|
|
 قهوة أولاد أمدرمان
|
|
|
 
|
|
|
|
|
|
|
|
Re: قهوة أولاد أمدرمان (Re: محمد ابو القاسم)
|
الاخ محمد ابو القاسم ..
| Quote: (امدرمان لا يعرف سحرها لا اهلها) |
لك الود وخالص التحية .. اثرتني هذه العبارة
فدلفت عبر هذا البوست الجميل إلى قهوة اولاد امدرمان ..
وعبر بوابة عبد القيوم ..وهذه الكلمات الرائعة في حق البقعة المباركة ..
أم درمــــــــانـــــ ..
وأي حب هذا يا أم درمان الذي نحمله اليك في قلوبنا..
| |
|
|
|
|
|
|
|
|
|
Re: قهوة أولاد أمدرمان (Re: waleedi399)
|
وليد الغالي
| Quote: امدرمان لا يعرف سحرها لا اهلها |
دي عبارتي دوا عند الحديث عن امدرمان
وكم اعشقها مثلك تماما ولي فيها زكرياااااااااااااااات جميلة جدا
شكرا ليك يا غالي
مع ودي وسلامي
| |
|
|
|
|
|
|
|
|
 Re: قهوة أولاد أمدرمان (Re: محمد ابو القاسم)
|
الاخ/ محمد ابوالقاسم
عبرك التحيات النواضر لكل ذرة مل فى ام در
فأم در وصفها الشاعر العبادى بكلماته الشهيرة والتى اذكر منها
أمدرمان قامت بجهله
وابت اهله
كلمات قليلة الحروف ولكنها تحمل فى داخلها مضامين غارقه فى الطيبة والبراءة وامدرمان فتحت ابوابها لكل ابناء السودان لدرجةان اهلها عندما ضاقت بهم الظروف وجدواامدرمان تضم الوان الثقافات المختلفة يرضعون من ثديها وتنكرت لهم لا كراهية ولكن من أجل حقوق الرضاعة وحق الامومة لابنائها الجدد ليدبوا فى كنفها ويصبحوا جزء من اولادها فبذالك تكون امدرمان هى اول مدينة تفتح ازرعها لتحتضن كل ابناء السودان لما لا يحدث هذا وهى فوق كل ذالك العاصمة الوطنية
ولى عودة
تحياتى
| |
|
|
|
|
|
|
|
|
|
العــودة الـيك يا أم دمــان (Re: محمد ابو القاسم)
|
عشـــرقـة الأشــــــواق
..
.
هـا هـنا ســأحـط رحلـي ..
وهــنا ســوف أضـع طـاولتـي ..
في انتظار أصدقائـي ورفاق الصـبا..
فـرســان أحــلامـك ..
الـذين يشتــهو لـثـم ثغـرك الباسـم ..
وضــمهـم لـدفـــئ احضــانـك ..
هـا هـنا نسعـد .. ونهـنأ.. ونمــرح
علــى تـرابـك ..
ونطفي من نهــلك يا أم سـعـدي حرقة الاشواق ..
علـى رحـــابـك ..
الحــب .... الصــدق .... الدفـئ
..
.
التحــنان ... ديـدنـك
يا...
أم درمـــــــان
فـكــونــي .. كمــا تشـــائـي
| |
|
|
|
|
|
|
|
|
|
Re: العــودة الـيك يا أم دمــان (Re: محمد ابو القاسم)
|
رسائــل ســت الدار بت احمد جابر
محمد الحسن سالم حميد
للزين ود حامد
)تلغرافات(
باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات والحيكومة السمها فاير
أم أولادك ست الدار بت أحمد جابر
ست الدار بت أحمد كيفك
جاني جوابك مفتوح شارع
جاني جوابك وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني يا اخيتي ومرتي وامي وأم الكل
أنا بندهلك من شارع الله .. فوقي هجير والتحتي بقل
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد
جاني وفد في المصنع زاير .. وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا ... سيرو موكب صامد وصامت
إتضامنا معاهم سرنا ..
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة .. والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع .. مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي .. وكل وجوه الراسمالية
وأشرف من ..............
