حينما طال الحنين بشاعرنا الراحل المقيم صلاح أحمد ابراهيم وفاض به شجناً بث أشواقه المشبوبة لكل اللوحات التى بذاكرة الوطن فهربت منه كل نداوة الألوان إلا الليل الذى بسط له يد الهوى فبث له أسرار العشق فى صوت متهدج كالضوء حزيناً ومضيئاً.
غريب وحيد فى غربتو
حزنان يغالب لوعتو
حيران يكفف دمعتو
يتمنى بس لأوبتو
ولسان حاله يردد مع الفيتورى
لو لحظة من وسنى
تبعد عنى حزنى
تحملني تُرجعنى لعيون وطنى
فاعطى الضوء الأخضر لطائره المهاجر أن يتهيأ للإقلاع وان يفرد جناحيه إيذاناً بالرحيل فسفره وقت الخريف غير الفصول الأخرى وزوده هامساً ألاّْ يتوقف طوال الرحلة وان يواصل الليل بالصباح وسط الرياح تحت المطر وان تعب فيه جناح ماذا يفعل؟
يقول له فى السرعة زيد أطلق لجناحيك العنان تصفيقاً وتحليقاً وغناء
فضل الدليب فى وطنه تعرف دفئه الطيور المهاجرة، وحتى لا يضل الطريق لأن السفر إليه لا يحتاج الى زاد ولا أوراق ثبوتية.
وزى وطنا وقت اشتاقلو
برحل ليهو من غير زاد
وهمس الشاعر يداوى فى سمع الطائر:
فوت بلاد وسيب بلاد
وان جيت بلاد تلقى فيها النيل يلمع فى الظلام
زى سيف مجوهر بالنجوم من غير نظام
تنزل هناك وتحيي يا طير باحترام
على نيل بلادنا وشباب بلادنا ونخيل بلادنا
فلاحت له من على البعد خضر الروابى
يتوسطها النيل موشحاً
بسيفه المجوهر نجوماً
فأمتزج الخرير بالتغريد
فحيا النيل صادحات العنادل
فالبدر هنا له لمعان
ففاضت الأشواق دون حد
موكباً يغزل الطرب
ها هنا يختلط القوس الموشى
من كل دار من كل ممشى
وهبط الطائر فى أرضه السمراء مثل قطرة من الندى يحفها موكب بالعطر ريان محملاً بالتباريح الدقيقة المنقولة لبيت صغير تخيل معى انك أمام بيت داخل خميلة تتوشحه الخضرة من كل الجوانب وأمامه تجرى جداول عذبة وبداخله «زول» جميل بينك وبينه تباريح قديمة وصبابات متدفقة لم تلتق به سنوات طويلة، ثم يفتح لك الباب ويحدق فيك ثوان ثم يفتح ذراعيه ليعانقك عناقاً حاراً فتذوبا فى لحظات بالغة التواصل الإنسانى.
بالله يا طير قبل ما تشرب تمر على بيت صغير
من بابو من شباكو بيلمع ألف نور
فيقف الطائر أمام شباكها المضئ ويقبل يديها ويبثها بلغة الطير أسرار الهوى ويجدد لها العهد على دوام كاس المودة رغم طول النوى والبعاد.
وكما تلتقى النوارس فى موسم هجرتها وتغسل عيونها بنسيم الفجر، فإنسان الأبيض تستطيع ان تميزه بين أهل السودان إذا ناديته من قبل الإنسانية والحب والفن والتصوف.
وإذا أصغيت إلى «ريلاً ادعج العينين يترنم بهذا اللحن:
مكتول هواك أنا من زمان
مكتول هواك أنا يا كردفان
أسير غزال فوق القويز
كلام غزل معسول لذيذ
دمعات عتاب من زولاً عزيز
سالت بحر شالت قليب
أتمنى يوم زولى القبيل
يقطع معاى درباً عديل
رحلة عمر مشوار طويل
نمشيهو فى رمل الدروب
فى كردفان
يقول الشاعر عالم عباس:
شاء ربنا بسر حرف كن
ولفظ كان
أن يوجد الإنسان كامناً فى داخل الإنسان
فشال من جنان الخلد قطرة
ومن دموع الحور
وهزها ورجها رجتين
فكان إنسان كردفان ذلك النسيج الإجتماعى النادر وذلك الانصهار الرائع الممزوج من جنان الخلد ودموع الحور الذى أعطى إنسان المنطقة معنى الحياة والتدفق، فالأبيض مدينة عريقة فى حيادها لم تلوث أرضها أدخنة المصانع ولم يصدأ قلبها لانه «مصنفر» بالذكر.
فهى ملتفحة بازاهير الروابى وورود الوديان وكثبان الرمال الذهبية، يأتى إليها الناس فى يوليو ليغسلوا فى خريفها وربا خضرتها هموم ما مضى من العمر.
لانها ديوان السودان الجميل وقدحه الكبير ومرآة لزمن الفن الجميل والعصر المتوهج فإذا كان الجمال يسر الروح حيثما وجدته فتتغنى به وتحتشد له لانه محسوس ويدركه البصر، فالأخلاق أعلى صور الجمال فى الخليقة لان الجمال المعنوى لا يرى بالعين المجردة وانما تتحسسه النفس المرهفة ويدركه العقل فمجتمع أهل الأبيض لا تفرق بينهم الألوان السياسية، دافعوا عن ارض هذا الوطن حمل أجدادهم وآباؤهم السلاح لتحرير السودان فشهدت لهم شيكان وكررى والخرطوم والأبيض وما زالت ثقوب الرصاص بمبنى المديرية وساماً يحكى دورهم القيادى فى استقلال السودان، وحين تمرد أغلبية أهل السودان لم يتمردوا ولم يحملوا السلاح وهذا أن دل على شئ إنما يدل على وعيهم السياسى وحسهم الوطنى ويكفيها فخراً انها قدمت أغلى رموز الاستقلال أول رئيس سودانى إسماعيل الأزهرى الذى طرق باب الحرية بذكاء واقتدار فوهب هذه الأمة نسيم الحرية فى طبق من ذهب واعطت للوطن أحلم بنيها المشير عبد الرحمن محمد حسن سوار الذهب الذى وعد بتسليم السلطة وهو يجلس فى قمتها فعلم العالم كيف الزهاد فيها وهى التى يقاتل العسكر فى الإستيلاء عليها أو يموتوا دونها، وكلما دخل المشير فى حوار هادئ طرفاً ثالثاً فى خلاف غاضب انفض الخلاف واستأذن الغضب فى الإنسحاب، وجوه التقيت بها فى مشوار حياتى بمدينة الثغر تجمع بين الجمالين المعنوى والمحسوس.
