كتب الكاتب الفاتح جبرا المتوفرة بمعرض الدوحة
|
|
 الغريب .. والبحر .... هاشم صديق
|
شعـــر :هاشــــم صـــــــديق
جِيت على موج البَحَر مَعْبُور .
مَغبر بى رماد النار
مَجَرّح من حَصَا المشوار
مَشَقّق من لظا العتمور .
أيا موج البحر بالذات
أيا موج البحر تحديد
أجيك مجبور
أجيك قرفان أجيك حزنان
وصوت نبض الضحك محظور .
أجيك نَشْفَان أجيكْ حفيان
وخيل دَرْب السفر مكتول
وسيف وَهَج العُمُر مكسور .
أجيكْ مدفور بايِد الريح
أواجه لفّة التاريخ
واحس طَرَف اللسان مشلول
طعم كل العشقتو مسيخ
أيا موج البحر بالذات
أيا موج البحر تحديد .
زبَد غُبْنَك مكث فى النور
زبد غُبنى اْنسجن فى السور .
زبد غُبْنَك سطع للناس
زبد غُبْنِى اتخنق وانْدَاس
طَلَع فى حلمى قَمَر الزيف .
اتْقَطّع سلام الروح
بَهَت سر الشِعِر فى البوح
وبات سَمَر الأماسى مُخيف .
أجيكْ يا موج من الأصقاع
أدُق باب الصَدَف فى القاع.
يهِد حيل الصدى الإيقاع .
واخوض فى لُجّتَك مهووس
تَقَالْد الزُرقه فى الأبنوس
ومن غابة المرجان
يهِل فى عتمة الأركان
نَجِم منقوش فى بال فانوس .
ويزيد شَبَق العَطَشْ لى زول
يِوَشوِشْ نَبْضَك المشلول
أموت لى ونَسه نُص الليل
لى حُضناً يشد الحيل
لى نَقْرَة حوافْر الخيل .
لى رعداً يَعدْل الميل
ولى ضحكة مليون ميل .
أموت فى همسه ماتِنْذَاع
ولى رفّة نسيم فى شْراع
مسافر لى مرافى عروس .
أموت فى صُحْبَه ما بِتْخون .
أموت فى طعنه ما بِتْكون
أموت فى بيت شِعِر مسكون
أموت فى بوح فصاحتو سكون .
أموت فى صك غرام مضمون
أموت فى حق جسارتو جنون
أموت ... وأموت ...
فى شيتاً يعيد الكون
********************************
تسيل يا موج - دموع فى خاطرى - من عَبْرَه
أسَامَر " كاسِر الأمواج "واتِب من فكره لى فكره .
أيا موج البحر أشهد
مِسَاسِق عمرى فى المغَسَه
نَفَس تَعَب الغُبُن قايم من امبارح ولى حَسّه .
واحِس فى ايْدِىْ باقِّى حريق
ألاقى صوابْعى فى الجَمْرَه
ولسّع شاقِّى ظُلْم الريح
ولسع داجِّى فى اللُجّه
وما وَشْوَش فنار لشْرَاع
ولا اتْنَفّس صباح بُكره .
أيا موج البحر بالذات .
أيا موج البحر تحديد
جَدَعْت شِبَاكى شان أقبُض
وميض من دُرّه فى المحّار .
صَبَرتَ حَبَسْتَ نَفَس الشوق
عشان أحصِد شَقَا المشوار
ظهر فى شَبَكى قِرْش الموت
إتْمَرْعَف عَلَىّ الحوت .
إنْفَجَر البَرِق أمطار
إتْجاسَر عَلَىّ الريح واتْحاصَرْتَ بالأخطار .
وفى عَرْض البَحَر والموت
عَزَفْت من الهلع مسدار .
سبح فى الجو رفيف الصوت
واتْهَدّج صدى القيثار
رجع بال البَحَر ساكن
واتْمَكّن هوى المحّار
بقيت (اورفى) فى وش الموت
بكايا ضِحِك غُنايا هسيس
أبارز بالنَغَم أشباح واكاتل بالشِعِر إبليس
واخُش فى ليل مدايْن الموت
أرجِّع للشَمِس ( يُوْرِيدِيس )
أيا موج البَحَر بالذات
أيا موج البَحَر تحديد
مشيت جَمْر العُمُر مجبور
مشيت نُص العُمُر مدفور
مشيت صحرا العُمُر بالايد .
فَتَرْتَ من السَبَق للتار .
ومن مرجيحة الأشرار .
ومن حِسْكِنّة الأسرار .
ومن شَبَق الخيال للتار .