داك الحين المصنع هاج
جات عربات اللات بوليس .. فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان
(بعد الحاصل والإتحصل ست الدار بت أحمد تكتب) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض ..بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات .. مرتاً دغري وغلباوية
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو .. فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
طالو الناس التريانين .. ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
ا########## تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد وا########## جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد
| |
|
|
|
|
|
|
|
|
|
Re: العــودة الـيك يا أم دمــان (Re: محمد ابو القاسم)
|
الفوراس والكوارث
هاشم صديق
ياتو ورقاً
اتمضا
وكان دوانا
من الأذى؟!
...............
ياتو ظُلماً
اتنسى
بس عشان
مكَّاً ضحك
أو عشان
سِيِداً عفا؟!
ياتو خُطباً
في إضينّا
جَملّت في عيونّا
شينه؟!
وياتو تلفاز
ياتو رادي
ياتو راوي
ياتو زينه
لَبسّت عريانّا
توب
وبدّلت طعم
(السخينه)؟!
وياتو حلماً
في عصورنا
ما صبح باللّت
عجينه؟!
وياتو مركب
في بحَرْنا
طاش صوابها
وهدهدت أعصابها
مينا؟!
وياتو راجلاً
بالبشارة
جانا
من أقصا
المدينه
و (بالبشاورة)
كان مسح
سبورة الرحلة
الحزينه
وكان غرس
في الليل
بشارات الرتينه
وشَفانا
من جوع
أو حفا؟!
ياتو مسرح
ابتدا
واسيادنا
ماكانوا الفوارس
ونحنا كومبارْس
الحوادث؟!
وياتو والي
في المنابر
ما خطب فينا
ونَهَر
مليون شهر
ونحنا قاعدين
في البنابر
قدامو
زي شُفَع مدارس؟!
وياتو دستور
ما صِبِح في راسنا
قمبور
وياتو اعلان
أو بيان
ما انْغرس
في حلوقنا أحزان
وياتو لحماً
للعضام
يوماً رجع
وياتو آذان
يا عسس (مالطا)
انسمع
وياتو صفاً
إنقسم
وعاد يتمم
وانجمع؟!
وياتو رُتبه
وياتو قُبه
ما بقت
في اللفّه كُبه
وياتو صوتاً
من وجع
دمدم هتف
ما انقطع حبلو
ونزف
وبالأوامر
والكوامر
اتنفا؟!
أحلام بتنقح
طول دبابيس
الليالي
ولما جمر الدنيا
يصبح
وما انجبر
يا دنيا خاتر
لسه لافّانا
المواجع
والصفافير
والمواتر
.....
سِيِداً مرق
سيداً رجع
مكَّاً دخل
مكَّاً طلع.
شيخاً لَبَد
شيخاً نَبَل.
سيفاً ضِحِك
كشّر كَتَل.
ورقاً جبل
ورقاً سَهَل.
صِدْقَاً أَفَل
كِضباً لمع.
صنماً وقف
صنماً وقع.
كفاً عصر
كفاً قلع.
...........
والأماني
لسه في حال
(الصواني).
لقمه طاعمه
وبي كرامه.
حبة احساس
بالسلامه
رجعه لي قيف
الشهامه
مَرْقة
من (عصر)
القيامه
فرحة ما تكمل
ندامه.
لاها قصراً
أو دواير.
لاها بستان
أو مناظر
لاها (مول)
في (وادي شنقول)
وكبري طاير
في (القماير)
لاها أموال
في الخفا.
أعفونا
من كُتْر (التحالف)
و (التخالف)
والشراكه
والشياكه
والمواثيق
والتواثيق
والورق.
كم مره
أذَّنا الفَجُر
قبال نفيق
شَفَقُو انسرق.
كم مره
بشرتو الخُشوم
أكلت عديل
مُر الصفق.
كم مره
جربنا (البيان)
كم مره
جبناكم عيان
نِشِف البلد
قلبو انحرق
........
الشعب وين
يا مؤمنين
ودستورو
في حَله انسلق؟!
