|
|
 الصادق المهدي.. أنا أول المتمردين في آل المهدي
|
الصادق المهدي.. أنا أول المتمردين في آل المهدي
الحوار مع الامام الصادق المهدي له بريقه الخاص من واقع قدرة الرجل على الابحار بعيداً واصطياد الدهشة وربما نسف المحاور احياناً، عموماً ورغم ان الوقت الذي اتيح امامنا لم يكن كبيراً الا اننا زحفنا كعادة الصحافيين على مساحات الاخوة بمكتب الحبيب. ولأن حوارنا ارتاد آفاقاً عديدة فقد رأينا ان نقدم الجزء الاول منه هنا ونرجئ نشر الجزء الثاني الى الاسبوع القادم.
ü نبدأ بتاريخ الميلاد ورمزية هذا التاريخ؟
25 ديسمبر...نبدأ ببرج الجدي
انت مهتم بالأبراج؟
زمان ما كنت مهتم بمسألة الابراج لكن اي مكان امشيهو القى الناس مهتمة بيها جداً والقى صحف مهتمة بيها واعتقد ان الميلاد عندو اهمية وارتباط بالبرج وميلاد المسيح عليه السلام وهوميلاد مختلف حوله واقصد تاريخ ميلاد المسيح.
كيف؟
ميلاد المسيح مازي تاريخ ميلاد الرسول محمد عليه الصلاة والسلام لانو سيدنا محمد ولد وعاش في وضح التاريخ ما في شك في تاريخ الميلاد ولا عاش وين حياتو موثقة لكن الانبياء الآ خرين في خلاف حول ميلادهم وتفاصيل حياتهم.
عشان كدة الفصائل المسيحية مختلفة حول تاريخ ميلاد السيد المسيح؟
ايوة الارثوزوكس مثلاً بيحتفلوا يوم 7 يناير والكنائس الغربية بتحتفل يوم 25 ديسمبر.
تفتكر سبب الخلاف عدم التوثيق فقط؟
حياة السيد المسيح ما موثقة كلها واتقرر جزء منها بواسطة القيادات الكنسية.
التاريخ ده كان ليه معنى عندك؟
طبعاً بالنسبة لي كان مصادفة نبهتني للمسيحية من بدري ولفتت انتباهي للمسيحية كدين في وقت كنا كمسلمين بننشأ بنوع من النفور من المسيحية.
وكنت مهتم جداً بالتاريخ ده وبتحتفل بيهو ؟
والدتي هى الكانت مهتمة بالموضوع في وقت كان من النادر جداً يحتفل الاطفال بعيد ميلادهم وما عارف ليه والدتي اهتمت بالاحتفال.
سألتها عن السبب؟
اذكر انني سألتها وقالت انها بتعتبر ميلادي بشارة لانو كان يوم 25 ديسمبر وصادف واحد شوال يعني صادف عيدين ولما سألتها ليه الناس في محيطنا ما قاعدين يحتفلوا بعيد ميلادهم سردت لى قصة ثانية بتعضد مسألة البشارة وقالت لي يحيى ود عمك «يكبرني بسنوات قليلة» جاء لما كانت حامل هي واختها وقال ليهم مامعناه مهاجر جاي من كبكابيه.
وده معناه شنو...؟
يعني واحد من الفي البطون دي مهاجر ولما ولدت اختها سألوه ده مهاجر قال لا الجاي من كبكابيه يوم الخميس وفعلاً ولدت يوم الخميس وده خلالها تعتقد في مسألة البشارة.
وبقى الاحتفال تقليد دائم عندكم؟
لا..لما أكون وحدي - وأنا غبت كثير - ما بحتفل بيهو لكن لما الظروف تكون مواتية بنحتفل بيهو والتقليد ده انتقل بعد وفاة الوالدة الى اسرتي الصغيرة وبعدها بقى يحتفل بيهو السيد صلاح عبد السلام وقبل سنتين بقي يحتفل بيهو المكتب بتاعي ودائماً بيكون الحفل مفاجأة بالنسبة لي وما قاعد أسأل او اتابع وانا بفتكر انو مجرد الاحتفال ما ليهو معنى..وفيهو شخصنة للأمور.
