|
لا لا يا قروية
|
اخواني و اخواتي
ابحث عن قصيدة القروية مع معلومات عن الشاعر والملحن.
|
|
|
|
|
|
|
|
Re: لا لا يا قروية (Re: بت قضيم)
|
قالو لي في الخرطوم
البت تلاقي عريسا
لبسوها الشورت والدبلة تمشي تقيسا
احّيا متين اشوف الخرطوم
لا لا يا قروية ما تغرك المدنية....بلاي دي ما كانت حقارة ودعوة للتهميش....
نحن بالعصرية بنفتح سبيس توون والاتاري سوني جنبو تلفزيون وسيد اللبن ان فات بنجيبو بالعربيّة
لا لا لا لا يا قروية
احيّا متين اشوف الخرطوم
قالوا لي في الخرطوم الرقشة والدفار والمدارس خاصة والبنات شطّار والمدرس يجيهم كل يوم في الدار ونحن هنا في مدرسة وقطيييّة
لا لا لا لا يا قروية
انت ياقروية يا السمنتك بلدية طوريتك الملوية ..زراعتك المطرية وبين بنات الناس انت بس حوريّيّة
احيّا متين اشوف الخرطوم
دي نجرتها ليك حسب حاجتك وان ما كفتك تاني بنجر ليك
| |
|
|
|
|
|
|
Re: لا لا يا قروية (Re: Walid Safwat)
|
الأخ الكريم وليد صفوت هي من إبداعات الرائعين في توتي حيث فرقة زهرات توتي و هي فرقة من الأطفال يتم تغيير الأعضاء حسب السن و ظلت الفرقة صامدة لزمن طويل الشاعر ممكن يكون المبدع الشيخ عمر لكن لأنو من توتي و كتب لهم الكثير لكن تأكد من التواتة أمثال الأستاذ منير عبدالوهاب الذي كان مخرجآ للفرقة و الأستاذ سيف الدولة خوجلي الملحن و عازف المندلين و شقيق الرائع الفنان إبراهيم خوجلي, لهم جميعآ التحايا, و ذكرتنا زمن سمح و ناس رائعين.
| |
|
|
|
|
|
|
Re: لا لا يا قروية (Re: الطيب بشير)
|
الاخ الكريم وليد صفوت لك التحية والتقدير
نعم شاعر وملحن القروية هو المرحوم الشيخ عمر الضوء وهو من أبناء جزيرة توتى ولقد توفى عليه الرحمة منذ خمسة اشهر من الان والعمل سجل بتلفزيون امدرمان فى العام 1975م من مجموعة من البنات تتراوح أعمارهن فى ذلك الحين بين 10 و12 عاما
يارابى بتين اشوف الخرطوم قالو لى فى الخرطوم جنينة البلدية لا لا لا لا ياقروية لا لا ياقروية ما تغرك المدنية إنت ما منسية والله انت غنية بزراعتك المطرية وبهايمك المسقية
أحيي بتين اشوف الخرطوم قالو لى فى الخرطوم البت بتختار عريسه وكمان كان دارت الدبله تمشى تقيسه
هذا ما تذكرته من القروية واتمنى ان نجد من يكملها لنا
وفاة المسرحي الشيخ عمر الضو
| |
|
|
|
|
|
|
Re: لا لا يا قروية (Re: Walid Safwat)
|
العزيز / نزار حسين طبعاً رغم انى ضد التهميش لكن هنا اختلف معك فهذه القصيدة للمرحوم الشاعر/الشيخ عمر الضو من ابناء جزيرة توتى وكانت اداء زهرات توتى (رباب، هويدا ، منال ..الخ)كما تفضل الاخ / الطيب بالتوضيح .. ولم تكن دعوة للتهميش فى ذلك الوقت بقدر انها كانت سجال ومجادعة للمقارنة بين فتاة القرية وحياتها البسيطة وبين فتاة العاصمة التى تختلف حياتها عن تلك بعصريتها وقيادتها للعربية واختيارها للعريسها وتبدأ المقارنة من فتاة القرية قائلة : أحيّا بتين اشوف الخرطوم قالو لى فى الخرطوم جنينة البلدية وقالو فى الخرطوم البت بتسوق العربية *** يارابى بتين اشوف الخرطوم قالو لى فى الخرطوم البت بتختار عريسه وكمان كان دارت الدبله تمشى تقيسه أحيا انا والله بقيت منسية
أحيّا متين اشوف الخرطوم *** وترد فتاة ( الخرطوم ) العاصمة
لا لا لا لا ياقروية انت يا قروية بالفهم معروفه إنت ما منسية والله انت غنية بزراعتك المطرية وبهايمك المسقية لا لا ..لا ياقروية وما تغرك المدنية
خارج القروية بس بينى وبينك يا نزار النجر بتاعك عصّرى جدا .. وخصوصا مسالة الاسبيس تون والاتارى والاجمل فى النجرة الواقعية الحالية للتعليم والمواصلات والحياة الاقتصادية فى العاصمة فى مقطعك الرائع :
قالوا لي في الخرطوم الرقشة والدفار والمدارس خاصة والبنات شطّار والمدرس يجيهم كل يوم في الدار ونحن هنا في مدرسة وقطيييّة
شكرأ ليك يا صفوت فقد اعدتنا لايام خوالي واتمنى ان تجد بقية المقاطع مع ترتيبها
أحـــيّا متين نرجع الخرطوم
| |
|
|
|
|
|
|
Re: لا لا يا قروية (Re: Walid Safwat)
|
الاخوات والاخوان المشاركين ، ، سلام اولا الاخ وليد صفوت ( صاحب الاسم الوجيه ) انت وليد صفوت الواحد دا و لا واحد تانى ؟!!