و (القسمه)
في ثروة منو
والشعب
بي جوعو انشرق؟
و(النسبه)
في سُلطة منو
و(سُكرنا زاد)
(بالنسبه)
في الدم انطلق.
........
انتو الفوارس
والمكوك.
الدايْر يبيع
تدوهو
(في جاهكم يلوك)
واللسّه
ماسك في الجَمُر
ياريتو بس
يلقى النبق
والجوع يقَطِّع
في الحشا
ألفين سنه.
أدونا بس
حق الصَبُر
خلونا
من غش الكلام
وعد الرخا
وليلة القَدُر.
خلونا
من كضب
البشاير
في القصايد
والجرايد.
أدونا بس
حق الفطور
أعفونا
من حق (العوايد)
و (النفايات)
والدوا
وكفايه
(فك عكس الهوا)
............
يامؤمنين
الشعب وين؟
تاكلو الثمر
والشعب تدوهو
النوا؟!
خلونا
من حشد المواكب
بي أجاويد الجرايد
والإذاعه
والإشاعه
وبي مناشير
الوظيفة.
كم مره
دقيتو النحاس
في لمبه
طقّت وطرشقت
أو (زره) جاتكم
حتى لو كانت
خفيفة
أو (نِبْلَه) ناشت
باب جنابكم
وعطسه قَدّت
للرهيفه
أو هاجسه
مرقت
من عقول
عَسَس الخليفة.
........
خلونا نمرق
من هدومنا
ونغلي نهتف
للكرامه
والشهامه
والحساب
الفي الكتاب
وللرغيفه
وللحليفه :
- مافي جُحراً
تاني بلسع.
ومافي عذراً
للفوارس
تاني بشفع.
ومافي ومضاً
في عقولنا الصاحيه
نلقاهو انطفا
ومافي رجعات
تاني للشوك
والحفا.
ورونا كيف
ننسى الكوارث
يا فوارس؟
الإنكسار
الإنشطار
الإنحسار
الذِلّه لي ناساً
كِرام
موت العُروض
دك الفروض
بلْع الحرام.
ورونا كيف
بس لينا يوم
(بعتوا الترام)؟!
ورونا كيف
لمعت وشوش
كبرت كروش
وأنحنا ناس
ربط الحزام؟!
كَسَر الخراب
مِرْق البلد
حتى النفوس
صبحت حطام.
أدونا بس
فَرْق العُمُر
سووا المعاش
حبة لحم
فوق العضام.
أوضحكه
من جوه القَلِب
أو لمبه
في جوف الضلام
ولو أصلو موت
أدونا موت
حق الكِرام
.........
خلونا
من جنس التخاريف
في الثقافه
ومهرجانات السخافه
أدونا بس
حبة (كُنافه)
..............
ياتو حرفاً
يوم هتف
بي غُبنو
أو صادم وقف
أشّر
على حق (اتلهف)
أو على خَطْف
الشَرَف
أو غَنّا
للناس والشَمِس
واتحدى للظلمه
وعزف
وما اتخنق صوتو
ونَزَف؟!
...........
حريه وين
يا مؤمنين؟!
صوتنا وين
يا موحدين؟
............
الشعب وين
في السُلطه
يا أُمة محمد
ويا يسوع؟!
(القسمه)
في المال والحُكُم
ولاّ المظالم
والدموع؟!
...........
يا شراكه
يا تحالف
يا (تخالف)
يا شياكه
يا قِباب
يا رهاب
يا خطابه
يا شيوخ
يا شلوخ
يا مهابه :
- انتو الفوارس
في المسارح
ونحنا كومبارْس
الغلابه.
انتو أبطال
القصص
نحنا التلاميذ
في الحصص
انتو الأكابر
في المنابر
ونحنا
حُراس المقابر
بِتْصَدِقوا
أو تضحكوا؟!
قسماً عديل
يا نبقى
نحنا الساده
والحق والقياده
وانتو خُدامنا
وزياده
نطلع نكون
نحنا المنابر
والإمامه
أو تقوم بينّا
القيامه.
الشعب ما ضحكه
وقمامه
والصَنّه
ما بر السلامه.
