|
|
 مريم حريقة .. كوميديا شيطانية .. مشروع مسرحية هزلية .. CoOLDOwn
|
مقدمة للمسرحيه مع موسيقى تصويريه تواتريه
تقع انداية مريم حريقه على الطرف الغربي من احد احياء الطبقة المتوسطه
وهو منزل كان مهجورا لم يكتمل بناءه (اوضتين وبرنده) حيطة زباله قصيره و مشرتمه تزينها بعض شظايا( قزاز) المشروبات الغازية كالبيبسي ,الكولا ,استيم تفاح وخلافه
يعني بالمختصر المفيد كده(( حيطة تتمطى وتفلًق في قفا الزول البناها)) كما تقول اغنية عقد الجلاد او كما يقول الشاعر هاشم صديق
""بينتا طين واقع مشرم ولما خال الكين يحنن نشقى شان يلفى الزباله""
وتحكي الرويات ان منزل حريقه ست العرفي ترجع ملكيته ل صلاح كباشي الذي مات مقتولا في معركة سقوط مدينة كاجي كاجو الداميه بجنوب السودان
حيث كان المرحوم حينها يعمل بسلاح المدفعيه برتبة ملازم اول بسلاح التوجيه المعنوي وهو فرقة في الجيش لا يحمل من يعمل بها سلاحا وينحصر عملها فقط في شحذ الروح المعنويه للجنود
يعني بالعربي كده فرقة لا بطًقع لا بتجيب الحٌجار
وتقول شمارات نسوان الحي وبعض المعارضين للحكومه ان منزل صلاح اعطته الحكومه للمرحوم نتيجة تفانيه في خدمته العسكريه بالجنوب او ربما اعطته له لانه احد كوادرها
الذي قضي صلاح به كل زهرة شبابه حتى دخوله سن الاربعين فورث المنزل عن المرحوم بعد وفاته شقيقه الاكبر محجوب وقام بتأجيره لمريم قبل هجرته لدولة ماليزيا
ولكن( تحت تحت كده) انطلقت العديد من الشمارات بأن مريم حريقه لم يجيبها الدرب لهذا المنزل بمحض الصدفه وحكاية انها مؤجرة البيت دي مكنة ساي
ومريم جات البيت عشان تسكن في بيت المرحوم (صلاح) راجلها الذي تؤكد الشمارات الرسميه وغير الرسميه
بزواجه منها ولكن هذه الشمارات لم تؤكد ان كان كل ابناءها الاربعه ام فقط البنتين هما ابناء المرحوم
بغض النظر عن صحة تلك الشائعات من عدمها تبقي هنالك حقيقة واحده وهي ان مريم حريقه
هربت باولادها تبحث عن بيتا ياويهم من ويلات الحرب بالجنوب وهي رحله شاقة وطويله
لم يكن لها ان تكلل بالنجاح لولا قوة شكيمه مريم واجادتها للغه التي يتخاطب بها اهل الشمال
وهو مما يرجح مقولة زواجها من صلاح ,,, والعلم عند الله
يقع المنزل كما قلنا في موفع يبعده من الحركة اليوميه لسكان الحي او الاحياء المجاورة ولا يعكر صفو هدؤه
سوى بعض الصبيه الذي يمارسون لعب الدافوري عصرا في الفسحه الخاليه التي تقع على في وسط المنطقة التي تعزل المنزل عن باقي
منازل الحي كما لايستثني من هذا الهدوء الذي يخيم المنزل هدير بعض الركشات التي ( تزًن وتبرطع جيئة وذهابا) في الطريق الذي استنبطه سائقي
الركشات بديلا للشارع الرئيس بعد مطارادات يومية من شرطة المرور والنجده واطلقوا عليه اسم شارع روما
والاسم الاوربي لعله محاولة لطمئنة الركاب بان كل الطرق وان اختلفت اشكالها وتضاريسها تؤدي الى روما
ولتطمين الركاب بصورة اكبر اجمع السائقين على عدم المخاطرة بنقل الركاب عبر شارع روما من بعد مغيب الشمس
اتقاءا لشر الحفر والمطبات التي لسان حالها يقول لهم في ذلك الليل البهيم كما يقول المدافع الارعن للمهاجم الحريف ياكراعك يا الكوره
وبالطبع المقصود بالكوره هنا هو الركشه اما الكراع فهي قد يكون المقصود بها السائق او الراكب او الاثنين معا
لعل الزائر لمنزلل مريم حريقه قد يتردد بعض الشئ من الدخول لوجود الكلبه( حكومه) كالديدبان بلغة الجياشه اربع وعشرين ساعة
قدام خشم باب الزنك المتهالك الذي يستند على (مرق عنقريب) مما جعله يبدو كالعجوز المتوكئ على عصاة .
