رمق الجالسين بنظرة ماكرة وهو يلقي عليهم تحية باردة
وقف الجميع وفي طرف فم كل منهم باقي ضحكة كان يتبادلها مع جليسه
- كناس قيادة عليا في البلد عايز اناقش معاكم الموجهات العامة للتشكيل الوزاري
فيكم واحد داير يناقش موضوع تاني
- لو امكن يا ريس نناقش موضوع اجور العاملين في الدولة
- شايفك بقيت مشروع بطل قومي يا ابجضوم تناقش مشاكل العاملين كمان ...
ايوا يا ود النوبة
- ياريس بكصوص تسكيل وزالي دي ..نرجو انكم تدو جبال مكان طري شوية
ضجت القاعة بالضحك
-تدحكو شنو ادونا وزارة فيهو روح شوية موش وزارة ميت زي بتاع سياحة والا حيوانات ...لازم تدونا لحم لين شوية نهن سبعنا من كوارع دي
-هو في الذ من الكوارع ...لكن انت عارف الوسط والشمال ده بياكل السودان كلو عشان كده بياخدو الوزارات المهمة
- يعني بترول لما يتلع اندنا بتخلو لينا الوزارات الطرية دي
- كدي لما يطلع نشوف
المفروض نبتعد عن النظرة القبلية الضيقة وننظر لمصلحة الوطن
-مسلحة الوتن دي يا ريس كلنا ممكن نسويها .... ما المفرود تكون حكر على ناس وناس لا بعدين الوزارات دي ماشة بالتكنوقراط الفيها ناس عفنت في وظائف وكيل وزارة ديل هم البيديرو العمل الحقيقي في الوزارات ......الوزير معروف انو ضيف ثقيل على الوزارة بيقضي ايامو وبيمشي
-عشان كده البلد وحلانة ....لازم تعرفو انو نحن جينا نغير كل حاجة كل وزير لازم يكون عندو برنامج مستمد من نهج الثورة ويسعى لتنفيذو ....ما عايز وزارة متفرغة للقطيعة والتكتلات وتاركة مصلحة البلد
ساد صمت طويل ....والرئيس يجول بنظره على الجالسين كانه يلعن اليوم الذي اجتمع فيه معهم
دخل البيت
- ياولية جيبي الغدا - شوف السفرة بيكون جهزا ادم - انا موش قلت ليك انا داير من يدك وما عايز أكل الطباخين ده - يا راجل هووي انا فاضية ..انا زاتي من الصباح في انتماع - هههههههه تقولي للرئيس يا راجل هووووي تاني اسمعا منك علا ادخلك الحراسة ...مرة مطرطشة - والله ياهو الثورة تاكل نسوانا - عايزك تصحيني الساعة ستة عندي اجتماع مع منافقين . - اللبس جلابية والا كاكي - لا بمشي ليهم ساااي - سجمي ساااي كيفن كمان
نزلت طائرة الرئيس الهيلكوبتر وغبارها الكثيف يغطى المستقبلين .... رفض الجلوس في مكتب مدير المصنع وطلب الذهاب مباشرة لافتتاح مصنع السكر الجديد.
قص الشريط التقليدي وتابع مراحل انتاج السكر من مرحلة سكب القصب وتابعه وهو عصير وذهب لمرحلة العسل ( المولاص)
واقتربت لحظة مشاهدة السكر وهو لؤلؤ ابيض يملاء الشوالات . ابتسم الرئيس وهو يقترب من المرحلة الاخيرة ومدير المصنع ووزير الصناعة بجانبه وجمع غفير من خلفه ليشاهد المفاجاءة الشولات تعبأ بعسل اسود بدلا عن السكر الابيض ..امتعض وجه الرئيس ونظر شذرا لوجه المدير الذي ارتعب للمشهد - مولاص ؟..... مولاص ؟ - والله يا ريس امس عملنا تشغيل اختباري مرتين والسكر طلع ابيض ما عارف الحصل شنو؟ - مدير عام وما عارف ؟....
صمت الجميع وهم يشاهدون العسل الاسود يسيل في الجولات بدلا عن السكر . اخفى البعض ابتسامته الشامتة بصعوبة شديدة وهو يتمتع بالفرجة على الموقف ... الكاميرات التي احضرت لتصوير الانجاز جالت في الموقع لتصوير خيبة الرئيس ...وركزت كثيرا على وجهه المنتفخ والالفاظ الغير مفهومة تتطاير من فمه . - ده شغل شيوعيين يا ريس - هو عندكم هنا شيوعيين ما شملم التطهير - ايوا كتاااار .... حاج تبيدي وقيلي ديل عملو دقون وسبح لكن يظهر لا زالو على ضلالم القديم - ياخي انتو الضلالية النايمين وما شايفين التخريب البيحصل
اشار للوزير باصبعه السبابة ...واومأ الوزير براسه دلالة انه فهم القصد فصل المدير العام ومدير الانتاج
عم التوم عرف وسط اهل عطبرة بكرهه الشديد للرئيس ...فهو نقابي قديم عمل في كثير من محطات السكة حديد الخلوية .... عرف من الاخبار ان الرئيس سيقوم بزيارة لعطبرة ....لم ينم ليلتها وهو يفكر في كيف سيشرح كرهه وكره المدينة للقادم .