قديماً دخلت القوافل هذه المدينة من كل حدب وصوب وارتفعت رايات الإسماعيلية الشيخ إسماعيل الولى وسوار الذهب والشيخ عبد الباقى والتيجانية وتجمعات القادرية وأبو شرا ومن ود أب صفية ودليل المحس.
الإدارة الأهلية وأمير البديرية حسين زاكى الدين ومن الرعيل الأول بالمدينة إبراهيم حسنين من قادة الحركة الإسلامية بالابيض الحديث عنه وعن دوره يطول وحتى نوفيه حقه نحتاج لملف خاص به.
مهدى عبد المنعم من سادات الأبيض و أقطابها المميزين ومن مؤسسى الغرفة التجارية وعلى اكتافه أينعت زهور البعثة التعليمية الدينية بالأبيض له علاقات مميزة بأرض الكنانة وأهلها.
وتيمنا بلقائه بالرئيس جمال عبد الناصر بالأبيض عام 1961م سمى المهدى ابنه جمال.
وبمناسبة قيام منظمة الأبيض التطوعية للتنمية والتعمير بالخرطوم الرياض
قامت اللجنة بتوزيع الأدوية لمستشفى الأبيض الواصلة من أبناء الأبيض بالخليج وبطاطين وملاءات للمرضى بالمستشفى وسجن الأبيض ودار الهجرة.
واللجنة برئاسة الباشمهندس سيد احمد الحسن، ومن الشخصيات التى التقيت بها فى العاصمة ولا يزال الود بينى وبينها عامر عمر البشير احمد سليمان، وعبد الله محمد الحسن.
وحينما يستسقى الغمام بوجه الأبيض تسكن الكلمات جدائل التبلدى وتلح فى الذاكرة قارورة عروس الرمال لترحب بفيض السحر عبر شرفة تطل على فردوس بديع جمع بين جمال الحقيقة بحقيقة الجمال.
ومن هنا نبعث بالشكر كل الشكر لبى المجتبى (بكرى إسماعيل الطاهر )
05-17-2005, 00:25 AM
nasiradin nasiradin
تاريخ التسجيل: 06-01-2003
مجموع المشاركات: 1270
حبابك عشرة بلا كشرة - وينك انت يا عزيز من ديك وعيك آخر اتصال وانت بالصين باين الجرارى (تروتسكى) ده عمل ليك غسيل المنتجات الصينية وختاك فى خانة اليك - خليك من التجارة دى والدنيا ام بنايتن قش وقرب تعال وزور كردفان فى كمال زينتها فى الخريف وساكون بهناك شهر يوليو انا واخوى الجرارى وآخرين خلى لم القروش وتعال انجم.
Quote: أن يحفظ لينا الغرة أم خيراً جوة وبرة في إطار سودان ديمقراطي ويلمنا في ظلالها تامين ومبسوطين علي الدوام
.. . مكتول هواك أنا من زمان مكتول هواك أنا يا كردفان أسير غزال فوق القويز كلام غزل معسول لذيذ دمعات عتاب من زولاً عزيز سالت بحر سقت القليب فى كردفان.. مكتول هواك أنا من زمان
Quote: فكان إنسان كردفان ذلك النسيج الإجتماعى النادر وذلك الانصهار الرائع الممزوج من جنان الخلد ودموع الحور الذى أعطى إنسان المنطقة معنى الحياة والتدفق، فالأبيض مدينة عريقة فى حيادها لم تلوث أرضها أدخنة المصانع ولم يصدأ قلبها لانه «مصنفر» بالذكر. فهى ملتفحة بازاهير الروابى وورود الوديان وكثبان الرمال الذهبية، يأتى إليها الناس فى يوليو ليغسلوا فى خريفها وربا خضرتها هموم ما مضى من العمر.
الرائع على.. حبابك عشرة مقامك زين جيتاجيت وقنب طولا..
أتمنى ان نلتقيك واقعافى سانحةمن وقتك الثمين وساحزن على هذا البوست بعد الأرشفه ولكن سنعيده لسيرته الأولى سيرة ام خيرا جوه وبره..
My cellphone#.+249 912606382
Best wishes
05-17-2005, 10:14 AM
عصام دهب عصام دهب
تاريخ التسجيل: 06-18-2004
مجموع المشاركات: 10401
تورت فينا الشوق وأنت تؤكد على أريحيتك الجميلة و تفرش لنا هذا البرش في نص البلاد فنستمتع بهمبريبك الرائع .. بريق القبلي ضوى زيف البداير هوى هميت بدور أهلي شايف دريبهم توا زينة البنات يا ضوة شوفي الزمن شن سوا .. و شوف يا ـ البديري المدهش ـ أخوي علي : كان الله فرجّا.. فرجا .. و كان ما فرجا ببيع حماري دا و .. بإذنه تعالى أكون معاكم .. بس نطلع من الوحلة دي !! و للحديث بقية ..