ولكن هذا التردد بالدخول يزول بسرعة البرق لأن الكلبة حكومه على ما يبدو تدخر طافتها فقط لمطاردة اضحاب الركشات ( المساكين ) نهارا
و لحسن حظ زائري الليل ان تلك الخاصية تجعلها في معادلة عكسيه معهم, فهم يسبحون نهارا ويضبحون ليلا وهي تسبح ليلا وتعضعض نهارا
|
|
 
|
|
|
|
|
|
|
|
Re: مريم حريقة .. كوميديا شيطانية .. مشروع مسرحية هزلية .. CoOLDOwn (Re: humida)
|
مشهد آخر
ليلة صيفية من ليال السودان الحارة والقمرة تضرب باشعتها على ارضية حوش مريم حريقة الرملي وعلى بعض الوجوه الشاحبه
التي جلس اصحابها في شبه حلقة .. 0
على اليمين وعلى حافة سرير مهتوك تاكلت ارجله
من فعل الصدأ الذي قام في غفلة من صاحبة المنزل بقضم رجل سرير باكملها ,فقامت ست البيت بتركيب رجلا صناعية بدلا عنها وهي عبارة عن صفيحة جبنه وضعت فيها بعض
من سم الفار عسى ولعل ان يقتل السم ذلك المخلوق الذي لايعجبه من طيبات البيت من قرقوشًٍٍََُِِْ وكسره ناشفه الا كرعين السراير على اي حال وجد محمود الكضاب و ود الجاك انفسهم مجبرين على الجلوس على حافة السرير مبتعدين عن المغامرة بالجلوس في وسط السرير المهتوك (هتكت عدوك) لأن التجربه علمتهم ان الخمر بالروؤس عندما تلعب فان اي حركه مع ذلك السرير او (سيك ميك) تعني ابتلاع السرير لك وخبطك للدلجه الامر الذي قد يطًير السكرة من نافوخ الشخص المبلوع او يسبب للمبلوع به عاهة مستديمه
وفي عنقريب الحبل الذي يستقبل الجالس عليه برقصة (على وحده ونص) وبطقطقة موسيقيه مجلجلة تقطع قلب اجعص الشنبات 0
ولكن تلك الموسيقى العنقريبيه لم تكن بالمزعجه البته بالنسبه لشيخ ادريس وعبد المعطي فهي تترى على اسماعهم كموسيقي سانتانا او كموسيقى الشرف التي تعزف في المطارات عند استقبال الرؤساء والملوك
هذا وفد جلس النقر بجسده الضخم كالعاده وحيدا على بنبره المدور ولعل عشق النقر للكورة هو الشئ الذي يحببه على الجلوس في ذلك البنبر حتى يرسم على
على رمل الحوش الخطط التي لعب بها برشلونه ضد الارسنال والطريقة التي جاءت بها الاهداف وبمسحه سريعة بيده على الرمل يمكنه توقيف الصوره واعادتها بالرسم البطيئ ليؤكد مواقف التسلل والفاولات ولمسات اليد
بصورة تحسدها عليه اعظم كاميرات التصوير
وهناك عن شمال بنبر النقر جلس شيوخ القعده وهما عمك حسين السنجك وصديقه وعدوه اللدود ود الرباطابي على سرير قصير وضعت عليه مرتبة ( مطبطبه) يتوسطهما راديو صغير فهم قذ ادمنا العرقي كما ادمنا السماع لنشرة مراحيم الساعة التاســــــ9 م ــــــعه
وعلى جانب الشيخين كان هناك مقعدين شاغرين والمقعدين الوثيرين عبارة عن بطارية عربيه فارغه و صندوق بيبسي قديم والمقعدين مخحوزين لشخصين سنتعرف عليهم من خلال المشهد الاول.0
وهناك خلفهم كلهم جلست مريم امام الراكوبه المسقوفه بحصير البوص ونــُسج بتشكيله رائعة من شولات الفحم ,السكر و شولات دقيق منظمات الاغاثه العالمي الفاخره
كانت مريم على قناعة تامة بصمود هذه الراكوبه في الخريف المقبل لان العامل الذي قام بسقفها اكد لها ان هذا الزخم والنسيج الرائع الذي تملكه من الشولات العالميه
