جاء استاذ عبدالقادر مدير المدرسة الاساسية، وجد فارس جالسا مستندا على سور المسيد يمسك بدفتر قديم يراجع فيه بعض الحسابات، وقد وضع بجانبه بعض الاوراق النقدية الممزقة : بتعمل ايه يا ولد؟ الناس تجي المسيد تصلي وانت جايي تسرق!
اسرق شنو، وفي حاجة يسرقوها هنا؟ الا اسرق لي زير! أنا فلّست، دة دفتر الدكان بتاعي القديم، عاوز اراجع الحسابات القديمة يمكن ألقى زول طالبه باقي قروش!
وهو داك كان دكان؟ دة كان شَرَك تصطاد بيه العذَبات! ود الخزين الكان شغال معاك في الدكان فترة، قال اصلا ما شاف قروش دخلت الدكان، الشغل بالدين، يجوا العذبات من سوق الأربعاء ياخدوا السكر والشاي بالدين والحساب يجمع بالليل في المريق!
جمع فارس دفاتره القديمة ووضعها بجانبه وقال:
انت لسة في التدريس يا استاذ عبد القادر من زمن كنت بتقيف بحمارك بحري المدرسة وتنادي: يا ولد دق الجرس، وتحرّك الطابور من فوق حمارك: صفا انتباه، صفا انتباه على الفصل دور، لو اتأخرت في السوق، دقوا الجرس وروحوا! انا ما فاهم ليه يعني ندق الجرس قبل نمشي ما دام المدرسة ما فيها مدرس غيرك وانت في السوق!
النظام يا ولد، لازم الاولاد يتعلموا النظام، حتى لو قامت حريقة في المدرسة، تدق الجرس بعدين تمرقوا رقبتكم!
جاء شيخ النور: سلامات يا استاذ عبد القادر، ثم جلس على الارض بجانبه وقال: المدرسة اخبارها شنو؟.
المدرسة حالها واقف، المغتربين وعدونا يرسلوا شوية قريشات ما وصلت، حكومة ناكل مما نقلع، ستة شهور ما دفعت مرتبات المعلّمين، السنة الفاتت مشيت قابلت شيخ عبداللطيف مدير المشروع، وافق يدينا الموية نزرع حوش المدرسة، زرعنا شوية فول قلنا ندعم بيها المدرسين والاولاد التعبانين نوفر ليهم وجبة فطور في المدرسة لأنّ الناس كلها تعبانة، والاولاد في فسحة الفطور بيقعدوا في المدرسة لأنّ البيوت ما فيها حاجة، زرعنا نحن المعلمين والاولاد ساعدونا، حظنا كعب، الفول ضربته العسلة ، رمينا شوال وشلنا شوال!
الحمدلله المرق حق التقاوي!
ناس مكتب التعليم قالوا لو دايرين كتب تدفعوا في الاول! ما عرفناه مكتب تعليم ولا سوق السبت! والاولاد مساكين، شيخ عبد الجليل الله يرحمه كان بيسافر الخرطوم، يمشي عمرة، يلقّط من الناس شوية قريشات على الاقل حق الكتب، بعد وفاته كل شئ إنتهى!
ضحك فارس وقال: ما في زول قدر ياخد مني تبرع الا شيخ عبد الجليل، قال لي محتاجين قروش نعمل صيانة للمدرسة يا تدفع لينا من القروش السرقتها من الحكومة، يا امشي اعمل ليك امر قبض لأنك سرقت مخزن المدرسة !
قبلها بايام كنت ماري قدام المدرسة، ناداني قال لي تعال ساعدني! زمان ناس المدرسة عارفنك في الامتحان شايل البخرات وكانوا بيخلوك عشان ظروفك، وعشان عارفنك البخرة ذاتها بتنقلها غلط! ساقني دخلني المخزن قال لي تعال ساعدني نطلّع كتب، وننظف المخزن، وكت طلعت من المخزن لقيته جاب ليه طشت غطي أثر أقدامي في الارض! قلت ليه عملت كدة ليه، قال يمكن نحتاج ليه! قلت ليه تحتاج ليه في شنو؟
قال لي انت حرامي وكمان لميت الكيزان! بقيت حرامي رسمي، حرامي بشريطين!واكيد يوم حتجي تسرق هنا، وحنحتاج الاتر دة! قالوا اي زول يجيه زيارة في البيت بعد يمرق بيغطي اتر قدمه، يقول يمكن يجينا يوم بالليل نكون عارفين اتره!
ضحك استاذ عبد القادر وقال: قبل سنوات جاني شيخ عبد الجليل وقال لي انا بقيت رئيس مجلس اباء المدرسة الابتدائية ودايرنك تجي تمسك المدرسة، المدير الجابته الحكومة شغال سبّابي، سمسار بهائم وحمير! المدرسة بقت زي الكارة، كل يوم جايب ليه حمار يا عجلة يا بقرة، واليوم كله يفاصل مع المشترين في حوش المدرسة! لو جاه زبون يطلع يخلّي الحصة، مرة قاعد معانا في المدرسة بعد وفاة زوجتي بسنين، أنا قلت داير اعرس لي مرة! قال لي: دايرها براها ولا بجناها!