.............
يا ناس كفايه
من خراب
نُبل الضماير
والهواجس
في البشاير
ومن طلاسم
جايه باكر
ومن تعاويذ
(الولاده)
ومن كضب
يوم السمايه
ومن تهاليل
البدايه
ومن عويل
خط النهايه
ومن صراع
كل الديوك
للكراسي
وللولايه.
يا (مبيور)
ويا (جَلاّبه)
انحنا الشعب
سَدْرَنا ولّع
وكَرْكَرْ تَب.
حتفاوضونا؟!
ولاّ نولِّع
ونبدا حرابه
نَخُش الغابه؟!
ياتو ورقاً
اتمضا
وكان دوانا
من الأذى؟!
..........
وياتو ظُلماً
اتنسى
بس عشان
مكَّاً ضحك
أو عشان سِيِداً عفا؟!
هاشم صديق
10/7/2005م
| |
|
|
|
|
|
|
|
|
|
Re: العــودة الـيك يا أم دمــان (Re: فرح)
|
عبدالله ود الزين وهو يلهج:
(أمدرمان)
حبيبي جميل
جمال فتان
جمال تظهر سماتو الحلوة ميزات جوهر الانسان
جمال زى بقعة ام درمان
جمال فى طابعو سوداني
جمال فى شكلو انسانى
جمال ما فيهو دور تالت ولا تانى
جمال فى بيت من الجالوص
وفوق للشعبة رابط سعف منسوج من حبال و بروش
ووسط الحوش
تنوم العزة تتوسد لحاف بالعاديات مفروش
حبيبي جميل
جمال فتان
جمال رايع
جمال فى قبة او جامع
جمال فى طابية بتدافع
جمال فى طاقة بتقبل على الشارع
وقفة بتقفل الطاقة
وزحام فى شارع الصاغة
وضيف فى خلوة او دهليز
وزول نايم تحت لالوبة او جميز
جمال ما بحسو غير زولن لعب شدَت ووسط الميس
حبيبي جميل
جمال بطران
جمال شبعان
جمال زى بقعة امدرمان
وامدرمان
بيشوفا الرامد المرضان:
بلد بيموت
وعز بيفوت
وواحدة عجوزة راجية الموت
وامدرمان
بعين الشاعر الانسان
وعين البعرف امدرمان:
سلام وامان
تخش بحمار
تسوي حصان
تنوم بردان
تقوم دفيان
واسمعو كيف بقول عبدالله ود الزين
وليد الاوليا الصالحين
وليد الشهدا و الشاهدين
واسمعو كيف بقول فى ام در
وليد البر
انا امدرمان سليلة السيل
ولد ولدونى بالتهليل
انا امدرمان..
إسماعيل حميم
| |
|
|
|
|
|
|
|
|
|
Re: العــودة الـيك يا أم دمــان (Re: محمد ابو القاسم)
|
خاطرة امدرمانية – لماذا كنا احسن ؟
نقرأ ونسمع ونشاهد فى التلفاز ما كان مستحيلا فى امدرمان القديمة , جيوش المشردين والشماسة والاطفال الجياع الذين يسكنون المجارى . والمؤلم ان هذه الظاهرة صارت فى ظل حكومة البر والتقوى تعتبر عادية . قديما كان المجتمع يتحمل مسئوليته مسئولية كاملة نحو الجميع من مواطنين ووافدين بدون تفرقة . وامدرمان الرائعة تستقبل الجميع بصدر رحب وتلقم ثديها وترضع كل محتاج . ولهذا قلت قديما :
جراب العرد
يا بلدا زى نهدا مــــــــا عرف شقريب
حلوة زى الحجرى فى الشلوح عسليب
جراب العرد تشيل وما بتابا غريب
فيكى العليل بيطيب
وانتى للمريض محريب
ساكن البقعة ما بضوق المر
وزول امدر كان ما نفع ما بضر
الحنقوق نوعين الرقيق و الضكر
والخلق شكلين فيهم البعرف امدر
الشقريب = انفطار الجلد لحمل او ترهل
الشلح = عرق البطيخ او الشمام
الحجرى = الشمام او البطيخ فى اول الشلح
العرد والمردس = بضم الميم والدال نباتات تستعمل فى صبغ الجلد.