05-17-2005, 10:22 AM
معتز تروتسكى معتز تروتسكى
تاريخ التسجيل: 01-14-2004
مجموع المشاركات: 9839
عليك الله يا استاذ اغمض عينيك وتذكر وانت فارش ليك برش بعد المطرة كده ومعاك الاحباب وانت راقد على قفاك تحسب نجوم الليل فى منتصف يوليو - وامات وحلتك دى انشاء الله تطلع منها حتى لو ضنبنا ليك -
اه و بكده حنكون انت والجرارى و تبلدينا هناك فى شهر يوليو وكمان لمن يرغب من البورداب لنجعلها تجمعا فريدا -
05-18-2005, 01:01 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
البوست ده هدفو الاساسى تحريك مشاعر الزيكم ديل وانا على يقين فى معيتك الكثير فنحن فى انتظارك وحتى لو تأرشف سنعيده تانى كما قال اخونا تبلدينا - فى الانتظار وبالين حبل الصبر وعارفين الجاى الما خمج شكرا عزيزى
05-17-2005, 12:04 PM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
البوردابى الكردافى (الرياض / الخرطوم) وكمان الامارات اذا الله هون
كيفنك والاحوال وانت وسط الاهل والاحباب بين كردفان والخرطوم - وانشاء الله طاب ليك المقام هناك - عاملين ايه مع جمعية ابناء الابيض ؟؟؟؟ ويا اسفى انا لم ارى بوست الجمعية هذا الا بعد خروجى من السودان وكان ودى الالتقاء بكم واه اسفاى ولكن سنلتقى ونتواصل انشاء الله - و هذه وصيتى
بالله يا تبلدينا وكترنا وهشابنا امانة عليك ان توصل سلامى لكل احبابنا الكردفانيين عامةوبالاخص اعضاء الجمعية فردا فرد - اهنئكم على هذا العمل الرائع ووقعتوا لينا فى جرح وهذا هو ديدننا البنسعى ليهو لكردفان عامة وعلمى ويقينى ان فى معيتكم الكثير فرجاءا ثم رجاءا ان تعضوا على هذه الجمعية بالنواجذ وانا من الان جندى مسخر لهذه الجمعية وبأى الصور فقط ادونا شرف الخدمة ونتمنى التنسيق وانا على استعداد بأن اسخر كل امكانياتى المتواضعة لعمل شى وحتى لو صغير يمكن يساعد اهلنا هناك فى كردفان ويا ربى يا كردفان -
وبدورنى هنا سوف اوافيكم بآخر اخبار الرابطة عن قريب - وهذا هو عنوانى [email protected] والموبايل انت عارفو ويمكنك اعطاءه لاعضاء الجمعية للتنسيق والمتابعة
لك الشكر والتقدير
05-17-2005, 10:24 AM
Tragie Mustafa Tragie Mustafa
تاريخ التسجيل: 03-29-2005
مجموع المشاركات: 49964
يطيب لى ان نرحب بك كعضوة فى سودانيس اولاين اولا وذلك لعدم التقائنا فى اى بوست سابق ونرحب بك كمشاركة فى هذا البوست ثانيا.
Quote: ومعليش جاى اقلق بهجة الطراوة دى والبوست
لما تفتحوا كأن الناس دى ما معانا
مستمتعيي بهمبريب كردفان
المهم يا سيدى استمحيك عذرا
واطلب من كل الاخوة المرور على بوست حمديين والزاكى
سودانيين يواجهون خطر الموت فى العراق
اين متشدقى حقوق الانسان ,يابكرى .......الخ
والله يا اختنا نحن مع الكل ونعيش الاجواء كل على حده ونتداخل و نتحاور نفرح ونحزن وكذلك كل على حده ولا نتوجه ولا نوجه وفى اعتقادى ان لا يكون هناك فرضا لى او لاى متداخل ان يتبع او ان يكون (امعة) فأنا احيانا ادخل البوستات من العناوين واخرى من الكتاب واخرى بالاحساس - وتأييد القضايا او رفضها لا ياتى بالمشاعر وانما بالقناعة - واخيرا اتمنى ان نستمتع ومعانا كل الاعضاء وانت اولهم بهمبريب كردفان الغرة - وايضا لنا ولكم ان نحزن ونعبر وكل بطريقته على ما يحصل فى دارفور ولكن بالرؤية الفردية لكل فرد يا تراجى - ولك الشكر والتقدير
05-17-2005, 10:13 PM
abas abas
تاريخ التسجيل: 07-27-2002
مجموع المشاركات: 6254
صديقى عباس حبيب الناس الرفع الكاس ( كاس افريقيا )- نحن ندعوك يا ابو محمد انت والعيال الى كردفان فى الخريف من يوليو وحتى اكتوبر لتغسل رطوبة العين دى هناك وتعال قول لى جزر الكنارى - شكرا عزيزى ابومحمد وتحياتى للاهل
05-18-2005, 01:20 AM
THE RAIN THE RAIN
تاريخ التسجيل: 06-20-2002
مجموع المشاركات: 2761
طبعا يا سيدى اسم اسماعيل ده موجود بكثرة فى كردفان وبالاخص فى الابيض تيمنا بالعارف بالله المغفور له باذن الله الشيخ اسماعيل الولى فلذلك من كل 5 اشخاص تجد اقلهم اثنين اسماعيل فلا تستغرب اذا ذهبت الى حى القبة فى الابيض فى البيت لو الابو ما اسماعيل لازم الابن وهكذا ولو ناديت يا اسماعيل الحلة كلها تجيك - واما صداقاتك لابناء كردفان فهذا تاج فى راسنا فنحن كلنا اصدقاءك فقرب تعال تلقانا قدامك وحبابك عشرة بلا كشرة - واصدقاءك المذكورين بعاليه اكيد اخوانى ناس معتز وعصام دهب وتبلدينا سوف يجيبوا ليك قرارهم - ودمت اخا وصديقا عزيزا
05-18-2005, 02:43 AM
البحيراوي البحيراوي
تاريخ التسجيل: 08-17-2002
مجموع المشاركات: 5763
ما اروعكم وما اروع تلك الارض البكر التي انجبتكم...كردفان نغم حنين في سويداء قلوبناما ان نسمع احرفها تلفظ "كردفان" وحقا يكون احدنا في حالة لا يشبهها الا " يا صوتها لما سرى".... ويا لكردفان ورسمها ويا لها ارضها واهلها
وكيف الحال ان لم اكن كردفان وكمان بديري " دعوها انها منتنة" عذرا اخي قصدت ان اشير الى مزحة الحبيب عصام دهب " كان ما فرجت ببيع دحيشتي دي بفرجها".... واصبحت الدحيشه في خبر كان ذي صاحب جرات الثمن و لا العسل ما عارف نسينا.
هيا يدا بيد من اجل السودان الذي لم تكن كردفان في صفوفه الخلفية يوما ما ففي الدين لنا اسلاف سامقة قبابهم شامخةهاماتهم وها هو الولي - وود ابوصفية والشيخ عبدالباقي ويوسف ابوشرا ودليل ويا لها من ارض للصالحين فيها رياض ورياض
يا اخي والله اثرت ليس النقع في عرصاتنا ولكنها لواعج الذكرى التي جددتها في وجدانياتنا وان بقى اسم كردفان محفورا في صدورنا ما بقى فيها قلب ينبض... وان صرنا الى التراب لتمنينا ان تصبح اجسادنا جزءا من اديم تلك الارض المعطاء. ومن هذا المنبر اؤكد لكم اصالة عن نفسي ونيابة عن رابطة ابناء الابيض بالمنطقة الغربية ومن منطلق كوني السكرتير العام لها اؤكد بان ايدينا معكم ومع كل ابناء كردفان المسكونين بهم اهلنا الغبش الحنان هناك.
