|
|
 ليك ياريس . . وانت بتحضر خطابك/اكرم محمد زكى
|
احساس جميل ياريس . .
انوكل الدنيا والعالمين دى مستنين خطابك التاريخى . . مش كده ؟
المحللين والصحفيين كملوا امخاخهم وفضوا اقلامهم وفتروا من التحليل والتنبؤ
يا الله حيتنازل لبكرى؟
طيب لو بكرى وافق يحميهو ناس وداد وعبدالله البشير ديل يودوهم وين ؟
يا الله على عثمان خاف ورجع قروش التمكين؟
ولا بكرى لسه ما وصل معاهم مرحلة تحويلهم لبيوت الاشباح
طيب حيطلب من الصادق المهدى تشكيل حكومة وحدة وطنية مع الميرغنى ويقنعوا الترابى يشارك ؟
هو الترابى بلعب بى
الصادق ولا الصادق بيلعب بالترابى ولا ننتظر بت الميرغنى تتزوج ولد الصادق ويجيبوا لينا ملك محبوب ؟
ياالله يمكن عاوز يفصل دارفور؟
هى دارفور ما مفصولة ؟
يا الله يمكن عاوز يصالح مالك عقار ويمسكو منصب امين سر الرئيس لانو كل المناصب التانيه من نائب ومساعد ومستشار ملانه وممكن ياسر عرمان يمسكوهو سودانير ؟
ولا يا الله يمكن عاوز يمسك المؤتمر الوطنى لى وداد ونجمها لامع الايام دى عربيا ودوليا مش قالوا مايستبعدوا ترشيح امراة لرئاسة الجمهورية ؟
ولا ياربى حيسلمها للجيش ويخلص ؟
هو فضل عندنا جيش ؟
وغايتو ناسك
ناس المؤتمر الوطنى قضوا اليومين الفاتو ديل فى الحمامات ( الادبخنات يعنى) يتلووا ساكت
خايفين يفقدوا البتزا والهوت دوق
والسياسيين الباقين برضوا قضوا اليوم فى الحمام ( الدش يعنى) بيتجهزوا وكل واحد فيهم بيحلم بالبيتزا. . . او الهوت دوق . . او بيجهزوا فى
حزب السودانيين . . ا
طبعا انت بتضحك مبسوط لانو يمكن حتى خطابك زاتو ما جاهز لى هسع ولا عارف تكتب شنو
وزى كل مرة بتلفق براها
انت بس تقيف قدام الميكرفونات من كل وكالات وتلفزيونات العالم والفلاشات بتلمع والملايين المغلوبين على امرهم كلهم اذان صاغية لى مفاجاتك
وانت عارف انك لو حتى قلت نكته الجميع حيصفقوا ليك وبكره الجرائد والقنوات الفضائية تعمل ليك منها دعوة لى حوار عميق والمعارضة ترفضها وتطلب بى مشاركة
لكن صدقنى يا ريس
الملايين الانتو بتلعبوا بيهم ديل
بقوا جيعانين
كلهم وصلوا حد الموت
وياروح ما بعدك روح
اللهم الطف ببلادنا واهلنا اجمعين
اكرم محمد زكى
|
|
 
|
|
|
|
اكرم محمد زكى
فيس بوك
تويتر
انستقرام
يوتيوب
بنتيريست