|
|
 راس السنَّة
|
راس السنَّة
شعر عزمى أحمد خليل
تسأنى كيف راس السنة .. وأنا بى هنا
مليان شقا وشرقان ضنا
يا بختك إنت هناك سعيد .. متهنى بالعام الجديد
كلك فرح ودايب غنا .. وتسألنى كيف راس السنَّه
***
حليل بلدنا ويا حليل .. كل الجميلات والفرح
وبلدنا بى رغم الظروف .. القاسيه والهَّم الطفح
مافيش بلاداً تشبهها .. ولا غير سماها كنار صدح
كل حاجة ليها طعم هناك .. حتى الحزن زى الفرح
وحناننا ما زى كل حنان .. ولا ناسنا زى الناس هنا
وتسألنى كيف راس السنة
***
أنا لى زمن ما حضرته عيد .. فى وطنا ولاَّ فرحته يوم
يوماتى شايلنى الأسى .. ويدينى بعدو كمان هموم
الليل يمر زى حول هنا .. ألقاهو من أصحى وأقوم
وكتير ليالى تعدى بى .. من غير عيونى يجيها نوم
وأهو ديَّه حال كل زول غريب .. الرجعه ليهو تكون منى
وتسألنى كيف راس السنة
***
هنا لا فرح ولا عيد بيجى .. ولا بنعرف مروا كيف
كل الأماسى زى الصباح .. حتى الربيع زى كل صيف
من عُمرَنا بيمضى الزمن .. وأيامنا ماشه على خريف
وعيوننا جافاها النظر .. حتى القليب قرَّب يقيف
والشوق خلاص كمَّل دموعنا .. وأقدارنا مابيه تلمنا
وتسألنى كيف راس السنة
***
بالله كيف ناسنا الهناك .. طبعاً سعيدين فى الوطن
الفرحه ما فرحة فلوس .. الفرحه إحساس بالزمن
زى ما بقاسوا من الظروف .. أهو نحنا حاضنانا المحن
ومحنَّه فى بلدى العزيز .. فى الدنيا معدومة تمن
وظروفنا بكرة بتتعدل .. ومن تانى بيزورنا الهنا
وتسألنى كيف راس السنة
***
كل يوم يمر يا بلدى فيك .. إن شاء الله تقفزى للأمام
وربوعك الخضره الجميله .. بالخير يغطيها الغمام
والناس تعود زى ناس قبيل .. لا فتنة لا جفا لا خصام
وتعودى زى ما كنتى أول .. وسط الدول رمز السلام
ونجيهو سوداننا الزمان .. وعليهو ما نشيل همَّنا
وتسألنى كيف رأس السنة
واشنطن دى سي 2003-2004م
|
|
 
|
|
|
|
فيس بوك
تويتر
انستقرام
يوتيوب
بنتيريست