جراب العرد اقوى واجمل جراب .
فى نهاية الخمسينات , وفى الشارع الذى يمتد من دار الرياضة امدرمان مارا بجامع الهاشماب الى العباسية كان يسكن الاخ صعلّك . واول مرة اشاهده كان يحمل جردلين من الماء لان منزلهم لم يكن به حنفية . وحيّاه صديق الطفولة مختار الطاهر ( ازيك يا صعلّك. وعرفت انه اشتهر بالاسم بسبب شيطنته . وكنت اشاهد عربة كارو تقف امام المنزل فى بعض الاحيان , اظنها تخص والده .
فى 1959 وصعلك فى حوالى الخامسة عشر من عمره حكم عليه العميد يوسف بدرى الذى كان قاضيا فى محكمة الاحداث بالجلد . لان صعلك قد قبض عليه متلبسا بالسرقة . وفى حيثيات الحكم ذكر يوسف بدرى ان الحدث صعلك يعيش فى حى الهاشماب واطفال الحى من اسر ميسورة ويذهب ابناؤهم الى السينما ودار الرياضة بانتظام وصعلك محروم . وحدد لصعلك مصاريف 150 قرش شهريا يستلمها من الصراف عبدالعظيم فى مكتب السردارية القديم فى نفس حوش مجلس القضاة الاوسط . حيث يجلس العم عبدالرحيم محمد خير صاحب مصانع العطور وبعض اعيان امدرمان وينظرون فى الجنح والقضايا الصغيرة .
وفى هذه المحكمة كان القاضى مثل عمنا الصائغ يحاول ان يصلح بين المتخاصمين فى الاول قبل النظر فى القضية . وعند الموافقة يبتاع المتهم اورنيك بثلاث قروش ويكتب العم جادين صافى الدين الذى يجلس تحت الجميزة الجنوبية و سكن فى شارع السيد الفيل العرضحال ويتقاضى خمسة قروش ويعمل كذلك كشاهد زواج واستشارى للبسطاء . او العم حجازى ويصنع كذلك الاختام النحاسية الصغيرة , ومكتبه كذلك عبارة عن تربيزة صغيرة تحت الجميزة الشمالية ولا احد يتعدى على هذه الترابيز فى المساء .
فى هذه المحكمة شهدت كثير من المحاكمات بعضها كنت متهم انا فيها بسبب العراك والشجار . وحكم علىّ بالسجن وانا فى السادسة عشر بتهمة تسبيب الاذى الجسيم . واستبدل الحكم الى غرامة وتعويض المجنى عليه عندما تأكد اننى طالب . وواجه محمد ادريس رحمة الله عليه صاحب بازار الاحفاد وعبدالمجيد (الاحمر) صاحب البوكس ويسكن غرب طاحونة ام سويقو فى العباسية بتهمة استلام المال المسروق فلقد باعهم صعلك بعض الاغراض ولكنهم برئا لانهما تصرفا بحسن نية .
العم ادريس الهادى صاحب الورشة الضخمة فى المنطقة الصناعية كان كذلك احد القضاة فى محكمة الاحداث . وكتن يوظف الاحداث الجانحين فى ورشه التى تسع مئات العمال . وهو ابن ست بتول عيسى من اول القابلات فى السودان وتلميذة بابكر بدرى فى رفاعة وقد كرمتها الامم المتحدة لانها عملت كقابلة ومدرسة فى مدرسة القابلات لسبعة وستين سنة متواصلة واهملناها نحن . ابن ادريس الهادى احمد تزوج من ابنة عبدالكريم ميرغنى وكان يسكن مع الوالد عبدالكريم ميرغنى , وكمال عبدالكريم ميرغنى سكن عند ادريس الهادى لانه متزوج من شقيقة أحمد . وقديما ولا يزال فى امدرمان يصير الرجل أقرب الى اهل زوجته .