كيف؟
الناس لازم يضيفوا للاحتفال معنى تاني
زي شنو؟
جرد حساب السنة الفاتت وانا من السنة الماضية بديت اقول كلام متعلق بالحياة ومسيرته لكن الاحتفال برضو فيهو معنى تاني مهم وهى معنى المودة والمحبة بين الناس لانها معاني بتخلي الحياة محتملة وضروري يصطحب معانا اليات المحبة زي السلام والهدايا وغيره والمحبة شئ مهم جداً لانو الدنيا دي كالحة وفيها مفاجآت صعبة يعني الزول بيمرض فجأة واقرب الناس ليهو بيخونوهو وبيفقد اعزاء عنده..الدنيا مليئة بأسباب الاحباط والحزن عشان كده نحن محتاجين ادوية نفسية زي الايمان والحب.
كونك من بيت المهدي ده فرض عليك طفولة محددة؟
الناس بيفتكروا اننا نشأنا نشأة محصورة والغريبة نحنا نشأنا بصورة عادية وطفولتنا كانت بين الجزيرة ابا وحي العباسية في ام درمان وما بعتقد ان طفولتي بتختلف في تفاصيله عن أى زول عادي في المناطق دي.
شنو توصيفك للعادية؟
تعليمنا كان في كتاب الجزيرة ابا وفي مدرسة الاحفاد وانا دائماً كنت بقول اننا كأطفال كانت عندنا استقلالية عن أسرنا يعني كل أولاد العباسية بتلموا المساء في الشارع ولو لقينا كوم رمل بيبقي النادي بتاعنا ونقعد نلعب شدت وشليل وكديس مين نطاكا لغاية ساعة متأخرة من الليل وحكاية التلفزيون دي زمان كانت مافي المهم انا عايز اقول انو نحنا قبل منتصف الخمسينات كان بيتنا زي أي بيت سوداني من الطبقة العامة زي الموظفين والتجار.. بيت ارضي عادي وماكنا مميزين لا في السكن ولا في التربية.
والحصل شنو منتصف الخمسينات؟
في الفترة دي بدأ التمييز في مستوى الحياة لما اتطورت المسألة السياسية ويمكن الاختلاف بالنسبة لي جاء لما دخلنا مدرسة كمبوني ودي مدرسة داخلية وسبب وجودي فيها كان لأنو الوالد بمشي الجزيرة ابا ويجي الخرطوم كثير وده عمل عدم استقرار وكمبوني كان فيها انضباط شديد وده حرمنا من حاجات كثيرة اتعودنا عليها وزادت المسألة لما انتقلت للدراسة في فكتوريا بالاسكندرية لانها مدرسة فيها خصوصية وماكل الناس بيقدروا يمشوا ليها.
ليه...!الكلية دي اتعملت لاستقطاب اولاد الطبقات العليا والقيادية في العالم العربي وهناك لقينا ابناء الاسر القيادية في الاردن ومصر والسعودية والبحرين وغيره وفكتوريا كان هدفه تثبيت الثقافة الانجليزية يعني كان ممنوع تتكلم فيها عربي ولو اتكلمت عربي بتعاقب.
كان معاك طلاب سودانيين؟
ايوة كان معاي اولاد عبد المنعم واولاد ابو العلاء ومأمون عبد المتعال وهؤلاء من اسر سودانية ميسورة.
ومن الدول العربية؟
الملك حسين وطلال وهشام ناظر من السعودية وغيرهم وانا ا كتشفت مقاصد فكتورياواتمردت عليها.
ده كان التمرد الاول؟
كان التمرد الاول حقيقة نحنا في الاول ماكنا شاعرين بي المسألة يعني كنا لسه اولاد صغار واهلنا ذاتهم في تقديري ما كان عندهم تخطيط وما أتساءلوا الناس بيمشوا هناك ليه؟ افتكروا المسألة مدرسة جديدة وكويسة وخلاص وانا لما ظهرت لي نوايا المدرسة بعد سنتين رجعت في العطلة وقررت عدم العودة الى فكتوريا.
