|
|
 الوطن كل يوم بضيق.. زاهر بخيت الفكى
|
..
نحن جينا..
جينا شايلين...
هم وطن ..وااااسع عريق..
ضاق علينا..
فيهوا فارقنا الرفيق..
انزوينا..
فى ركن قاصى وبعيد..
بلا صديق..
اهتدينا..
بعد تُهنا ضلينا الطريق..
جينا نبحث عن هوية..
بيها تتحل القضية..
القضية بقت عصية..
الوطن كل يوم بضيق..
أشركونا..
فى حوار ناضج عميق..
ما برانا..
الجميع واقف ورانا..
هيا نتحاور حقيقة..
شان وطن خارت قواهوا..
فات جنوبوا الغالى منوا..
شال أراضيهوا ومياهوا..
شال شباب ناضر جميل..
فيهوا كم سالت دماهوا..
شوفوا دارفور العريقة..
لا (جنينة) ولا حديقة..
دمروها..
صارت أكوام من تراب..
أشعلوها..
ما انطفت ..فيها الحريقة..
والحقيقة..
كل وطنا صبح يباب..
هيا نبحث عن طريقة..
بيها يكتمل الحوار..
نوقف الحرب اللعينة..
نحترم حق الجوار..
نشرك الكل فى حوارنا..
كل شبابنا..
نسمع آراء الكبار..
والصغار..
يلقوهوا بكرة..
وطن رائع جميل..
لا نزاع بيناتنا نحن..ولا دمار..
بلا أقنعة...
صحيفة الجريدة السودانية...
|
|
 
|
|
|
|
زاهر بخيت الفكى
فيس بوك
تويتر
انستقرام
يوتيوب
بنتيريست