ابوساره بابكر
***************************************************************************** مكتوب لك الدهب المجمر تتحرق بالنار دوام
05-22-2005, 10:24 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
انها كردفان يا قريبى تلك الارض التى ما حللت بها الا وعرفت ان للارض معان غير تلك التى تكتب وتقرأ كردفان وكما وصفتها هى تلك الارض المسالمة اهلها كردفان انجبت امثالكم واوائل طلاب الحرية والتعايش السلمى - وبمقارنة بسيطة بالله حاول ان تغمض عينيك وتتعمق وتتذكر من هم جيرانكم فى الحى ومن اصدقائك واحباب شلتك وزملاء الدراسة ورفقاء الدرب وكيف الالفة والمحبة والوئام بين قاطنى كل تلك الارض الطيبة بعيدا عن النعرات والجهويات والقبليات والاثنيات ...الخ كردفان هى السودان المصغر يا سيدى ونموزج لسودان الغد كردفان هى الغرة ام خيرا جوه وبره حبابك عشرة بلا كشرة قدم ادخل لجاى استريح وانجم هى الفزع والنفير والملم والجودية والفاس والحشاشة والطورية هى نصرة الغريب على القريب هى المحبة والقرابة هى المودة والصداقة ياااااااااااه
Quote: كان ما فرجت ببيع دحيشتي دي بفرجها
بتفرج يا ود عمى هذه انتم يا كردفان التمتم والجرارى وام صلبونج والتويا والمردوم والنقارة والربة والهداى وام كىكى والزمارة والعاكاز المضبب والسفروق والقرجة وام كرتبو والحربة والطبيقة والسكين والمنقاش والمسلة كردفان هى قلبنا النابض ومستقبلنا المشرق - واما عن اياديكم فنحن على يقين يا ابو سارة اخوى تور الشيل بابكر تسلم يابضراع اكيد جاينك اصلب طولا وانتظر وشكرا جزيلا وارجوا التواصل عبر الايميل تجده بعاليه او بالبروفايل ودمت ود ام غرة
Quote: ناس فلان اسع بجو... وين على بال ما يجو يااخوي
اسع بجو دى مطاطية ويمكن ما يجو - يمكن فى السرحة يمكن فى الفريق يمكن خاترين ولكن سماحة وكرم وضيافة اهلك يا اخوى بابكر - اسع بجو دى لازالة الحرج من الضيف الذى هو عندهم مثل الشرف والعرض والملامة- كردفان من كثرة قبائلها تسمى كرش الفيل لما تحويه من تنوع وتعايش سلمى - هل حفظ لها هذا - انها ود امى ويا ضناى وحشاى واخوى وابوى وتلك تنعت للغريب والقريب معا ياااااه لها من ارض ارضنا يا بابكر يا اخوى - خلى ناس تروتسكى وعصام وتبلدينا يفضوا ليك شوية ويحدثونا عنها - سلام الى ان نلتقى عزيزى بابكر
ويمكن قانصين للارنب ويمكن في النفير يحشو زرع فلان يمكن راحو الجلب يجيبوا العيش من الجبال نعم هم اهلك الكايلين مد الشونة دايما يا علي ود سماعين
لوحة من الجمال والتنوع العرقي والثقافي والديني... في اروع صور التسامح وود الانسان لاخيه الانسان حنان عديل كده ما في زول زيهم.
ولك تحيات معطرة بعبق الكضيم .... والقنبيل وكان عايز من مسكيت الفولة
ولكن اياك ان تتكعبل في الحسكنيت في الغابة... وحتى دبيب نمل كردفان وحركة "ام صرفة" في ارضها الريانة يعزف في النفسه نوته موسيقيةخاصة.
سلامي للاخ اباذر ... هل هو اباذر خورطقت ام تطابق في الاسماء على كل وفي الحالين اغريك تحياتي الكردفانية نعم ان كردفان هي بيت لكل المجموعات السكانية السودانية ولنا ان نفخر بهذه الرقعة من النسيج الاجتماعي في بلادنا. ابوساره
********************************************************************** مكتوب لك الدهب المجمر تتحرق بالنار دوام
05-25-2005, 11:22 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
ابو سارة الرائع كيف قيلتو يا الحبيب تحياتى الحارة كلام صحيح يمكن ويمكن ويمكن وهذا هم انتم اهلى الكردافه الله يديكم العافية ،
Quote: ولك تحيات معطرة بعبق الكضيم .... والقنبيل وكان عايز من مسكيت الفولة
ولكن اياك ان تتكعبل في الحسكنيت في الغابة... وحتى دبيب نمل كردفان وحركة "ام صرفة" في ارضها الريانة يعزف في النفسه نوته موسيقيةخاصة
مالك على يا اخوى من ما قريت كلماتك دى لى الليلى خشمى جامينى وبالمناسبة دى واحد شاب كده من اهلى البديرية ديل وباين عليهو عايز يتغزل فى محبوبتو وينوى يوصل ليها رسالة فقام قال ليها والله يا عشوشة انى دى من ما اشوفك كده ريقى بجمنى - فقامت قالت ليهو ياوليد هووى ترا عليك الله انى دى ليك ارديباى ولا ليموناى - فانت يا زول مالك على من القضيم و القنبيل والمديكى والحميض والعرعرى والعقش وخلافو - كمان انا فى اواخر 98 ذهبت البلد بعد غياب وركبونى حمار ريفاوى وبعدين لاقينا ناس بنعرفهم ماشين علينا وانت تعرف الدرب ما بشيل الماشى والجاى فقلت افسح الدرب وبعدين اسلم وقام الحمار جفل بسرعة وعينك ما تشوف الا النور والله وقعة فى نص الحسكنيت وتعال شوف الجلابية والعراقى والعمة وين والمركوب وين والعصاية وكل شى حت الجزلان وقع فى حته وشوف الناس والمواساة بتاعة الشماتة على ناس العلم وناس المدينة خاى يا جماعة الزول ده لتمدن وخرب خلاس اهييييييييييييى والله لى اسع لمن اذكرها بتفقع من الضحك . عموما تورت فينا حاجات ما من هنا والكلام كتير - خالص التحايا
