|
|
 يا بلد قوم غسل وشيك
|
المبدع طارق الامين يرسم صورة واقعه ويلتقط الصور الساخرة
يا بلد قوم غسل وشيك
وبطل الجن والكواريك
خلينا من الواك واك وعيك
وتاخ تاخ تراخ
وساك ساك وسيك
يابلد لي مين اشتكيك
وانت جاك الخطر الوشيك
وانت اصلا من العليك
مش ح تأدر تغمض عينيك
يا وطن خليك يوم ظريف
وامسك الصابونه والليف
العرش مقدود وما نضيف
ولسه جاي عليك الخريف
الملاية مكرفسه وكيف
ومنظرك في النوم جد مخيف
مرة تشخر ومرات تقيف
ومادي بوذك والشلاليف
غبار وصينيين دقاق
يبيعو فكس في اخر الزقاق
حفر كبار
خيران ودقداق
ضل في الشمس ..وهبوب ورقراق
ولافتة مكتوبة «إلى العراق»
كارو بيبيع الموية جم شاطي البحر
وباعوض... وحر
وواحدين بحفرو في حفر
وتانين بيدفنو في الحفر
من حقهم
مش حفرتم
من حقهم وفقا لقانون الحفر
طبالي رغيف وطعمية ... وجكه شرطة شعبية
ونفايات رايعة مرمية... في العاصمة الحضارية
غنمايات جم سفارات... لوحات فلكلورية
شحادين... عواطلية... مشاهد روعة فنية
شوايات وكرنتات ... ومولانات بي ماهية
وسك ركشات وايجارات ... زي سك الحرامية
ايصالات وايرادات.... سلامتنا المرورية
فرامل اليد مع الخطرات ... مخالفة مية في المية
لكن تدفع ايصالات ... تذور تمشي عادية
ومشاكل الطلبة في الباصات.. ورائحة السكرجية
***
حاجات تفوق حد الوصف
وكشك عصير
واستريو قال «ما بنختلف»
اديني بس حق الرسوم بحسب قروشك الف الف
اوسطوب .. ختف
ممنوع تقيف... ممنوع تفوت .. ممنوع تلف
طمبوجة .. محلوج البلف
طمبجني بي موية هواك
عند الخريف .. بي موية رفضت تنصرف
ما بنختلف ... وما بننصرف
وسماسرة زاكين محترف
حاصل شنو.. احسن عديل زول يعترف
وما بنعترف
لازم ندور او نلف
وريني بس حتة رسوم مافيها ربكة ولا لغف...
عالم مركب بالغلط
طابونه بتبيع اسكريم راكوبة في نص الظلط
سيرة حمام وزين وبط
وخرفان مسنسنة واقفة لط
مستر عتود لابس شبط
رفض الضبح قال ارتبط
صف التلج عز السقط
خلونا من هذا العبط
واحدين قروشم بالربط
واحدين دماغم الا خط
وكان عقد امتنا انفرط
سودانا بالضحك انشرط
|
|
 
|
|
|
|
امير عبد الماجد
فيس بوك
تويتر
انستقرام
يوتيوب
بنتيريست