|
|
 الحمى ام بيض ياسجيمان
|
والله ياسجيمان يااخوي جاتني ليك حمى الله لا وراك ليهالابندول نزلا ولا حاجات تانية معارف اسمها زاتو شنو، ويوم قلت امشي للدكتور محمد ولدي انتظرني لابس قدام الباب قال داير يوديني للدكتورة عشان يدوني حقنة تس .
جرو ليك مني حقنة كاملة دم عشان الفحص وختو لصقة وادوني حقنة فولترين وشلت من الممرضة لصقة تانية عشان الصقها في يدي التانية عشان اوريها لولدي محمد وانو ابوهو مابخاف من الحقن زي ماقالت امه ، لكن لما شافن ما اقتنع وقال لي انا بمشي معاك ماتخاف حاجة بسيطة بس تس واشر على المكان داك .
المهم ياسيدي اتذكرت مضروب الطاري بتاعك داك بتاع الحمى وقلت ياولد مايقع عليك كلام سجيمان وقعدت اضحك ومن الألم الضحكة ظهرت زي الإبتسامة اتلفت القى ليك الولية دموعها في خدها ولما شافتني جرت وقعدت تجعر ، امي تسالها ياولية مالك وهي شغالة حليلك ياعشاي حليلك ياالماشفت جديد هند ومحمد والبربيهم بعدك منو ؟ وامي لسه تسأل فيها قامت قالت ليها جمل شيلي الظاهر حياتو بتنعرض قدامو ومن عملو الصالح بيبتسم للملائكة ( عملو الصالح دي قالتها برخوة اظن لي هي زاتها مامصدقة ) .
امي جاتني جارية وجاء ابوي بس قعد جنبي ويقرأ في القرآن وبرضو جاء اخوي الكبير وقعد يبكي .
ماقدرت اقول ليهم ياجماعة ده بوست سجيمان كمان يقوموا يودوني الطائف ، اها جا اخوي الحتالة قايتو ربنا يسامحو معذبنا من ما اتولد قال ليهم ملائكة شنو ديل البيبتسمو لعلي ياجماعة دي هضربة حمى ساكت ، حتى بعد داك الجماعة انتبهوا شوية وبقو يسألوني ، قايتو ربك رب الخير اتذكرت دكتور عادل وقلت ليهم انو وصف علاج الحمى كده وكده
مسكوني ليك من رقبتي دكتور عادل ده منو والوداك ليهو شنو ؟ واحد يقول ده دكتور حمير والتاني يقول ده مشعوذ نوديهو الهيئة .
قايتو ياسجيمان يااخوي ربنا يسامحك على العملتو فيني ده .
|
|
 
|
|
|
|
فيس بوك
تويتر
انستقرام
يوتيوب
بنتيريست