لايتواجد حتى في مباني الامم المتحده ووصفها بانها راكوبه على مواصفات عالميه ماتخرش الميه
| |
|
|
|
|
|
|
|
|
|
Re: مريم حريقة .. كوميديا شيطانية .. مشروع مسرحية هزلية .. CoOLDOwn (Re: humida)
|
فقره اعلانيه
سيدتى سيدى هل تعانى من عدم استقرار فى النوم او عدم استقرار فى حياتك الاجتماعيه او الاقتصاديه او حتى الاكاديميه؟؟
بشرى ساره وعلى نهج الانفتاح والعولمه وفى ظل السلام وبمباركة ادارة الحكم الثنائى تعلن إنداية مريم حريقة عن تخفيض شامل لمنتجاتها تبلغ الخمسين فى المائه
كما يسرها تقديم منتجها الجديد عرقى ماركة الزارعنا غير الله الليجى يقلعنا بالخلطه السريه ذو الاربعه نكهات جوافه بلح عنكوليب ونكهة السلام
ومفاجأة الاندايه الكبرى اشترى قاروره من منتجنا الجديد واحصل على كورة عسليه مجانا كل هذا على انغام الفنانه الصاعده نانسى بت الجمكو
| |
|
|
|
|
|
|
|
|
|
Re: مريم حريقة .. كوميديا شيطانية .. مشروع مسرحية هزلية .. CoOLDOwn (Re: humida)
|
تبدأ كوميدياتنا الشيطانيه بضوضاء كبيره وذلك جراء الخرخره الشديده التي احدثها محمود الكضاب في احد العاب الكوتشينه التي نعرفها باسم الحريق
ولكننا في العاده نمارس لعبة الحريق( الودي) غير المطعَم ولكن ماكان يمارسه الجمع الكريم كان الحريق المطعًم الذي يشارك
فيه كل لاعب بمبلغ معلوم من المال ولكن المال هنا لم يكن السبب المحرك للدوشه التي افتعلها محمود فالمال هو اخر من يفرق
بين هذه الشله الفريده , وانما السبب يرجع لشخصية محمود وعدم اعترافه بي كياشته في اللعبه مقارنة بالسنجك الحريف والجايي
في علبها كما يقول اهل الكوتشينه
محمود الكضاب وهو يضرب على الطربيزه بعصبيه ويقف متارجحا : على بالطلاق طلاطاشر مره.. دو الهارت ده انت سارقو
انت قايلني داقس وللا شنو؟ غايتو يال الشوته دي تتعاد يا تاني مافي كوشتينه بتتلعب في ( .. ) ايمان ده
ويشد محمود الملايه التي فرشت للعب الكوتشينه وبعنف يرمي بها بعيدا ليرتمي هو الاخر عليها وهو يسب ويلعن
كل من بالمنزل وهنا تتدخل حريقه وتناديه:0
خلاس قوم يامهمود يوم ليك يوم عليك ..تعال هاك كوبايه مجان
ينتفض محمود مسرعا نحو مريم التي ناولته الكوبايه فيكشحها محمود في جوفه وهو مغمض عيناه
محمود: ده شنو ده ؟ كاسك مالو قصيًر كده .. علويه كوكو كاسها قدر ده عشره مرات
حريقه: علويه بتاعك ده بديك كوبايه بلاش؟
النقر : ياحريقه انسيك منو يمين محمود ده لو اديتيهو كاس العالم برضو يقول ليك شويه
ويواصل النقر حديثه : يلا يا اخوانا كدي نوقف الشراب شويه عشان ناكل لينا حاجه سريعه كده
يامريم نادي ولدك دينق خليو يجري يجيب الفولاتيذ اللذيذ
وقبل ان تنطق مريم بشفة كان دينق امامهم وكانه جني خرج من تحت الارض ,, لم تستغرب مريم لاستيقاظ ابنها حتى
هذه الساعة المتأخره فهي تعرف ان ابنها البكر لانتام له عين ولا ترتخي له اذن الا بعد انقضاء سامر الشله
فدينق كان يعشق كلامهم وشجارهم بل انه يطرب لاصواتهم المتنافره عندما يصدحون باغانيهم الغريبة ذات الكلمات والالفاظ الغريبه
