|
|
 خـالد الحـاج يتسبب فى إتـلاف ممتلكـاتى
|
جانى سجيمان ومعاهو ام الخير...اها من شفتا ام الخير الخلعة الدخلت فينى لى يوم الليلة مامرقت...وقبل ما اسلم عليهم قلت لى سجيمان اخوى انت وام الخير دى بتخشو الجنة دوووووش...لانو ياسجيمان اخوى ام الخير دى تحمد الله اللقت ليها راجل اليعرسا...وانت شكلك كدا صابر على الولية دى... اها يا اخوى الحامد والصابر قالوا الاتنين فى الجنة...بس دحين قول لى الولية الكلها اباطاط دى معرسا كيفين...وقبل سجم الرماد ما يفتح خشمو انا صحيت من النوم...قمت واشهدت واستغفرت...وبراى قلت لى روحى...الله يستر...ويتم اليوم دا على خير...مدام بداء بالجنى المعصعص دا ومرتو المِتل الكراكة دى.
اها نجى لعملية خالد الحاج ...
انا اصلو فى الدنيا دى كل الوراى والقدامى فِرِد كيس اللِل مكرونة...لانو ارخص شئ فى البلد دى...ولانو الفلس حاصل ليه مدة وما اظنو فايتنى...والبيت عدمان نفاخ النار...قحط شديد....وبعد تلتلة وعذاب ...الله لمانى فى كيس مكرونتى دا...وكيس المكرونة دا فرحان بيه فرح شديد خلاص...وطاير بيه السماء...لانى لى زمن كارب على بطنى...وقدر ما اعين ليكس المكرونة دا ساى بالفرحة اشبع...اسبوع انا جيعان وفرحان بكيس مكرونتى دا...وكل يوم اشيلو واديهو قدوم...واقول ليهو امانة ما ليك يوم...كيس المكرونة دا بقعدنى تلاتة ايام... وتلاتةايام بعد ما اكلو دى ذكرة ساى... واسبوع كامل قبل ما اكلهو بكون شبعان بالفرحة...يعنى كيس المكرونة دا بيشيلنى حامد شاكر تلطاشر يوم بى حالين...عافى وراضى عليك ياكيس مكرونتى...وشدة ماعاجبنى وفرحان بيهو بنومو جمبى...والصباح اختو فى الرف...واعين ليهو واضحك امشى و اجيهو راجع... كدا ياكيس مكرونتى ....وكمان جاتنى فكرة...اصلى انا قاعد فى بلد النصارى دى...امشى لجيرانى النصارى ديل واشحدوم حبة اللِلت فياقرا...لانهم بيبقا لى بستعملوها...لانو كل يوم حريم النصارى ديل داخلات على الرجال ديل ويقعدن بالايام ...وكمان عوضتى لِصق عوضتوم...لكن عمرى يوم واحد ماسمعت لى إح وللا أح...اها قلت قطع شك الجماعة ديل ماشادين حيلوم ويانى البلقا لى عندهم حبة اللِلت فياقرا... واجى ارمى حبة الفياقرا دى فى كيس مكرونتى دا ...عسى ولعلا يتكاثر ويبقى لى شوال...وكدا اكون عملت حماية من الفقر لعدة سنين....اها الليلة كانت ساعة الصفر لكيس المكرونة...قلت كدى يايمى بسم الله جبتا الحلة الماخمج ديك وكبيت فيها كيس المكرونة وكبيت عليهو الموية وخديتو فى النار....قلت شوية كدى واجى اتاوق ليهو...
اهااااا قمت لميت فى خالد الجن دا فى محادثة وياريتنى لو مالميت فيهو....وبديت انضم واهرج معاهو فى حرديهو للبورد دا...اها اشيل والعلع معاهو لامن خشمى ذبت وريقى نشف...ترجع ما ترجع ترجع....وقولو لى انا مالى ومال خالد يرجع وللا مايرجع...ح يبقى لى اصلو كيس مكرونة....اريتو رجوع خالد طاير...كان بى وراهو كيس مكرونتى لحق امات طه...اها بس اشوف ليك الدخان فى السماء...وجرى على المطبخ...وبس تعالو شوف السكلى والنواحة...كيس مكرونتى إتحرق حرقت السواد والرماد...وبس اسوى فى ووووب احى ووووب احى....اريتك ياخالد طاير والبورد بى وراك...كان هدمتا امالى...انا شِن يفيدنى ترجع وللا ماترجع....انا مالى ومال الشَعر الماعندى ليهو رقبة...انا كان اخلى بالى لى كيس مكرونتى ياهو ذادى فى الدنيا وياهو الباقى لى وخالد اليحرق...وقشقشتا دموعو ومخاخيتى واستغفرتك يامالك روحى...والله لى لليلة الغبينة كاتلانى...وكيس مكرونتى الاتحرق دا واجعنى جوة فى حشاى وداخل علىِ دخلة شديدة خلاص.......اها اسى انا بدوركم ياناس البورد تعملو لى كشف و يكون داك يالكشف الماخمج....وماداير زول يقول لى الجاتك فى كيس مكرونتك سامحتك....ما سامحتنى ولا شِتين...تعملو لى كشف يعنى تعملو لى كشف وانا جادى جداً وما قاعد اهزر..سامع النضمى دا يا ود الحاج...وبعدين الكشف دا تمسكوهو لى اخوى سجيمان دا...وانت ياسجيمان الجن لمن اسعلك من الكشف ما تقول لى القريشات دخلت بيهن فى صندوق مع ناس كنتوشة الداية وفشودا الدلالية وتقعد تسوى لى فى ارجى الصرفة الجاية والماجاية....انا مِتل النضمى دا مابينفع معاى ولا بخش لى فى راسى دا..................وانت ياود الحاج دحين انا اسى طالبك كيس اللِل مكرونة وبى اسرع فرصة...وما تعملى اضان الحامل طرشة...طرشة اكتر من كيس مكرونتى الاتحرق دا...وكان طنشتا يانى الجايك فى هولندا ومشتكيك فى محكمتكم المصيبة دى القالوا دولية ...اى يانى المشتكيك فى كيس مكرونتى دا...اها انا اسى دحين اقبل وين...وياعملات سجيمان اخوى سويت لى مناحة فى كيس مكرونتى الاتحرق دا.