واتجهت لمدرسة أخرى..؟
لا في المرحلة دي قاطعت التعليم الحديث ولجأت للتعليم وساعدني على التمرد الاستاذ الشيخ الطيب السراج وده زول عالم وعندو شخصية خاصة ما زي أى عالم تاني وكان من خريجي كلية غردون واتمرد عليها وأخد موقف مضاد للتعليم الحديث لانو برضو كلية غردون بدرجة اقل كانت مكان لنشر الثقافة الغربية عموماً لما لاقيتو صادف هوى في نفسي وبقيت حوارو لمدة سنتين وزيادةوده في تقديري كان موقف تمرد ضد غسيل المخ البيمارس في فكتوريا.
فكرت الوقت داك تبقى شنو؟
انا ماكنت بديت افكر في المستقبل وكنت اسير مؤثرات قوية حولنا زي الاحاجي ودي كانت محتكرة للحبوبات وكان عندنا واحدة خالة والدتنا اسمها خالتي بخيتة وبالمناسبة نحنا كنا بنسمي الناس حسب العلاقة بالام وخالتي بخيتة وحبوبة فاطمة كانوا عايشين معانا وهن من منطقة ام جر بالنيل الابيض.
ابرز الاحاجي كانت شنو؟
الشاطر حسن وفاطمة بت نمير والغول وفاطمة السمحة.
ياتو احجية كنت تتمنى تكون البطل فيها؟
الاحاجي اوجدت في اذهان الوقت داك مثل أعلى زي ود النمير وده كنا بنعتبرو بطل السودان وانا كانت بتعتقد ان اكبر اثرين بيوحدوا الرؤية السودانيةالوقت داك كانت الاحاجي والالعاب ذي شدّت وشليل وغيره لانها عنصر مشترك بين مناطق كثيرة في السودان بالاضافة للخلوة وانا شخصياً عندي عنصر رابع كان مؤثر جداً.
ممكن نسميهو؟
ممكن نقول السيرة المهدوية والمؤثر ده بيخصنا نحنا في البيت لانو جدتنا السيدة فاطمة بت حسين كانت حوار للمهدي وجات من ام جر للجزيرة ابا عشان تقرأ القرآن قام المهدي خطبه لي نفسو واعتذرت بما معناه انها جات للتعلم وفي النهاية اقنعه واتزوجتو واعتبر ت نفسها مش مجردزوجة فقط لكن حوار لذلك كانت صلته بالمهدي ايدلوجية بالاضافة للصلة الزوجية وزرعت الفكرة دي في بيته وفي ابنتها ام سلمة وهى ام والدتي التي أخذت منها هذه المفاهيم لذلك نحنا لما نشأنا لقينا حبوبتنا ام سلمة قدامنا وما أذكر اني شفتها طوال حياته وما في كتاب في ايده ووالدتي اخذت منها الحكاية دي وكانوا بيفتكروا انو واجبهم الاساس يعملوا لنا غسيل دماغ بالمهدية.
والآليات المستخدمة شنو؟
لا يمكن يجي موضوع الا ويرتبط بحاجة عملها المهدي ..مثلاً القمرية لما تقوقي بقولوا لينا المهدي قال القمرية لما تقوقي بتقول وحدوا ربكم ومرات الوالدة بتكون قاعدة معانا وتجي القمرية تقوقي بالحاح شديد تقوم تقول ليها. ياقمرية وحدّنا ربنا بطلّي ثقالة..وده خلى ثقافتنا مهدوية.
وكنت بتسمع حاجات زي الحمرة الأباها المهدي؟
الوالدة كانت بتقول المهدي ما أبا الحمرة... المهدي أبا أفعالهم والمهدي ذاتو عندو أولاد حُمر.
فكرة المهدوية خلتك تفكر في السياسة؟
ابداً..انا ما كان عندي تفكير أبقي سياسي وأول ما فكرت في المستقبل فكرت أبقي زراعي.
ده كان متين؟
في المرحلة الثانوية
لكن دخلت السياسة..برضاك؟
مدهش جداً الحصل لّي في الكاريره السياسية لما كنت في جامعة الخرطوم لم أمارس أي دور سياسي كبرلوم وكان الصراع الوقت داك حاد جداً بين الشيوعيين والاخوان المسلمين وانا كان قراري انو ده ما بينفع معاي.
السبب شنو؟
الاخوان ضحوا بالتحديث من أجل التأصيل والشيوعيين ضحوا بالتأصيل من اجل التحديث لذلك الاثنين ما بينفعوا معاي.