وبجانب هذا وذاك .. دينق دائما ما ينتطر مراسيلهم لانهم يغدغون عليه بالكرم ويطالبونه بالاحتفاظ بباقي المراسيل من النقود
المعدنيه .. وذلك يعني ان بامكانه غدا في المدرسه شراء بعض الحلوى له ولاخوته الصغار
جمع النقر حق الشيرينق من الجميع وقال موجها حديثه لدينق
اجري فتش صحن الفول وامشي لدكان البرقاوي الفي شارع روما خليو يدنكل ليك خمسه فول بالجبنه وخليو يديك عشره عيشات
زياده خمسه لينا وخمسه ليك انت واخوانك عشان يحشوهم ليك سندويشات للمدرسه وبعدين كلمو يعمل الشطوط والمخلالات في
في اكياس بالجمبه اوعى يكبهم في الفول ,, كويس ؟؟
دينق ( وهو يحاول الانطلاق مستعملا الصحن على شكلال دركسون) : اااي كويس ياعمو
وقبل ان يدوس دينق على البنزين ويفًحٍط امسك به النقر قائلا : تعال هنا ياودالغسل الصحن ده منو ؟
دينق : مافي زول غسلو انا لقيتو نضيف
وهنا يتدخل محمود الكضاب : الليله سجمنا ثم سجمنا .. ده معناتو كلبتكم حكومه بت الكلب كانت بتلحس فيو الليل
ود الرباطابي : دحين ده كلام شنو يامريم كلبتك سابت اكل الفطايس والعضام وقلبت فيجيتيريان وللا عاد كيقن!!0
محمود: اجري ياود يادينق غسل الكلب فصدي الصحن سبعهه مرات بالتراب ومره بالليفه والصابون
ود الرباطابي : يازول استغفر ربك الحديث بقول اغسلوه سبعه مرات ومره واحده بس بالتراب
ودي ما كشتيينه عشان تقعد تفتي لينا فيها .. وقع ليك كلامي ياللخو؟
محمود: ياود الرباطابي ياخي انت اثبت لي بما لا يدعو مجال للشك انك انسان رجعي ومتخلف للاسف الشديد
الحديث ده لما الرسول قالو .. كان بتكلم عن كلاب الصحابه موش كلاب اب لهب بتاعين اليومين ديل
النقر يتدخل : يا اخوانا ختو الكوره واطه .. الله !! عايزين ناكل تحنا .. ياود سيب الصحن ده وقول للبرقاوي
النفر فال ليك سلفو صحن لغاية ما يرجعو ليك بكره الصباح
ود الجاك: لا لا لا كلو حاجه ولا فول البرقاوي بالليل ده .. ياخي ده فولو دين حجر في البطن بي شكل
التقول كبو في كرشك خرصانة برج الفاتح ... ياود امشي جيب الفول من عبده بتاع شارع الزلط
النقر : زلط شنو يازلط انتا !! يمين انا كان اتعشا بي ام فتفت ما اتعشى بي فول عبده
في هذه الاثناء يتسلل دينق الى خارج المنزل دون ان يشعر به احد ..فدينق يعلم تماما ان لا رجاء في انتظار مما سيسفر عنه هذا الجدل
وهم في نهاية الامر لايفرقون بين فول البرقاوي وعبدو ولا فول ابوالظعبوط حتى
يخرج دينق من الباب فيدخل بعده مباشرة احد الشخصيتين الذين حدثتكم عنهما سابقا .في هذا الوقت ساكشف فقط عن اسمه
وهو جمال ابوزيد المشهور بجمال اوروبا ..
| |
|
|
|
|
|
|
|
|
|
Re: مريم حريقة .. كوميديا شيطانية .. مشروع مسرحية هزلية .. CoOLDOwn (Re: humida)
|
يدخل جمال عبر باب الزنك بحذر مبالغ فيه فقد دفع جمال الثمن بالغا من قبل عندما (شبك) احد المسامير الصدئه ليمزق مؤخره
بنطلونه ماركة ( جيوفري بني) وما تحته . 0
يلتفت ود الجاك مندهشا تجاه الشخص القادم من الباب : ماااااااااااااا بصدق اوربا!!
