانها بذلك وليس لكاتبها من الشهرة ما يجعل الاخرون يدخلون لبوستاته.
فانا مثلا دون ان اقرأ عنوان البوست ادخل بدون تردد على اى موضوع للاخ ود قاسم مثلا لانى خبرت كتاباته وجميعها كانت ممتعة وكذا لعدد من الكتاب. الا اننى اقوم فى كثير من الاحيان بتمشيط المنتدىحتى اكتشف الكتابات الجديدة والجيدة.
لك الود
والف باقة ورد
| |
|
|
|
|
|
|
| |
المعتمد
بدرالدين شنا
jini
ALGARADABI
عبد الحميد البرنس
Aymen Tabir
فرح
فيس بوك
تويتر
انستقرام
يوتيوب
بنتيريست