05-25-2005, 05:21 PM
اباذر عبدالله اباذر عبدالله
تاريخ التسجيل: 03-13-2005
مجموع المشاركات: 40
انا اباذر الابيض الثانوية من ناس سنهوري لو سمعت بيهم(ناس سينما عروس الرمال زي ما بعرفونا معظم اهل الابيض). مع انه خور طقت كانت عدوناو منافسنا (في مجال الرياضة) لكن في اللحظة دي ليها مكان في القلب.و كنت اذكر لما واحد يغني جنبنا ( هبوب الهبت حي انا الثانوية خور طقت حي انا) كانت زي ضربت الكف.كانت ايام جميلة يا ابو سارة
أستاذ علي اسماعيل لك ولكردفان ألف تحية ،،، أنا عاشق لكردفان ولأهل كردفان ولجمال كردفان ،،، وأعتبر أهل الأبيض نسائبي ، ومنهم آل فضل ، وآل الخليفة ، والحرازاب ،، وقد زرت الأبيض في السبعينات ، ومررت بالرهد وأم روابة ، وتنزهت في البان جديد ،،، وما زالت تفاصيل الرحلة باقية في ذاكرتي ،،، والأبيض تحديدا هي المدينة التي تمنيت أن أعيش فيها ،،،
05-22-2005, 07:29 AM
هاشم نوريت هاشم نوريت
تاريخ التسجيل: 03-23-2004
مجموع المشاركات: 13622
يبدو ان العشق متبادل يا ود قاسم والنسب متبادل ايضاوهذا هو السودان ،
ونحن اذ ندعوك لزيارة كردفان الان ولتوثق ما ترى وفى انتظارك من الان ، وحبابك عشرة لتعيش بيننا فى الابيض ولو بس ادينا خبر ونقوم ليك نفير فى يوم واحد نبنى ليك وتسكن كمان ابشر بس تعال . خالص الود والتقدير
05-23-2005, 03:46 AM
Tragie Mustafa Tragie Mustafa
تاريخ التسجيل: 03-29-2005
مجموع المشاركات: 49964
تعظيم سلام مربع لكى يا استاذة - انها المفاجاة بذاتها يا تراجى كنت عشت فى القبة وكنت تدرسى فى مدرسة كلية المعلمات لالالالالالالالالالالالالالالا - طيب كنت مندسة وين؟ شفتى الخور البين القبة والكلية ده كل يوم نحنا مبطحين فيهو - وكمان كل اثنين وخميس بنستلم الذلابية والشاى من كل البيوت بالقبة لزوم الحولية - باين عليكى بخيلة عشان كدة ما جبتى لينا الشاى واللقيمات عشان كده ما اتلاقينا- انت اخوكى نزار ؟ كنتو ساكنين مقابل ناس حجة سكينة وحاجة فاطمة ناس عفاف وام روبة خلف بيت قمبور وناس مجدى ابجكيتة تقريبا اذا حالفتنى الذاكرة . طيب انت الكتاحة دى جايباها من وين ؟؟
اماالصديق العزيز اخوناالمكابد/ بشيراحمد اسماعيل ده صديقى وابن منطقتى وابن خال صديقى معتز تروتسكى تحياتنا الحارة له وخلوا بالكم عليهو ده فلتة مافيش زيو والزمن بيورينا- وكيفين ما ترددى مع بشير ده المفروض تنططى عدييل كده - عموما لكى ولبشير وكل المعاكم الف تحية
05-23-2005, 04:14 AM
البحيراوي البحيراوي
تاريخ التسجيل: 08-17-2002
مجموع المشاركات: 5763
و الله ما قرأت لك شيئا حتي اذادث اصالتك عندي و قامت حواسي لك احتراماو تقديرا. بالله كلمنا و زيد كلامك عن ارضنا الغرة كلمني و ين فات الزمن بكردفان ؟ وين عبدالقادر سالم و رقصة المردوم, عبدالرحمن عبدالله و الزمام ابو رشمة.كلمني عن ليالي الابيض و الحمادي و الدلنج و عن النهود لبارا ورقصات النقارة كيف اهلنا النوبة و البقارة و الجعليين و الشوايقة و الدناقلةو المحس و الفلاتة. وبالله اكتب و زيد سطورك عن وصفة الرملة الصفيرة النقية و مافي غيرة. كلمني عن طير الرهو ساب اهله زينا و اغترب ولا ييشم فوق الدعاش حارس المطر و صوت الرعد. و كيف الجهال مع الشكشاكة لسة بيلعبو ديرا ديرا يا مطيرة.ووين جبل العين و خور ابوحبل و خور شالايا و البانجديد.
اخوك تعبان و قال الرووووب يا علي
05-24-2005, 01:11 PM
خدر خدر
تاريخ التسجيل: 02-07-2005
مجموع المشاركات: 13188
حبابك عشرة بلا كشرة - يا سلالالالالالالام يا خضر التبلدية مره واحده كد ؟ انت لكن ما جيت من الآخر وكملت كلام السبق الكبار والقدرو - اولا التبلدية فى وقوفها السامق المقيل الماء العفوس الجريوات (القنقليس) الجرن وحاجات كتيرة خلاس بس كده انت اقيف وراعى ليها كدى واتأملها وبعدين قول لى خواطرك - بالله يا خضر او اى من الاخوان ينزل لينا اغنية مكتول هواك انا يا كرفااااااااااان
خالص الشكر والتقدير
05-26-2005, 02:34 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