العم بشير محمد احمد من بيت المال كانت له ورش ضخمة للنجارة فى المنطقة الصناعية . وكان يعلّم كثيرا من الصبية أصول النجارة فى ورشه ويرعاهم كابنائه
كان يندر ان ترى فى كل بقاع السودان شماله وجنوبه وغربه لوريا وليس منحوت فى ترباس صندوقه الحديدى كلمة (ختر) بضم الخاء والتاء وختر كان صاحب ورشة فى امدرمان يعمل فيها عشرات الناس وكثير من الصبية ويصنع اجمل صناديق للوارى ويعلم المهنة للصبية .
العم ناصر الحداد كان يتحمل مسئوليته كمواطن امدرمانى وعلى يديه تعلم كثير من الصبية الحرفة , منهم الفنان ابراهيم عوض عبدالمجيد وصديقه سليمان قلووظ . وصديقهم كان عمر ابراهيم بدرى الذى كان يدرس فى الاحفاد الا انه كان لا يفترق عنهم .
ملجأ القرش انشئ بجمع الفلوس قرشا قرشا. وكان بعض الطلبة يسكنون فيها ويدرسون .لقد تخرج منها اعظم الصنّاع , بعضهم اصدقاؤنا ومنهم الميكانيكين والبنايين والسروجية ... الخ .وكانت لهم فرقة موسيقية رائعة وفريق جمباز وفريق كرة قدم وفرقة كشافة وليتنا نتحمل مسئوليتنا ونحن الان مقصرون بالرغم من الفلوس التى تنهب من المواطنين من رسوم وزكاة وضرائب ؟ واين فلوس البترول ؟ .
فى الثمانينات كنا فى الطريق الى الخرطوم فى الصباح مع شقيقى الشنقيطى رحمة الله عليه . فلاحظنا مجنونا يقف فى الصينية امام صيدلية امدرمان فى السوق . وشاهدنا اثنين من المجانين فى صينية المجلس البلدى , وثالث متسلقا عمود النور فى وسط الصينية فى الموردة , فقال الشنقيطى ( بلد عجيبة , يعنى الواحد لو هسى جنه ما يلقى ليه صينية فاضية .)
حتى المجانين قديما كانوا يعاملون برقة , وهنالك من يهتم بهم .(كرضم)مثلا , كان يجلس امام المجلس البلدى طيلة اليوم وهو يحدق فى قطعة من الحديد يمسكها بيده اليمنى بالساعات الطويلة . ثم يذهب الى منزل العم الضابط المتقاعد سليمان ابراهيم بالقرب من بوابة عبدالقيوم ويجد الملبس والمأكل والمسكن .
بعد ملاسنة مع رفيق الدرب مامون يوسف المامون ابن الموردة والذى لازمنى فى براغ والسويد , قلت لمامون عاجبك الكلام دا ؟ فقال لى ما جعلنى انفجر ضاحكا : كرضم قال شنو يا شوقى . وكرضم لم يكن يتكلم ابدا . وعندما خوطب فى سوق الموردة لم يرد. فقالوا له تعال يا كرضم هاك حديدة , فغسل القائل بنظرة باردة وقال ما صار حكمة ( حديدكم ما بشتغل معانا.
)قهوة اول) كان اسم عرف به شيخ متقدم فى السن يفتل الحبال فى الشارع وتمتد حباله من منزل آل البيلى فى نفس شارع المركز الثقافى البريطانى سابقا ومكتبة البشير الريح الحالية , والشارع يتجه نحو الموردة . وفى الشارع منزل آل ابوسنينة وآل شكاك وعبدالله الشيخ وآل اسحق , منهم صديق الطفولة والشباب (ابو رزقة) وشقيقه عبدالعزيز رحمة الله عليه حلاق سوق الموردة المشهور. وفى الحى آل فرج الله , وآل قسم السيد الكابتن وآخرون . وعندما يفرغ الشيخ من عمله يطرق اى باب فى الحى . وعندما يسأل اذا كان يريد طعاما او شايا يقول (قهوة اول) ولهجته كانت اقرب للهجة النايجيريين. وبالرغم من شيطنتنا لم نكن نعبث ابدا بحباله .