تتحول انظار الجميع نحو مجدي الذي يرد على ود الشيخ بسخريه :
لا.. امريكا اللاتينيه
ود الجاك : وييييين الغيبه والله مشتاقين ليك جنس اشواق
مجدي : اي ميس يو توو ,, لاكين والله كنت( بيزي ) بي شكل غير عادي الاسبوع الفات
مشيت بورتسودان اخلص المرسيدس
النقر ( بخبث ): مشيت تخلص المرسيدس وللا كنت مع صاحبتك فلانه يا شيطان يامسلط انتا ؟؟
مجدي : اييييييييييييك ياخي انت من زمن ايام سلافه .. سلافه يااخوي عجزت و زوجها اخيرا رجع وسفرها معاو ليبيا
انا هسع مع العولمه والجيل الجديد الازواجهم لسعع ما رجعوا .0
الرباطابي : يا مجدي ياولدي الكلام البتسوي فيو ده غلت
مجدي : غلط انا وللا الرجال السافرو وسابو نسوانهم ( اسكيتو) بوراهم ؟0
الرباطابي : ااي انت غلتان و هم ذاتم غلتانين ,, الله يرد غربتهم
اها يا مجدي سيبك من ده انشالله مشيت لي خالك عثمان في المينا وجبت لي منو الوصيه؟
مجدي: للاسف ياعم رباطابي والله ما قدرت ازورو ,,, انت عارف اللداحة بتاعت ناس الجمارك
والعكلته بتاعتم .. امشي جيب اقرار جمركي ,امشي اشتري دمغه امشي جيب بوليصة تامين امش لناس
ضبط الجوده خليهم يمضوا ليك الورقه دي وامشي وامشي .. تصدق انا كنت لايص اسبوع كامل في الدوامه دي
مع انو في اوروبا الشغلانه ما اخدت معاي اكتر من تلات دقايق!!
السنجك : طيب بعد ده كلو قدرت تخلص العربيه وللا ما قدرت؟
مجدي : ده كلامك يا السنجك ,, انا مرقتها من اولاد جون ما اقدر امرقها من الفارات بتاعين هنا ديل
ويمين مرقتها منهم من غير ازبًل اي واحد مع انو اي واح من الغقير للمدير دايرني ادفع ليو عشان يخلصها لي
الرباطابي : طيب نان وين المرسيدس ؟؟ ما شايفنا واقفه بره !!
مجدي : يا رباطابي انتا مانصيح مرسيدس موديل الفين وتلاته البجيبا شنو في الاماكن المشبوهه دي !!
انا زول معروف ولامن اجي هنا بجي متنكر ( اندر كوفر) راكب ركشه, امجاد ,تكسي وحاجات زي كده
النقر : خلاس نسيت وبقت ليك مشبوهه هسه ... كتير خير اوروبا البقت زول
عشان تجي تتفلفس علينا بالتنجليزي
مجدي : يلا ياحاقد .. مافي شيتن خلاك مصاقر البلد غير حسجك وحقدك ده
بس هسه خلوني من اوروبا عرقيك كيف ياحريقه ناس بورتسودان
هروني بالعرقي الطعمو ملح ملح ... ما طالباني حليفه يمين عطشان لي عرقيك
جنس عطش .. ناولني السم الهاري
النقر: كدي اصبر دقايق خلينا نتسمم بالاول .. دينق هسه مرق يجيب الفول
مجدي : قلت شنو ؟؟ فووووول ... مجدي اوروبا ياكل فول ؟؟
اما انكم شعب متخلف .. فول شنو وهباب شنو ناس اوروبا الواحد
لو ما اكل تلاته كيلو باربي كيو ما بقرب من البار شبر.0
خلاس انتطرو حسنين انا اتعشيت ... ارويني يا حريقه
بينما تصب له حريقه كأسه , يساله السنجك : حسنين جا معاك ؟
مجدي (بعد ان ياخذ جرعه من العرقي): ايوه جا معاي يالسنجك لاكين اتفارقنا في شارع الزلط
فال ماشي يشتري تمباك وانا محلات( لو كلاس) زي دي مابمشي ليها
النقر : خلى بالك ياسنجك صاحبك حسنين مشى يجيب تمباك من الود كرباوي الغرباوي
الود تمباكو درجه اولى تمباك يشفي الجرح
جمال: ما قلت ليكم شعب غاية التخلف .. الشعب الاوربي يمتع فمه بالشيكولاته والكاندي بار والايسكريم
وانتو بي جاي تملو شلاليفكم بالقرف ده وتقولو عليو يشفي الجرح ..عالم وهم
السنجك : يازول هوي اسكر سكرك وماتقعد تفلقنا كلو دقيقه اوربا اوربا
كرهتنا السودان والدول المجاوره .. شعوب العالم كلها بتسف
الامريكان بسفو والانجليز بسفو .. الهنود بسفو , اليمانيه بسفو
كلهم بسفو والحاله شلاليفم صغار خلينا نحنا بي تلاليشنا الكبار ديل
يلا اسكر سكرك ,, سكرات الموت قول امين
مجدي : سكر شنو انتو هسي بي زمتكم قايلين روحكم بتسكرو !!