كيفك يا الحبيب ود ام غرة سلامات يا اخى - اعزرنى على التاخير فى الرد فلك العتبى حتى ترضى يا اخوى - ما تقرأءه عنى يا قريبى هو محاولة وخربشات نكتبها فى حق امنا ام غرة كردفان والتى بالتاكيد اذا جبنا البحار مدادا لنكتب عنهاسوف لم نستطيع ان نؤتيها حقها تلك الارض الطيبة الحنونة الروؤم المتمثلة فى شخصكم يا الغفارى انكم ومن قبل اجدادكم واجيالكم القادمة هى كردفان انتم الواجهة تقرأ كردفان فى جباهكم فلذلك عندما تقرأ ولو سطر عن كردفان ستهيج فيك الاحاسيس والمشاعر النبيلة والمودة لتلك البقعة انه الولاء لتلك الارض يا اباذر الغفارى - ام زمام ابور شمة وجدى الريل وشقيش و الليمونى وتومى طرينا وووووو الكثير انه ودبارا بلبل الغرب طريح الفراش يصارع مرض الغضروف اللعين شفاه الله تعالى باذنه وستجد فى هذا الرابط الكثير عنه لجنة دعم وسفر ود بار (بلبل الغرب) - عبدالرحمن عبدالله واما عن كردفان عموما ستجد ما تبل به الشوق فى هذه البوستات التالية تكوين رابطة ابناء كردفـــــــــــــــــان - دولة الامارات العربية المتحدة الابيض ** كرفان ** السودان 00 والروب ده قالوه كتير من قبلك عندما فارقت اقدامهم تلك الارض الطيبة اهلها كردفان وانا اولهم يا اباذر - خالص شكرى وتقديرى
05-25-2005, 10:37 AM
ghariba ghariba
تاريخ التسجيل: 03-09-2002
مجموع المشاركات: 13231
وين الايام بيك يا سيدى اخبارك واخبار ناس الرياض شنو -
Quote: وانحنا ناس الاحياء الغربية المعاصر والميرم ( الوحدة حالياً ) وزندية وود الياس وفلطسين لينا الله
اخوى انتو الناس العاملين فيها شفوت والبتخشوالسنماالدور التانى ديل لازم نتريس فى الدخول معاكم فى سجال نحن ناس مدرسة اسماعيل الولى اللى (لم ينجح احد ) خلونا نتفسح فى الكورة والغنا وجروبى وفونتانا و مالنا ومال اكل التبش والاقاشى وكد الدوم والدليب شوف صلاح غريبه ده بالله والله ده غريب ذى اسمو ما قلنا من زمان الاسامى دى ما بدوها لاهلها الا الملائكة قلتو لا - اها شوفو غريبة اسمو ده جابو من وين الزى كلامو الفوق ده ؟
خالص التحايا والتقدير وخليك بالماسنجر
05-28-2005, 05:00 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
فى اطار تفعيل العمل الثقافى والاجتماعى وتعزيز الانتماء للوطن وتكريس قيم المجتمع ْاضافة لتوثيق روابط التواصل بين ابناء البلاد بالداخل والخارج ، يسعدنا ان نبشركم بانطلاقة (مجلة عروس الرمال) التى تعمل على ترسيخ تلك المفاهيم حيث تحتوى على ابواب تختص بالمجالات الاجتماعية والفنية والاسرية وتهدف لتسليط الضوء على قضايا المغتربين. وتتعدد المواد والمواضيع من حيث الطرح والرؤى لتجمع بين قضايا الداخل والخارج كما تتميز بكتابات أشهر الاقلام السودانية والعربية ذات الصدى فى الوسط الاجتماعى والاسرى والساحة الاعلامية . وفى هذا السياق ولاجل تكامل الروئ والاهداف وتحقيق الغايات المنشودة نسعد بمشاركتكم ودعمكم لهذه المطبوعة الوليدة لنصل جميعا لمبتغانا فى سبيل توصيل الرسالة التى لن تكون بغير مشاركتكم من خلال مشاركاتكم الفعالة لمؤسستكم عبر صفحات (عروس الرمال) التى تصل لكافة البيوت السودانية بالامارات وكثير من دول المهجر والبيوت السودانية فى السودان وخارجه. ويبقى دعمكم للمجلة دعم للمفاهيم والقيم والتى نسعى من خلالها تكريس روعة السودان والارتقاء بكل من ينتمى له ومحو كل صورة غير محببة تكرست بفعل مختلف الظروف.
ودمتم ودامت عزة السودان
على محمد اسماعيل محمد / رئيس مجلس الادارة
للمتابعة والتنسيق يمكنكم الاتصال على الارقام التالية
الاستاذ على اسماعيل يعود بنا الحديث عن كردفان الي ذكريات عزيزة على بمنطقة اب حمرة المحطة والسميح وطاحونة خالتي التومةوداخلية الرهد يااااااااااااه والله ايام يازمان مابقول العشنا كان
.............. تخريمة الرجاء الاتصال ضروري جدا
05-28-2005, 09:27 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
اخبارك يا عزيز - ما احلى الكلام عن ربوع كردفان ويا بختك وبخت من له زكريات بكردفان نحن فى انتظارك بالله اسرد لنا كيف كانت ايامك هناك وطاحونة خالتك التومة ام دقيقها دراش ودايما واقفة يا دايرة سير ويا جازها خلص - والداخلية بالله والناظر الالفة وتمام المغرب والمذاكرة بالفانوس ولا انتو ناس اللمبة امقطان ؟ فى رجاك يا ابوالزهور ودمت تخريمة : تلفونك يا مرة مشغول يا مغلق - نلتقى فى الماسنجر ودمت صديقا واخا عزيزا
05-30-2005, 01:17 PM
إسماعيل التاج إسماعيل التاج
تاريخ التسجيل: 11-26-2004
مجموع المشاركات: 2514
Quote: بسم الله الرحمن الرحيم محضر انعقاد الجلسة التأسيسية لمنتدى كردفان
التاريخ الجمعة 3/ 6/ 2005
المكان / قاعة مسرح النادي السوداني بدبي
الحضور:-
