|
|
 كشف الحساب ..!! (قصيدة) للدكتور محمود شعراني
|
عشان ما نسمع الأخبار ونتنّور بتقطعوا مِننا التيار وإنتو منورين والعّين دياركُم باقة بالأنوار..
قطعتو الموية رويانين .. ونِّحن حلقنا ولع نار ..
ختفتو اللُقمة من أطفالنا ليل ونهار ..
خزنتو من الضرائب مال وشلتو زكاتنا للتجار .. مساكين الله ما شبعوا تشيلو الصدقة للفجار !!
ومسئولين بياكلوا الدنيا باسم الدين .. ولما نثور يقولوا علينا ناس كفار !!
قرارنا تقولوا حررتو .. وليكم ما أستقل قرار
وقلتو أكلنا من إيدنا .. وزرعكم ما بغيظ كفار ..
شريتو دقيق طلع بايظ .. ملان بالسُوسة والحُجار ..
لبستو حرير طلع صيني ومُصنع خارج الأسوار..
لبستو الدين طلع ميني .. وكشف لي عورة الأفكار ..!!
صرافاتكم مرابية .. وكتلتو إتنين عشان دولار ..
وإنتو نصيركم الملا البشتم في صحابة كبار ..
منو البشتم زي الفاروق وذو النورين .. وأبو الصديق أبو الابرار..
منو البٍكذب ويقول مسلم وعايز يبقي للسودان مدرس دين وملا من الملالي كبار ..!!
ونحن كمان وحاة الله وكان ما العنجهية حرام .. نقول الدين دا سوداني ..
وما بنجيبه مستورد زي الركشة أو الكيماوي والدفار ..!!
نقول النُكتة حزنانين ونضحك من بلايا كتار ونرقص زي صقر جديان مجرح جوة في الأغوار ..
أهلنا بقولوا ساعة الجد حسابنا ولد ..
وعندالله الحساب إتنين : حساب أنثي بيعقبه ولد ..!!!
حساب الدنيا كلو نكد ويوم الآخرة باب الرحمة قد ينسد ..
تفكر بس رهيفة الشعب مقدودة وتخينتك إنت ما بتنقد .. !!!؟
حساب الدنيا عادنو وفارزنو وحساب الآخرة ما بنعد ..
الله يقول محال أظلم وإنتو طغيتو فتو الحد ..
وناس ماتت شبع والله وناس أرماقه ما بتنسد ..
الله مقدم اللقمة علي عبادتو ومافيش غيرو رازق حد ..
وإنتو تأخروا اللقمة وتشقلبوا في الكلام الجد ..!!
ولما نثور نقول جُعنا .. تقولوا علينا كفار جد ..
وقال: أبو ذر تشيل سيفك إذا جُوعتهَ لأنو الجوع أخو الكفار وهو المرتد !!!!
|
|
 
|
|
|
|
د. محمود شعراني
فيس بوك
تويتر
انستقرام
يوتيوب
بنتيريست