السكر في اوربا يا بلاش ... يا سلام على الجيهه والنظام
السكر هناك في البارات مش زي الخرابه دي
النقر( بازدراء) : بالله
مجدي ( مواصلا حديثه): وووب انا من( البارتندر) الشقروات وحات النعمه يالسنجك من يشوفنك دخلت البار
واحده تجيك شايله القزاره والتانيه شايله الكاس... ورررررب واحده تقعد في رجلك اليمين والتانيه في اليمين
ويفعدن يكبكبو ليك في الويسكي كاس ورا كاس فزازه ورا قزازه .. تقطع كاس تقطع وراو قدوم
النقر : ليه اصلو اوربا دي الجنه
مجدي : عليك نور يالنقر السودان ده آخرتنا و اوربا ديك الجنه بتاعتم وانا حالف تلاته اقاسمهم فيها النص بالنص
اصلو ما بخليهم اتمتعو بيها براهم
وفي هذه الاثناء يدخل حسنين احد ابطال قصتنا الذين حدثتكم عنهم في المشهد الاول
حسنين : الســـــــــــــــــــــــــــلامو عليكم ايها الفئة الضاله
| |
|
|
|
|
|
|
|
|
|
Re: مريم حريقة .. كوميديا شيطانية .. مشروع مسرحية هزلية .. CoOLDOwn (Re: Osman M Salih)
|
Osman M Salih
عارف يا عزيزي انت بتذكرني بشنو
في الموردة وبالضبط امام حديقة الموردة
محطة بص
كل ما يتوقف الباص هناك .. يصعد رجل بملابس رثة
ويقول .. يا جوماعة انا عندي موية في عيوني
والدكتور قال ... وانا ..
وهكذا لمدة ستة سنوات .. استخدمت فيها ذلك الباص
في ذهابي للجامعة ..
لا أعلم ما هي الصلة ..
