|
|
 HD ترجمة خطاب السيد الرئيس/ اكرم محمد زكى
|
بعد انتهاء الكلمة الضافية للسيد رئيس الجمهورية شرعت لجنة مكونة من خبراء فى مختلف المجالات فى فك شفراتها ورموزها ومعالجتها ثم ترجمتها تمهيدا لتقديمها للشعب فى نسختها البسيطة التى تلبى متطلبات الجميع
وقد ضمت اللجنة كل من
سعادة العميد معاش مهندس عبد الهادى الحياطى وهو اخصائى هندسة الحاسوب وفك الشفرات خريج جامعة مان : هاتن وقد عمل لفترة طويلة فى جيوش الخليج ثم عاد لسلاح الاشارة قبل ان يحال للصالح العام وهو ايضا عميد اسرة الحياطى المعروفة بدورها الرائد فى البللى
سعادة العميد استطاع فك شفرة ( وثبة ) والتى قال انها تعنى سجن و ( اعتساف ) والتى كما اشار انها تاتى من كلمة يعتفس وهى فى الكلام الخليجى يعنى ينشغل ويتلخبط بامر ما والكلمتان تعكسان الثقافة الخليجية للسيد الرئيس ابان فترة عمله فى الامارات حيث ان الوثبة اسم جن فى ابوظبى وفى نفس الوقت منطقة عسكرية
مولانا الشيخ دفع الله الحالم الفقيه والعالم المختص بالتفاسير وتفسير الاحلام والذى طمان جماهير الشعب بان لا ينزعج من عبارة ( افاق التهيؤ والاقبال ) لانها ليست سوى حالة زنقة عادية يمكن ان يمر بها اى شخص نائم وتنتهى بمجرد ان يستيقظ ويذهب للحمام وان لم يستبعد وجود بعض الحالات التى قد لا يستيقظ فيها الشخص فى الوقت والمكان المناسبين
عمك السر قفيس وهو عامل ميكانيكى ورئيس اتحاد نقابات الاطباء لدورتين وهو الذى استطاع فك شفرة ( تفريط) حيث اوضح انه لفهم معناها لابد من توليفة بان تقراها مكررة مع مد الياء وبسرعة ليتضح معناها وهو صوت الرقشة كما اوضح ان باستعمال نفس التكنيك نجد ان ( اصطفاف ) مكرر ايضا هو صوت نقرة سويتش فى عربية بطاريتها ضعيفة
الحاجة سكينة امتعاض البصيرة المعروفة اكتسبت شهرتها بانها حين تعالج مرضاها يمتعضوا اولا ثم يصرخوا ثم يطرشوا ثم يتماثلوا للشفاء وهى نفس مراحل تطور الديمقراطية الا انها فى السودان دائما ما كانت تنتهى فى حتة الطراش ولم يتسن لنا ابدا ان وصلنا للمرحلة الاخيرة - على اى حال الحاجة سكينة فكت المعنى المشموط لكلمة ( ركيزة ) واوضحت انها المقصود بها الدخرى وتعنى فى خطاب الرئيس اموال التمكين
التشكيلى العالمى البروفسير حسن رؤى فاجانا بحضوره وافاد بانه اتى من المطار مباشرة بعد ان سمع الرئيس يردد اسمه عدة مرات وعبر عن قلقه عن تطرق الرئيس للجوء ( لحوار وطنى عريض ) حيث اكد انها تعنى استمرار سياسة القمع فالحوار العادى الايام دى بيسبب مشاكل وبوليس وضرب فما بالك بحوار وطنى ود بلد وكمان يكون ماكن وعريض ؟! كذلك يرى ايضا ان الدعوة لمناظرة لا تستثنى فيها الحركات هى دعوة للاقتتال حيث انه من المؤكد ان يقوم واحد بعمل حركة غير مناسبة او غير مهذبة تثير الحضور وتستفزهم
practice الدكتور سمير سعال استشارى القلب والصدر بمستشفى كينجز كوليدج بلندن والذى اكد ان عبارة ( اعمال تعاون لا يسلب احدا حقه ) مع بعض الكحة الخفيفة هى ممارسة تساعد على اخراج البلغم ولا خوف منها