فَتَرْتَ من الطَعِن والظن
ومن نَحْر الجميل بالمَن
ومن رَجْيّة غرام وأنيس
أيا موج البحر أشْهَد
نَفَس غُبْن العُمُر قايم
ولسّع ما وصلت الميس
أموت يا موج على دَقْسَة نِعَاس فى سلام .
ولى نَمّة فَرَح جايى
ولى خاطَرَة مُدُن أحلام
ولى آخِر نَضِم يِتْقَال
ولى آخِر بياناً هام
ولى صُبْحَاً مَزَرْكَش نار
ولى ضُلاًّ يِمِش قِدّام .
أموت وأموت
لى يقظة جَرِحْنَا النام
ولى خَجْلَة خَجَلْنَا العام .
أيا موج البَحَر بالذات
أيا موج البَحَر تحديد
بَصَقْتَ على المثَل مَرّه عشان قال:-
(الأمل حُفْرَه)
رَسَمْتَ هواى بالشَفْرَه
عشان آمَن عَدَا الخُفَرَا .
طلبت " جواز سفر " تمديد
خَتَموا جروحى للتجديد
لقيت تأشيره للمُرَه
ورماد حاْزمِنُّو فى صُرّه
***********************
أيا قابض هوى السكين
ويا غبيان ويا صحيان
ويا فالح ويا مسكين
أخير سَفَرك يخيب مَرّه
أكان تبقى الجروح حُرّه .
أخير تختار تكون مُحتار
بدل تهبط حِلِم واطى
أخير تَغْرَق فى شَبَق الموج
بَدَل تَلْمَس وَهَم شاطى .
أخير تِنْجَم فى نار الهَم
بَدَل تَحْلم حِلِم واهى .
أخير تَصْبِح عديل مظلوم
بَدَل تصبِح عديل خاتى
أخير تصرخ فى وش الجِن
بَدَل تِتْعَدَّ متواطى .
أيا موج البَحَر بالذات
أيا موج البَحَر تحديد
قريت سر الطريق فى كتاب
مغبَّر فى رفوف دكان
نَفَخْتَ غبارو بى روحى
وتَلَيت تعويذَة العنوان .
لقيت فَصْل الفُجور واسع
وضَيِّق مدخل الإيمان .
نَبَشْتَ الفكره بى ضُفْرى
وبَحَّتَّ الفصول أزمان .
سَرَق من عُمرى لُغز الخير
واتْقَاسم هوايا الغير
وانْكَسَر الفَهَم خجلان
واتْحَيّرتَ فى حيرتى
ومن تخريفَة الميزان
أيا موج البَحَر أضحك
لقيت الحق صَدَر (مرسوم )
من " هيئة الأركان "
واتْرَفّع أمير الجن
صِبِح فى غَفْله سِيِد الشان
وقام فى عين شَمِسْنَا السد
اتْقَطّع غُنَا الشُفّع واتْقَلع الضُفُر فى اليد .
ومن شَبَكة مسام الليل قام شوك الظُلُم فرهد
وغاب قمر الأمل خجلان من ظُلمة المشهد .
أيا موج البَحَر بالذات
أيا موج البَحَر تحديد
أيا موج البَحَر أشهد
كِمل دَمْع الوَتَر فى البوح
واتباقص شُعاع الروح
ومن بين صوابْع الايد اتْسَرّب شعاع الروح
وما معروف متين يا موج جروحنا تَروح .
أسف يا موج على طَعَم الضَحا الحَنْضَل .
على المِحْرَات وكِت عَصْلج
على غَصَة أسى المِنْجَل .
أسف يا موج
على (الحِيْرَان)
على الميزان على القاضى
على الطاغى على الظُلْم الرقَد قَيَّل .
أسف يا موج
على الانسان وكِت يِصْبِح من الفيران
على طاولة فكى المعمل .
أسف يا موج
على الموصول وما واصِل .
أسف يا موج
على القِرْش الصِبِح فاصِل .
أسف يا موج
على المُدّاح على الزفّه
أسف يا موج على تَجْرِيحْنَا باللفّه .
أسف يا موج
على عار الغَتَا الناصِل
أسف يا موج
على حالنا على الحاصل .