لكنك تذكرني بهذا الشحاذ .. عافانا الله جميعا
| |
|
|
|
|
|
|
|
|
|
Re: مريم حريقة .. كوميديا شيطانية .. مشروع مسرحية هزلية .. CoOLDOwn (Re: humida)
|
وعليكم الســـــــــــــــــــــــــــــلام ورحمتو الله (يرد الجميع) .0
حسنين : شنو مالك مما دورتو الكاسات لي هسه؟؟
النقر: القال ليك منو ما دورنا .. يا سيدي نحنا مدورين من المغربيه .. هسه نحنا في استراحة مابعد
الشوطين
حسنين : ياخي يكرك يوديك الخور انت اي موضوع لازم تدخل فيو الكوره
قديتنا بيها عديل كده
النقر: اخير انا البنضم في الكوره .. انت من تضرب ليك كاس كاسين تتحول لقيس بن الملوح
حتى نحسبنك الاذاعه السودانيه وقد تحولت من برامج دكان ود البصير لبرامج لسان العرب
يضحك الجميع لتشبيه النقر ولا يجد حسنين ما يرد به ربما لان ما ذكره النقر هو عين الحقيقة
فآثر الابتعاد من النقر واتجه نحو مريم .. فقد تعود حسنين ان يفش غبينته في حريقه
حيطتو القصيره (كما يقولون) 0
حسنين (وهو يسحب صندوق البيبسي ويهم بالجلوس عليه):0
والله صحي المثل البقول (المابدورك بحمر ليك في الضلمه) شنو هسه مالك من خشيت محمره لي كده ؟
اديني كبايه سريع احصل بيها الجماعه
رغم انشغال الرباطابي بالاستماع الى الراديو الا ان الربااطابي تمكن من التقاط جملة حسنين الاخيره
ليقول له بسلاطة لسان الراكاب المعهوده :0
تحصل الجماعه وين؟؟ ناس عمك السنجك فنشو خلاص هسه بقروا في التشهد الاخير
يضحك حسنين ليعود ويمسك بالكبايه من حريقه (المبوزه) في ذلك الوقت وهي تقول له :0
هاك اشرب .. تشرب التدشرو دم
تجرع حسنين ما بقى فى كبايته من "عرقى" ولعن إبليس فى سره قبل ان يلتفت الى "حريفه" ست الاندايه مرة اخرى محملقا فى عينيها الجميلتين لبرهه ثم خاطبها قائلا: 0
انتى يا حريقه يا دين.. العرقي ده( بايله) فيو!! 0
مية مره قلنا ليك بنج الحصين البتختيهو فى السم الهارى ده حيطلع ميتينا يوم خافى الله فى شغلك ده ياخى غضبت حريقه اشد الغضب و (قدوما) بقي متر وردت قائله: "باللاي ياهسنين هقارات تا ماندكورو دى اهسن ليك تبتليو
والله انا كان ما هقارتكم دى اسلو ما كنتا اشتغلت شغل زى ده واللاي انا في جنوب كان عندي هواشه ومعاو اربئين بقره ..نهنا كان ما حرب ودكشمان كتل بقر وهرق هواشه ومدرسه بتاع احنا كان يكون اندي بيت اهسن من بيت تا مجدي اوربا ذاتو .0
وبعدين تانى منو يكاف الله يا هرامى المريسه انتى بشيلى آرقى بى الدين وين قروس تا آرقى يا هرامى
حسنين (ويبدو انه تحول للسان العرب) : صبي ياهذه .. مالك صبنتي الكأس عنا ايتها النازلة
حريقه: يازول هوي فتح عينك .. نازله وللا طالعه انت ما عندك معاي شغله
حسنين (بعصبيه): قلت لك صبي الخمر ايتها الجاريه الشقيه
حريقه : جاريه كيف يعني !!! انا اجري منك سان سنو ؟؟
حسنين: حسنا يبدو انه انك لاتعين ما اقول شأنك في ذلك شأن كل الجواري من بلاد الاحباش وبلاد الروم
يضرب حسنين كفا بكف ويلتفت الى باقي الشله ليقول: ارى ان لا فائدة من الجلوس هنا .. ايها القوم فلنعد الى مضاربنا
حريقه: اضاربكم اسان سنو !! انا بس آيز قروس بتاعي بالهسنه
حسنين وهو يتجرع اخر الكاس : سندفع لك حالما غزونا ديار بنو النضير وقبائل بنو هاشم
حريقه : تجيب قروس من هاسم تشيلو من مهمود انا ما عندي فضيه .. المهم انا آيز قروشي
حسنين : عجبا .. أتقولين هكذا !! انها الحرب اذن
حريقه : سميها زي ما انتا عايز ذاتو .. حرب. دفاء شعبي ,, جهاد نهنا اصلو بعد ده ما نكاف
بقر بتاعنا راح ... كما عايز تشيلو قروش بتاع نحنا