1- المهدي الطاهر بخيت 2- محمد عيد عبدا لرحيم 3-علي محمد علي كباشي 4- عبد الناصر حماد أحمد 5- سيف الدين محمد أحمد 6- عمر محمد الشريف 7- الرشيد ميرغني حسين 8- الطيب آدم الطيب 9- علي خميس أحمد 10- عوض الله عوض علي 11- آدم محمد موسى 12- عبدا لقادر بانقا الزين 13- يحي عبدا لكريم العبيد 14- فتح الرحمن أحمد حسن 15 – إبراهيم مصطفى التماري 17- علي محمد إسماعيل 18- عبدالدين سلامه 19- عبود ميرغني عبود 20- عبدا لله احمد إبراهيم 21-/حبيب سرنوب 22-/ علي الشريف 23- إسماعيل إبراهيم محمد 24- أحمد محمد عبدا لله 25- يوسف مرسال محمد 26- عبدا لله محمد بابكر 27-عصام نورا لدين الفكي 28- خالد عبدا لله البكري 29- بالبكر مجذوب محمد 30- احمد إبراهيم محمود 31- الطاهر محمد آدم 32- صلاح إبراهيم جابر 33- جابر بشير مخلوف 34- يوسف بابكر احمد 35- آدم سليمان محمود 36- محمد آدم الطيب محمد 37- فارس محمد خالد 38- مهدي إبراهيم محمود 39- احمد محمد علي
ومن أصدقاء أبناء كردفان :-
1- مهدي الأمين 2- عبدا لقادر الكتابي 3- محمد سيد احمد 4- إبراهيم محمد عطية
ومن القنصلية :-
1- احمد شاور ( القنصل العام بدبي ) 2- العبيد أحمد مروح ( الملحق الإعلامي ) 3- عوض محمد أحمد ( السكرتير الأول )
وقائع الاجتماع:- 1-بدأ الاجتماع بتلاوة آيات من الذكر الحكيم تلاها الشاعر عبدا لقادر الكتيابي 2-كلمة النادي السوداني ألقاها الصادق ( سكرتير النادي ) ورحب فيها بالحاضرين وسرد دور النادي في احتضان ودعم المنتديات ودور وحدود صلاحيات تلك المنتديات واللوائح التي تحكمها وآلية النادي القانونية في مثل هذا الاجتماع وأثنى على خطوة أبناء كردفان وتحركهم الفعال لإقامة هذا الكيان 3-كلمة أبناء كردفان ألقاها نيابة عن الداعين لقيام المنتدى السيد / علي إسماعيل تناول فيها الأسباب الداعية لقيام هذا المنتدى والهدف المرجو منه وما يستصحبه من آليات إعلامية وترويجية ودعي لوحدة الصف والعمل لتنمية المنطقة وفق لوائح المنتدى وقانون دولة الإمارات العربية المتحدة 4-بعد تأكده المعلن عن قراءة الجميع للائحة الرابطة وموافقته عليها وإقراره بها تولى السيد / الصادق ( ممثل النادي السوداني ) الإشراف المباشر على إجازة اللائحة وانتخاب رئيس اللجنة الاستشارية 5-تم اختيار حبيب سرنوب رئيسا للجنة الاستشارية للمنتدى بإجماع الحاضرين وتولى رئاسة الجلسة وإدارة الجمعية العمومية 6-بعد تقديمه كلمة شكر لثقة الحاضرين به تولى حبيب سرنوب إدارة انتخاب رئيس المكتب التنفيذي للمنتدى 7-تم انتخاب السيد / علي محمد إسماعيل رئيسا للمكتب التنفيذي للمنتدى بإجماع الحاضرين 8-بعد شكره الحاضرين على ثقتهم به في كلمة قصيرة تعهد رئيس المكتب التنفيذي بعمل كل ما يمكن عمله لتحقيق أهداف الرابطة 9-بعد اختلاف الآراء في كيفية اختيار أمناء المكتب التنفيذي اتفق الجميع وبتدخل توافقي مباشر من السيد / الصادق ( ممثل النادي ) على اختيار لجنة برئاسة رئيس اللجنة الاستشارية ورئيس المكتب التنفيذي لترشيح قائمة وعرضها على الجمعية العمومية وتم تكوين لجنة الاختيار من:-
1- الرشيد حسين زاكي الدين 2- عبدا لله أحمد إبراهيم 3- محمد عيد عبدا لرحيم 4- عبدالدين سلامه 5- علي خميس 6- يحي عبيد 7- مهدي الطاهر 8- علي الشريف
10- قامت اللجنة بترشيح أمناء المكتب التنفيذي كما يلي :-
1- نائب رئيس المكتب التنفيذي يحي عبدا لكريم 2- الأمين العام عبدالدين سلامه 3- أمين المال علي محمد علي ( الشريف ) 4- أمين الخدمات محمد الجودة أحمد 5- أمين الشؤون الاجتماعية علي خميس 6- الأمين الثقافي عبدا لله أحمد ( الكردفاني ) 7- أمين العلاقات العامة محمد عيد عبدا لرحيم
8- الأعضاء 1- الرشيد ميرغني حسين زاكي الدين 2- مهدي الطاهر 3- حسين محمد علي 4- خالد إبراهيم
11-بعد الاتفاق على الاختيار الذي تم بمراعاة التمثيل الجغرافي عرضت الأسماء على الجمعية العمومية التي أجازتها بالإجماع على أن يتم مراقبة أداء اللجنة لمدة عام كامل تقرر الجمعية العمومية إستمراريتها أو تعديلها أو استبدالها 12-وفي كلمة ختامية عن السلك الدبلوماسي أشاد السفير/ أحمد شاور قنصل عام السودان في دبي بالروح العالية التي سادت الانعقاد وما لعبته كردفان على مر العصور التاريخية من أدوار أساسية ومفصلية هامة في السياسة والثقافة والاقتصاد السوداني مؤكدا دعم القنصلية لهذا المنتدى وداعيا الجميع لوحدة الصف والتكاتف لما فيه مصلحة الوطن 13-ابتدأ الانعقاد في الثانية من بعد صلاة الجمعة واستمر حتى السابعة إلا الربع مساءا
06-07-2005, 02:31 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
Quote: بسم الله الرحمن الرحيم كلمة ابناء كردفان القاها السيد (على اسماعيل)
أعضاء السلك الدبلوماسي بالقنصلية السودانية في دبي ... السادة ممثلي إدارة النادي الثقافي الاجتماعي السوداني بدبي .. إخوتي أبناء كردفان .. الإخوة الحضور ... السلام عليكم ورحمة الله وبركاته ..