وقف رجال الشرطة على طول الطريق الذي سيسلكه الرئيس صاح احد رجال الشرطة لرجل يقود دراجته ببطء شديد - يا حاج ..... يا حاج ...شوال العيش مقدود قاعد يدفق سمع عم التوم صياح الشرطي .....ولكنه تظاهر بعدم السمع - يا حاج ..... يا حاج ...شوال العيش مقدود قاعد يدفق - يا ولدي البيت قرب خلاس جال عم التوم شوارع المدينة التي يقف على طولها رجال الشرطة ..بعجلته المكعكعة وشوال الفتريتة مربوط في سرج العجلة .يرش على اطراف الاسفلت عيش الفتريتة الذي تحبه الغنم كثيرا. خرجت غنم عطبرة عن بكرة ابيها على جانبي الشارع تلتهم الفتريتة وتصفق باذنيها للرئيس .....وبقي اهل المدينة في بيوتهم فهم جميعا على درجات مختلفة من الكره للرئيس القادم. - القى نظرة الى الشارع ليرى منظر الغنم تصفق باذنيها وهي تبحث عن فتريتة عم التوم. تعب رجال الشرطة من مساككة الغنم وهي تدخل لشارع الاسفلت غير عابئة بصياح الشرطة تك ايش تك تك تك تك تك .....تك .... والغنم الجائعة المحبة للفتريتة تصفق باذنيها متلذذة بكرم عم التوم وكمية الفتريتة الوفيرة على جانبي الطريق ... تدخل حرس الرئيس الخاص ... ومجلس الولاية ولجان المراءة وشباب الوطن لدفع الغنم عن الطريق .....ولكنها لا تعبا بهم فهي مصرة على الترحيب بالرئيس بطريقتها الخاصة وحوافرها على الاسفلت تحدث نغمة منتظمة كانها تقول
- معقول ... غنم ؟ انا تستقبلني الغنم ؟ .... امسك برقبة الوالي ..... وبصق في وجهه ....جايبني للغنم ...صبرك وصبرك يا عطبرة ...كان تندق فيك طوبة تنمية تاني .... كل المشاريع الهنا تتنقل لمدن مؤدبة ... امبارح الليل كلو أهضرب بتيس قعد يرفسني .... انت مرفود ارجع اقعد عواطلي يا ( .......... ) .
وقف عم التوم على راس منزله وهو يراقب الموقف ...وضحك ...ضحكا لم يضحكه من قبل
منو الزيك يا الكلس
ابتسم وهو يحدث نفسه والسيدة الاولى تتوسد ذراعه الايمن
شعب كرتون ...ما يجي الا بالضغط ...قال هيومان رايتس قال
الهيومان رايتس للامم المتحضرة ...زول لو ما بعرف يسوق عربية واديتو عربية بيعمل بيها شنو ؟
حيخش بيها في حيطة ويضيع ويضيع عيالو وناس تانين
عشان كدة الكلمة دي بتعمل لي اااكولة في حلقي وقد في نص راسي
لسة بدري علينا ممكن في الولاية التالتة نفك ليهم نسمة حرية على خفيييييييف كده
- يا راجل هه ات لسه صاحي
قالت ذلك وهي تشد جسمها لتلتصق به عله يحس باجتهادها وكمية العطور المرشوشة على صدرها
- لا نايم
قال ذلك وهو ينقلب للجهة المعاكسة لها ساحبا ذراعه من تحت راسها
يا ريس اليوم عندك اجتماع مع السفير الامريكي ...في الاجتماع الفات يا ريس السفير كان طول الاجتماع خالف رجلو عى وشك الافضل اكلمو انو ما يخلف رجلو في حضرتك
- لا بس كلمو ممكن يخلف رجلو ...لكن في الجهه الانا ما قاعد فيها ...والا اقول ليك سيييبك منو ...هو كويس لو خلف رجلو ولم لسانو الخواجة (الا.....لف)
- لا بس انا كان قصدي شان الفضائيات وكده
- ياخي بدل تكلمو جيب ليهو كرسي ما يقدر يخلف رجلو فيهو ... الناس ديل عندنا عندهم طلبات متلتلة...ما عايزنها تتعطل بسبب خلفة رجل سفير وقلة فهم مدير مراسم .
جلس السفير ورجله في وجه الرئيس بسبب الكرسي ففي الاجتماع الاول كانت رجله متدلية بعض الشئ .
- سيدي الرئيس انا اسف جدا ان انقل لكم قلق دولتي لاوضاع حقوق الانسان المتردية في بلادكم.
همهم الرئيس ديل كانو اولاد عمك والا باقي قبيلتك يا خواجة يا ( ا..لف )
- افتكر نحن عملنا خطوات جيدة في موضوع حقوق الانسان ده وممكن تزور السجون الزرتها المرة الفاتت حتلقاها فاااااضية
- نحن عندنا علم انكم غيرتو مواقع السجون
البلد قدامك فتش ... اصلو ما عارف مين الحاكم البلد دي انتو والا انا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
garjah
فيس بوك
تويتر
انستقرام
يوتيوب
بنتيريست