أها وكت قال لي عاوزك تجي تمسك المدرسة، قلت ليه أنا زرت مدرستكم قبل ايام ، المدرسة قديمة وعرش الصالة قدّام الفصول آيل للسقوط، خطر على الاولاد، صلحوا المدرسة بعدين انا بجي!
قال لي أنت خايف على الاولاد ولا خايف على رقبتك؟ قلت ليه على الاتنين! قال لي طيب ما تجي تستلم المدرسة وتصلحها بنفسك، قلت ليه الاولاد أهلهم تعبانين وانا ما بعرف زول اقول ليه يساعدنا في منصرفات الصيانة، قال لي خلاص تعال معاي يوم السوق نمشي نلم التبرعات، انا ما كنت عارف انه هو بيطلّع حقه في الاول من التبرعات ولو فضل حاجة للمدرسة! أها مشيت وراه في السوق وانا شايل ورقة وقلم، وهو يقابض في التجّار ، تجّار القطّاعي الفراشة وكت شافوه جايي خلوا بضاعتهم في الارض وشردوا مرقوا رقبتهم! الحالة صعبة والناس تعبانة ، يخلصوا من ناس الضرائب يجوهم ناس الزكاة، قبل يخلصوا منهم يجيهم حاج عبد الجليل، قبل يخلصوا منه يجوهم العيال مطرودين من المدرسة عشان ما دفعوا حق الكتب ورسوم ما عارف شنو. وكت شفت الناس بتجري من قدامنا انا قلت يمكن ناس الجيش حايمين يلقّطوا الشباب للتجنيد الاجباري. لقيت شيخ عبد الجليل عنده كشة براه ما اقل من ناس الجيش! اها يقول للناس دة المدير الجديد جبناه بعد تعب، قال لو ما صلّحنا السقف بيخلي الشغل، والسقف خطر على اولادكم! اليقول ليه انا ما عرست ما عندي اولاد، واليمسك بطنه يقول عندي اسهال ويجري بالابريق، كلما ياخد من زول قروش يختها في جيبه انا كنت بوراه بسجّل المبلغ، في الاول ما كان ملاحظ، فجأة انتبه لقاني شغّال تسجيل، قال لي بنهرة: بتكتب في شنو!؟
قلت ليه دي المبالغ القاعد تلمها.
قال لي: صلي على النبي ياخينا، علي الطلاق قرش من القروش دي ما بتشوفه!
قلت ليه طيب نحن طالعين ليه؟
قال لي انت مش عاوز سقف المدرسة يتصلّح؟ قلت ليه أيوة
قال لي خلاص جيب الورقة دي وما ليك دخل بالقروش البلمها، بس خليك ماشي معاي!.
أها واصلت بوراه، الناس تجري واليقبضه يقلع القروش من عينه، كان نصيح ما شاء الله بعدين يده خفيفة، في ثانية يكون دخّل اليد في جيبك ومرق الفيها النصيب! بعد ايام جاب عمال فرتقوا السقف القديم فيه كمر ومواسير من النوع القديم التقيل الغالي، باع السقف القديم واشترى مواسير وزنك عملوا بيها السقف الجديد!
ضحك شيخ النور وقال: سوق فارس بينفع في موضوع التبرعات دي! ولو الناس جروا بيلحق يبجيبهم ولو ما دفعوا يدقهم!
قال شيخ عبد القادر: شيخ عبد الجليل كان بيقسم التبرعات مع المدرسة، لكن دة حيشيلها كلها!
قال شيخ النور: الاتر بتاعه مش محفوظ في المخزن! لو ما جاب القروش افتح ليه بلاغ ومية المية بيكون اصلا سارق حاجة
ضحك فارس وقال: الناس دي ما قعدت في الحلة الا بعد حاج عبد الجليل مات، الناس كانت اول ما تسمع صوت حماره، يجروا كلهم على الخلاء او يتدسوا في المريق لغاية يمشي، مرة عوض ود حاج حسين جاري لقى عمه العميان، عبد الرحيم جاري على المريق قال ليه يا عمي اجرى في الاتجاه التاني ، غشاه خلاه يجري على الاتجاه الجايي منه حاج عبد الجليل، أها الحاج أوقفه، وسأله مالك جاري يا عبد الرحيم اليشوفك جاري كدة بنمرة خمسة يقول عندك ستة عيون مش عميان! عبد الرحيم ما اتذكر صوته، قايله واحد من ناس الحلة الجنبنا، قال ليه: حاج عبد الجليل جنّنا، كرّهنا الحياة كل يوم جايي داير تبرعات، والكيزان ما خلو لينا حاجة نديها ليه!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد الملك
فيس بوك
تويتر
انستقرام
يوتيوب
بنتيريست