الليلة ياكيس مكرونتى
الاتحرقتا صغير وجاهل
وود الحاج مطنشك وما ساعل
******
الليلة ياكيس مكرونتى
يتجازا ود الحاج
الحرقك لى وانا ليك محتاج
******
الليلة ياكيس مكرونتى
ابكيك بالماوس والكى بورد
واريتو ود الحاج مايرجع البورد
*****
الليلة ياكيس مكرونتى
يبكوك العمات والخالات
يالبتسندنى تلاتة ايام كاملات
*****
الليلة ياكيس مكرونتى
وووب واااحى
يالبانى عليك مستقبلى
ويالماسمعو بيك اهلى
*****
ـــــــــــــ
ولا اراكم الله مكروه فى كيس مكرونة لديكم..
|
|
 
|
|
|
|
|
|
|
|
Re: خـالد الحـاج يتسبب فى إتـلاف ممتلكـاتى (Re: Osman Hamad)
|
عثمان حمد
تعازينا الحارة في كيس مكرونتكم
لكن يا اخوي طالما انت حلمت بي انا وام الاخير... احمد ربك الجات في كيس مكرونة بس.... المرة الجاية ان حلمت بي انصحك تبيت برا البيت ...ولاّ تسافر من البلد الانت فيها لانو اقل حاجة زلزال...
القصيدة عجبتني والله....وانا اتمنى انك تنتمي لجماعة الشعر الفرضي...ومافي شك انك حتكون اضافة ثرة للجماعة.....
اما تحميلكم لي خالد حراق مكرونتكم دا نوع من الافتراء ويحتاج الي اثبات....يعني عشان يقولو لك خالد رجع تسيب المكرونة تحرق؟... هو خالد رجع من الحج اصلو؟.....وشيل شيلتك رجعو قوانين سبتمبر للمنبر تاني....حيجلدوك ويزيعوك في التلفزيون...ويمكن كمان يحلقو لك راسك
| |
|
|
|
|
|
|
|
|
 Re: خـالد الحـاج يتسبب فى إتـلاف ممتلكـاتى (Re: Osman Hamad)
|
الله يجازي محنك يا عثمان حمد
تعرف المشكلة ما في المكرونة
المشكلة نحنا جيران وبين ماسفة أقل من 200 كيلو متر
وإنت بيتك مافيهو غير كيس مكرونة تشيل وتحضن فيه
والله اللوم راكب خالك من راسو لي رجليهو..
دحين فداك خالك والجاتك في المكرونة سامحتك
ونخلي الطاجن مغطي يا عثمان إنت العليك أنا عارفو
خالتك أماني مرسلة ليك شية جمر بي أتاش منت
وأبقي تعال يا عمو حسبو ولا أقول ليك بنجيك نحنا
قصرت معاك..
| |
|
|
|
|
|
|
|
|
|
Re: خـالد الحـاج يتسبب فى إتـلاف ممتلكـاتى (Re: Osman Hamad)
|
دحين يا عثمان ياود امي بدل تقول ليهو فداك مصنع المكرونه
كلو مش كيس واحد تتجرس وتسوي جنس ده
اريتو يايمه كيس مكرونة السواد واللواد البجرسك قدر ده
لكن بيني وبينك صدمتك كبيره فيهو والله الحق ينقال وماضربوليك 911
من الدخاخين والعجاجه ؟
الله يعوضك بي كيس سكسكانيه بدل المكرونه
وياخالد الحاج فداك مصانع المكرونه والشعريه والسكسكانيه
نوف
| |
|
|
|
|
|
|
|
|
|
Re: خـالد الحـاج يتسبب فى إتـلاف ممتلكـاتى (Re: doma)
|
| Quote: اصلى انا قاعد فى بلد النصارى دى...امشى لجيرانى النصارى ديل واشحدوم حبة اللِلت فياقرا... |
| Quote: لانهم بيبقا لى بستعملوها...لانو كل يوم حريم النصارى ديل داخلات على الرجال ديل ويقعدن بالايام .. |
| Quote: وكمان عوضتى لِصق عوضتوم...لكن عمرى يوم واحد ماسمعت لى إح وللا أح... |
| Quote: اها قلت قطع شك الجماعة ديل ماشادين حيلوم ويانى البلقا لى عندهم حبة اللِلت فياقرا... |
اوبسسسسسسسس ... سوري ....
اظني دخلتا هنا بالغلط ... معليش يا عثمان حمد
| |
|
|
|
|
|
|
| |
Osman Hamad
سجيمان
james
WaD OmI
doma
Hussein Mallasi
فيس بوك
تويتر
انستقرام
يوتيوب
بنتيريست