نيابة عن أبناء الإقليم يشرفني ويسعدني هذا التواجد الذي يؤكد حرصنا وارتباطنا بتراب الوطن لأداء ما علينا من واجب مستحق نأمل أداءه من خلال التكاتف والوحدة بين أبناء الإقليم والتي نتمناها أن تكون نموذجا مشرفا لوحدة الوطن الكبير والالتفاف حول قضاياه بتجرد تام من كل الميول والانتماءات السياسية وان نتمكن عبر هذه الرابطة التي اجتمعنا لإنشائها في هذا اليوم التاريخي من أجل خدمة أبناء وقضايا المنطقة والنهوض بمجتمعها الذي نحن جزء لا يتجزأ منه ... والرابطة كما تعلمون إخوتي ليست فكرة جديدة ولكننا كمجتمع كردفاني تجري الوحدة في دمائه وتدخل ضمن مفاصل تشكيلته الأساسية من خلال ما وجدنا عليه آباءنا وأجدادنا وما شاركنا فيه من أشكال الترابط والتعاضد والروابط الفطرية كالنفير والضرا والفزع وما شابهها من الصور والأشكال والقيم الاجتماعية التي شكلت جزءا أصيلا من هويتنا ومفرداتتنا الثقافية والبنائية . وإننا إذ دعونا لتشكيل هذه الرابطة إنما لتكون همزة وصل وتقريب بيننا لنناقش مع بعضنا مختلف الهموم والشؤون والشجون ونسهم في حلحلة قضايانا وتنمية مناطقنا وطرح السمات الكردفانية الرائعة في مختلف المحافل وربط أبناء الرابطة بكردفانهم عبر مختلف الخدمات التي تسعى الرابطة لتوفيرها بالتنسيق مع أولي الأمر هناك ... ولنبدأ من خلال هذه الرابطة التفاكر في كيفية تنمية مناطقنا بتقديم العون الممكن أو إعمار المشاريع الاستثمارية المختلفة وتوصيل أصواتنا ورؤانا للمسؤولين ودعمهم لما فيه خير للنهوض بالمجتمع الكردفاني عبر مختلف الخدمات . ومن هذا المنبر أحملكم رسالة دعوة من لم تصله دعوة اليوم للانضمام إلى هذه الرابطة ودعمها بأفكاره ومقترحاته ورؤاه وستبقى الرابطة منبرا مفتوحا لكل أشكال العمل الاجتماعي الذي يتوافق مع دستور النادي الثقافي الاجتماعي وقانون دولة الإمارات العربية المتحدة التي وفرت لنا كل ماهو متاح لخدمة المجتمع . وتعالوا معا نتسامى عن كل شيء شخصي ونتكاتف معا للنهوض بكردفاننا وهي دعوة لكل سوداني للنهوض على الأقل بمنطقته لينهض السودان كله في وقت واحد وبسيمفونية تتناغم فيها الجهود الشعبية مع الجهود الرسمية . ومع إنشاء هذه الرابطة يسرنا أن نعلن لكم عن انطلاق مجلة عروس الرمال التي تتم طباعتها وتوزيع جزء كبير منها بداخل الإمارات وتوزيع الجزء الآخر بالسودان وبخاصة مناطق كردفان وهي مع حملها كل شؤون الأسرة السودانية في المليون ميل تفرد ملفا خاصا بكردفان وأبناء كردفان في الخارج وإمكانات المنطقة وكل ما يختص بها ونحن حريصون على أن تمثلكم هذه المجلة خير تمثيل وأن تدعو لوحدة ونهضة السودان الجديد الذي اقتربت شمسه من الشروق كما أناشدكم بالوقوف مع هذه المطبوعة بكل أشكال الدعم الممكنة من مساهمات إبداعية وصورية وإعلاناتكم الصغيرة والكبيرة وملاحظاتكم وحرصكم على اقتنائها في كل شهر عبر الاشتراك السنوي أو عبر موزعينا في مختلف إمارات الدولة والذين يتعهدون بتوصيلها لكم حتى في بيوتكم . وكما نعلن لكم ايضا عن انطلاق موقعكم على الشبكة العنكبوتية (الانترنت ) ليكون حلقة تواصل وترابط بينكم وبقية ابناء الاقليم والبلاد كافة اينما وجدوا وعنوانه هو (www.kurdofan.com ) وسنقوم بتدشينه لكم فى القريب العاجل. ونيابة عنكم نتقدم بجزيل شكرنا وامتناننا لاسرة السلك الدبلماسى بسفارة السودان وعلى راسها سعادة السفير حاج الفكى هاشم الذى رحب بقيام هذه الرابطة وتعهد بتوفير كل ما امكن من دعم معنوى يسهم فى تطوير الرابطة واستمراريتها وكان من المفترض ان يكون بيننا لولا بعض الظروف الطارئة الخاصة بهموم الوطن ولكنه حملنا رسالة ان ننقل لكم خبر لقاءه بكم لاحقا والشكر موصول لاعضاء السلك الدبلماسى بالقنصلية السودانية بدبى ايضا وعلى راسهم سعادة السفير احمد محجوب شاور الذين رحبوا بالفكرة وابدوا استعدادهم بدعمها بكل اشكال الدعم وكذلك اسرة النادى السودانى بدبى والذى احتضن هذه الرابطة وتعهد برعايتها . ولا أريد الإطالة عليكم ومرة أخرى أشكركم لتكبدكم عناء المجيء إلى النادي من مختلف إمارات الدولة ولكم منا كل الشكر والتقدير
06-07-2005, 02:38 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
.. . الهميم الأستاذ الكردفاني الأصيل على اسماعيل البديري وفقك الله وأبناء كردفان قاطبة فى مساعيكم اعتذر للمداخلات المختصرة نسبة لغرض الرابطة الأسمي ونسبة للعجالة التى تحيط بنا..
دمت,,,
06-08-2005, 07:12 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
نحن على علم تام بمشغولياتك واعباءك الكثيرة وما نحن بغريبين بعمل المنظمات واهو فى النهاية انت بتادى عمل نبيل نسأل الله لك التوفيق انت ايضا واسهاماتك فى شئون الرابطة وخلافه محفوظة ومسوكرة فى انتظارك بس خلينا نفرق ما بايدينا وسنطاردك حتى ولو ختيت المنظمة دى فى راسك وجريت - خالص التحايا والتقدير
06-12-2005, 01:59 AM
معتز تروتسكى معتز تروتسكى
تاريخ التسجيل: 01-14-2004
مجموع المشاركات: 9839
السحيةمالكو يا كبارى مالكو عليا انا ما بسيبو الحبيب لو الزمن جار بيا --- الصغيرون عليك الله جر التوب لينا مرة انا يا عريييييييييييييييس بنات مداى يا بنات مداى عليكن الله صفقن معاى للصغيرون فى الطوطحاى اللسع ما كمل اللباى وفى قليصة حيهم بجاى محل سقونى الموية بالكباى الصفيووووون عليك الله جر التوب لينا مرة ----- ياااااا قزاز كلونيا اللى كلك سوا بسالم الشباب ولهان كايس الدوا
07-13-2005, 09:26 AM
على اسماعيل على اسماعيل
تاريخ التسجيل: 03-25-2004
مجموع المشاركات: 1802
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
nasiradin
البحيراوي
الزنجي
إسماعيل التاج
عصام دهب
معتز تروتسكى
Tragie Mustafa
abas
)- نحن ندعوك يا ابو محمد انت والعيال الى كردفان فى الخريف من يوليو وحتى اكتوبر لتغسل رطوبة العين دى هناك وتعال قول لى جزر الكنارى - شكرا عزيزى ابومحمد وتحياتى للاهل
THE RAIN
اباذر عبدالله
ودقاسم
هاشم نوريت
خدر
ghariba
شمهروش
)
فيس بوك
تويتر
انستقرام
يوتيوب
بنتيريست