الاخت بت قضيم يا قطيمه ( بالمناسبه دى ما نبذه عشان ما تفهمينى غلط ).. كان نزلت ليك الاغنية بكون حرقت ليم الشغلة و لا رايك شنو ؟ اقوم انفعل ...
| |
|
|
|
|
|
|
Re: لا لا يا قروية (Re: Walid Safwat)
|
ليس من المنظور اصدق مكنة دي ما شتيمة دي،، الناس كلها تقول عليا قطيمة يبدو أنني الوحيدة التي تحس بظرافتي،، ولا بأس.
ثم اتحداك تكون عندك الأغنية وتنزلها اتحداك رسمي
| |
|
|
|
|
|
|
Re: لا لا يا قروية (Re: Walid Safwat)
|
.. . يااااااااااى من اللفح انت لمن ما متأكدة منها بالفحيها مالك ؟؟ غايتو جابت ليها خفه كمان
يا لفحنجيه ..
كدى ترجمى النكته ..ما دى ..دييييك اوعك تقول لى ديك ولا دجاجة
سلام
| |
|
|
|
|
|
|
Re: لا لا يا قروية (Re: Walid Safwat)
|
قالوا لى فى الخرطوم البت بدورو حديثها ودخلوها الجامعه و وظفوها رئيسه وقالوا لى كن دارت كمان تنقى عريسها والديبله الديبله تمشى تقيسها
**************** لالالالا ياقرويه انت يا قرويه بالكرم معروفه تهب نسايم الليل تقوم تعشى ضيوفها وانت ياقرويه بالقري موصوفها ***************** قالوا لى فى الخرطوم البدره والمنكير وياحلات البت يوم تمشى للكوفير احى متين اشوف الكوفير ********************** منو البلاكى بمول وزاره الماليه غايتو دا المتذكراهو والباقى اتعاونوا فيهو مع بعض وايدكم معانا ياجماعه
| |
|
|
|
|
|
|
Re: لا لا يا قروية (Re: tariq)
|
بت قضيم (ذات الاسم الاصيل)
لا اجد سوى الشكر والدعوات لك لو تكرمتي بانزال الأغنية بالرابط في البورد.
عليك الله نزليها وما يستفزك طارق ونضيع نحنا في الجرادل.
اما اسمي فهو بدايه نفسي ونهاية عشقي
| |
|
|
|
|
|
|
Re: لا لا يا قروية (Re: Walid Safwat)
|
ها يا وليد ، عرفة متيييين ؟
طيب ارجاها تنزلا ليك الاغنية وانا بس بعاين ليكم ؟
بعدين يعنى برضك اتجاهلت سؤالى ؟!!!
ظنيتك وليد صفوت زااااته ...
| |
|
|
|
|
|
|
Re: لا لا يا قروية (Re: tariq)
|
الاخ عزيز لك التحية والتقدير
من الغريب ان اكون من نقل خبر وفاه استاذي الشيخ عمر الضوء. ولانني فجعت مع من فجع في عالم الفن والطفل فقد ضاعت من امامي بقيه الخبر المحتوي على الرد لتساءلي.
لقد عملت مع العم عمر (كما كنا نناديه) كممثل في بدايه السابعينات. كنت مع مجموعه من الاطفال اذكر منهم لؤي قباني وعبد الباسط الذي واصل التمثيل واشتهر بشخصيه عزوز بجنه الاطفال و التحق فيما بعد حسب علمي الضعيف بفرقه الاصدقاء وهو ايضا طبيب اطفال.