أيا موج البَحَر بالذات
أيا موج البَحَر تحديد
أقرالك تُراث (الرمه والحُراس)
( وتغنيلو بت عباس )
عينَى أنا فى القهوه ما جَلاّس
(عينَى أنا)
واحكيلك
حكايْة ( الغول ) مع (السَمْحَه)
سباق النمله والقمحه
يصَفِّق موجك المدهوش
ويضحك صوتك المقروش
وتَطْوَل ضحكتك صارى
تجارى المولد الجارى
وشوف يا موج
نَحَجِّى القَمَره بالفُقَرا
وكت " اتقاسمو (النَبَقَه)
تكشِّر بَسْمَتَها الصافيه
وتَحْلِب دمعه فى قافيه
تقول يا موج
أنا الشاهْدَه وأنا الشايفه
حكاية الدنيا من قامت
وعارْفَه الناس متين شِبْعَت متين صامَت
ومندهشه من الأمثال
وكت تَصْبِح خَدَر .. غَشّه
كتير يضحك وَكِت أسمع :-
(قَصَم ظهر البعير قَشّه )
كتير بَسْمَع حُجَا التاريخ حِكَم أمثال
ألاقى الحِكْمَه وش القول
وضَهْر الحِكْمه فى الأفعال
كتير شُفْت (السِبَح) تِنْجَر .
وجوه فى الحق تِتِب تِنْصَر .
دموع وُرّاع وايديناً تَرُد الصاع .
كتير نَسْمَع عن الدنيا ام نعيماً غَشْ
وعن فَضْل الضَهَر فى الحر
وعن نورَة صَلاح الوش
وعن غَضّ النَظَر ايمان .
وعن بَرَكة صَحَانا دَغَش .
ونلقى الحِكْمَه مليون لون
والفُجّار نجوم الكون .
نلقى الكلمه مليون وش
ونلقى الغَش مبارِى الغش .
متين يا موج أَسَفْنَا يغيب
دَغَشْنَا يجى
*****************************
عصور يا موج نَضِمْنَا شَكِى
شِعِرْنا شَكِى غُنَانَا شَكِى فِعِلْنَا شَكِى .
و (تحت القُبه) مما قُمْنَا (مافى فكى)
أيا موج البحر بالذات
أيا موج البحر تحديد
أحاول بى صوابْع الخوف
ادق باب الهوى المعزول
أحِس بى رهَبَة الأحلام
وبى حَنْضَل زمان وفصول .
واشِد حيل العَشَم من ميل
أقوِّم جَنّة الأحلام
تجى الأحلام فى درب السيل
تعافِر فى مسالْك الموت
وتِتجرّح حوافْر الخيل
أيا (سيزيف)
زمان الجِن
متين قَدَرَك يسامح يحن
متين تَوْصَل بحجر الشيل
أيا قابض هوى السكين
ويا غبيان ويا صَحْيَان ويا مسكين
وحيد رغم الورق والصوت
وحيد بين النَفَس والموت
وحيد بين القِرِش والحوت .
وحيد رغم الشدر والطير
وحيد وسط الصحاب والغير
وحيد زى خاطْره فى عتمور
وحيد زى عَتْمه وسط النور
كفاكْ يا زول مَضَايْق السور
تجابِد فى الزمن معبور
تَصَفِّر فى سَمْاكَ الريح
تَلِفْ بيكا المدن وتْدور
وراكْب العاصْفه زى عُصفور
مَعَلّق فى المطر والغيب
ومِرْقَ الدنيا فوق مكسور .
أجيك يا موج وتر معبور
تَقَبِّل زُرْقَتَك منى
احكيلك شقا المشوار
يخاف مِلْحَك مِلِح هَمِّى .
أقول ليكا الكلام مكشوف
واْرافِع شَان تحس وتْشوُف
يطْلَع من جبينك نور
يِجُبْر الخاتر المكسور
وتَنْدَه لى بنات الحور
يِفِجَّن من عيونى السور
واشوف حُضْن الوطن مفتوح
واقيف فى (كاسِر الأمواج )
أشُم طيناً قريب للروح
ويِهَوِّم فى الشَرِق فانوس
محلِّق بى جناح( فينوس)
واسيل حِنِيّه من دمعه
واقَطِّع دفتر الفجعه
واحس من فرحه من عَبْرَه
تدُق تأشيره للرجعة
أجيكْ يا موج من الأصقاع
أدُق باب الصَدَف فى القاع
يِهِد حيل الصدى الإيقاع
واخوض فى لُجَتَك مهووس
تغيب الزُرقه فى الأبنوس
ومن غابة المرجان يهل فى عَتْمَة الأركان
وطن مرسوم بنور فانوس
وطن منقوش فى بال فانوس.
هاشم صديق 10/1/1996
|
|
 
|
|
|
|
|
|
|
|
Re: الغريب .. والبحر .... هاشم صديق (Re: Enigma)
|
ماقبل التلاشي .عيون الارخبيل
عندما كنت صغيرا ..كنت مفتونا بجيفارا ..وسولارا..وجومو ..ونزار
كنت مبهورا ...بسارتر ..ونيرودا ..ولوركا ..وابطال اليسار .......
كنا في الحي نطالع من جدار لجدار , الشعارات التى كتبت بليل ضد
اثام الطواغيت الكبار .