طوال فترة وجدوك في جامعة الخرطوم لم تمارس نشاط سياسي؟
ما كان عندي دور سياسي الا بعد مشيت جامعة اكسفورد وهناك ما كان عندي طريقة ابعد عن السياسة لانو ثورة العالم كانت سياسية..العدوان الثلاثي وموضوع فلسطين ملتهب ومستقبل افريقيا على طاولة النقاش فجأة لقيت نفسي قدام معركة متعددة الجوانب..المحافظين والعمال والاشتراكيين والغربيةورغم انوا الصراع في جامعة الخرطوم كان بين الاخوان المسلمين والشيوعيين لكن بين المبعوثين في اكسفورد كان الصراع حول الاتحاد والاستقلال لذلك لقيت نفسي انخرطت بصورة كبيرة في العمل السياسي وسط الطلاب السودانيين.
رجعت للسودان اشتغلت سياسة؟
وجهت اجي أقور بدور في الانتخابات سنة 1958م وفعلاً اشتغلت في الفترة دي لكن التجربة ما عبجبتني لانو انا اصلاً كان تفكيري اقرأ اكسفورد وامش ادرس زراعة في امريكا ولما انتهت الانتخابات اتكلمت مع الوالد في الموضوع ده ووافق فالتحقت بوزارة المالية.
ودي عندها علاقة بالدراسة في امريكا؟
زمان أي زول بجي يتأهل كويس بيمش بعثة وانا قلت اشتغل في المالية سواء لقيت بعثة او مشيت على نفقتي ادرس زراعة في امريكا وأنا حسب تخطيطي كنت عايز امشي في خط التقنية لكن بعد شهور وقع انقلاب 17 نوفمبر وحقيقة الانقلاب ده لخبط حساباتي.
كيف؟
لقيت اني ما بقدر اكون محايد واقيف بعيد
عملت شنو؟
كتبت خطاب شديد اللهجة للحكومة والوقت داك العداوة بينا وبين ناس عبود ما كانت ظاهرة - المهم كتبت جواب سلمتو لي مديري وكان اسمو الهادي حمدتو.
الخطاب هجوم على الحكومة؟
قدمت استقالتي من الوزارة واوضحت اني اشتغلت في ظل نظام شرعي ومنتخب وما مستعد اخدم في ظل نظام شمولي واكون اداة من ادواته واذكر انو عبد الهادي حمدتو ناداني وقال لي انا ما بقدر اسلمهم جواب زي ده انا ح اقول ليهم انك قدمت استقالتك وانا قبلتها وما تدخلنا في مشاكل مع الناس ديل
|
|
 
|
|
|
|
|
|
|
|
Re: الصادق المهدي.. أنا أول المتمردين في آل المهدي (Re: Abdel Aati)
|
Quote: وميلاد المسيح عليه السلام وهوميلاد مختلف حوله واقصد تاريخ ميلاد المسيح.
|
أما لماذا مختلف حوله, ليس هذا التبرير المبتسر عن غموض تواريخ ميلاد الانبياء, و انما ما يعرفه حفيد "المهدى" جيدا, بما أنه قارىء "موسوعى", و لكن تأخذه حمية "العربسلام" أن يتفوه به, هو أن هذا التاريخ المسمى زورا تاريخ ميلاد "المسيح" هو بالتحديد تاريخ ميلاد "أوزيريس" فى حضارة وادى النيل القديم. و "أوزيريس", حتى لا يضيف حفيد "المهدى" لميزان سيئاته, هو نبى معتمد ضمن قائمة الأنبياء فى الدين الاسلامى تحت اسم "ادريس".
كان هذا السؤال عن الميلاد فرصة للعلامة حفيد "المهدى" للسياحة بالقراء بفيض من المعلومات عن تاريخ أجداده ملوك وادى النيل القديم, الذين ما ثار "المهدى" الا لاستعادة مجدهم التليد, و لكن هيهات .. فمن حول "الحمرة الأباها المهدى" الى "المهدى ما أبا الحمرة !!", لن يمنحنا سعادة القول: "هذا الشبل من ذاك الأسد".
| |
|
|
|
|
|
|
| |
omar ali
Abdel Aati
Tanash
فيس بوك
تويتر
انستقرام
يوتيوب
بنتيريست