|
|
 يا جنوبيين دقيقة بالله الموضوع ما محتاج جر حبل/دندرا علي دندرا
|
دندرا علي دندرا
صرح الاخ الرئيس في ال BBC وقال اذا لم يحقق الجنوبيين في غضون الايام القادمة سلام ومصالحة شاملة فإن البلاد سوف تواجه اسواء مجاعة في تاريخها.. في زول بيقدر يقولينا تقديرات الرئيس غلط؟؟؟ كمان الكوليرا بداء هجوم مركز في جوبا ومفكر يطلع الولايات .. معه حق فإن المصائب لا تاتي فرادى.. طبعاً المصائب دايرة ليها رفيق درب زول يقدمها.
ده كله ما مشكلة.. المشكله الحقيقية أنا استمعت لتنوير اعضاء وفدنا لمفاوضات السلام مع المتمردين في اديس أبابا وعرفت من حديثهم ان قصة السلام ده فيه مباراة جر حبل طووووويل.. وفدنا الموقر داير يعمل فريق من الكجور والفنانين والسلاطين والشباب وناس المجتمع المدني والنسوان وأرباب المعاشات وهلمجر إسمهم ( (Stakeholderأصحاب الشأن يرافقوهم لمفاوضة المتمردين.. (حاجة عجيبة جداً)
يا حكومة وينو مبدأ تفويض السلطات بتاعك؟؟؟
يا حكومة ببساطة قولوا لناس الايقاد قدام الله مافي حاجة اسمه Stakeholder)) في دولة جنوب السودان لان الجنوبيين منذ نيفاشا فوضوا سلطاتهم للحركة الشعبية لتتحدث نيابة عنهم وتدير شؤون البلاد.. مش الجنوبيين بس حتي إخوانا النوبة والانقسنا وثقوا فيها وفوضوها لتتحدث بإسمهم.. الحركة الشعبية بدورها إختارت الرفيق سلفا كير ليكون رئيس للبلاد ومنحته سلطات بموجبه يستطيع عزل حاكم منتخب من قبل الشعب بدون الرجوع إليها.. تاني تقولوا لينا (Stakeholder)!! (Stakeholder) بتاع شنو!! دى جرجره ساكت وفتنة ولخبطة كيمان علشان الحقيقة تضيع هؤلاء الناس ليس لديهم دخل بهذا الموضوع ولا من قريب ولا بعيد؟؟ يا أهلنا كان في (أصحاب الشان) في الجنوب إنتو دورتوا الحرب ده كيف بدون علمهم.. وليه ما سألتوا منهم الاذن؟؟ إذا كان في (Stakeholder) في الدولة.. وفد المفاوضات ده كونتوا كيف؟؟ إذا كان في (أصحاب الشأن) في البلد... منو قال ليكم أجلوا الانتخابات التي حددها القانون بدون الرجوع الي اصحاب الشأن؟؟ من الذي فوضكم لتعقدوا أتفاقية سلام مع حركة كوبرا بقيادة الاخ ديفيد ياو ياو؟؟؟
بالله حكومة أصحاب الشأن الذين فوضكم للصلح مع ياو ياو.. يفوضكم الان للصلح مع رياك مشار ممكن!!!
يا حكومة... علشان خاطر الله شعب جنوب السودان فوضكم من أول يوم الحرب ان تبذلوا مجهوداتكم وتأتوا بالسلام بأسرع وقت ممكن حتي لا يضرب المجاعة جنوب السودان كما قال الاخ الرئيس.. وللتاريخ أنتم مسؤولين امام الله وامام شعب جنوب السودان الذي منحكم الثقة عن ما يحدث الان وعن أي كارثة تحدث بالبلاد لانكم حكومة.. وله انتو كمان تمردتوا علي طموحات شعب جنوب السودان وأماله في دولة مستقرة أمنة؟؟؟
الحقيقة التي يجب ان يعرفها اعضاء وفدنا المفاوض ان شعب جنوب السودان بسلامتهم اصبحوا معلمين يحملون شهادة خبرة في فن إدارة الازمات من كثرة الحروبات والمفاوضات والاتفاقيات التي عاشوا داخلها لدرجة انهم ألفوا فيها كتب (نقض العهود والمواثيق) تخيلو في التسعة سنة سلام القريب ده بس كم تمرد مر علي البلاد ( تانينق ودكتور لام أكول في ملكال.. جورج اطور وياو ياو في بور) حكايتنا حكاية.. إي إختلاف في الرأي يؤدي الي تمرد .. هذا يعني ان القدرة علي إدارة حوار بناء معدومة..حكاية عجيبة جداً.. حكاية دايرة دراسة وحل جزري
تنوير اعضاء وفدنا المفاوض بيقول ان السلام بعيد المنال ليس لان الاجندة التي طرحها الوسيط لا تتوافق مع مبادئ اطراف النزاع بل لان إرادة السلام الحقيقية لم تتوفر لدي طرفي النزاع.. كيف الكلام ده؟؟؟ معلوم في كل نزاعات العالم الحكومة هي التي تقود قاطرة السلام مع الذين تمردوا عليها..مثال لذلك السيد الرئيس عمر البشير شخصياً الذي طلب من دول الايقاد التوسط في عملية السلام في السودان.. وسطاء الايقاد ضموا دول الترويكا في الوساطة وطرحوا مبادئ الايقاد التي تتضمن تقرير المصير .. رفضتها حكومة السودان في البداية ثم قبلت به بعد سنتين.. يعني الحكومة هي رأس الديزل الذي يحرك قطار السلام وعندما لا تملك ارادة السلام ترسل ناس غاذي صلاح الدين رئيس وفد لافشال المفاوضات والحكومة بعد كده تقوم وتقعد متحججة بمليون حجة.. الاخ غاذي صلاح الدين إعترف بهذه الحقيقة مشكوراً.. وعندما أصبحت الحكومة بكامل ارادتها جاهزة للسلام قاد وفدها نائب الرئيس علي عثمان طه ليوقع بقلمه علي اتفاقية سلام تعزله شخصياً من نائب الرئيس البلاد.. شوفوا الكلام ده.. شوفوا ثمن السلام غالي كيف بقية القصة معروفة للجميع.
