|
|
 تحالفات ولا بيزنس
|
يا جماعة الخير مساء الخير و (ابقو رقاق ) الليلة عاوز اعك فى السياسة وشايف طوالى لمن نعمل الحاجة طوالى ينكت لينا زول بوست صارخ بمطالبة بتاعة تخليص وطرد من المنبر لكن (ديمة على رمايانى عيونى ) اها يومتا شفت خبر كدا قالو عمنا نقد مشى قابل ناس المؤتمر الشعبى وبحثوا جملة قضايا اشار لبعضها وجزء منها تصريح صحافى صادر عن الحزب الشيوعى قالو فيهو اخونا الشيوعيين انهم عاوزين قبال قولة تيت لاى تحالف انو ناس الشعبى يقدموا نقد ذاتى لمسئوليتهم فى انقلاب الانقاذ ويقبلو كمان المحاسبة يعنى السيد عبد الله حسن احمد او الشيخ الترابى بصورة اصح يقدم كشف يقول ديل الضباط الجو قالو لينا بنقلب ليكم الحكومة ودا الزول الكتب البيان رقم واحد ودا فلان العمل داك والترك داك وكمان قال التصريح الصحفى كلام كتير المهم فيهو انو ناس الشعبى (اكلوها ) وقالو نفكر ونحن ما مسعولين من اى حاجة فى البلد دى بعد ما البشير كشانا من الحكومة وشربنا - بالتشديد - المقلب والمحاسبة ممكن تكون على اساس شخصى دى كيف غايتو ما عرفتها ؟؟
المهم اللقاء انتهى واى زول شاف موضوع تانى فى الحزبين ناس الشعبى نشطو طوالى اتصالاتهم مع باقى الناس - طبعا الحكومة واحد من الناس ديل - وناس الشيوعى صنقعو ودنقرو وشايفهم شغالين بقصة المؤتمر بتاعهم القال كدودة (يمكن يقوم ) والمهم الكلام بيجيب الكلام وبيطرح بالتالى سؤال مهم خارطة التحالفات فى الفترة الجاية شكلها كيفن وشنو ...
شخصيا - ودى قراءة ما ملزمة طبعا - بتوقع انو يتكون حلف فيهو الحكومة ولمن نقول الحكومة بنعطف عليها الاحزاب (المسجلة ) ومعاها الحركة الشعبية وطوالى حيخش هنا لاعتبارات كتيرة فصيل قوات التحالف البيقوده العميد عبد العزيز خالد البدا فعلا فى تسجيل حزبو وفى صف التحالف بين الحكومة والحركة الشعبية اتوقع كمان انو (ابو هاشم ) والاتحاديين يجو خاشيين ودا بربطو طوالى بزيارة جون قرنق المرتقبة للقاهرة وواضح انو الراجل حيقعد مع مولانا عشان يشوف الراى كيف واعتقد انو حيكون راى بالموافقة خاصة انو مصر واضح انها بتدعم تحالف الحكومة والحركة الشعبية فى دعم ومشاركة الاتحاديين اكتر من اى تنظيم تالت يمكن يخش فجناح الترابى بالنسبة للقاهرة مزعج والشيوعيين ما لاحمين سلوكهم كويس تاريخيا مع القاهرة وناس حزب الامة ما مهضومين كما هو معروف للمصريين .
طيب يفضل خارج القسمة منو ... ناس المؤتمر الشعبى وديل واضح انهم ما قدامهم خيار غير دعم المؤتمر الوطنى - ولو على كره - لانو سقوط الحكومة معناها انو الشعبى زاتو حيلحق امات طه قبال البشير وطه والشعبى لو ما خش الحكومة حيكون معارضة لصالح الحكومة بمعنى انو حيكون ذراع ليها فى الشكل الحيكون معارض للحكومة الجديدة (البشير = قرنق ) والتحالف المعارض دا حيكون فى الغالب من حزب الامة بقيادة الصادق المهدى وناس الحزب الشيوعى ، طيب حيفضل لينا ناس حركات التمرد فى الشرق ودارفور وفى الشرق فان اى تسوية مفجائة وتطبيع للعلاقات بين الخرطوم واسمرا ودا شى وراد جدا بعد وصول قرنق للقصر الجمهورى وخاصة لو جا الميرغنى ودا معناه انو جبهة الشرق حتكون منتهية مع ملاحظة انو الحركة الشعبية حيكون جيشها فى تلك المناطق غير موجود والتواجد المكثف لقوات السلام الدولية سيجعل اى نشاط عسكرى فى تلك الجبهة عمل احمق وتحت رحمة الشجب والغضب الدولى الرسمى لصالح الحكومة ، طيب حيفضل لينا ناس دارفور وطبعا ظاهر جدا انو حركة العدل والمساواة خلاص ضعفت وكترت فيها المشاكل ودى وهمة عشان يمرقو بهدوء من اللعب لانو اصلا خلاف الحكومة مع الشعبى ماشى على النهاية ، اها حيفضل ناس جيش تحرير السودان وديل برضو ظروفهم كعبة والمجتمع الدولى زاتو قضى من ازمة دارفور وطره وقصة المحاكمات ظاهر انو فيها صفقات وتسويات والله يستر من شطب البلاغ ضد مجهول وامريكا خاصة بعد التعاون الامنى مع السودان بقت عندها نفقة عند ناس الانقاذ ديل اكبر من نفقة ناس دارفور غض النظر عن المشكلة وضخامتها ...
المهم دى هترشة ساى وسليقة وغير رسمية والعاوز يقبل بيها كويس والما قبلان بينها برضو كويس لانو التحالفات دى كلها بيزنس ويمكن بكره تظهر صفقة ما معروفة هنا ولا هناك تلخبط الورق كلو
|
|
 
|
|
|
|
محمد حامد جمعه
Osman M Salih
فيس بوك
تويتر
انستقرام
يوتيوب
بنتيريست