كان ضوء الشمس يشرق من قصيده او شعار .........
كنت مفتونا بفاطمه ..وصلاح ..وغابة الابنوس ..والهبباي ..والطير المهاجر ..وياماريا..واساطين الكتـــــــابه والخطابــــــــه والصـــــلابه ..والمنــــاشير الخفــــيه ...والقضيـــــــــة
ومن تقاسيم المصانع والمنازل ..كان غبن الظــــلم يطلع ثم يسطع ..الميـــادين تقاتل ..الدكاكـين تناضل ..الرواكـــــيب تجـادل ..والمـناشير تنازل ..كانت الدنيا عزيزة.. ولذيذة ..رغم اطراح السواقي ..رغم اركان المنافـــــي ..رغم اسوار الفواصل والمقاصــــــــــل..
كان زهو الفجر منقوشا على صدر المحالج ..الطواقي الحمر تغزل فوق احضان ..المناسج..المناديل المزركشه..الزهور..الرسائل والعطور
اللقاءات البريئه ..الهتافات الجريئـــــه..الليالي الشعريه في المنابر ...شقشقات الوجد في ثغر الدفاتر ...كان صدق القلب في طرف اللســـــــــــــــان ..والصداقه .........سيسبـــــــان.
كانت الدنيا مضيئـــــة..وحديقة..المسارح والجماهير والسواري
وترنيم الاماني ..الاغاني ..الرياضة..والرهيب رجل الثواني..
* كانت السينما جميله وصديقه
*سايكو في سينما( برمبل )
*في كلوزيوم_في المناظر_اعلنوا (صوت الموسيقى)....
*يجهر المذياع بالشدو الجميل..وردي غنى المستحيل ...
الدراما..الكرامه..الصحـافه..الحصـافه...الثقــافه..
القــيافه..الطـــرافه...والامـــــــــــــــــــان.
_ من اعلن النعى على ذاك الزمـــــــان؟
_ من اصدر الذكري على ذاك الزمــــــان؟
*كان طول العام مثل الالف في الزمن المعاصر ..كان..كذب الناس من جنس (الكبائر) ..كنا نجتاز (الصغائر ).
القراءة ادمنتنا (كالسجائر) كانت اخبار المطابع مثل لمع البرق
في الحي تسافر ..نقرا الكتب الجديده والقديمه ثم ناتي لنجادل و
نسامــــــــــر..
- ندوة في النادي (الفلانـــــــــي)..
- ونسه في ( ركن اليمانــــــــــي)..
- (قعدة) في الاغانـــــــــــــــي)..
- مافي زولا كان ( مدبـــــرس ) او (ممزق) او (مشتت) او بعاني..
- نكتـــــــــة..والضحك انفجـــــــــــار...
- كنا بنعرف الهظـــــــــــــــار..
- كان زمان الحب.. زمان الانتظـــار..
- الحب وجـــــود..الحب قضيــــــة..
*عندما كنت غريرا.. وصغيرا..كانت الدنيا سلام اسرجتنا جذوة الاحساس
بالزمن الجميل...ارسلتنا نحو ( كنـــز الارخبيـــــــل).
*كان زهو الشعر في الصحو النبيل ..كان نبض الود في السمر الطويل
*لم يكن ظهري مشاعا للنبال..لم يكن سر الحقيقة خلف اسوار الخيال ..لم نكن نحتار مابين الحــــــرام والحــــــلال.....
كانت الايام والانسام والاحلام والالام والاقلام تلهث نحو قسمات الجمال..كانت الدنيا عزيزة ... ولذيذة ... رغم اتراح السواقي..والمنافي..والجبال.
* عندما كنت صغيرا...وغريرا..كنت مفتونا بجيفارا..وسولارا..وجومو... ونزار.
* كنت مبهورا ومفتونا باحلام اليسار
* كان ضوء الشمس يسطع من قصيده او شعار .
* من اعلن النعى على ذاك الزمان؟
* من اصدر الذكرى على ذاك الزمان؟
* من ارهق الزمن المعاصر؟........اجتـــــــــرار
بقلم هاشم صديق
هاشم صديق ذاك الصرح الشامخ الصامد رغم قسوة الزمان والمكان
له الف تحيه وتجله وتقدير ..
ليته كان عضوا في هذا المنبر لننهل منه ولو قطره ....
هاشم صديق رائـــــــــــــــع رائـــــــــــــع رائـــــــــــــع
حد الجنون
Enigma
الف تحيه ليك يا راقي وانت تتحفنا بكلمات هاشم صديق
نوف
| |
|
|
|
|
|
|
| |
mustafa mudathir
WaD OmI
abas
فيس بوك
تويتر
انستقرام
يوتيوب
بنتيريست