يا حركة يا شعبية الجنوبيين كلهم اعضاء فيك بدليل انهم تقيدوا بتعليمات قيادتك ونفذوا بالحرف الواحد اتفاقية السلام الشامل علي اكمل وجه .. أولاً صوتوا للرفيق سلفا كير ليكون نائب رئيس الجمهورية ورئيس الجنوب وفوضوا جميع قيادات الحركة من الصف الاول الي الاخير ليكونوا الحكومة (برلمانات ولائية وقومية).. ثم صوتوا لانفصال جنوب السودان ليصبحوا مواطنين درجة اولي في دولة يسودها السلام والاستقرار والرجاء كما قلتوا.. وظلوا منتظرين دولة المواطنة والرجاء لي يوم الليلة هم منتظرين وسيظلوا منتظرين ولن يغيروا رايهم. ولكن قيادات الحركة الشعبية باين عليهم نسوا وعدهم للشعب.. وهاهم لوحدهم (حكومة الحركة الشعبية ومتمردين الحركة الشعبية) دوروا حرب طاحن يكاد يعصف بالبلاد وهم وحدهم يعرفون سبب هذه الحرب.. ثم جلسوا في مفاوضات حولوه جر حبل بينهم يلفوا ويدوروا في حلقة مفرغة معتقدين ان الشعب لا يراهم .. هه وووين .. كان الحكومة.. وكان المتمردين قاعدين في فضايه ساكت... مكشوفين للشعب والعالم.
يا قيادة انتو علمتوا الناس انه الحركة الشعبية لتحرير السودان يعني تحرير الفرد من القبلية والجهوية والطائفية والكذب وتدريبه علي تحمل المسؤوليات.. والوجه الاخر للمسؤولية هي الحرية وقلتوا عضو الحركة الشعبية الفعال هو الذي يتحمل المسؤولية ويقول (بنت الفكي عذبة) .. الكلام ده انتو شغالين فيه لمدة واحد وعشرين سنة حرب تحرير وتوعية للمواطن ثم تسعة سنة سلام وتجهيز المواطن لدولة مستقلة .. تفتكروا شغل كبير ذي ده ما بيطور أفكار الشعب!!! أكيد في تغيير في تفكير الشعب... المفارقة العجيبة القيادة والشعب في شمال السودان يتحدثون اليوم عن السودان الجديد بفضلكم وانتو اصحاب النظرية وين!! ما معروف.. باين فات عليهم الموضوع ده.. معليش الشعب مقدر وعارف انه بريق السلطة بيزغلل العيون وبيعمي الابصار وبيشتت الفكر وبتجعل القادة ينسون مسؤولياتهم التي هي سلامة الوطن والمواطن بأي ثمن.. بس كنا فاكرين قيادات الحركة محصنين من الموضوع ده .. لكن ياهو ذي ده .. هم بشر وقدر بيكلموا مافي يوووووو.
السيد الرئيس السلام بيرفع راسك فوق ويريحه من الهموم
يا بنج أرجوك اسمع غناء جون كدوس (دور ين كوج يلاو نم) السلام بيريح راسك من الهم وبيعيدك للتاريخ .. انت الوحيد الكسبان في عملية السلام لانك سوف تفرح شعبك وتفرح معهم.. إشتري السلام وأدفع كل مكاسب الدنيا ثمناً له في النهاية انت الوحيد الكسبان.. وبيان بالعمل انت عملت سلام مع الاخ ديفيد ياوياو وكسبت شعب البيبور كلهم وأدخلت الفرح والسرور في قلب ناس ولاية جونقلي والجنوبيين كلهم وساعدت الجيش الشعبي من مهمة حرب الاخوان.. طبق نفس الشئ مع الاخ الدكتور رياك مشار وكفي الجنوبيين شر القتال والدمار والتخلف يعطيك العافية
عاش كفاح شعبنا البطل
|
|
 
|
|
|
|
دندرا علي دندرا
فيس بوك
تويتر
انستقرام
يوتيوب
بنتيريست