|
|
 مكالمة البشير مع جوزيه مورينيو/اكرم محمد زكى
|
تررررررررررررررن
الو . . سيد مورينيو
انا معاك عمر البشير
رد من الانسر ماشين
مرحباً : مورينيو كير
اذا اردت الفوز بالبريمير ليج اضغط واحد
اذا اردت الفوز باندية اوروبا اضغط اثنين
او هولد على اللاين كتير
بعد موسيقى طويلة فاتت
وفترة مرت زى دهور
جا المدرب وصوته مشهور . .
يس مورينيو : هات بسرعة . . من الاخير
سيد مورينيو احم احم
فى الحقيقه
انا رئيس بلدا كبير
رد مورينيو بلماضتو : اممم
تقصد انو الكان كبير
قولي ياخى من الاخير
كوتش عاوزين لينا خطه
تنجى من مازق عسير
انت عارف انو نحنا
قلنا بالاسلام نسير
بس حصل زى عطل فنى
فانزلقنا فى جوه خور
رد مورينيو بسخافة
قلتوا جوه الخور هو احسن
فيو ماااكل وفيو سرور
فيهو قتلتوا الشعب كلو
واندفن جوه القبور
حتى باقيهو البيحيا
تصلوا فى نار الهجير
يبقى منزوع الكرامة
لى ريجيم فاسد كتير
انتوا تشفطوا رحمة الله
ماسلم رزق الطيور
برشلونه يقيف امامكم
فتوا ميسي بعشرة جير
لو هو كان برغوث صغير
انتو اوبئة العصور
فتوا رونالدو بقذايفو
وانتو تقصفوا فى القرى
دون
احساس او شعور
اكنس امسح قش ورش
زى لعب بايرن ميونخ
فتوا هتلر فى الفجور
انو يا انتو وفهمكم
او على الدنيا الثبور
شفتوا كيف حولتوا امة
كانت اصلا تانى دور
لى امم افريقيا شالت
كاس مانديلا الهصور
اصبحت طيش الفساد
لا ذكاء لا علم و نور
تحتكم لو تخطو خطوة
ترجع الفين خلف دور
انتو يا مستر بشير
جبتوا ابليس الرزيرف
شكلو راح يستنى مور
خطتك قدامى هسع
هل قروشك كاشا حار؟
ايوه يا مورينو جاهزه
بعت ليك نص الديار
ولوتحب نديك كمان
خيل مسومة والبعير
والدهب بى نورو يبرق
لما تلمحوا
راح تطير
لا لا حول ليا احسن
فى حساب مورينيو . . سير
مع قصور فى جوه لندن
زى قصر ود الدقير
او ابو الجاز لو بيرضى
من بناياتو الكتار
واحدة او اتنين بيمشو
فى دبى جنب الغرير
ولو كده المتعافى يخصم
من تقاوى المليونير
ومهدى ابراهيم يحول
من سويسرا فيجر كبير
خطتك راح تبقى اكتف
راح تكونوا بالف خير
اولا
يستقيل كل العجايز
حتى والجقق الكبار
استقالة كل والى
او رئيس لجنة ووزير
واستقالة كل مساعد
الا ود المهدى غير
وحتى ود الميرغنى
مابجى السودان . . اخير
ياللا تملا الفاضى
دونكيز
او كما تعلم حمير
ديل اكيد راح يستميتوا
ويشغلوا الناس بى امور
وانتوا فى الاثناء دى تجروا
تمسحوا الميمورى الخطير
دمروا كل الوثائق والملفات والسطور
يبقى مافى دليل ادانة
لا كبيراً او صغير
ذاكرة شعبك ضعيفة
دى العليها بتعتمد
دى اللى بيها بتستجير
بس انبهك ااالبشير
انا ضمان ليك عندى ماااافى
ولما مارد شعبك يصحى
لا سمعتك
لا بعرفك
بس اكيد شعبك حيعرف
كيف حيصليكم سعير
الاكيد شعبك حيعرف
كيف حيصليكم سعير
توت توت توت توت توت توت توت توت
اردفها مورينيو بعدما قفل
الخط ب : ( باستردز ) . . اى والله
اللهم الطف بنا وارحمنا جميعا
اكرم محمد زكى
|
|
 
|
|
|
|
اكرم محمد زكى
فيس بوك
تويتر
انستقرام
يوتيوب
بنتيريست