تقف حريقه على ارجلها وهي في غاية الانفعال لتصب جام غضبها عليه ولكن بالرطانه هذه المره فقد نفذت خزينتها من المفردات العربيه
ولكن حينها كان حسنين بعد ان لعبت الخمر برأسه منهمكا يردد اغنية العقاد ( شذى زهر ولا زهر) بصوت زي الرعد لا يمت لصوت اافنتن الكابلي بصله ولكن يبدو ان السكارى عندما تلعب الخمر بالروؤس لا يقرقون بين صوت عبد الكريم الكابلي وصوت عبد الظنبار
واصبح الجميع يردد بنشاز فريد :0
وبي سكر تملكني واعجب
كيف بي سكر
رددت الكاس عن شفتي لعل شفاهك الخمر
نعم ان انت الرحيق لنا وانت النور
والعطر
يندمج الجميع مع الاغنيه ويندمج كذلك (العنقريــبجيتار) مع اللحن فيبشر مجدي اوربا ويبدأ بالسكسكه ويلوح السنجك بعصاه ويعرض الرباطابي الذي على حسب السكره خيل له ان العمود الذي تقف عليه الراكوبه احد حسنوات الحي وهي
تقوم برقصة (الرقبه) وحينها ينفعل الرباطابي مع تمايلها واهتزاز نهودها وانزلاق التوب من على كتفها العاري فيقوم الرباطابي بمد رأسه لياخد شبال منها فيرتطم رأسه (الغليد) بقوه بعمود الراكوبه ليتوقف الفاصل الغنائي
لاسعاف الرباطابي الغبيان الذي قد نافوخه
| |
|
|
|
|
|
|
|
|
|
hi (Re: humida)
|
حميده ياخي...النزل لينا "عابر سرير"
i love you for that soo much
ما تميت المسرحية لسة...وصلت لحتة الزول بيقعد خواجية في رجلو اليمين، و التانية في رجلواليمين "برضو؟!"
don't get discouraged by some of the remarks here
Zif you didn't expect them
طيب كاتب cool down ليه؟
i still didn't finish
و عرفتا خميسك كنت بتقضيهو وين (just kiddin!)
و حجيك راجعة
و خاتمة صديق عمر (قوموا لقواريركم) هي رائعة
| |
|
|
|
|
|
|
|
|
|
Re: hi (Re: Maysoon Nigoumi)
|
العزيزة ميســون
اتلمس طريقــى...وسط هـــذأ الابــداع و الســرد الجميــل و الكلمــة الطيبــة
تبريــدة قلب......اشــتاق لقطـــاطى ســـنجة و مطــرة خريف فى حى الســـوق الذى
انتمـــى لــه.....و لـــى اهــل افتخـــر بهم....منهم من ارتحـــل و منهـــم
بقــى....شــــكراً لك فقد تنسمــت بعض اريجـــها.... ولنــا عـــودة
صــديق عبدالمنعم عــمر الحسين الربــاطــابى
| |
|
|
|
|
|
|
|
|
|
Re: hi (Re: humida)
|
الأخ حميده
لا أفترض سوء النيه ولكن أعتقد أنه من الواجب أن توضح للقراء أن كول داون هو الكاتب وأنها منقوله من سودان نت حفاظآ على الحق الأدبى للمؤلف لأن مجردكتابه كول داون بالعنوان لا توضح لغير المتابع لسودان نت ذلك لأنه يمكنه إعتبارها جزء من العنوان
ولك مودتى
| |
|
|
|
|
|
|
|
|
|
Re: مريم حريقة .. كوميديا شيطانية .. مشروع مسرحية هزلية .. CoOLDOwn (Re: humida)
|
ذات السخف القبيح والنظرة الإستعلائية الفجة والتي لا تصور باءعات العرقي والقادمون من المناطق المهمشة إلا عبيدا لهم وجوار يخدمونهم وظهر ذلك في مناداة أحد أبطال هذا السخف لمريم حريقة بالجارية وإبراز النعرة العنصرية البغيضة وتصوير مريم بأنها لا تفهم العربية ولا تعي الفرق بين الجارية والطالعة والمضاربة وكل الكلمات القبيحة التي جاءت في هذا السرد السخيف .
كما أن تصوير دينق إبن حريقة بهذه الصورة المزرية وكأنه عبدا لشاربي العرقي وأنه يقتات من فضلات بقاياهم هو قمة السخف وإنعدام الشعور بالحساسية الإجتماعية .
أيا كان كاتب هذه القصة فهو إرتكب جريمة شنعاء بحق من تمثلهم مريم حريقة وإبنها دينق .
وتبا لكم .
| |
|
|
|
|
|
|
| |
humida
Osman M Salih
Hussein Mallasi
Siddig A. Omer
Kostawi
ناصر محمد خليل
ahmed haneen
فيس بوك
تويتر
انستقرام
يوتيوب
بنتيريست