بمشاركه المخرج المرحوم محمد رضا حسين وكان اول و اخر تجارب المرحوم احمد قباني في اعمال الاطفال. و حسب معلوماتي فان الاعمال الاربعه لم تعرض ابدا وظلت حبيسه بمكتبه التلفزيون كنوع من العقوبات اللتي فرضت على بعض المشاركين نسبه لاراءهم السياسيه.
عزيز قد نكون التقينا ولكم الذاكره بدءات تعاني من اعراض الشيخوخه.
الاخ الطيب بشير
كان فعلا زمن رائع اطلت منه الابداعات وانحسرت متقوقعه راجيه زمن قد يعود.
| |
|
|
|
|
|
|
Re: لا لا يا قروية (Re: Walid Safwat)
|
أحيا متين أشوف الخرطوم ؟ لا لا ..لا لا ..يا قروية انتى يا قروية بالكرم معروفة وفى هجايع الليل تقوم تعشى ضيوفها أحيا متين أشوف الخرطوم ؟ قالوا فى الخرطوم البت بيسوقها عريسها أحيا الدبلة تمشى تقيسها وقالوا فى الخرطوم البت بتلبس ماكسى أحيا كمان بتركب تاكسى .. ***** لكن أخير منها دى : وزرعت لى حبة وفتقت بقت وردة وفتقت بقت وردة فى مدنى شارع القبة وووب يا حبيبى كان مت ذنبى عليك شكيت الناس لألله الطلقوا النار فى الحلة الطلقوا النار فى الحلة وسكنوا الحاج عبد الله ووب يا حبيبى كان مت ذنبى عليك شكيت الناس لربى الطلقوا النار فى قلبى ووب يا حبيبى كان مت ذنبى عليك الطلقوا النار فى قلبى السكنوا الحى الغربى ووب يا حبيبى كان مت ذنبى عليك أنا غيرك ما حبيت يا حبيبى وكان مت ذنبى عليك ... بيغنيها ابراهيم مدنى ؟ مش كدا ؟
| |
|
|
|
|
|
|
Re: لا لا يا قروية (Re: ست البنات)
|
أخى الكريم وليد صفوت لك الحب والتحية
كم أسعدنى بأننا يمكن أن نكون قد التقينا فأنا من أبناء جزيرة توتى وعملت مع مجموعة العم الشيخ عمر عندما كنا اطفالا ونفذنا نشيدى المصور وتوتى فى ذات الفتره التى نفذت فيها لا لا ياقروية .. الاخ دكتور عبدالباسط كان الدفعة الامامى فى مدرسة المؤتمر الثانوية امدرمان وعملنا معا فى فرقة الموسيقى بالمدرسة .. ثم التحقت بالمعهد العالى للموسيقى والمسرح .. يعنى لابد أن نكون قد التقينا مادام أهتمامنا مشترك وتجمع بيننا كثير من المناسبات .. سوف اجتهد لكى اتحصل لك على القروية كاملة وهذا ليس بالامر الصعب ولكن احتاج للوقت لأننى الان أبعد الاف الاميال عن توتى الحبيبة أعيش الان بهولندا ولكن سوف اقوم باتصالاتى وافيدك بالنتيجة .. لك الحب ودعنا نتواصل عبر المسنجر لأننى يمكن أن أدلك على أخر توثيق مع العم الشيخ عمر عبر الفيديو رحمة الله أخوك
| |
|
|
|
|
|
|
Re: لا لا يا قروية (Re: عزيز)
|
يلا يا جماعة منظريييين الغنية عليكم الله العنده ينزلها
اما بخصوص عزوز..او عبدالباسط السيد المكي فهو جراح اطفال بالمملكة المتحدة وكان استاذ في قسم الجراحة بكلية طب جامعة الخرطوم
اما اخته مني والتي كانت عضوة في عقد الجلادو اعتزلت ..فكانت معروفة بانها تغني في اغنية جنة الاطفال ماهي دنيتنا الجميلة..LEAD SINGER
ويا حليل السودان وايامه الجميلة والله فتحتوا علينا النوستالجيا
يديكم العافية وبرضو منتظرة
| |
|
|
|
|
|
|
Re: لا لا يا قروية (Re: tariq)
|
thanks alot wallahy for that.. u took us baaaaaaack to very nice days by putting the audio of this song.. taslamo shadeeeeeeeeeeeeeeeeeed
| |
|
|
|
|
|
|
|