المرضى والمجانين يعاملون الان وكانهم مجرمون . والمجرم هو المجتمع الذى يهملهم والغريب ان المسيحين والرهبان , خاصة فى الجنوب , كانوا ينشئون معسكرات كبيرة للمجزمين ويتعهدونهم بالرعاية والعلاج والأكل , وكذلك مرضى الكلزار والسل . وفى نهاية حكم عبود طرد المبشرون والقسسة وانتشر المجزمون فى السودان.
ويخبرنا العزيز هلال زاهر سرور فى كتابه ذكريات التونج كيف كان الناس يقفون بالعصى الغليظة لضرب المجزمين وابعادهم عن براميل (المريسة) حتى لا يدخلوا ايديهم فيها فيعافها الناس ويتركونها لهم . والسؤال لماذا لم يكن المجتمع يهيىء براميل خاصة للمجزمين فى الاحتفالات ؟ ولماذا ننفر نحن من المجزمين ؟ صديقى كمال كان مجزما , وكان يسكن فى العرضة كجار للخالة مريم والدة المبدع محجوب شريف فى
مواجهة منزل اختى فاطمة ابراهيم بدرى والسفير ولاعب الكرة قاقارين وشقيقه وزميل الدراسة النرب . تعرفت بكمال عن طريق ابن عمتى عثمان عبدالمجيد على طه . والغريب أنه كان هنالك أسرة ة هندية تشاطرهم السكن . والزوج على عكس الهنود منفتحا على السودانيين يحب العرقى والبنقو, وسجن لفترة لأنه زور روشته فى غياب طبيبه وتحصل على حبوب لا تصرف الا عن طريق الطبيب .وأخذ أهل الحى بالهم من أسرته فى غيابه .
وكان لنا صديق آخرمجزما اسمه رمضان فى فريق السوق . تعرفت به عن طريق صديقى الملاكم عبدالرحمن ككس(بكسر الكاف) عجلاتى فى السوق . وأخيرا جمع المبشرون المجزمين فى مستشفى التجانى الماحى فى بداية السبيعنيات . وكنا نشاهد الأطباء الأمريكان يحملون المونة على أكتافهم ويبنون الحمامات فى الجزء الشمالى. الا ان السلطات انتزعت المستشفى وصار مستشفى التجانى الماحى . وفى الاربعينات والخمسينات كان الاستاذ الأديب المبارك ابراهيم المذيع فى امدرمان ومقدم برنامج الحقيبة كاتب هذه المستشفى ومسئول الادارة . وكان العم جادالله والد الاخوة محمود وعلى ومنصور وآخرين , الدينمو المحرك فى ذلك المستشفى ويسكن هو وعائلته فى حوش الارسالية الذى حوى فصولا لمحو الامية وهو شرق المستشفى مباشرة , لعلاج كان مجانيا . الم نكن نحن قديما ارحم من اليوم ؟ .
على ظهر شهادة الميلاد السودانية , وهى الوثيقة التى كانت تقدم مجانيا , هنالك صيغة تقول (ان الوالد ملزم بتطعيم ابنائه فى خلال ستة اشهر من تاريخ الميلاد والا تعرض للسجن أو الغرامة أو العقوبتين معا . العلاج كان يفرض مجانيا وبالقانون . والان لا يجده الانسان بالفلوس.
بعض الناس كان يظن ان التطعيم ضد الجدرى مضر. وفى احد الايام وأثناء محاكمة مهمة سمح المفتش الانجليزى بدخول الناس الى حوش المحكمة على غير عادته . وحثهم على الدخول وعندما امتلأ الحوش قام بقفل الابواب وكشف ذراعه للتطعيم وقال (ما فى زول يتلأ بدون قراهة) . التحية
شوقى بدرى
| |
|
|
|
|
|
|
| |
محمد ابو القاسم
waleedi399
Mamoun Ahmed
حسام يوسف
بلدى يا حبوب
يازولyazoalيازول
فرح
إسماعيل حميم
فيس بوك
تويتر
انستقرام
يوتيوب
بنتيريست