الاستاذ بابكر الناقش استاذ رياضيات بحته سابقا وصاحب صاج سمك حاليا وهو من اصحاب نسبة الذكاء العالية فى العالم حسب ترتيبه المتقدم فى اختبارات ال اى كيو وبصراحة كده زول ناقش وفاهم اى حاجة وهو الذى نقش ليك انو عبارة ( الحكم الرشيد ) انما قصد بها السيد الرئيس الحكم بفتح الحاء حيث ان الحكم الرشيد كان بيحكم فى الليق والروابط زمان وكان مشهور بحسمه للاعبين الخرخارين ايضا اوضح استاذ بابكر انو ( المنهج المرتضى ) هو اسم روضة وفى نفس الوقت محطة حافلات خلف الانقاذ !؟
اعتذر عن الحضور الخليفة سى دى الناير عمدت . كم لانه كان مجتمع مع اتباعو من حول العالم عبر الوسائط الاجتماعية حيث يقيم لهم ئى - حولية
(e-حولية)
وبعد فك الرومز والشفرات وعمل التوليف والتجميع اللازم استطاع الفريق العامل من الوصول الى ترجمة HD اتش دى تعنى هسى دى يعنى ترجمة طازجة ومباشرة واليكم نصها بضم النون
ايها الاخوة والاخوات ابنا الشعب السودانى
السلام عليكم ورحمة الله وبركاته
شفتوا لميت ليكم الجماعة ديل كيف؟ ورصيتم ليك قدامى زى الحمام البطرى مايقدر واحد فيهم يقول بغم
طبعا
وعلى القسم لو ما راقوا من نقتهم البقت زى صوت الركشات دى الا ادخلم ليك كلهم محل بعرفوه براهم . . وثبه ياخ كيف معاكم ؟
انا فترت من النضمى الكتير والجوطة الفى راسى من مرتين وجيش وشعب مكفيانى كمان عايزين تطلعوا لى انتو من الاصلاحيات حرامية ؟
انت قايلينى انا ملكى ولا شنو؟
هوى انا عسكرى وما بنفع معاى الا العساكر شغل الملكى النى ده انا حا اشوتو كلو فاهمين؟
الشعب ده اربعين مليون ما اهو قدامكم قاعد ياخد علقتو ويجوع جوعو ويموت موتو مافى واحد فيهم رفع راسو وقال بغم الا لمن قمتوا تتشاكلوا فى القروش حتن هم زهجوا . . وليهم حق . . فقعتوا مرارتنا بروفسير وشيخ وامام وحركات . . الله لا تريحكم كلكم خرخارين
بصراحة جعفر الصادق هو الوحيد الصادق فيكم لمن صرح بانو الوثيقة بتاعتى بتطابق مبادرة ابوهو وده صحيح لانو الاثنين عبارة عن ورقتين اى فور فاضيات !؟ مافيهن سطر واحد
انا وعلى القسم بديكم كم يوم كده ترجعوا كل القروش الشفطوها وتسلموها لى فى يدى والا تعرفوا شغلكم مع بكرى وخلى بالكم كلكم تم حظركم من السفر وحتى ال الله بيقدروا يهرب هسى مافى لوفتهانزا ولا كى ال ام تتحاموا بيها تطلعوا فى اى طيارة تانية بجيبوكم لى راجعين والبهرب ساهرون ناس اثيوبيا واريتريا برجعوه لى والبحاول بى مصر اهو حبيبنا السيسى استلم الامور هناك وبرضوا حيجيبكم لى راجعين . . سامعين يا النسايب يا جلابين المصايب انتو الاتنين بالذات . . قال امشى رئيس وانا حبيس . .
يمكن الرجوع لمقالى الذى نشر قبل الخطاب تحت عنوان ليك ياريس وانت بتحضر حطابك لتكتمل الفكرة ونتجنب التكرار
اللهم الطف بنا اجمعين
اكرم محمد زكى
|
|
 
|
|
|
|
اكرم محمد زكى
فيس بوك
تويتر
انستقرام
يوتيوب
بنتيريست